士師記 第 19 章

1

(THR) Tng Í-sek-lia̍t bô ông ê sî, ū kià-kha tī Í-hoat-liân soaⁿ-tōe hit-pêng ê chı̍t ê Lī-bī lâng, chhōa chı̍t ê Iû-tāi Pek-lī-hêng ê cha-bó͘-gín-ná chòe sòe-î;

(BCL) 當以色列無王的時，有寄腳佇以法蓮山地彼旁的一個利未人，娶一個猶大伯利恆的查某囝仔做細姨。

2

(THR) sòe-î kiâⁿ-îm pōe i ê tiōng-hu, lī-khui i tò--khì Iû-tāi Pek-lī-hêng, kàu lāu-pē ê ke, tòa hia sì-ge̍h-jı̍t.

(BCL) 細姨行淫背伊的丈夫，離開伊倒去猶大伯利恆，到老父的家，住遐四月日。

3

(THR) I ê tiōng-hu khí-lâi, tòa chı̍t ê lô͘-po̍k nn̄g chiah lû khì jip i, beh ēng hó-ōe an-ùi i, chhōa i tò-lâi; i chiū chhōa i jı̍p lāu-pē ê chhù; hū-jîn-lâng ê lāu-pē khòaⁿ-kìⁿ, chiū hoan-gêng i.

(BCL) 伊的丈夫起來，帶一個奴僕、二隻驢去伊，欲用好話安慰伊導伊倒來。伊就導伊入老父的厝。婦仁人的老父看見，就歡迎伊。

4

(THR) I ê tiūⁿ-lâng, chiū-sī cha-bó͘-gín-ná ê lāu-pē, lâu i; i chiū kap i tòa saⁿ-jı̍t; in chiū saⁿ-kap lim-chia̍h, tiàm tī-hia.

(BCL) 伊的丈人，就是查某囝仔的老父，留伊，伊就及伊住三日。就相及飲食，踮佇遐。

5

(THR) Kàu tē-sì jı̍t, in thàu-chá khí-lâi, i beh khí-sin khì; cha-bó͘-gín-ná ê lāu-pē kā kiáⁿ-sài kóng, Chhiáⁿ lí chia̍h tām-po̍h piáⁿ chòe tiám-sim, āu-lâi chiah thang khí-sin kiâⁿ.

(BCL) 到第四日，透早起來伊欲起身去，查某囝仔的老父給子婿講：「請你食淡薄餅做點心，後來才通起身行。」

6

(THR) Nn̄g-lâng chiū chē--lo̍h-khì, saⁿ-kap lim-chia̍h; cha-bó͘-gín-ná ê lāu-pē tùi hit-lâng kóng, Chhiáⁿ lí hoaⁿ-hí koh tiàm chı̍t-mî, hō͘ lí ê sim khòai-lo̍k.

(BCL) 二人就坐落去相及飲食。查某囝仔的老父對彼人講：「請你歡喜閣踮一暝，互你的心快樂。」

7

(THR) Hit-lâng khí-lâi beh khí-sin, i ê tiūⁿ-lâng kiông-kiông lâu i; i chiū koh hioh chı̍t-mî.

(BCL) 彼人起來欲起身，伊的丈人強強留伊，伊就閣歇一暝。

8

(THR) Kàu tē-gō͘ jı̍t, i thàu-chá khí-lâi beh khí-sin; cha-bó͘-gín-ná ê lāu-pē kā i kóng, Chhiáⁿ lí koh tiám-sim, thèng-hāu kàu jı̍t chhiâ-sai; in nn̄g lâng chiū saⁿ-kap chia̍h.

(BCL) 到第五日，伊透早起來欲起身，查某囝仔的老父給伊講：「請你閣點心，聽候到日斜西。」二人就相及食。

9

(THR) Hit-lâng kap i ê sòe-î kap lô͘-po̍k khí-lâi beh khí kiâⁿ; i ê tiūⁿ-lâng, chiū-sī cha-bó͘-gín-ná ê lāu-pē, kā i kóng, Khòaⁿ ah, jı̍t beh àm, chhiáⁿ lí koh hioh chı̍t-mî, jı̍t beh lo̍h lah; lí tio̍h hioh chia, hō͘ lí ê sim khòai-lo̍k; bîn-á-jı̍t thàu-chá khí-sin tò--khì lín tau.

(BCL) 彼人及伊的細姨及奴僕起來欲起行，伊的丈人，就是查某囝仔的老父，給伊講：「看啊，日欲暗，請你閣歇一暝；日欲落啦，你著歇遮，互你的心快樂。明仔日透早起身倒去恁兜。」

10

(THR) Hit-lâng m̄-khéng koh hioh chı̍t-mî, chiū khí-lâi khí-sin, kàu Iâ-pò͘-su ê tùi-bīn, Iâ-pò͘-su chiū-sī Iâ-lō͘-sat-léng; nn̄g-chiah kòa-oaⁿ ê lû, í-kı̍p i ê sòe-î, kap i khì;

(BCL) 彼人呣肯閣歇一暝，就起來起身，到耶布斯的對面（耶布斯就是耶路撒冷。）二隻掛鞍的驢，以及伊的細姨及伊去。

11

(THR) kiâⁿ kūn Iâ-pò͘-su ê sî, jı̍t í-keng beh lo̍h; lô͘-po̍k kā chú-lâng kóng, Lâi ah, lán m̄-ta̍t-tio̍h oat-jı̍p Iâ-pò͘-su lâng chit ê siâⁿ, hioh-mî tī-hia.

(BCL) 行近耶布斯的時，日已經欲落，奴僕給主人講：「來啊，咱呣值著越入耶布斯人此個城歇暝佇遐。」

12

(THR) Chú-lâng kóng, Lán bô beh oat-jı̍p gōa-pang lâng ê siâⁿ, chiū-sī bô sio̍k Í-sek-lia̍t lâng ê; khah-hó lán tio̍h kè-lâi Ki-pí-a;

(BCL) 主人講：「咱無欲越入外邦人的城就是無屬以色列人的，卡好咱著過來基比亞」；

13

(THR) koh kā lô͘-po̍k kóng, Lâi, lán tio̍h khì chiah ê só͘-chāi ê chı̍t-ê, lâi hioh tī Ki-pí-a, á-sī La̍h-má.

(BCL) 閣給奴僕講：「來，咱著去諸個所在的一個，來歇佇基比亞，抑是拉瑪。」

14

(THR) In chiū chìn-chêng khì; chiong-kūn Piān-ngá-bín ê Ki-pí-a, jı̍t í-keng lo̍h.

(BCL) 就進前去。將近便雅憫的基比亞，日已經落；

15

(THR) In chiū oat-jı̍t-khì, beh hioh tī Ki-pí-a; chiū jı̍p-khì chē tī siâⁿ-lāi ê koe-lō͘; in-ūi bô lâng chiap-la̍p in jı̍p chhù hioh-mî.

(BCL) 就越入去欲歇佇基比亞，就入去坐佇城內的街路，因為無人接納入厝歇暝。

16

(THR) Jı̍t-àm ū chı̍t ê lāu-lâng tùi chhân--nih chòe-kang tò-lâi. I pún sī Í-hoat-liân soaⁿ-tōe ê lâng, kià-kha tī Ki-pí-a; chóng-sī hit só͘-chāi ê lâng sī Piān-ngá-bín lâng.

(BCL) 日暗，有一個老人對田裡做工倒來。伊本是以法蓮山地的人，寄腳佇基比亞；總是彼所在的人是便雅憫人。

17

(THR) Lāu-lâng kia̍h-ba̍k khòaⁿ-kìⁿ lâng-kheh tī siâⁿ-lāi ê koe-lō͘, chiū mn̄g i kóng, Lí tùi toh-lo̍h lâi? beh khì toh-lo̍h?

(BCL) 老人抬目看見人客佇城內的街路，就問伊講：「你對叨落來？欲去叨落？」

18

(THR) I ìn kóng, Góan tùi Iû-tāi Pek-lī-hêng lâi, beh khì Í-hoat-liân soaⁿ-tōe hit-pêng; góa pún tī-hia, kè--khì Iû-tāi Pek-lī-hêng; taⁿ góa khì Iâ-hô-hoa ê chhù; tī-chia bô lâng chiap-la̍p góa jı̍p i ê chhù;

(BCL) 伊應講：「阮對猶大伯利恆來，欲去以法蓮山地彼旁。我本佇遐，過去猶大伯利恆，今我去耶和華的厝，佇遮無人接納我入伊的厝。

19

(THR) chóng-sī góa ū chháu ū niû, thang hō͘ lû, iā ū piáⁿ ū chiú thang hō͘ pún-sin, kap lí ê lú-pī, kap tè lí ê lô͘-po̍k ê siàu-liân lâng, lóng bô khiàm chı̍t-hāng.

(BCL) 總是我有草有糧通互驢，也有餅有酒通互本身及你的女婢，及隨你的奴僕的少年人，攏無欠一項。」

20

(THR) Lāu-lâng kóng, Gōan lí pêng-an; lí só͘ khiàm-ēng-ê sī góa tāi; to̍k-to̍k lí m̄-thang tī koe-lō͘--nih kè-mî.

(BCL) 老人講：「願你平安！你所欠用的是我代，獨獨你呣通佇街路裡過暝。」

21

(THR) Tùi án-ni chhōa in kàu i ê chhù, chhī i ê lû; in chiū sóe-kha lim-chia̍h.

(BCL) 對按呢導到伊的厝，飼伊的驢，就洗腳飲食。

22

(THR) In ê sim tú teh khòai-lo̍k ê sî, siâⁿ-lāi hiah ê húi-lūi ûi-lûi i ê chhù, tı̍t-tı̍t phah-mn̂g, tùi chhù-chú lāu-lâng kóng, Lí chiong hit ê jı̍p lí ê chhù ê lâng tòa--chhut-lâi, góan beh kap i kau-ha̍p.

(BCL) 的心抵快樂的時，城內許個匪類圍纍伊的厝，直直拍門，對厝主老人講：「你將彼個入你的厝的人帶出來，阮欲及伊交合。」

23

(THR) Hit ê chhù-chú chhut-lâi in hia, kā in kóng, Góa ê hiaⁿ-tī ah, m̄-thang, bo̍h-tit chòe chit ê pháiⁿ; chit-lâng kì-jiân jı̍p góa ê chhù, lín chiū bo̍h--tit chòe chit ê kiàn-siàu ê sū.

(BCL) 彼個厝主出來遐給講：「我的兄弟啊，呣通，莫得做此個歹；此人既然入我的厝，恁就莫得做此個見誚的事。

24

(THR) Góa ū cha-bó͘-kiáⁿ, iáu sī chāi-sek-lú, koh ū i ê sòe-î; góa chhōa i chhut-lâi, lín thang lêng-jio̍k i, chhut-chāi lín ê ì-sù khóan-thāi in; to̍k-to̍k tùi chit-lâng lín m̄-thang kiâⁿ chit ê kiàn-siàu sū.

(BCL) 我有查某子，猶是在室女，閣有伊的細姨，我導伊出來恁通凌辱伊出在恁的意思款待，獨獨對此人恁呣通行此個見誚事。」

25

(THR) Chóng-sī hiah ê lâng m̄-thiaⁿ i ê ōe; hit-lâng chiū chiong i ê sòe-î khan chhut-khì gōa-bīn kau in; in chiū kap i kau-ha̍p, thong-mî lêng-jio̍k i; kàu chá-khí thiⁿ beh kng ê sî, chiah pàng i khì.

(BCL) 總是許個人呣聽伊的話。彼人就將伊的細姨牽出去外面交，就及伊交合，通暝凌辱伊，到早起天欲光的時，才放伊去。

26

(THR) Thiⁿ phú-kng ê sî, hū-jîn-lâng lâi kàu i ê chú-lâng só͘ hioh hit ê chhù mn̂g-kháu, chiū tó tī-hia, tı̍t-kàu thiⁿ-kng.

(BCL) 天昲光的時，婦仁人來到伊的主人所歇彼個厝門口，就倒佇遐，直到天光。

27

(THR) Thiⁿ-kng-chá i ê chú-lâng khí-lâi khui chhù ê mn̂g, chhut-khì beh khí-sin, khòaⁿ-kìⁿ hit ê hū-jîn-lâng, chiū-sī i ê sòe-î, tó tī chhù mn̂g-kháu, nn̄g ki chhiú khòa tī hō͘-tēng--nih;

(BCL) 天光早，伊的主人起來開厝的門，出去欲起身，看見彼個婦仁人就是伊的細姨倒佇厝門口，二支手靠佇戶椗裡；

28

(THR) chiū kā hū-jîn-lâng kóng, Khí-lâi, lán beh khí-sin; chóng-sī i bô ìn; i chiū kā i hû tī lû ê téng-bīn, khí-sin khì i ê pún só͘-chāi.

(BCL) 就給婦仁人講：「起來，咱欲起身！」總是伊無應。伊就給伊扶佇驢的頂面，起身去伊的本所在。

29

(THR) Kàu i ê chhù, chiū ēng to chiong i ê sòe-î ê sin-si kap kut koah chòe cha̍p-jī tè, chhe lâng the̍h-khì thong Í-sek-lia̍t ê chôan-kéng.

(BCL) 到伊的厝，就用刀將伊的細姨的身屍及骨割做十二塊，差人提去通以色列的全境。

30

(THR) Kìⁿ-nā khòaⁿ-kìⁿ ê lâng lóng kóng, Tùi Í-sek-lia̍t lâng chhut Ai-kı̍p ê jı̍t, tı̍t-kàu kin-á-jı̍t, bē-bat án-ni kiâⁿ, iā bô khòaⁿ-kìⁿ; taⁿ lín tio̍h siūⁿ, tio̍h chham-siông, jiân-āu chiah kóng.

(BCL) 見若看見的人攏講：「對以色列人出埃及的日，直到今仔日，未曾按呢行，也無看見。今恁著想，著參詳然後才講。」

Bible Color Mark

• 台語漢字羅馬本
• 巴克禮全羅