士師記 第 3 章

1

(THR) Iâ-hô-hoa só͘ lâu chiah ê cho̍k, sī beh ēng i lâi chhì-giām Í-sek-lia̍t lâng, chiū-sī hiah-ê m̄-bat kìⁿ-kè Ka-lâm kau-chiàn ê sū ê;

(BCL) 耶和華所留諸個族，是欲用伊來試驗以色列人就是許個呣曾見過迦南交戰的事的，

2

(THR) tiâu-tî beh hō͘ Í-sek-lia̍t āu-tāi ê lâng chai, lâi kà-sī in kau-chiàn, chiū-sī hiah-ê chêng só͘ bē bat keng-kè ê lâng.

(BCL) 刁持欲互以色列後代的人知來教示交戰，就是許個前所未曾經過的人。

3

(THR) Só͘ lâu--teh hiah ê cho̍k, chiū-sī Hui-lī-sū gō͘ ê siú-léng, kap it-chhè ê Ka-lâm lâng, Se-tùn lâng, kap khiā-khí Lī-pa-lùn soaⁿ ê Hi-bī lâng, tùi Pa-le̍k-hek-bûn soaⁿ, kàu Hap-má kháu;

(BCL) 所留許個族就是非利士五個首領及一切的迦南人、西頓人，及徛起黎巴嫩山的希未人，對巴力黑們山到哈馬口。

4

(THR) che chiū-sī beh ēng in lâi chhì-giām Í-sek-lia̍t lâng, khòaⁿ in khéng thiaⁿ-thàn Iâ-hô-hoa thok Mô͘-se só͘ bēng-lēng in lia̍t-chó͘ ê kài-bēng á-bô.

(BCL) 這就是欲用，來試驗以色列人，看肯聽趁耶和華託摩西所命令列祖的誡命抑無。

5

(THR) Tùi án-ni Í-sek-lia̍t lâng khiā-khí tī Ka-lâm lâng, Hek lâng, A-mô͘-lī lâng, Pí-lī-sé lâng, Hi-bī lâng, Iâ-pò͘-su lâng ê tiong-kan; chhōa in ê cha-bó͘-kiáⁿ chòe-bó͘; iā ēng cha-bó͘-kiáⁿ kè in ê kiáⁿ,

(BCL) 對按呢以色列人徛起佇迦南人、赫人、亞摩利人、比利洗人、希未人、耶布斯人的中間，

6

(THR) sòa ho̍k-sāi in hiah ê siōng-tè.

(BCL) 娶的查某子做某，也用查某子嫁的子，續服事許個上帝。

7

(THR) Í-sek-lia̍t lâng kiâⁿ Iâ-hô-hoa só͘ khòaⁿ-chòe pháiⁿ ê sū, bōe-kì-tit Iâ-hô-hoa in ê Siōng-tè, khì ho̍k-sāi chiah ê Pa-le̍k kap A-su-tha-lio̍k.

(BCL) 以色列人行耶和華所看做歹的事，記得耶和華──的上帝，去服事諸個巴力及亞舍拉，

8

(THR) Só͘-í Iâ-hô-hoa siū-khì Í-sek-lia̍t lâng, bōe in hō͘ Bí-só͘-pho-tāi-bí ông Kó͘-san-lī-sat-tiân ê chhiú; Í-sek-lia̍t lâng ho̍k-sāi Kó͘-san-lī-sat-tiân poeh nî.

(BCL) 所以耶和華受氣以色列人，賣互米所波大米王古珊利薩田的手。以色列人服事古珊利薩田八年。

9

(THR) Í-sek-lia̍t lâng kiû-kiò Iâ-hô-hoa ê sî, Iâ-hô-hoa chiū kā Í-sek-lia̍t lâng heng-khí chı̍t ê chín-kiù--ê kiù in; chiū-sī Ka-le̍k ê sió-tī Ki-la̍p-su ê kiáⁿ Gô-tô-liap.

(BCL) 以色列人求叫耶和華的時，耶和華就給以色列人興起一個拯救者救，就是迦勒的小弟基納斯的子俄陀聶。

10

(THR) Iâ-hô-hoa ê Sîn lîm-kàu i, i chiū chòe Í-sek-lia̍t ê sū-su, chhut-khì kau-chiàn. Iâ-hô-hoa chiong Bí-só͘-pho-tāi-bí ông Kó͘-san-lī-sat-tiân kau tī i ê chhiú, i chiū khah-iâⁿ Kó͘-san-lī-sat-tiân.

(BCL) 耶和華的神臨到伊，伊就做以色列的士師，出去交戰。耶和華將米所波大米王古珊利薩田交佇伊的手，伊就卡贏古珊利薩田。

11

(THR) Tùi án-ni hit ê tōe-hng thài-pêng sì-cha̍p nî. Ki-la̍p-su ê kiáⁿ Gô-tô-liap sí.

(BCL) 對按呢彼個地方太平四十年。基納斯的子俄陀聶死。

12

(THR) Í-sek-lia̍t lâng koh kiâⁿ Iâ-hô-hoa só͘ khòaⁿ-chòe pháiⁿ ê sū; Iâ-hô-hoa chiū hō͘ Mô͘-ap ông I-ki-lûn kiông-sēng, kong-kek Í-sek-lia̍t lâng; in-ūi in kiâⁿ Iâ-hô-hoa só͘ khòaⁿ-chòe pháiⁿ-ê.

(BCL) 以色列人閣行耶和華所看做歹的事，耶和華就互摩押王伊磯倫強盛，攻擊以色列人，因為行耶和華所看做歹的。

13

(THR) I-ki-lûn chū-chı̍p A-bûn lâng kap A-má-le̍k lâng óa i, khì phah Í-sek-lia̍t lâng, chiàm chó-chhiū ê siâⁿ.

(BCL) 伊磯倫聚集亞捫人及亞瑪力人倚伊，去拍以色列人，佔棗樹的城。

14

(THR) Tùi án-ni Í-sek-lia̍t lâng ho̍k-sāi Mô͘-ap ông I-ki-lûn cha̍p-poeh nî.

(BCL) 對按呢以色列人服事摩押王伊磯倫十八年。

15

(THR) Í-sek-lia̍t lâng kiû-kiò Iâ-hô-hoa ê sî, Iâ-hô-hoa chiū kā in heng-khí chı̍t ê chín-kiù--ê; chiū-sī Piān-ngá-bín lâng Ki-la̍h ê kiáⁿ Í-hut; i sī kòan-liān ēng tò-chhiú-ê; Í-sek-lia̍t lâng thok-tiōng i sàng lé-mı̍h hō͘ Mô͘-ap ông I-ki-lûn.

(BCL) 以色列人求叫耶和華的時，耶和華就給興起一個拯救者，就是便雅憫人基拉的子以笏；伊是慣練用倒手的。以色列人託仗伊送禮物互摩押王伊磯倫。

16

(THR) Í-hut ūi ka-kī phah chı̍t-ki siang-bīn lāi ê kiàm, tn̂g chı̍t-tiú, pa̍k tī chiàⁿ-thúi i-ho̍k ê lāi-bīn.

(BCL) 以笏為家己拍一支雙面利的劍，長一肘，縛佇正腿衣服的內面。

17

(THR) I ēng lé-mı̍h hiàn-hō͘ Mô͘-ap ông I-ki-lûn; I-ki-lûn sī chin pûi ê lâng.

(BCL) 伊用禮物獻互摩押王伊磯倫（伊磯倫是真肥的人）；

18

(THR) Hiàn lé-mı̍h í-keng bêng-pe̍k, chiū chhe tòa lé-mı̍h ê lâng lóng khì.

(BCL) 獻禮物已經明白，就差帶禮物的人攏去，

19

(THR) I pún-sin tùi kūn Kiat-kah phah chio̍h-siōng ê só͘-chāi oat-tò-tńg lâi, kóng, Ông ah, góa ū pì-bı̍t ê sū beh kā lí kóng; ông kóng, Sok-chēng; khiā tī i sin-piⁿ ê lâng chiū lóng thè-chhut.

(BCL) 伊本身對近吉甲拍石像的所在越倒轉來，講：「王啊，我有祕密的事欲給你講。」王講：「肅靜！」徛佇伊身邊的人就攏退出。

20

(THR) Í-hut chiū-kūn i, ông ka-kī chı̍t-ê chē tī liâng-léng ê lâu-téng; Í-hut kóng, Góa hōng Siōng-tè ê bēng-lēng ū tāi-chì lâi pò lí; ông chiū tùi chō-ūi khiā khí-lâi.

(BCL) 以笏就近伊；王家己一個坐佇涼冷的樓頂。以笏講：「我奉上帝的命令有代誌來報你。」王就對座位徛起來。

21

(THR) Í-hut chiū chhun tò-chhiú, tùi chiàⁿ-thúi pu̍ih-chhut kiàm, chhì-jı̍p ông ê pak-tó͘;

(BCL) 以笏就伸倒手，對正腿拔出劍，刺入王的腹肚，

22

(THR) kiàm ê pìⁿ iā sòa jı̍p-khì, kiàm hō͘ iû kā-tiâu, in-ūi i bô tùi i ê pak-tó͘ pu̍ih kiàm chhut-lâi; chiū thàng-kè ka-chiah chhut-lâi.

(BCL) 劍的柄也續入去。劍互油咬住，因為伊無對伊的腹肚拔劍出來，就過尻脊出來。

23

(THR) Í-hut chiū chhut-khì kàu léng-lông, chiong hiah ê lâu-mn̂g koaiⁿ-só.

(BCL) 以笏就出去到伶廊，將許個樓門關鎖。

24

(THR) I chhut-khì liáu, ông ê lô͘-po̍k kàu, khòaⁿ-kìⁿ lâu-mn̂g koaiⁿ-só, chiū kóng, I tek-khak sī tī lâu-téng teh tāi-piān.

(BCL) 伊出去了，王的奴僕到，看見樓門關鎖，就講：「伊的確是佇頂大便。」

25

(THR) In thèng-hāu kàu gông-ngia̍h, khòaⁿ-kìⁿ i bô khui lâu-téng ê mn̂g, chiū kia̍h só-sî lâi khui; khòaⁿ ah, in ê chú-lâng í-keng sí, tó tī tōe--nih.

(BCL) 聽候到卬愕，看見伊無開樓頂的門，就抬鎖匙來開，看啊，的主人已經死，倒佇地裡。

26

(THR) In iân-chhiân ê sî, Í-hut chiū tô-cháu, í-keng kè phah chio̍h-siōng ê tōe, siám cháu kàu Se-i-la̍h.

(BCL) 延延的時，以笏就逃走，已經過拍石像的地，閃走到西伊拉；

27

(THR) Í-keng kàu, chiū tī Í-hoat-liân soaⁿ-tōe pûn sàu-kak; Í-sek-lia̍t lâng chiū tè i tùi soaⁿ-tōe lo̍h--khì, i kiâⁿ tī thâu-chêng;

(BCL) 已經到，就佇以法蓮山地歕哨角。以色列人就隨伊對山地落去，伊行佇頭前，

28

(THR) tùi in kóng, Lín tè góa lâi, in-ūi Iâ-hô-hoa í-keng chiong lín ê tùi-te̍k Mô͘-ap lâng kau tī lín ê chhiú. In chiū tè i lo̍h--khì, pé-siú Mô͘-ap ê tùi-bīn, Iok-tàn hô ê tō͘-thâu, bô iông-ún chı̍t-lâng kè-khì;

(BCL) 對講：「恁隨我來，因為耶和華已經將恁的對敵摩押人交佇恁的手。」就隨伊落去，把守摩押的對面約但河的渡頭，無容允一人過去。

29

(THR) hit-sî thâi-sí Mô͘-ap lâng iok-lio̍k chı̍t-bān, lóng sī tōa-hàn ê ióng-sū, bô chı̍t-ê cháu-lī.

(BCL) 彼時死摩押人約略一萬，攏是大漢的勇士，無一個走離。

30

(THR) Tùi án-ni Mô͘-ap chiū khut-ho̍k tī Í-sek-lia̍t lâng; tōe-hng thài-pêng poeh-cha̍p nî.

(BCL) 對按呢，摩押就屈服佇以色列人。地方太平八十年。

31

(THR) Í-hut liáu-āu, ū A-ná ê kiáⁿ San-ka, i ēng kóaⁿ-gû ê thih-chhì phah-sí la̍k-pah ê Hui-lī-sū lâng. I iā kiù Í-sek-lia̍t lâng.

(BCL) 以笏了後，有亞拿的子珊迦，伊用趕牛的鐵刺拍死六百個非利士人。伊也救以色列人。

Bible Color Mark

• 台語漢字羅馬本
• 巴克禮全羅