以賽亞書 第 53 章

1

(THR) Lán só͘ thiaⁿ-kìⁿ-ê, ū chī-chūi sìn ah? Iâ-hô-hoa ê chhiú ǹg chī-chūi hián-bêng ah?

(BCL) 咱所聽見的，有是誰信啊？耶和華的手向是誰顯明啊？

2

(THR) In-ūi i tī I ê bīn-chêng seng-tióng chhin-chhiūⁿ chíⁿ-chíⁿ ê íⁿ, ia̍h chhin-chhiūⁿ kun hoat tī ta-tōe; i bô hó hêng-chōng bô ui-gî; lán khòaⁿ-kìⁿ i ia̍h bô hó hêng-iông, thang hō͘ lán him-bō͘ i.

(BCL) 因為伊佇伊的面前生長親像茈茈的芛，亦親像根發佇乾地。伊無好形狀無威儀；咱看見伊亦無好形容，通互咱欣慕伊。

3

(THR) I siū khòaⁿ-khin, hō͘ lâng pàng-sak, siū chōe-chōe khó͘-thàng, siông-siông tú-tio̍h iu-būn; i siū khòaⁿ-khin, chhin-chhiūⁿ hō͘ lâng ng-bīn m̄-khòaⁿ-ê chı̍t-iūⁿ; lán ia̍h bô chun-tiōng i.

(BCL) 伊受看輕，互人放拺；受多多苦痛，常常抵著憂悶。伊受看輕，親像互人掩面呣看的一樣；咱亦無尊重伊。

4

(THR) I sı̍t-chāi tam-tng lán ê iu-būn, pē lán ê khó͘-thàng; chóng-sī lán lia̍h-chòe i siū chek-ho̍at, hō͘ Siōng-tè phah, koh siū khó͘-chhó͘.

(BCL) 伊實在擔當咱的憂悶，背咱的苦痛；總是咱掠做伊受責罰，互上帝拍，閣受苦楚。

5

(THR) Nā-sī i ūi-tio̍h lán ê kè-sit siū siong, ūi-tio̍h lán ê chōe-kòa siū-hāi; i tam-tng hêng-ho̍at, lán tit-tio̍h pêng-an; i siū piⁿ-phah, lán tit-tio̍h i-hó.

(BCL) 若是伊為著咱的過失受傷，為著咱的罪過受害。伊擔當刑罰，咱得著平安；伊受鞭拍，咱得著醫好。

6

(THR) Lán lóng chhin-chhiūⁿ iûⁿ bê-lō͘; ta̍k-lâng kiâⁿ ka-kī ê phian-lō͘; Iâ-hô-hoa hō͘ lán chèng-lâng ê chōe lóng kui tī i sin-chiūⁿ.

(BCL) 咱攏親像羊迷路；逐人行家己的偏路；耶和華互咱眾人的罪攏歸佇伊身上。

7

(THR) I siū ap-pek tú-tio̍h kan-khó͘, iáu-kú bô khui-chhùi; i chhin-chhiūⁿ iûⁿ-á khan kàu siū-thâi ê tōe; koh chhin-chhiūⁿ iûⁿ tī chián-mn̂g ê lâng ê bīn-chêng bô chhut-siaⁿ, i ia̍h án-ni bô khui-chhùi.

(BCL) 伊受壓迫抵著艱苦，猶久無開嘴；伊親像羊仔牽到受的地，閣親像羊佇剪毛的人的面前無出聲，伊亦按呢無開嘴。

8

(THR) I tùi ap-pek kap sím-phòaⁿ siū chhú--khì; tī i ê sè-tāi, chī-chūi siūⁿ-tio̍h i tùi o̍ah-lâng ê tōe siū chián-tû? á-sī in-ūi Góa ê peh-sìⁿ ê chōe-kòa siū-phah ah?

(BCL) 伊對壓迫及審判，受取去，佇伊的世代，是誰想著伊對活人的地受剪除？抑是因為我的百姓的罪過受拍啊？

9

(THR) I sui-jiân bô kiâⁿ kiông-pō, chhùi iā bô ū khúi-chà, iáu-kú tī i ê sí kap pháiⁿ-lâng tâng-bōng, iā kap pù-lâng saⁿ-kap.

(BCL) 伊雖然無行強暴，嘴也無有詭詐，猶久佇伊的死及歹人同墓；也及富人相及。

10

(THR) Chóng-sī Iâ-hô-hoa hoaⁿ-hí sún-hāi i, hō͘ i siū khó͘-thàng; i ê o̍ah-miā chòe sio̍k-chōe ê chè, hit-sî i beh khòaⁿ-kìⁿ hō͘-è, koh ke-thiⁿ hè-siū, Iâ-hô-hoa só͘ hoaⁿ-hí ê sū beh tī i ê chhiú-tiong heng-thong.

(BCL) 總是耶和華歡喜損害伊，互伊受苦痛。伊的活命做贖罪的祭。彼時伊欲看見後裔，閣加添歲壽。耶和華所歡喜的事欲佇伊的手中亨通。

11

(THR) I beh khòaⁿ-kìⁿ pún-sin lô-khó͘ ê hāu-kó, chiū sim-móa ì-chiok; Góa gī ê lô͘-po̍k beh ēng i ê chai-bat hō͘ chōe-chōe lâng tit-tio̍h chheng-chòe-gī; iā i beh tam-tng in ê chōe-kòa.

(BCL) 伊欲看見本身勞苦的效果，就心滿意足。我義的奴僕欲用伊的知識互多多人得著稱做義；也伊欲擔當的罪過。

12

(THR) Só͘-í Góa beh hō͘ i kap chē kôaiⁿ-ūi--ê pun hūn-gia̍h, kap kiông-béng--ê pun só͘ chhiúⁿ ê mı̍h; in-ūi i pàng-sak sìⁿ-miā kàu-sí, i iā lia̍t tī chōe-hōan ê tiong-kan; chóng-sī i tam-tng chōe-chōe lâng ê chōe, koh thòe chōe-hōan kî-tó.

(BCL) 所以，我欲互伊及坐高位者分份額，及強猛者分所搶的物。因為伊放拺生命到死；伊也列佇罪犯的中間。總是伊擔當多多人的罪，閣替罪犯祈禱。

Bible Color Mark

• 台語漢字羅馬本
• 巴克禮全羅