約書亞記 第 7 章

1

(THR) Chóng-sī Í-sek-lia̍t lâng tī eng-kai hiàn ê mı̍h ū hōan-chōe; in-ūi Iû-tāi ê chi-phài-tiong, Siā-la̍h ê cheng-sun, Sat-tí ê sun, Ka-bí ê kiáⁿ, A-kan the̍h eng-kai hiàn ê mı̍h; Iâ-hô-hoa chiū siū-khì Í-sek-lia̍t lâng.

(BCL) 總是以色列人佇應該獻的物有犯罪；因為猶大的支派中，謝拉的曾孫，撒底的孫，迦米的子亞干提應該獻的物；耶和華就受氣以色列人。

2

(THR) Iok-su-a tùi Iâ-lī-ko chhe lâng khì Pek-te̍k-lī tang-sì, óa-kūn Pek-a-bûn ê Ai siâⁿ, hoan-hù in kóng, Lín chiūⁿ-khì thau-khòaⁿ hit ê tōe; in chiū chiūⁿ-khì thau-khòaⁿ Ai ê siâⁿ.

(BCL) 約書亞對耶利哥差人去伯特利東勢、倚近伯亞文的艾城，吩咐講：「恁上去偷看彼個地。」就上去偷看艾的城。

3

(THR) In tò-lâi kàu Iok-su-a hia, kā i kóng, M̄-bián hō͘ chèng peh-sìⁿ chiūⁿ-khì; tāi-iok nn̄g-saⁿ chheng lâng chiūⁿ-khì phah Ai siâⁿ, chiū hó; m̄-bián lô-tōng chèng peh-sìⁿ khì kàu hia; in-ūi hia ê lâng chió-chió.

(BCL) 倒來到約書亞遐，給伊講：「呣免互眾百姓上去，大約二三千人上去拍艾城就好；呣免勞動眾百姓去到遐，因為遐的人少少。」

4

(THR) Tùi án-ni peh-sìⁿ-tiong iok-lio̍k saⁿ-chheng lâng chiūⁿ-khì hia; kéng-jiân tī Ai siâⁿ ê lâng ê bīn-chêng tô-cháu.

(BCL) 對按呢百姓中約略三千人上去遐，竟然佇艾城的人的面前逃走。

5

(THR) Ai siâⁿ ê lâng thâi-sí in iok-lio̍k saⁿ-cha̍p-la̍k lâng; in tùi siâⁿ-mn̂g-chêng tui-kóaⁿ in, kàu Sī-pa-lîm tī in lo̍h-kē ê só͘-chāi phah-sí in; chèng peh-sìⁿ chiū sit-táⁿ, lóan-jio̍k chhin-chhiūⁿ chúi.

(BCL) 艾城的人死約略三十六人，對城門前追趕，到示巴琳，佇落低的所在拍死；眾百姓就失膽，軟弱親像水。

6

(THR) Iok-su-a chiū thiah-lı̍h saⁿ; i kap Í-sek-lia̍t ê tiúⁿ-ló, tī Iâ-hô-hoa ê kūi-chêng, phak tī thô͘-kha, kàu ê-hng, iā ēng tîn-ai sám tī thâu-khak.

(BCL) 約書亞就拆裂衫；伊及以色列的長老佇耶和華的櫃前仆佇土腳，到下昏，也用塵埃摻佇頭殼。

7

(THR) Iok-su-a kóng, Ai-ah, Chú Iâ-hô-hoa ah, Lí siáⁿ-sū chhōa chiah ê peh-sìⁿ kè chit ê Iok-tàn, chiong góan kau tī A-mô͘-lī lâng ê chhiú, hō͘ góan bia̍t-bô ah? Khó-sioh góan bô lia̍h tiàm tī Iok-tàn hit-pêng chòe kàu-gia̍h.

(BCL) 約書亞講：「唉啊！主耶和華啊，你啥事導諸個百姓過此個約但，將阮交佇亞摩利人的手，互阮滅無啊？可惜阮無掠踮佇約但彼旁做夠額。

8

(THR) Chú ah, Í-sek-lia̍t lâng í-keng tī tùi-te̍k ê bīn-chêng o̍at-tńg-sin cháu, góa iáu-ū sím-mı̍h thang kóng ah?

(BCL) 主啊，以色列人已經佇對敵的面前越轉身走，我猶有甚麼通講啊？

9

(THR) In-ūi Ka-lâm lâng kap chit só͘-chāi it-chhè khiā-khí ê peh-sìⁿ thiaⁿ-kìⁿ, chiū beh ûi-khùn góan, tû-bia̍t góan ê miâ tī tōe-chiūⁿ; hit-sî Lí ūi-tio̍h Lí ê tōa-miâ beh cháiⁿ-iūⁿ ah?

(BCL) 因為迦南人及此所在一切徛起的百姓聽見就欲圍困阮，除滅阮的名佇地上。彼時你為著你的大名欲怎樣啊？」

10

(THR) Iâ-hô-hoa kā Iok-su-a kóng, Khí-lâi, lí siáⁿ-sū án-ni phak tī tōe-nı̍h ah?

(BCL) 耶和華給約書亞講：「起來！你啥事按呢仆佇地裡啊？

11

(THR) Í-sek-lia̍t hōan-chōe, ûi-pōe Góa só͘ bēng-lēng in ê iok, chhú eng-kai hiàn ê mı̍h, iā thau-the̍h, iā kiâⁿ khúi-chà, khǹg tī in ê ke-khì-tiong.

(BCL) 以色列犯罪，違背我所命令的約，取應該獻的物；也偷提，也行詭詐，囥佇的家器中。

12

(THR) In-ūi án-ni Í-sek-lia̍t lâng tī tùi-te̍k ê bīn-chêng khiā-bōe-tiâu; in tī tùi-te̍k ê bīn-chêng o̍at-tńg-sin cháu, sī in-ūi in chiâⁿ-chòe siū chiù-chó͘; lín nā bô chiong eng-kai hiàn ê mı̍h, tùi lín tiong-kan tû-khì, Góa chiū bô koh kap lín saⁿ-kap tī-teh.

(BCL) 因為按呢，以色列人佇對敵的面前徛住。佇對敵的面前越轉身走，是因為成做受咒詛；恁若無將應該獻的物對恁中間除去，我就無閣及恁相及佇。

13

(THR) Lí khí-lâi, hō͘ peh-sìⁿ chheng-khì, kā in kóng, Lín tio̍h ka-kī chheng-khì pī-pān bîn-á-jı̍t; in-ūi Iâ-hô-hoa Í-sek-lia̍t ê Siōng-tè án-ni kóng, Í-sek-lia̍t ah, lín iáu-bē kau-chhut hit ê mı̍h, chiū tī tùi-te̍k ê bīn-chêng lín beh khiā-bōe-tiâu.

(BCL) 你起來，互百姓清氣，給講：『恁著家己清氣，備辦明仔日，因為耶和華──以色列的上帝按呢講：以色列啊，恁猶未交出彼個物，就佇對敵的面前恁欲徛住！』

14

(THR) Bîn-á-chá-khí lín tio̍h chiàu lín ê chi-phài kūn-chêng lâi; Iâ-hô-hoa só͘ chhú ê chi-phài, tio̍h chiàu chong-cho̍k kūn-chêng lâi; Iâ-hô-hoa só͘ chhú ê chong-cho̍k, tio̍h chiàu ke-kòan kūn-chêng lâi; Iâ-hô-hoa só͘ chhú ê ke-kòan, tio̍h chiàu jîn-teng, chı̍t-ê chı̍t-ê kūn-chêng lâi.

(BCL) 明仔早起，恁著照恁的支派近前來；耶和華所取的支派，著照宗族近前來；耶和華所取的宗族，著照家眷近前來；耶和華所取的家眷，著照人丁，一個一個近前來。

15

(THR) Siū chhú-tio̍h ê lâng, ū eng-kai hiàn ê mı̍h tī i hia, i kap i só͘-ū-ê, tio̍h siū hé sio; in-ūi i ū pōe Iâ-hô-hoa ê iok, koh in-ūi i tī Í-sek-lia̍t tiong ū kiâⁿ gōng-gōng ê sū.

(BCL) 受取著的人有應該獻的物佇伊遐，伊及伊所有的著受火燒；因為伊有背耶和華的約，閣因為伊佇以色列中有行戇戇的事。」

16

(THR) Thiⁿ-kng, Iok-su-a chá-chá khí-lâi, hō͘ Í-sek-lia̍t lâng chiàu chi-phài kūn-chêng lâi; chhú-tio̍h-ê sī Iû-tāi chi-phài;

(BCL) 天光約書亞早早起來，互以色列人照支派近前來，取著的是猶大支派；

17

(THR) hō͘ Iû-tāi ê chong-cho̍k kūn-chêng-lâi, chiū chhú-tio̍h Siā-la̍h ê chong-cho̍k; hō͘ Siā-la̍h chong-cho̍k ê jîn-teng chı̍t-ê chı̍t-ê kūn-chêng lâi, chiū chhú-tio̍h Sat-tí;

(BCL) 互猶大的宗族近前來，就取著謝拉的宗族；互謝拉宗族的人丁，一個一個近前來，就取著撒底；

18

(THR) hō͘ i ê ke chiàu jîn-teng chı̍t-ê chı̍t-ê kūn-chêng lâi, chiū chhú-tio̍h Iû-tāi chi-phài ê lâng siā-la̍h ê cheng-sun, Sat-tí ê sun, Ka-bí ê kiáⁿ A-kan.

(BCL) 互伊的家照人丁，一個一個近前來，就取著猶大支派的人謝拉的曾孫，撒底的孫，迦米的子亞干。

19

(THR) Iok-su-a tùi A-kan kóng, Góa ê kiáⁿ, góa khǹg lí tio̍h kui êng-kng Iâ-hô-hoa Í-sek-lia̍t ê Siōng-tè, tī I ê bīn-chêng jīn-chōe, chiong lí só͘ chòe ê sū kā góa kóng, m̄-thang tùi góa ún-môa.

(BCL) 約書亞對亞干講：「我的子，我勸你著歸榮光耶和華──以色列的上帝，佇伊的面前認罪，將你所做的事給我講，呣通對我隱瞞。」

20

(THR) A-kan ìn Iok-su-a kóng, Góa sı̍t-chāi tek-chōe Iâ-hô-hoa Í-sek-lia̍t ê Siōng-tè; góa só͘ chòe ê sū sī án-ni, án-ni;

(BCL) 亞干應約書亞講：「我實在得罪耶和華──以色列的上帝。我所做的事是按呢按呢：

21

(THR) góa tī só͘ chhiúⁿ ê châi-bu̍t-tiong khòaⁿ-kìⁿ chı̍t-niá Sī-ná ê súi-saⁿ, gûn nn̄g-pah sià-khek-le̍k, kim chı̍t-tiāⁿ, tāng gō͘-cha̍p sià-khek-le̍k, góa tham chiah ê mı̍h, chiū the̍h i, taⁿ tâi tī góa ê pò͘-pîⁿ-lāi ê thô͘-kha-ē, gûn tī i ê ē-tóe.

(BCL) 我佇所搶的財物中看見一領示拿的娞衫，銀二百舍客勒，金一錠重五十舍客勒，我貪諸個物，就提伊。今埋佇我的布棚內的土腳下，銀佇伊的下底。」

22

(THR) Iok-su-a chiū chhe lâng khì, in chiū khì, kàu i ê pò͘-pîⁿ; khòaⁿ ah, hit ê mı̍h kó-jiân khǹg tī i ê pò͘-pîⁿ-lāi, gûn tī ē-tóe.

(BCL) 約書亞就差人去，就去到伊的布棚。看啊，彼個物果然囥佇伊的布棚內，銀佇下底。

23

(THR) In chiū tùi pò͘-pîⁿ-lāi the̍h-chhut-lâi, tòa kàu Iok-su-a kap Í-sek-lia̍t chèng-lâng hia, hē tī Iâ-hô-hoa ê bīn-chêng.

(BCL) 就對布棚內提出來，帶到約書亞及以色列眾人遐，下佇耶和華的面前。

24

(THR) Iok-su-a kap Í-sek-lia̍t chèng-lâng, chiong Siā-la̍h ê cheng-sun A-kan, kap hit ê gûn, hit kiāⁿ saⁿ, hit tiāⁿ kim, kap i ê kiáⁿ, cha-bó͘-kiáⁿ, gû, lû, iûⁿ, pò͘-pîⁿ, í-kı̍p i it-chhè só͘-ū-ê, lóng tòa kàu A-kat ê soaⁿ-kok.

(BCL) 約書亞及以色列眾人將謝拉的曾孫亞干及彼個銀、彼件衫、彼錠金，及伊的子查某子、牛、驢、羊、布棚，以及伊一切所有的，攏帶到亞割的山谷。

25

(THR) Iok-su-a kóng, Lí siáⁿ-sū hāi góan? kin-á-jı̍t Iâ-hô-hoa iā beh hāi lí. Tùi án-ni Í-sek-lia̍t chèng-lâng ēng chio̍h-thâu tìm-sí i; ēng hé sio in, chiong chio̍h-thâu tìm in.

(BCL) 約書亞講：「你啥事害阮？今仔日耶和華也欲害你。」對按呢以色列眾人用石頭擲死伊，用火燒，將石頭擲。

26

(THR) Chèng-lâng tī i ê téng-bīn thia̍p chı̍t tōa-tui ê chio̍h, kàu tī kin-á-jı̍t; tùi án-ni Iâ-hô-hoa siu-hôe I ê tōa siū-khì. Só͘-í hit só͘-chāi miâ-kiò A-kat ê soaⁿ-kok, kàu kin-á-jı̍t.

(BCL) 眾人佇伊的頂面疊一大堆的石，到佇今仔日。對按呢耶和華收回伊的大受氣。所以彼所在名叫亞割的山谷，到今仔日。

Bible Color Mark

• 台語漢字羅馬本
• 巴克禮全羅