耶利米書 第 22 章

1

(THR) Iâ-hô-hoa án-ni kóng, Lí lo̍h-khì Iû-tāi ông ê kiong-lāi; tī-hia kóng chit ê ōe, kóng,

(BCL) 耶和華按呢講：「你落去猶大王的宮內，佇遐講此個話，講：

2

(THR) Chē Tāi-pı̍t pó-chō ê Iû-tāi ông ah, lí kap lí ê jîn-sîn í-kı̍p jı̍p chiah ê mn̂g ê peh-sìⁿ, lóng tio̍h thiaⁿ Iâ-hô-hoa ê ōe.

(BCL) 『坐大衛寶座的猶大王啊，你及你的人臣，以及入諸個門的百姓，攏著聽耶和華的話。

3

(THR) Iâ-hô-hoa án-ni kóng, Lín tio̍h kiâⁿ kong-pêng kap kong-gī, chín-kiù siū chhiúⁿ-to̍at--ê thoat-lī ap-chè lâng--ê ê chhiú; m̄-thang ēng kiông-pō khi-hū chhut-gōa lâng, kap ko͘-jî kóaⁿ-hū; tī chit ê só͘-chāi ia̍h m̄-thang lâu bô-chōe ê lâng ê huih.

(BCL) 耶和華按呢講：恁著行公平及公義，拯救受搶奪者脫離壓制人者的手，呣通用強暴欺負出外人及孤兒寡婦，佇此個所在亦呣通流無罪的人的血。

4

(THR) Lín nā jīn-chin kiâⁿ chit ê tāi-chì, chiū beh ū chē Tāi-pı̍t pó-chō ê ông, i kap i ê jîn-sîn peh-sìⁿ, he̍k-sī chē-chhia, he̍k-sī khiâ-bé, jı̍p chit ê chhù ê mn̂g.

(BCL) 恁若認真行此個代誌，就欲有坐大衛寶座的王伊及伊的人臣百姓，或是坐車，或是騎馬，入此個厝的門。

5

(THR) Lín nā m̄-thiaⁿ chiah ê ōe, Iâ-hô-hoa kóng, Góa kí pún-sin lâi chiù-chōa, chit keng chhù beh pìⁿ-chòe pha-hng.

(BCL) 恁若呣聽諸個話，耶和華講：我指本身來咒誓，此間厝欲變做拋荒。』

6

(THR) Iâ-hô-hoa lūn-kàu Iû-tāi ông ê ke án-ni kóng, Góa khòaⁿ lí chhin-chhiūⁿ Ki-lia̍t, chhin-chhiūⁿ Lī-pa-lùn ê bé-liu; chóng-sī Góa tek-khak hō͘ lí pìⁿ-chòe khòng-iá, chòe bô lâng khiā-khí ê siâⁿ.

(BCL) 耶和華論到猶大王的家按呢講：我看你親像基列，親像黎巴嫩的尾溜；總是我的確互你變做曠野，做無人徛起的城。

7

(THR) Góa beh pī-pān kiâⁿ húi-bia̍t ê lâng, ta̍k-ê kia̍h ke-si kong-kek lí; in beh chhò lí siōng-hó ê pek-hiuⁿ-chhiū, hiat-lo̍h hé.

(BCL) 我欲備辦行毀滅的人，逐個抬家私攻擊你；欲剉你上好的柏香樹，落火。

8

(THR) Chōe-chōe kok ê lâng beh keng-kè chit ê siâⁿ, ta̍k-ê saⁿ-kap kóng, Iâ-hô-hoa siáⁿ-sū án-ni khóan-thāi chit ê tōa siâⁿ ah?

(BCL) 「多多國的人欲經過此個城，逐個相及講：『耶和華啥事按呢款待此個大城啊？』

9

(THR) In beh ìn kóng, Sī in-ūi in khì-sak Iâ-hô-hoa in ê Siōng-tè ê iok, ho̍k-sāi kèng-pài pa̍t ê siōng-tè.

(BCL) 欲應講：『是因為棄拺耶和華──的上帝的約，服事敬拜別個上帝。』」

10

(THR) Bo̍h-tit ūi-tio̍h sí-lâng thî-khàu, bo̍h-tit ūi-tio̍h i pi-siong; tio̍h in-ūi siū chhian-sóa ê lâng tōa-tōa thî-khàu; in-ūi i bōe koh tò--lâi, ia̍h bōe koh kìⁿ-tio̍h i ê pún-kok.

(BCL) 莫得為著死人啼哭；莫得為著伊悲傷，著因為受遷徙的人大大啼哭；因為伊閣倒來，亦閣見著伊的本國。

11

(THR) In-ūi lūn-kàu Iû-tāi ông Iok-se-a ê kiáⁿ Sa-liông, sòa-chiap i ê lāu-pē Iok-se-a chòe ông, āu-lâi lī-khui chit ê só͘-chāi--ê, Iâ-hô-hoa ū án-ni kóng,

(BCL) 因為論到猶大王約西亞的子沙龍，續接伊的老父約西亞做王，後來離開此個所在者，耶和華有按呢講：

12

(THR) I tek-khak bô koh tò--lâi chia; chiū-sī beh sí tī hō͘ lâng lia̍h-khì ê tōe-hng, bô koh khòaⁿ-kìⁿ chit ê tōe-hng.

(BCL) 「伊的確無閣倒來遮，就是欲死佇互人掠去的地方，無閣看見此個地方。」

13

(THR) Hit ê ēng put-gī lâi khí chhù, ēng bô kong-tō lâi khí lâu; pe̍h-pe̍h kah lâng chòe i ê kang, bô hō͘ lâng kang-chîⁿ; hit lâng ū chai-ē ah.

(BCL) 彼個用不義來起厝、用無公道來起樓、白白教人做伊的工無互人工錢，彼人有災禍啊！

14

(THR) I kóng, Góa beh ūi pún-sin khí tōa-chhù, kap thong-hong ê lâu; ūi ka-kī khui tōa thang, ēng pek-hiuⁿ-chhâ chòe thian-lô-pán; ēng gûn-chu lâi iû.

(BCL) 伊講：我欲為本身起大厝，及通風的樓，為家己開大窗。用柏香柴做天花板，用銀朱來油。

15

(THR) Lí jia̍t-sim tī pek-hiuⁿ-chhâ ê kong-chok, chiū ōe chòe ông mah? Lí ê lāu-pē kiám m̄-sī ia̍h chia̍h, ia̍h lim, ia̍h kiâⁿ kong-pêng kap kong-gī mah? Hit-sî i tit-tio̍h hok-khì.

(BCL) 你熱心佇柏香柴的工作就會做王嗎？你的老父豈呣是亦食亦飲、亦行公平及公義嗎？

16

(THR) I pān-lí khùn-khó͘ kap sòng-hiong lâng ê àn-kiāⁿ, i chiū tit-tio̍h hok-khì; án-ni kiám m̄-sī bat Góa mah? che sī Iâ-hô-hoa kóng--ê.

(BCL) 彼時伊得著福氣。伊辦理困苦及喪鄉人的案件，伊就得著福氣。按呢豈呣是識我嗎？這是耶和華講的。

17

(THR) To̍k-to̍k lí ê ba̍k-chiu, lí ê sim, chù-ì tham-sim, lâu bô-chōe ê lâng ê huih, kiâⁿ ap-chè kap kiông-pō.

(BCL) 獨獨你的目睭、你的心注意貪心，流無罪的人的血，行壓制及強暴。

18

(THR) Só͘-í Iâ-hô-hoa lūn-kàu Iû-tāi ông Iok-se-a ê kiáⁿ, Iok-ngá-kèng, án-ni kóng, Lâng bô beh ūi-tio̍h i ai-siong, kóng, Ai-ah, góa ê hiaⁿ! á-sī, Ai--ah, góa ê tōa-chí! ia̍h bô in-ūi i ai-siong, kóng, Ai--ah, góa ê chú! á-sī, Ai--ah, i ê êng-kng!

(BCL) 所以，耶和華論到猶大王約西亞的子約雅敬按呢講：人無欲為著伊哀傷講：唉啊！我的兄；抑是，唉啊！我的大姊；亦無因為伊哀傷講：唉啊！我的主，抑是，唉啊！伊的榮光。

19

(THR) I beh hō͘ lâng tâi, chhin-chhiūⁿ tâi lû chı̍t-iūⁿ; beh thoa--chhut-khì, hiat tī Iâ-lō͘-sat-léng ê siâⁿ-gōa.

(BCL) 伊欲互人埋，親像埋驢一樣，欲拖出去佇耶路撒冷的城外。

20

(THR) Lí tio̍h chiūⁿ Lī-pa-lùn ai-khàu, tī Pa-san chhut-siaⁿ, tùi A-pa-lîm ai-khàu; in-ūi lí só͘ chhin-ài--ê lóng húi-bia̍t lah.

(BCL) 你著上黎巴嫩哀哭，佇巴珊出聲，對亞巴琳哀哭，因為你所親愛者攏毀滅啦。

21

(THR) Tng lí heng-thong ê sî, Góa chiū tùi lí kóng; lí kóng, Góa m̄ thiaⁿ; lí tùi siàu-liân í-lâi, lóng sī chit-khóan, m̄ thiaⁿ-thàn Góa ê ōe.

(BCL) 當你亨通的時，我就對你講；你講：我呣聽。你對少年以來攏是此款，呣聽趁我的話。

22

(THR) Lí ê bo̍k-chiá beh hō͘ hong chhe--khì; lí só͘ chhin-ài--ê beh hō͘ lâng lia̍h--khì; hit-sî lí tek-khak in-ūi lí it-chhè ê pháiⁿ lâi làu-khùi kiàn-siàu.

(BCL) 你的牧者欲互風吹去，你所親愛者欲互人掠去；彼時你的確因為你一切的歹來漏氣見誚。

23

(THR) Lí khiā-khí Lī-pa-lùn, choh siū tī pek-hiuⁿ-chhiū--ê, thòng-khó͘ lîm-kàu lí, thàng-thiàⁿ chhin-chhiūⁿ beh siⁿ-kiáⁿ ê hū-jîn-lâng; hit-sî lí ê khó-lîn kàu cháiⁿ-iūⁿ!

(BCL) 你徛起黎巴嫩，作巢佇柏香樹者，痛苦臨到你，痛疼親像欲生子的婦仁人，彼時你的可憐到怎樣！

24

(THR) Iâ-hô-hoa kóng, Góa kí Góa ê éng-o̍ah lâi chiù-chōa, sui-jiân Iû-tāi ông, Iok-ngá-kèng ê kiáⁿ Ko-nî-ngá, sī Góa chiàⁿ-chhiú kài-ìn ê chhiú-chí, ia̍h beh kā lí pak--khí-lâi.

(BCL) 耶和華講：「我指我的永活來咒誓，雖然猶大王約雅敬的子哥尼雅，是我正手蓋印的手指，亦欲給你剝起來，

25

(THR) Koh Góa beh chiong lí kau hō͘ siàu-siūⁿ lí ê sìⁿ-miā ê lâng ê chhiú; kap lí só͘ m̄-káⁿ kìⁿ i ê bīn ê lâng ê chhiú, chiū-sī Pa-pí-lûn ông Nî-pò͘-kah-nî-sat ê chhiú, kap Ka-le̍k-tí lâng ê chhiú.

(BCL) 閣我欲將你交互數想你的生命的人的手，及你所呣敢見伊的面的人的手，就是巴比倫王尼布甲尼撒的手及迦勒底人的手。

26

(THR) Góa ia̍h beh kóaⁿ lí, kap siⁿ lí ê lāu-bú, kàu pa̍t-kok, m̄-sī lín chhut-sì ê só͘-chāi; lín beh sí tī-hia.

(BCL) 我亦欲趕你及生你的老母到別國，呣是恁出世的所在；恁欲死佇遐，

27

(THR) Chóng-sī in ê sim chin ài tò--khì ê só͘-chāi bōe-tit-thang tò--khì.

(BCL) 總是的心真愛倒去的所在，得通倒去。」

28

(THR) Ko-nî-ngá chit-lâng sī siū khòaⁿ-khin, í-keng phòa ê hûi-khì mah? sī bô thang hoaⁿ-hí ê khì-kū mah? i kap i ê hō͘-è, siáⁿ-sū siū kóaⁿ, hiat tī in só͘ m̄ bat ê tōe ah?

(BCL) 哥尼雅此人是受看輕、已經破的磁器嗎？是無通歡喜的器具嗎？伊及伊的後裔啥事受趕，佇所呣識的地啊？

29

(THR) Tōe ah, tōe ah, tōe ah, tio̍h thiaⁿ Iâ-hô-hoa ê ōe;

(BCL) 地啊，地啊，地啊，著聽耶和華的話！

30

(THR) Iâ-hô-hoa án-ni kóng, Tio̍h kí chit-lâng bô kiáⁿ, it-seng bōe tit-tio̍h heng-thong--ê; in-ūi i ê hō͘-è ê tiong-kan, bô koh ū chı̍t-lâng tit-tio̍h heng-thong, ōe chē tī Tāi-pı̍t ê pó-chō, lâi tī-lí Iû-tāi.

(BCL) 耶和華按呢講：著指此人無子，一生得著享通者；因為伊的後裔的中間無閣有一人得著亨通，會坐佇大衛的寶座來治理猶大。

Bible Color Mark

• 台語漢字羅馬本
• 巴克禮全羅