約翰福音 第 13 章

1

(THR) Pôaⁿ-kè-choeh chêng, Iâ-so͘ chai I lī-khui chit sè-kan kui tī Pē ê sî kàu, í-keng thiàⁿ tī sè-kan sio̍k I ê lâng, kàu bé ia̍h thiàⁿ in.

(BCL) 過節前，耶穌知伊離開此世間歸佇父的時到。已經疼佇世間屬伊的人，到尾亦疼。

2

(THR) . Chia̍h ê-hng tǹg ê sî, Mô͘-kúi í-keng chiong bōe Iâ-so͘ ê ì-sù hē tī Ka-lio̍k lâng Se-bûn ê kiáⁿ Iû-tāi ê sim;

(BCL) 食下昏頓的時，魔鬼已經將賣耶穌的意思下佇加略人西門的子猶大的心。

3

(THR) . Iâ-so͘ chai Pē í-keng chiong bān mı̍h kau tī I ê chhiú, koh chai I tùi Siōng-tè chhut, ia̍h beh kui tī Siōng-tè,

(BCL) 耶穌知父已經將萬物交佇伊的手，閣知伊對上帝出，亦欲歸佇上帝，

4

(THR) . chiū lī-khui toh, thǹg saⁿ; the̍h kun ka-kī hâ.

(BCL) 就離開桌，褪衫，提巾家己縖，

5

(THR) . Tò chúi tī pôaⁿ-nı̍h, sóe ha̍k-seng ê kha, chiong só͘ hâ ê kun kā in chhit.

(BCL) 倒水佇盤裡，洗學生的腳，將所縖的巾給拭。

6

(THR) . Sóe kàu Se-bûn Pí-tek. Pí-tek kā I kóng, Chú ah, lí sóe góa ê kha mah?

(BCL) 洗到西門彼得，彼得給伊講：「主啊，你洗我的腳嗎？」

7

(THR) . Iâ-so͘ ìn i kóng, Góa só͘ chòe ê, lí hiān-kim m̄ chai, āu-lâi chiū ōe hiáu-tit.

(BCL) 耶穌應伊講：「我所做的，你現今呣知，後來就會曉得。」

8

(THR) . Pí-tek kóng, Lí éng-óan bô thang sóe góa ê kha. Iâ-so͘ ìn i kóng, Góa bô kā lí sóe, lí chiū kap góa bô kan-sia̍p.

(BCL) 彼得講：「你永遠無通洗我的腳！」耶穌應伊講：「我無給你洗，你就及我無干涉。」

9

(THR) . Se-bûn Pí-tek kā I kóng, Chú ah, m̄ nā góa ê kha, liân chhiú kap thâu-khak ia̍h tio̍h.

(BCL) 西門彼得給伊講：「主啊，呣若我的腳，連手及頭殼亦著。」

10

(THR) . Iâ-so͘ kā i kóng, Lâng sóe-e̍k liáu, chí-ū tio̍h sóe kha, chiū chiâu-chn̂g chheng-khì; lín chiah-ê sī chheng-khì, nā-sī bô ta̍k-ê án-ni.

(BCL) 耶穌給伊講：「人洗浴了，只有著洗腳，就齊全清氣。恁諸個是清氣，若是無逐個按呢。」

11

(THR) . In-ūi Iâ-so͘ chai bōe I ê lâng sī chī-chūi; só͘-í kóng, Lín bô ta̍k-ê chheng-khì.

(BCL) 因為耶穌知賣伊的人是是誰，所以講：「恁無逐個清氣。」

12

(THR) . Í-keng sóe in ê kha, chhēng saⁿ koh chē, chiū kā in kóng, Góa tùi lín só͘ ū kiâⁿ ê, lín chai mah?

(BCL) 已經洗的腳，穿衫，閣坐，就給講：「我對恁所有行的，恁知嗎？

13

(THR) . Lín chheng-ho͘ góa Sian-siⁿ ah, Chú ah; lín ê ōe tio̍h; góa sı̍t-chāi sī.

(BCL) 恁稱呼我先生啊，主啊，恁的話著，我實在是。

14

(THR) . Góa chòe Chú, chòe Sian-siⁿ, siōng-chhiáⁿ kā lín sóe kha, lín ia̍h tio̍h saⁿ-kāng sóe kha.

(BCL) 我做主，做先生，尚且給恁洗腳，恁亦著相共洗腳。

15

(THR) . In-ūi góa í-keng ēng bô͘-iūⁿ hō͘ lín, hō͘ lín chiàu góa só͘ tùi lín kiâⁿ ê lâi kiâⁿ.

(BCL) 因為我已經用模樣互恁，互恁照我所對恁行的來行。

16

(THR) . Góa sı̍t-sı̍t kā lín kóng, Lô͘-po̍k bô khah tōa i ê chú-lâng; hōng chhe ê bô khah tōa chhe i ê.

(BCL) 我實實給恁講，奴僕無卡大伊的主人，奉差的無卡大差伊的。

17

(THR) . Lín kì-jiân chai chiah ê sū, nā khì kiâⁿ i, chiū ū hok-khì.

(BCL) 恁既然知諸個事，若去行伊就有福氣。

18

(THR) . Góa m̄ sī chí lín chèng lâng lâi kóng; góa só͘ kéng ê, góa chai in; to̍k-to̍k beh hō͘ sèng-keng èng-giām, Chia̍h góa ê piáⁿ ê lâng kia̍h-khí kha-āu-tiⁿ that góa.

(BCL) 我呣是指恁眾人來講，我所揀的我知。獨獨欲互聖經應驗：『食我的餅的人抬起腳後踢我。』

19

(THR) . Taⁿ tāi-chì iáu-bē chiâⁿ, góa seng kā lín kóng; kàu tāi-chì chiâⁿ, hō͘ lín sìn góa chiū-sī I.

(BCL) 今代誌猶未成，我先給恁講，到代誌成，互恁信我就是伊。

20

(THR) . Góa sı̍t-sı̍t kā lín kóng, Chiap-la̍p góa só͘ chhe ê, chiū-sī chiap-la̍p góa, chiap-la̍p góa, chiū-sī chiap-la̍p chhe góa ê.

(BCL) 我實實給恁講，接納我所差的，就是接納我；接納我，就是接納差我的。」

21

(THR) . Iâ-so͘ kóng án-ni, sim-lāi tōa peh-pak, chiū kan-chèng kóng, Góa sı̍t-sı̍t kā lín kóng, lín tiong-kan chı̍t lâng beh bōe góa.

(BCL) 耶穌講按呢，心內大迫腹，就干證講：「我實實給恁講，恁中間一人欲賣我。」

22

(THR) . Ha̍k-seng saⁿ-khòaⁿ, siūⁿ m̄ chhut I sī kóng sím-mı̍h lâng.

(BCL) 學生相看，想呣出伊是講甚麼人。

23

(THR) . Ū chı̍t ê ha̍k-seng, chiū-sī Iâ-so͘ só͘ thiàⁿ ê, the kūn Iâ-so͘ ê heng-chêng.

(BCL) 有一個學生，就是耶穌所疼的，撐近耶穌的胸前。

24

(THR) . Se-bûn Pí-tek tìm thâu kā i kóng, Chhiáⁿ kā góan kóng, I só͘ kóng ê sī sím-mı̍h lâng.

(BCL) 西門彼得點頭給伊講：「請給阮講，伊所講的是甚麼人？」

25

(THR) . I chiū hiàⁿ sin óa Iâ-so͘ ê heng-khám, kā I kóng, Chú ah, sī chī-chūi?

(BCL) 伊就向身倚耶穌的胸坎，給伊講：「主啊，是是誰？」

26

(THR) . Iâ-so͘ chiū ìn kóng, Góa ùn chı̍t tè-á mı̍h hō͘ i, hit ê lâng chiū-sī. Sûi-sî ùn chı̍t tè-á, the̍h hō͘ Ka-lio̍k lâng Se-bûn ê kiáⁿ Iû-tāi.

(BCL) 耶穌就應講：「我搵一塊仔物互伊，彼個人就是。」隨時搵一塊仔，提互加略人西門的子猶大。

27

(THR) . I siū mı̍h liáu-āu, Sat-tàn chiū jı̍p i ê sim. Iâ-so͘ chiū kā i kóng, Lí só͘ chòe ê, kín-kín khì chòe.

(BCL) 伊受物了後，撒但就入伊的心。耶穌就給伊講：「你所做的，緊緊去做！」

28

(THR) . Tâng toh ê lâng, bô lâng chai ūi-tio̍h cháiⁿ-iūⁿ tùi i kóng chit-ê.

(BCL) 同桌的人無人知為著怎樣對伊講此個。

29

(THR) . In-ūi Iû-tāi kóan chîⁿ-tē, ū lâng phah-sǹg, káⁿ sī Iâ-so͘ kā i kóng, Lí khì bóe lán siú choeh só͘ khiàm-ēng ê; á-sī kah i khì chín-chè sòng-hiong lâng.

(BCL) 因為猶大管錢袋，有人拍算敢是耶穌給伊講：「你去買咱守節所欠用的」，抑是教伊去賑濟喪鄉人。

30

(THR) . Iû-tāi chih-tio̍h hit ê mı̍h, liâm-piⁿ chhut-khì; hit sî mî-sî.

(BCL) 猶大接著彼個物，連鞭出去。彼時暝時。

31

(THR) . Í-keng chhut-khì, Iâ-so͘ kóng, Taⁿ Jîn-chú tit-tio̍h êng-kng, Siōng-tè ia̍h tī I tit-tio̍h êng-kng;

(BCL) 已經出去，耶穌講：「今人子得著榮光，上帝亦佇伊得著榮光。

32

(THR) . koh Siōng-tè beh tī pún-sin êng-kng Jîn-chú, ia̍h beh liâm-piⁿ êng-kng I.

(BCL) 閣上帝欲佇本身榮光人子，亦欲連鞭榮光伊。

33

(THR) . Sòe-kiáⁿ ah, góa iáu ū tiap-á-kú kap lín tī-teh. Lín beh chhē góa; góa só͘ khì ê só͘-chāi, lín bōe-ōe kàu; góa bat kā Iû-thài lâng kóng, taⁿ ia̍h án-ni kā lín kóng.

(BCL) 細子啊，我猶有霎仔久及恁佇；恁欲尋我，我所去的所在恁會到。我曾給猶太人講，今亦按呢給恁講。

34

(THR) . Góa ēng sin ê kài-bēng hō͘ lín, chiū-sī lín tio̍h saⁿ-thiàⁿ; chhin-chhiūⁿ góa bat thiàⁿ lín, lín ia̍h tio̍h án-ni saⁿ-thiàⁿ.

(BCL) 我用新的誡命互恁，就是恁著相疼；親像我曾疼恁，恁亦著按呢相疼。

35

(THR) . Lín nā saⁿ-thiàⁿ, chèng lâng beh tùi án-ni chai lín sī góa ê ha̍k-seng.

(BCL) 恁若相疼，眾人欲對按呢知恁是我的學生。」

36

(THR) . Se-bûn Pí-tek kā I kóng, Chú ah, beh tá-lo̍h khì? Iâ-so͘ ìn i kóng, Góa só͘ khì ê só͘-chāi, lí hiān-sî bōe tè góa; āu-lâi beh tè góa.

(BCL) 西門彼得給伊講：「主啊，欲叨落去？」耶穌應伊講：「我所去的所在，你現時隨我，後來欲隨我。」

37

(THR) . Pí-tek kā I kóng, Chú ah, góa hiān-sî cháiⁿ-iūⁿ bōe tè lí ah? Góa beh ūi-tio̍h lí pàng-sak sìⁿ-miā.

(BCL) 彼得給伊講：「主啊，我現時怎樣隨你啊？我欲為著你放拺生命！」

38

(THR) . Iâ-so͘ ìn kóng, Lí beh ūi-tio̍h góa pàng-sak lí ê sìⁿ-miā mah? Góa sı̍t-sı̍t kā lí kóng, Koe iáu-bē thî, lí beh saⁿ pái m̄ jīn góa.

(BCL) 耶穌應講：「你欲為著我放拺你的生命嗎？我實實給你講，雞猶未啼，你欲三擺呣認我。」

Bible Color Mark

• 台語漢字羅馬本
• 巴克禮全羅