以賽亞書 第 31 章

1

(THR) Ū chai-ē ah, hiah-ê lo̍h-khì Ai-kı̍p kiû pang-chān--ê, in óa-khò bé; ia̍h óa-khò chhia, in-ūi i chōe; óa-khò bé-peng, in-ūi i kiông; chóng-sī bô ì-hiòng Í-sek-lia̍t ê Sèng--ê, ia̍h bô kiû Iâ-hô-hoa.

(BCL) 有災禍啊！許個落去埃及求幫助者，倚靠馬亦倚靠車，因為伊多，倚靠馬兵，因為伊強，總是無意向以色列的聖者，亦無求耶和華。

2

(THR) Iâ-hô-hoa kî-sı̍t ū tì-hūi, I beh kàng chai-ē, bô siu tò-tńg I ê ōe; beh khí-lâi kong-kek hiah ê pháiⁿ-lâng ê ke, koh kong-kek hiah-ê pang-chān lâng chòe pháiⁿ--ê.

(BCL) 耶和華其實有智慧；伊欲降災禍，無收倒轉伊的話，欲起來攻擊許個歹人的家，閣攻擊許個幫助人做歹者。

3

(THR) Ai-kı̍p lâng put-kò sī lâng, m̄-sī Siōng-tè; in ê bé put-kò sī bah, m̄-sī sîn; Iâ-hô-hoa chı̍t-ē chhun-chhiú, hit ê pang-chān lâng--ê beh tak--tio̍h, hit-ê siū pang-chān--ê beh po̍ah-tó, lóng saⁿ-kap bia̍t-bô.

(BCL) 埃及人不過是人，呣是上帝；的馬不過是肉，呣是神。耶和華一下伸手，彼個幫助人者欲觸著，彼個受幫助者欲跋倒，攏相及滅無。

4

(THR) In-ūi Iâ-hô-hoa tùi góa án-ni kóng, Chhin-chhiūⁿ sai kap sòe-chiah sai kò͘ i só͘ jiàu--tio̍h ê mı̍h, chiū hm̄-hm̄-háu, sui-jiân tiàu-chı̍p chōe-chōe bo̍k-chiá lâi kong-kek i, i lóng bô in-ūi in ê siaⁿ lâi kiaⁿ-hiâⁿ, ia̍h bô in-ūi in ê soan-hoa lâi khut-ho̍k; chhin-chhiūⁿ án-ni, bān-kun ê Iâ-hô-hoa beh lîm-kàu, kau-chiàn tī Sek-an soaⁿ kap i ê soaⁿ-niá.

(BCL) 因為耶和華對我按呢講：親像獅及細隻獅顧伊所抓著的物就噤噤哮，雖然召集多多牧者來攻擊伊，伊攏無因為的聲來驚惶，亦無因為的喧嘩來屈服。親像按呢，萬軍的耶和華欲臨到，交戰佇錫安山及伊的山嶺。

5

(THR) Chhin-chhiūⁿ chiáu thí-khui sı̍t, án-ni bān-kun ê Iâ-hô-hoa beh pó-hō͘ Iâ-lō͘-sat-léng; koh pó-hō͘ i, koh khan-kiù i, koh pôaⁿ-kè lâi kiù i.

(BCL) 親像鳥展開翅，按呢萬軍的耶和華欲保護耶路撒冷。閣保護伊閣牽救伊，閣過來救伊。

6

(THR) Í-sek-lia̍t ê kiáⁿ-sun ah, lín só͘ chhim-chhim pōe-ge̍k-ê, taⁿ tio̍h kui-ǹg I.

(BCL) 以色列的子孫啊，恁所深深悖逆的，今著歸向伊。

7

(THR) In-ūi kàu hit-jı̍t, ta̍k-lâng beh chiong i gûn ê ngó͘-siōng, kim ê ngó͘-siōng, chiū-sī lín ê chhiú só͘ chō, hām-lo̍h lín tī chōe--ê, lóng pàng-sak i.

(BCL) 因為到彼日，逐人欲將伊銀的偶像，金的偶像，就是恁的手所造、陷落恁佇罪者，攏放拺伊。

8

(THR) A-su̍t lâng beh sí tī to-ē, m̄-sī tùi-tī lâng, ia̍h m̄-sī pêng-siông lâng ê to beh bia̍t i; i beh tùi to ê bīn-chêng lâi tô-siám, i ê siàu-liân lâng beh chòe khó͘-kang.

(BCL) 亞述人欲死佇刀下，呣是對佇人；亦呣是平常人的刀欲滅伊。伊欲對刀的面前來逃閃；伊的少年人欲做苦工。

9

(THR) I ê chio̍h-pôaⁿ beh in-ūi kiaⁿ-hiâⁿ lâi bô--khì; i ê siú-léng beh in-ūi tōa-kî lâi kiaⁿ-hiâⁿ; che sī hit ê ū hé tī Sek-an, ū lô͘ tī Iâ-lō͘-sat-léng ê Iâ-hô-hoa kóng ê.

(BCL) 伊的石磐欲因為驚惶來無去；伊的首領欲因為大旗來驚惶。這是彼個有火佇錫安、有爐佇耶路撒冷的耶和華講的。

Bible Color Mark

• 台語漢字羅馬本
• 巴克禮全羅