以賽亞書 第 9 章

1

(THR) Chóng-sī hit-ê bat siū thòng-khó͘ ê tōe bô koh tiàm-tī o͘-àm. Chêng Siōng-tè hō͘ Se-pò͘-lûn kap Ná-hut-tha-lī ê tōe siū khòaⁿ-khin, āu-lâi chiū hō͘ iân-hái ê lō͘, Iok-tàn ê hô-gōa, gōa-pang ê Ka-lī-lī, tit-tio̍h êng-kng.

(BCL) 總是彼個曾受痛苦的地無閣踮佇黑暗。前上帝互西布倫及拿弗他利的地受看輕，後來就互沿海的路，約但的河外，外邦的加利利得著榮光。

2

(THR) Kiâⁿ tī o͘-àm-tiong ê peh-sìⁿ khòaⁿ-kìⁿ tōa-kng; khiā-khí tī sí-ìm ê tōe--ê, ū kng chiò in.

(BCL) 行佇黑暗中的百姓看見大光；徛起佇死蔭的地的有光照。

3

(THR) Lí hó͘ chit ê kok-bîn chōe-chōe , ia̍h ke-thiⁿ in ê hoaⁿ-hí; in tī Lí ê bīn-chêng hoaⁿ-hí, chhin-chhiūⁿ siu-koah ê hoaⁿ-hí, chhin-chhiūⁿ lâng pun só͘ chhiúⁿ ê mı̍h, hit-hō ê khòai-lo̍k.

(BCL) 你互此個國民多多，亦加添的歡喜；佇你的面前歡喜，親像收割的歡喜，親像人分所搶的物彼號的快樂。

4

(THR) In-ūi i só͘ pē tāng ê taⁿ, kap keng-thâu-téng ê kóaiⁿ, í-kı̍p ap-chè i--ê ê thûi, Lí lóng kā i at-chı̍h, chhin-chhiūⁿ tī Bí-tiân ê jı̍t chı̍t-iūⁿ.

(BCL) 因為伊所背重的軛，及肩頭頂的枴，以及壓制伊者的槌，你攏給伊遏折，親像佇米甸的日一樣。

5

(THR) In-ūi kau-chiàn-tiong chhēng-kah ê lâng ê kun-chong, kap kō tī huih-lāi ê saⁿ lóng beh siū sio, chòe hiâⁿ-hé ê chhâ.

(BCL) 因為交戰中穿甲的人的軍裝，及翱佇血內的衫，攏欲受燒，做燃火的柴。

6

(THR) In-ūi ū chı̍t ê eⁿ-á ūi lán lâi chhut--sì, ū chı̍t ê kiáⁿ siúⁿ-sù lán; i beh hū-tam kok-chèng, i ê miâ chheng-chòe Kî-biāu, Bô͘-sū, Chôan-lêng ê Siōng-tè, Éng-óan tī-teh ê Pē, Hô-pêng ê Jîn-kun.

(BCL) 因為有一個嬰仔為咱來出世；有一個子賞賜咱。伊欲負擔國政；伊的名稱做「奇妙謀士、全能的上帝、永遠佇的父、和平的人君」。

7

(THR) I ê kok-chèng kap pêng-an beh ke-thiⁿ bû-kiông-chīn, chiū-sī tī Tāi-pı̍t ê pó-chō kap i ê kok, beh ēng sím-phòaⁿ kong-gī lâi kiàn-lı̍p i, pó-hō͘ i, tùi taⁿ kàu éng-óan. Bān-kun ê Iâ-hô-hoa ê jia̍t-sim beh chiâⁿ chit ê sū.

(BCL) 伊的國政及平安欲加添無窮盡。就是佇大衛的寶座及伊的國，欲用審判公義來建立伊保護伊，對今到永遠。萬軍的耶和華的熱心欲成此個事。

8

(THR) Chú hoat-chhut chı̍t-kù-ōe hō͘ Ngá-kok ke, hit ê ōe ia̍h lîm-kàu Í-sek-lia̍t cho̍k.

(BCL) 主發出一句話互雅各家，彼個話亦臨到以色列族。

9

(THR) Chit ê chèng peh-sìⁿ, chiū-sī Í-hoat-liân kap khiā-khí tī Sat-má-lī-a--ê, lóng beh chai; in chiàu in kiau-ngō͘ chū-tōa ê sim kóng,

(BCL) 此個眾百姓，就是以法蓮及徛起佇撒瑪利亞者，攏欲知；照驕傲自大的心講：

10

(THR) Chng-phia̍h í-keng tó, góan beh phah-chio̍h lâi khí; sng-châi-chhiū í-keng chhò, góan beh ēng pek-hiuⁿ-chhiū lâi thòe-ōaⁿ.

(BCL) 磚甓已經倒，阮欲拍石來起；桑材樹已經剉，阮欲用柏香樹來替換。

11

(THR) Só͘-í Iâ-hô-hoa beh khí Lī-sìn ê tùi-te̍k lâi kong-kek i, ia̍h beh kek-tōng i ê tùi-te̍k;

(BCL) 所以，耶和華欲起利汛的對敵來攻擊伊，亦欲激動伊的對敵。

12

(THR) tang ū A-lân lâng, sai ū Hui-lī-sū lâng; in khui-chhùi thun-chia̍h Í-sek-lia̍t. Sui-jiân án-ni, Iâ-hô-hoa ê siū-khì iáu-bē siau, I ê chhiú iáu-kú chhun-teh.

(BCL) 東有亞蘭人，西有非利士人；開嘴吞食以色列。雖然按呢，耶和華的受氣猶未消；伊的手猶久伸。

13

(THR) Chit ê peh-sìⁿ iû-gôan bô kui-ǹg phah in ê Chú, ia̍h bô chhē bān-kun ê Iâ-hô-hoa.

(BCL) 此個百姓猶原無歸向拍的主，亦無尋萬軍的耶和華。

14

(THR) Só͘-í Iâ-hô-hoa tī chı̍t-jı̍t ê tiong-kan beh tùi Í-sek-lia̍t chām-tn̄g thâu kap bé, chang-chhiū-ki kap lô͘-úi.

(BCL) 所以，耶和華佇一日的中間，欲對以色列斬斷頭及尾，棕樹枝及蘆葦──

15

(THR) Lāu-tōa kap chun-kùi ê lâng chiū-sī thâu, ēng pe̍h-chha̍t-ōe kà-sī lâng ê sian-ti chiū-sī bé.

(BCL) 老大及尊貴的人就是頭，用白賊話教示人的先知就是尾。

16

(THR) In-ūi ín-chhōa chit ê peh-sìⁿ--ê, hō͘ in kiâⁿ chha-lō͘; hō͘ in ín-chhōa--ê lóng siū thun-bia̍t.

(BCL) 因為，引導此個百姓者互行差路；互引導者攏受吞滅。

17

(THR) Só͘-í Chú bô hoaⁿ-hí in ê siàu-liân lâng, ia̍h bô beh lîn-bín in ê ko͘-jî kóaⁿ-hū; in-ūi ta̍k-lâng sī siat-to̍k--ê, sī kiâⁿ-pháiⁿ--ê, koh ta̍k-lâng ê chhùi lóng sī kóng gōng-ōe. Sui-jiân án-ni, Iâ-hô-hoa ê siū-khì iáu-bē siau, I ê chhiú iû-gôan chhun--teh.

(BCL) 所以，主無歡喜的少年人，亦無欲憐憫的孤兒寡婦；因為，逐人是褻瀆者，是行歹者，閣逐人的嘴攏是講戇話。雖然按呢，耶和華的受氣猶未消；伊的手猶原伸。

18

(THR) In-ūi siâ-ok chhin-chhiūⁿ hé to̍h sio-bia̍t chhì-phè kap chı̍t-lê; koh to̍h tī ām-ām ê chhiū-nâ, chiâⁿ-chòe ian-thiāu, tńg-se̍h chhèng-chiūⁿ kôaiⁿ.

(BCL) 因為邪惡親像火，燒滅莿帕及蒺藜，閣佇艷艷的樹林，成做煙柱，轉踅淐上高。

19

(THR) In-ūi bān-kun ê Iâ-hô-hoa ê tōa siū-khì, tōe piàn-piàn siū-sio; peh-sìⁿ chiâⁿ-chòe hé-to̍h ê chhâ; hiaⁿ-tī bô saⁿ khó-lîn.

(BCL) 因為萬軍的耶和華的大受氣，地遍遍受燒，百姓成做火的柴；兄弟無相可憐。

20

(THR) Lâng chiàⁿ-pêng chhiúⁿ-the̍h, iû-gôan sī iau; tò-pêng thun-kā, iû-gôan bōe pá; ta̍k-lâng kā i ka-kī chhiú-kut ê bah.

(BCL) 人正旁搶提，猶原是枵，倒旁吞咬，猶原飽；逐人咬伊家己手骨的肉。

21

(THR) Má-ná-se kong Í-hoat-liân, Í-hoat-liân kong Má-ná-se; nn̄g cho̍k ha̍p kong Iû-tāi. Sui-jiân án-ni, Iâ-hô-hoa ê siū-khì iáu-bē siau, I ê chhiú iáu-kú chhun--teh.

(BCL) 瑪拿西攻以法蓮；以法蓮攻瑪拿西，二族合攻猶大。雖然按呢，耶和華的受氣猶未消；伊的手猶久伸。

Bible Color Mark

• 台語漢字羅馬本
• 巴克禮全羅