士師記 第 5 章

1

(THR) Hit-jı̍t Tí-pho-la̍h kap A-pí-lô-am ê kiáⁿ Pa-la̍h chhiùⁿ-koa kóng:

(BCL) 彼日，底波拉及亞比羅菴的子巴拉唱歌，講：

2

(THR) In-ūi Í-sek-lia̍t tiong chòe-thâu-ê, chòe-thâu chhōa in, In-ūi peh-sìⁿ kam-gōan hi-seng, Lín tio̍h o-ló Iâ-hô-hoa.

(BCL) 因為以色列中做頭的，做頭導，因為百姓甘願犧牲，恁著謳咾耶和華！

3

(THR) Lia̍t-ông ah, tio̍h thiaⁿ, chiah ê siú-léng tio̍h àⁿ hī-khang; Góa ǹg Iâ-hô-hoa, góa beh gîm-si; Góa beh chhiùⁿ-koa o-ló Iâ-hô-hoa Í-sek-lia̍t ê Siōng-tè.

(BCL) 列王啊，著聽！諸個首領，著俯耳孔！我向耶和華我欲吟詩；我欲唱歌謳咾耶和華──以色列的上帝。

4

(THR) Iâ-hô-hoa ah, Lí tùi Se-jíⁿ chhut, Tùi Í-tong tōe kiâⁿ--lâi; Hit-sî tōe tín-tāng, thiⁿ teh tih; Hûn iā tih chúi.

(BCL) 耶和華啊，你對西珥出，對以東地行來。彼時地振動，天滴，雲也滴水。

5

(THR) Chiah ê soaⁿ tī Iâ-hô-hoa ê bīn-chêng iô-choah, Chiū-sī chit ê Se-nái soaⁿ tī Iâ-hô-hoa Í-sek-lia̍t Siōng-tè ê bīn-chêng iô-choah.

(BCL) 諸個山佇耶和華的面前搖泏，就是此個西奈山佇耶和華──以色列上帝的面前搖泏。

6

(THR) Tī A-ná ê kiáⁿ San-ka ê sî, Koh tī Ngá-ek ê jı̍t, tōa-lō͘ bô lâng kiâⁿ; Kiâⁿ-lō͘ ê lâng lóng sī oan sió-lō͘.

(BCL) 佇亞拿的子珊迦的時，閣佇雅億的日，大路無人行，行路的人攏是彎小路。

7

(THR) Í-sek-lia̍t tiong bô thâu-lâng, lóng-chóng bô, Kàu góa Tī-pho-la̍h khí-lâi, Kàu góa khí-lâi tī Í-sek-lia̍t tiong chòe lāu-bú.

(BCL) 以色列中無頭人，攏總無，到我底波拉起來，到我起來佇以色列中做老母。

8

(THR) In kéng sin ê siōng-tè, Kau-chiàn chiū kàu in ê siâⁿ-mn̂g. Hit-sî Í-sek-lia̍t sì-bān lâng ê tiong-kan, Kiám ōe khòaⁿ-kìⁿ tîn-pâi kap chhiuⁿ mah?

(BCL) 揀新的上帝，交戰就到的城門。彼時，以色列四萬人的中間豈會看見盾牌及槍嗎？

9

(THR) Góa ê sim ì-hiòng Í-sek-lia̍t hiah ê siat-lı̍p lu̍t-hoat-ê, Peh-sìⁿ-tiong kam-gōan hi-seng-ê; Lín tio̍h o-ló Iâ-hô-hoa.

(BCL) 我的心意向以色列許個設立律法者，百姓中甘願犧牲者。恁著謳咾耶和華！

10

(THR) Khiâ pe̍h-lû ê, Chē siù-hoe thán-á ê, Kiâⁿ-lō͘ ê, lín lóng tio̍h pò-iông.

(BCL) 騎白驢者、坐　花毯仔者、行路者，恁攏著報揚！

11

(THR) Tī chhiūⁿ-chúi ê só͘-chāi, lī-khui siā-chìⁿ ê lâng ê siaⁿ hn̄g-hn̄g, Tī-hia lâng beh kóng-khí Iâ-hô-hoa kong-gī ê só͘-kiâⁿ, Chiū-sī I tī-lí Í-sek-lia̍t kong-gī ê só͘ kiâⁿ. Hit-sî Iâ-hô-hoa ê peh-sìⁿ lo̍h-khì kàu siâⁿ-mn̂g.

(BCL) 佇汲水的所在，離開射箭的人的聲遠遠，佇遐人欲講起耶和華公義的所行，就是伊治理以色列公義的所行。彼時耶和華的百姓落去到城門。

12

(THR) Tí-pho-la̍h ah, chhíⁿ ah, chhíⁿ ah, Lí tio̍h chhíⁿ, tio̍h chhíⁿ, lâi chhiùⁿ-koa; Pa-la̍h ah, lí tio̍h khí-lâi, A-pí-lô-am ê kiáⁿ, tio̍h lia̍h lí só͘ lia̍h ê khì.

(BCL) 底波拉啊，醒啊！醒啊！你著醒，著醒，來唱歌。巴拉啊，你著起來，亞比羅菴的子，著掠你所掠的去。

13

(THR) Hit-sî só͘ chhun ê kùi-cho̍k, kap peh-sìⁿ saⁿ-kap lo̍h-lâi, Iâ-hô-hoa ūi góa lîm-kàu, kong-kek ióng-sū.

(BCL) 彼時所剩的貴族及百姓相及落來；耶和華為我臨到，攻擊勇士。

14

(THR) Ū tùi Í-hoat-liân lâi-ê, i ê kun-pún tī A-má-le̍k; Piān-ngá-bín chham tī lí ê peh-sìⁿ-tiong kun-tè lí, Ū siat lu̍t-hoat--ê, tùi Má-kiat lo̍h-lâi; Ū kia̍h-kóaiⁿ tiám-sǹg peh-sìⁿ ê siàu-gia̍h--ê, tùi Se-pò͘-lûn lo̍h-lâi.

(BCL) 有對以法蓮來的，伊的根本佇亞瑪力；便雅憫參佇你的百姓中跟隨你。有設律法者對瑪吉落來；有抬枴點算百姓的數額者對西布倫落來；

15

(THR) Í-sat-ka ê siú-léng, kap Tí-pho-la̍h saⁿ-kap lâi, Í-sat-ka kap Pa-la̍h chı̍t-iūⁿ, In tè i cháu-lo̍h pîⁿ-iûⁿ; Tī Liû-piān ê khoe-piⁿ, Sim ū tōa-tōa chim-chiok gī-lūn.

(BCL) 以薩迦的首領及底波拉相及來；以薩迦及巴拉一樣。隨伊走落平洋；佇流便的溪邊心有大大斟酌議論。

16

(THR) Lí siáⁿ-sū chē tī iûⁿ-tiâu ê tiong-ng, Thiaⁿ kiò iûⁿ-kûn ê siaⁿ ah?

(BCL) 你啥事坐佇羊　的中央聽叫羊群的聲啊？

17

(THR) Ki-lia̍t khiā-khí tī Iok-tàn hit-pêng; Tàn siáⁿ-sū thêng tī chûn-nih? A-siat chēng-chēng chē tī hái-piⁿ, Tiàm tī káng-lāi.

(BCL) 基列徛起佇約但彼旁。但啥事停佇船裡？亞設靜靜坐佇海邊，踮佇港內。

18

(THR) Se-pò͘-lûn sī piàⁿ-miā phe-sí ê peh-sìⁿ; Kap Ná-hut-tha-lī tī chhân-iá kôaiⁿ ê só͘-chāi, iā sī án-ni.

(BCL) 西布倫是拼命拼死的百姓；及拿弗他利佇田野高的所在也是按呢。

19

(THR) Lia̍t-ông lâi kau-chiàn; Hit-sî Ka-lâm lia̍t-ông tī Bí-kiat-to chúi-piⁿ ê Tha-la̍h kau-chiàn, Chóng-sī bô chhiúⁿ-tio̍h gûn.

(BCL) 列王來交戰。彼時迦南列王佇米吉多水邊的他納交戰，總是無搶著銀。

20

(THR) Ū tùi thiⁿ kau-chiàn ê, Chhiⁿ-sîn tùi in ê khúi-tō lâi kap Se-se-la̍h kau-chiàn.

(BCL) 有對天交戰的，星辰對的軌道來及西西拉交戰。

21

(THR) Ki-sūn hô kā in lâu--khì, Ki-sūn hô chiū-sī kó͘-chá ê hô. Góa ê sîn ah, lí hùn-ióng chìn-chêng khì.

(BCL) 基順河給流去，基順河就是古早的河；我的神啊，你奮勇進前去。

22

(THR) Bé-tôe kho̍k-kho̍k háu, sī in-ūi kín-kín cháu, Chiū-sī la̍t--ê ū kín-kín cháu.

(BCL) 馬蹄硞硞哮，是因為緊緊走，就是力者有緊緊走。

23

(THR) Iâ-hô-hoa ê sù-chiá kóng, Tio̍h chiù-chó͘ Bí-lô-su, Tōa-tōa chiù-chó͘ kî-tiong khiā-khí ê peh-sìⁿ, In-ūi in bô lâi pang-chān Iâ-hô-hoa, Bô lâi pang-chān Iâ-hô-hoa tí-te̍k ióng-sū.

(BCL) 耶和華的使者講：著咒詛米羅斯，大大咒詛其中徛起的百姓；因為無來幫助耶和華，無來幫助耶和華抵敵勇士。

24

(THR) Ki-nî lâng Hi-pek ê bó͘ Ngá-ek, Pí hiah ê hū-jîn-lâng khah ū hok-khì, Pí khiā-khí pò͘-pîⁿ-lāi ê hū-jîn-lâng khah ū hok-khì.

(BCL) 基尼人希百的某雅億，比許個婦仁人卡有福氣，比徛起布棚內的婦仁人卡有福氣。

25

(THR) Se-se-la̍h thó chúi, i chiū ēng lin hō͘ i, Ēng pó-pòe ê pôaⁿ phâng gû-lin-iû hō͘ i.

(BCL) 西西拉討水，伊就用奶互伊用寶貝的盤捧牛奶油互伊。

26

(THR) Ngá-ek chhun-chhiú kia̍h teng, Chiàⁿ-chhiú kia̍h chòe-kang-lâng ê thûi-á, Ēng thûi kòng Se-se-la̍h, tèng-kè i ê thâu-khak, Chha̍k lâi thàu-kè i ê pìn-piⁿ.

(BCL) 雅億伸手抬釘，正手抬做工人的鎚仔，用鎚摃西西拉，釘過伊的頭殼，鑿來透過伊的鬢邊，

27

(THR) Tī i ê kha ê tiong-kan, Se-se-la̍h phak--lo̍h-khì, Chhih--lo̍h-khì, tó-teh, Tī i ê kha ê tiong-kan phak--lo̍h, chhih--lo̍h-khì; Tī só͘ phak--lo̍h ê só͘-chāi, chhih--lo̍h-khì lâi sí.

(BCL) 佇伊的腳的中間西西拉仆落去，扼落去倒，佇伊的腳的中間仆落，扼落去；佇所仆落的所在，扼落去來死。

28

(THR) Se-se-la̍h ê lāu-bú tùi thang-á khòaⁿ--chhut-khì, Tùi thang-á-chí--nih kiò kóng, Cháiⁿ-iūⁿ i ê chhia bān-bān lâi? Cháiⁿ-iūⁿ i ê chhia-lûn hiah iân-chhiân ah?

(BCL) 西西拉的老母對窗仔看出去，對窗仔子裡叫講：怎樣伊的車慢慢來？怎樣伊的車輪許延延啊？

29

(THR) Kun-sûi i chhang-miâ chun-kùi ê hū-lú ìn i, I iā ka-kī ìn kóng,

(BCL) 跟隨伊聰明尊貴的婦女應伊，伊也家己應講：

30

(THR) Kiám bô só͘ tit-tio̍h mah? kiám bô pun só͘-chhiúⁿ ê mı̍h mah? Ta̍k-lâng pun chı̍t nn̄g ê cha-bó͘-gín-ná; Se-se-la̍h chiū pun só͘ chhiúⁿ chhái-sek ê saⁿ, Só͘ chhiúⁿ siù-hoe chhái-sek ê saⁿ, Nn̄g-bīn lóng sī chhái-sek siù-hoe ê, thang kòa tī ām-kún, chòe só͘ chhiúⁿ ê mı̍h.

(BCL) 豈無所得著嗎？豈無分所搶的物嗎？逐人分一二個查某囝仔？西西拉就分所搶彩色的衫，所搶　花彩色的衫，二面攏是彩色　花的，通掛佇頷頸做所搶的物。

31

(THR) Iâ-hô-hoa ah, gōan Lí ê tùi-te̍k lóng chhin-chhiūⁿ án-ni bia̍t-bô; Gōan thiàⁿ I ê lâng chhin-chhiūⁿ jı̍t-chhut kng-nà-nà. Í-āu tōe-hng thài-pêng sì-cha̍p nî.

(BCL) 耶和華啊，願你的對敵攏親像按呢滅無！願疼他的人親像日出，光爁爁！以後，地方太平四十年。

Bible Color Mark

• 台語漢字羅馬本
• 巴克禮全羅