耶利米書 第 4 章

1

(THR) Iâ-hô-hoa kóng, Í-sek-lia̍t ah, Lí nā khéng tò--lâi, chiū tò--lâi Góa chia; nā tùi Góa ê bīn-chêng tû--khì lí khó-ò͘ⁿ ê sū, ia̍h bô chhìn-chhái kiâⁿ;

(BCL) 耶和華講：以色列啊，你若肯倒來，就倒來我遮，若對我的面前除去你可惡的事，亦無凊彩行。

2

(THR) ia̍h chiàu sêng-sı̍t, kong-pêng, kong-gī, kí Iâ-hô-hoa ê éng-o̍ah lâi chiù-chōa; chiū lia̍t-kok beh tùi I lâi ka-kī kiû hok-khì; ia̍h beh in-ūi I lâi khoa-kháu.

(BCL) 亦照誠實、公平、公義，指耶和華的永活來咒誓；就列國欲對伊來家己求福氣，亦欲因為伊來誇口。

3

(THR) Iâ-hô-hoa tùi Iû-tāi lâng kap Iâ-lō͘-sat-léng án-ni kóng, Tio̍h khai-khún lín ê thó͘-tōe, bo̍h-tit iā-chéng tī chhì-phè-lāi.

(BCL) 耶和華對猶大人及耶路撒冷按呢講：著開墾恁的土地，莫得撒種佇莿帕內。

4

(THR) Iû-tāi lâng kap Iâ-lō͘-sat-léng khiā-khí ê peh-sìⁿ ah, lín tio̍h kā pún-sin kiâⁿ kat-lé, kui tī Iâ-hô-hoa; tû--khì sim-lāi ê su-io̍k; kiaⁿ-liáu Góa ê siū-khì, in-ūi lín só͘-kiâⁿ ê pháiⁿ, lâi hoat-choh; chhin-chhiūⁿ hé to̍h--khí-lâi, sīm-chì bô lâng ōe phah-hoa.

(BCL) 猶大人及耶路撒冷徛起的百姓啊，恁著給本身行割禮，歸佇耶和華，除去心內的私慾；驚了我的受氣因為恁所行的歹來發作，親像火起來，甚至無人會拍熄！

5

(THR) Lín tio̍h thôan tī Iû-tāi, pò tī Iâ-lō͘-sat-léng, kóng, Lín tio̍h tī kok-lāi pûn sàu-kak, tōa-siaⁿ kiò kóng, Lín tio̍h chū-chı̍p, lán thang chìn-jı̍p kian-kò͘ ê siâⁿ.

(BCL) 恁著傳佇猶大，報佇耶路撒冷講：恁著佇國內歕哨角，大聲叫講：恁著聚集！咱通進入堅固的城！

6

(THR) Eng-kai ǹg Sek-an khiā tōa-kî; tio̍h tô-cháu, m̄-thang thêng-kha; in-ūi Góa beh hō͘ chai-ē kap tōa ê húi-hōai tùi pak-hng lâi.

(BCL) 應該向錫安　大旗。著逃走，呣通停腳，因為我欲互災禍及大的毀壞對北方來。

7

(THR) Ū sai tùi ām ê chhiū-nâ-tiong chiūⁿ--lâi, húi-hōai lia̍t-kok--ê, i í-keng khí-sin, chhut i ê pún só͘-chāi; beh hō͘ lí ê tōe pha-hng, hō͘ lí ê siâⁿ hong-hòe, bô lâng khiā-khí.

(BCL) 有獅對艷的樹林中上來，毀壞列國的。伊已經起身出伊的本所在，欲互你的地拋荒，互你的城荒廢無人徛起。

8

(THR) Ūi-tio̍h án-ni, lín ê io tio̍h hâ môa-pò͘, tōa-siaⁿ thî-khàu; in-ūi Iâ-hô-hoa ê tōa siū-khì bô tùi lán o̍at-tò-tńg.

(BCL) 為著按呢，恁的腰著縖麻布，大聲啼哭，因為耶和華的大受氣無對咱越倒轉。

9

(THR) Iâ-hô-hoa kóng, kàu hit-jı̍t kun-ông ê sim, kùi-cho̍k ê sim, lóng beh siau-bia̍t; chè-si lóng beh chhiⁿ-kiaⁿ, sian-ti lóng beh gông-ngia̍h.

(BCL) 耶和華講：「到彼日，君王的心，貴族的心，攏欲消滅；祭司攏欲生驚，先知攏欲卬愕。」

10

(THR) Góa kóng, Ai--ah, Chú Iâ-hô-hoa ah, Lí chin-chiàⁿ sī tōa-tōa khi-phiàn chit ê peh-sìⁿ kap Iâ-lō͘-sat-léng; kā in kóng, Lín beh tit-tio̍h pêng-an, kî-sı̍t to-kiàm hāi-tio̍h in ê sìⁿ-miā.

(BCL) 我講：「唉啊！主耶和華啊，你真正是大大欺騙此個百姓及耶路撒冷，給講：『恁欲得著平安。』其實刀劍害著的生命。」

11

(THR) Hit-sî beh ū ōe tùi chit ê peh-sìⁿ kap Iâ-lō͘-sat-léng kóng, Beh ū jia̍t-jia̍t ê hong, tùi khòng-iá kng-khō-khō kôaiⁿ ê só͘-chāi, ǹg Góa ê chèng peh-sìⁿ chhe--lâi; m̄-sī beh pòa--i, ia̍h m̄-sī beh hō͘ i chheng-khì.

(BCL) 彼時，欲有話對此個百姓及耶路撒冷講：「欲有熱熱的風對曠野光裸裸高的所在向我的眾百姓吹來，呣是欲簸伊，亦呣是欲互伊清氣。

12

(THR) Beh ū koh-khah tōa ê hong, ūi-tio̍h Góa chhe--lâi; taⁿ Góa koh beh hoat-chhut phòaⁿ-sû lâi kong-kek in.

(BCL) 欲有閣卡大的風為著我吹來；今我閣欲發出判詞，來攻擊。」

13

(THR) Khòaⁿ ah, i beh chhin-chhiūⁿ hûn khí-lâi; i ê chiàn-chhia chhin-chhiūⁿ kńg-lê-hong, i ê bé pí eng-chiáu khah kín; ū chai-ē ah, in-ūi lán pāi-bô lah.

(BCL) 看啊，伊欲親像雲起來；伊的戰車親像捲螺風，伊的馬比鷹鳥卡緊。有災禍啊！因為咱敗無啦！

14

(THR) Iâ-lō͘-sat-léng ah, lí tio̍h sóe-chheng lí ê sim, lâi tû--khì pháiⁿ, hō͘ lí thang tit-tio̍h kiù; pháiⁿ liām-thâu chûn tī lí ê sim-lāi, beh kàu tī-sî ah?

(BCL) 耶路撒冷啊，你著洗清你的心來除去歹，互你通得著救。歹念頭存佇你的心內欲到底時啊？

15

(THR) Ū siaⁿ tùi Tàn thôan-pò, tùi Í-hoat-liân soaⁿ pò chai-ē.

(BCL) 有聲對但傳報，對以法蓮山報災禍。

16

(THR) Lín tio̍h thôan hō͘ lia̍t-kok, pò-kò kong-kek Iâ-lō͘-sat-léng ê tāi-chì, kóng, Ū ûi-khùn siâⁿ--ê, tùi hn̄g-hn̄g ê só͘-chāi lâi; chhut in ê siaⁿ, kong-kek Iû-tāi chiah ê siâⁿ.

(BCL) 恁著傳互列國，報告攻擊耶路撒冷的代誌講：有圍困城者對遠遠的所在來，出的聲攻擊猶大諸個城。

17

(THR) In chiu-ûi kong-kek i chhin-chhiūⁿ kò͘-hn̂g ê lâng; in-ūi i pōe-pōan Góa; che sī Iâ-hô-hoa kóng--ê.

(BCL) 周圍攻擊伊，親像顧園的人，因為伊背叛我。這是耶和華講的。

18

(THR) Lí ê só͘-kiâⁿ, lí ê só͘-chòe, tì-kàu lí ū chiah ê sū; che sī lí ê chōe-ok, sı̍t-chāi sī khó͘, sī hāi kàu lí ê sim.

(BCL) 你的所行，你的所做，致到你有諸個事；這是你的罪惡，實在是苦，是害到你的心！

19

(THR) góa ê chōng-hú ah, góa ê chōng-hú ah, góa ê sim thàng-thiàⁿ, góa ê sim tī góa ê lāi-bīn peh-pak, góa bōe-ōe chēng-chēng bô kóng-ōe; in-ūi góa í-keng thiaⁿ-kìⁿ sàu-kak ê siaⁿ, kau-chiàn ê hoah-hiàm.

(BCL) 我的臟腑啊，我的臟腑啊，我的心痛疼！我的心佇我的內面迫腹。我會靜靜無講話，因為我已經聽見哨角的聲，交戰的喝喊。

20

(THR) Lâng teh pò húi-hōai, koh húi-hōai; in-ūi chôan-tōe pāi-hōai, góa ê pò͘-pîⁿ hut-jiân pāi-hōai, góa ê tiùⁿ-ûi tiap-á-kú phòa-lı̍h.

(BCL) 人報毀壞，閣毀壞，因為全地敗壞。我的布棚忽然敗壞；我的帳帷霎仔久破裂。

21

(THR) Góa khòaⁿ-kìⁿ tōa-kî, thiaⁿ-kìⁿ sàu-kak ê siaⁿ; beh kàu jōa-kú ah?

(BCL) 我看見大旗，聽見哨角的聲，欲到偌久啊？

22

(THR) Góa ê peh-sìⁿ gû-gōng, m̄-bat Góa; in sī gû-gōng bô chhang-miâ ê kiáⁿ; kiâⁿ-pháiⁿ chiū gâu, kiâⁿ-hó chiū ham-bān.

(BCL) 我的百姓愚戇，呣識我；是愚戇無聰明的子；行歹就，行好就頇顢。

23

(THR) Sian-ti kóng, Góa khòaⁿ tōe, khòaⁿ ah, tōe sī khang-khang hūn-tūn; góa khòaⁿ thiⁿ, thiⁿ ia̍h bô kng.

(BCL) 先知講：我看地，看啊，地是空空混沌；我看天，天亦無光。

24

(THR) Góa khòaⁿ hiah ê tōa-soaⁿ, khòaⁿ ah, in lóng tín-tāng; sió-soaⁿ ia̍h lóng iô-lâi iô-khì.

(BCL) 我看許個大山，看啊，攏振動，小山亦攏搖來搖去。

25

(THR) Góa koh khòaⁿ, khòaⁿ ah, lóng bô lâng; khong-tiong ê pe-chiáu, ia̍h lóng pe-cháu.

(BCL) 我閣看，看啊，攏無人；空中的飛鳥亦攏飛走。

26

(THR) Góa koh khòaⁿ--i, khòaⁿ ah, pûi ê chhân pìⁿ-chòe pha-hng ê tōe; it-chhè ê siâⁿ tī Iâ-hô-hoa ê bīn-chêng, in-ūi I ê tōa siū-khì, lóng-chóng tó-hōai.

(BCL) 我閣看伊，看啊，肥的田變做拋荒的地；一切的城佇耶和華的面前，因為伊的大受氣攏總倒壞。

27

(THR) In-ūi Iâ-hô-hoa án-ni kóng, Chôan-tōe tek-khak pha-hng; chóng-sī Góa bô beh húi-bia̍t kàu-chīn.

(BCL) 因為耶和華按呢講：全地的確拋荒，總是我無欲毀滅到盡。

28

(THR) In-ūi án-ni tōe beh iu-būn, thiⁿ-téng iā beh o͘-àm; Góa í-keng kóng--i, í-keng tiāⁿ-tio̍h--i, tek-khak bô thè-hóe, iā bô o̍at-tńg ì-sù, m̄ chòe--i.

(BCL) 因為按呢，地欲憂悶，天頂也欲黑暗；我已經講伊，已經定著伊，的確無退悔，也無越轉意思呣做伊。

29

(THR) Ta̍k ê siâⁿ ê lâng in-ūi bé-peng kap siā-chìⁿ ê lâng ê hōa-hōa-háu, chiū lóng tô-cháu, chìn-jı̍p chhiū-nâ, pê-chiūⁿ chio̍h-pôaⁿ-téng; ta̍k ê siâⁿ tú-tio̍h khì-sak, bô lâng khiā-khí.

(BCL) 逐個城的人因為馬兵及射箭的人的嘩嘩哮，就攏逃走，進入樹林，爬上石磐頂；逐個城抵著棄拺，無人徛起。

30

(THR) Lí soe-pāi ê sî beh cháiⁿ-iūⁿ chòe? Sui-jiân chhēng chu-âng ê saⁿ, ēng kim-khì chng-thāⁿ, ēng sek-liāu ūi lí ê ba̍k-chiu, án-ni tián hó-khòaⁿ, sī khang-khang; lôan-ài lí--ê khòaⁿ-khin lí, sòa siàu-siūⁿ lí ê sìⁿ-miā.

(BCL) 你衰敗的時欲怎樣做？雖然穿朱紅的衫，用金器妝飾，用色料畫你的目睭，按呢展好看是空空！戀愛你者看輕你，續數想你的生命。

31

(THR) In-ūi góa thiaⁿ-kìⁿ siaⁿ chhin-chhiūⁿ siⁿ-kiáⁿ ê hū-jîn-lâng, chhin-chhiūⁿ siⁿ thâu-chiūⁿ-kiáⁿ ê kan-khó͘, chiū-sī Sek-an cha-bó͘-kiáⁿ ê siaⁿ, i chhóan tōa-khùi, thí-khui chhiú kóng, Góa ū chai-ē ah, in-ūi góa ê sîn-hûn ūi-tio̍h thâi-lâng-ê lâi hūn-khì.

(BCL) 因為我聽見聲，親像生子的婦仁人，親像生頭上子的艱苦，就是錫安查某子的聲；伊喘大氣，展開手，講：我有災禍啊！因為我的神魂為著人的來暈去。

Bible Color Mark

• 台語漢字羅馬本
• 巴克禮全羅