路加福音 第 4 章

1

(THR) Iâ-so͘ siū Sèng Sîn chhiong-móa, tùi Iok-tàn hô tò-lâi; hō͘ Sèng Sîn chhōa I tī khòng-iá-nı̍h sì-cha̍p jı̍t kú, hō͘ Mô͘-kúi chhì I.

(BCL) 耶穌受聖神充滿，對約但河倒來，互聖神導伊佇曠野裡，

2

(THR) chiah ê jı̍t ê tiong-kan bô chia̍h sím-mı̍h mı̍h, āu-lâi chiū iau.

(BCL) 四十日久互魔鬼試伊。諸個日的中間無食甚麼物；後來，就枵。

3

(THR) Mô͘-kúi kā I kóng, Lí nā sī Siōng-tè ê Kiáⁿ, tio̍h kah chit ê chio̍h pìⁿ-chòe piáⁿ.

(BCL) 魔鬼給伊講：「你若是上帝的子著教此個石變做餅。」

4

(THR) Iâ-so͘ ìn i kóng, Ū kì-chài kóng, Lâng ê o̍ah m̄ nā óa-khò piáⁿ.

(BCL) 耶穌應伊講：「有記載講：『人的活呣若倚靠餅。』」

5

(THR) Mô͘-kúi koh chhōa I peh-chiūⁿ kôaiⁿ, chı̍t-ba̍k-nih kú ēng thiⁿ-ē bān kok hō͘ I khòaⁿ,

(BCL) 魔鬼閣導伊絔上高，一目　久用天下萬國互伊看，

6

(THR) chiū kā I kóng, Chit ê it-chhè ê kôan, kap in ê êng-kng góa beh hō͘ lí; in-ūi chit-ê í-keng kau hō͘ góa, chhut-chāi góa beh hō͘ sím-mı̍h lâng chiū hō͘ i;

(BCL) 就給伊講：「此個一切的權，及的榮光，我欲互你，因為此個已經交互我，出在我欲互甚麼人就互伊。

7

(THR) só͘-í lí nā pài tī góa ê bīn-chêng, chiū lóng-chóng sī lí ê.

(BCL) 所以你若拜佇我的面前，就攏總是你的。」

8

(THR) Iâ-so͘ ìn i kóng, Ū kì-chài kóng, Tio̍h pài Chú, lí ê Siōng-tè, to̍k-to̍k ho̍k-sāi I nā-tiāⁿ.

(BCL) 耶穌應伊講：「有記載講：著拜主──你的上帝，獨獨服事伊若定。」

9

(THR) Koh chhōa I kàu Iâ-lō͘-sat-léng, hō͘ I khiā tī tiān ê bé-liu, kā I kóng, Lí nā sī Siōng-tè ê Kiáⁿ, tio̍h tùi chia ka-kī tiô-lo̍h-khì;

(BCL) 閣導伊到耶路撒冷，互伊徛佇殿的尾溜，給伊講：「你若是上帝的子，著對遮家己趒落去；

10

(THR) in-ūi ū kì-chài kóng, I beh ūi-tio̍h lí bēng-lēng I ê thiⁿ-sài pó-hō͘ lí;

(BCL) 因為有記載講：伊欲為著你命令伊的天使保護你；

11

(THR) Koh kóng, In beh ēng chhiú hû lí, Bián-tit lí ê kha tak-tio̍h chio̍h.

(BCL) 閣講：「欲用手扶你，免得你的腳觸著石。」

12

(THR) Iâ-so͘ ìn i kóng, Ū kóng, Bo̍h-tit chhì Chú, lí ê Siōng-tè.

(BCL) 耶穌應伊講：「有講：『莫得試主──你的上帝。』」

13

(THR) Mô͘-kúi í-keng chīn ta̍k hāng ê chhì, chiū chiām-sî lī-khui I.

(BCL) 魔鬼已經盡逐項的試，就暫時離開伊。

14

(THR) Iâ-so͘ tī Sèng Sîn ê kôan-lêng tò-tńg-khì Ka-lī-lī. I ê miâ-siaⁿ piàn thôan tī sì-ûi ê tōe-hng.

(BCL) 耶穌佇聖神的權能，倒轉去加利利；伊的名聲遍傳佇四圍的地方。

15

(THR) I tī in ê hōe-tn̂g kà-sī, hō͘ chèng lâng o-ló I.

(BCL) 伊佇的會堂教示，互眾人謳咾伊。

16

(THR) Iâ-so͘ kàu Ná-sat-le̍k, chiū-sī I tióng-sêng ê só͘-chāi; tī an-hioh-jı̍t chiàu I pêng-siông ê hoat-tō͘ jı̍t hōe-tn̂g, chiū khiā-teh beh tha̍k.

(BCL) 耶穌到拿撒勒，就是伊長成的所在。佇安息日，照伊平常的法度入會堂，就徛欲讀。

17

(THR) Ū lâng chiong sian-ti Í-sài-a ê chheh hō͘ I; I chiū hian-khui, chhē-tio̍h hit só͘-chāi, kì kóng,

(BCL) 有人將先知以賽亞的冊互伊，伊就掀開，尋著彼所在記講：

18

(THR) Chú ê Sîn lîm-kàu góa, In-ūi I ēng iû boah góa, hō͘ góa thôan hok-im hō͘ sòng-hiong lâng; I ū chhe góa kā siū lia̍h ê lâng kóng, in ōe tit tháu-pàng, Kā chhiⁿ-mî ê kóng, in ōe tit-tio̍h koh kng, Lâi tháu-pàng siū ap-chè ê lâng,

(BCL) 主的神臨到我，因為伊用油抹我，互我傳福音互喪鄉人；伊有差我給受掠的人講：會得解放，給睛暝的講，會得著閣光，來解放受壓制的人，

19

(THR) Soan-thôan Chú hoaⁿ-hí ê nî.

(BCL) 宣傳主歡喜的年。

20

(THR) Iâ-so͘ ha̍p chheh, hêng chip-sū, chiū chē-teh; tī hōe-tn̂g ê chèng lâng lóng chù-ba̍k khòaⁿ I.

(BCL) 耶穌合冊，還執事，就坐。佇會堂的眾人攏注目看伊。

21

(THR) I chiū khui chhùi tùi in kóng, Chit ê sèng-keng ê èng-giām, lín kin-á-jı̍t ū thiaⁿ-kìⁿ lah.

(BCL) 伊就開嘴對講：「此個聖經的應驗，恁今仔日有聽見啦。」

22

(THR) Chèng lâng lóng kan-chèng I, kî-kòai I ê chhùi só͘ chhut un-tián ê ōe; chiū kóng, Chit-ê kiám m̄ sī Iok-sek ê kiáⁿ mah?

(BCL) 眾人攏干證伊，奇怪伊的嘴所出恩典的話；就講：「此個豈呣是約瑟的子嗎？」

23

(THR) I chiū tùi in kóng, Lín tek-khak ín chit ê sio̍k-gú, tùi góa kóng, I-seng ah, lí tio̍h ka-kī i; kìⁿ-nā góan thiaⁿ-kìⁿ lí kiâⁿ tī Ka-pek-lông ê, iā tio̍h kiâⁿ tī chia, chiū-sī lí ê pún só͘-chāi.

(BCL) 伊就對講：「恁的確引此個俗語對我講：『醫生啊，你著家己醫！見若阮聽見你行佇迦百農的，也著行佇遮，就是你的本所在』」；

24

(THR) Koh kóng, Góa sı̍t-chāi kā lín kóng, Bē ū sian-ti tī pún só͘-chāi hō͘ lâng chiap-la̍p i.

(BCL) 閣講：「我實在給恁講，未有先知佇本所在互人接納伊。

25

(THR) Nā-sī góa chin-sı̍t kā lín kóng, Tng Í-lī-a ê sî, thiⁿ khòng-hān saⁿ nî pòaⁿ, piàn-tōe tōa ki-hng, hit sî Í-sek-lia̍t tiong ū chōe-chōe chiú-kóaⁿ lâng,

(BCL) 若是我真實給恁講，當以利亞的時，天亢旱三年半，遍地大飢荒，彼時，以色列中有多多守寡人，

26

(THR) Í-lī-a bē bat hōng-chhe khì chhē in chı̍t lâng; chí ū khì Se-tùn ê Sat-le̍k-tāi, chhē chı̍t ê chiú-kóaⁿ lâng.

(BCL) 以利亞未曾奉差去尋一人，只有去西頓的撒勒法尋一個守寡人。

27

(THR) Koh sian-ti Í-lī-sa ê sî, Í-sek-lia̍t tiong ū chōe-chōe thái-ko ê; kî-tiong bô chı̍t lâng tit-tio̍h chheng-khì, chí-ū Sū-lī-a lâng Nái-bān nā-tiāⁿ.

(BCL) 閣先知以利沙的時，以色列中有多多癩的，其中無一人得著清氣，只有敘利亞人乃縵若定。」

28

(THR) Tī hōe-tn̂g ê lâng thiaⁿ-kìⁿ chiah ê ōe, lóng móa-sim siū-khì;

(BCL) 佇會堂的人聽見諸個話，攏滿心受氣，

29

(THR) chiū khí-lâi kóaⁿ I chhut siâⁿ-gōa, in ê siâⁿ khí tī soaⁿ-téng, chèng lâng tòa I kàu soaⁿ-khàm, beh kā I chhia-lo̍h-khì.

(BCL) 就起來趕伊出城外（的城起佇山頂）；眾人帶伊到山崁，欲給伊捙落去。

30

(THR) Nā-sī Iâ-so͘ tùi in tiong-kan kiâⁿ-kè, chòe I khì.

(BCL) 若是耶穌對中間行過，做伊去。

31

(THR) Lo̍h-khì kàu Ka-pek-lông, chiū-sī Ka-lī-lī chı̍t ê siâⁿ; tī an-hioh-jı̍t kà-sī lâng.

(BCL) 落去到迦百農，就是加利利一個城，佇安息日教示人。

32

(THR) Lâng kî-kòai I ê kà-sī, in-ūi I ê ōe ū kôan.

(BCL) 人奇怪伊的教示，因為伊的話有權。

33

(THR) Hōe-tn̂g lāi ū chı̍t ê hōan-tio̍h kúi ê lâng, tōa siaⁿ kiò kóng,

(BCL) 會堂內有一個患著鬼的人，大聲叫講：

34

(THR) Hàiⁿ, Ná-sat-le̍k ê Iâ-so͘, góan kap lí sím-mı̍h kan-sia̍p, lí lâi beh bia̍t góan mah? Góa chai lí chī-chūi, chiū-sī Siōng-tè ê Sèng-ê.

(BCL) 「嗐！拿撒勒的耶穌，阮及你甚麼干涉？你來欲滅阮嗎？我知你是誰，就是上帝的聖者。」

35

(THR) Iâ-so͘ chek-pī i kóng, Lí tio̍h chēng-chēng, tùi i chhut-khì. Kúi chiū chhia-tó hit lâng tī chèng lâng ê tiong-kan, chiah chhut-khì, lóng bô siong-tio̍h i.

(BCL) 耶穌責備伊講：「你著靜靜，對伊出去！」鬼就捙倒彼人佇眾人的中間，才出去，攏無傷著伊。

36

(THR) Chèng lâng gông-ngia̍h saⁿ-kap gī-lūn kóng, Che sī sím-mı̍h ōe ah? in-ūi I ēng kôan-pèng kap lêng-le̍k bēng-lēng chiah ê siâ-sîn, in chiū chhut-khì.

(BCL) 眾人卬愕，相及議論講：「這是甚麼話啊？因為伊用權柄及能力命令諸個邪神，就出去。」

37

(THR) I ê miâ-siaⁿ chiū piàn-thôan tī sì-ûi ê tōe-hng.

(BCL) 伊的名聲就遍傳佇四圍的地方。

38

(THR) Iâ-so͘ tùi hōe-tn̂g khí-lâi, jı̍p Se-bûn ê ke. Se-bûn ê tiūⁿ-ḿ hōan-tio̍h tāng ê jia̍t-pīⁿ; lâng thòe i kiû Iâ-so͘.

(BCL) 耶穌對會堂起來，入西門的家。西門的丈姆患著重的熱病，人替伊求耶穌。

39

(THR) Iâ-so͘ khiā-óa, àⁿ-lo̍h chek-pī i ê jia̍t-pīⁿ, jia̍t chiū thè; hū-jîn-lâng sûi-sî khí-lâi, su-hāu in.

(BCL) 耶穌徛倚，俯落責備伊的熱病，熱就退。婦仁人隨時起來伺候。

40

(THR) Jı̍t lo̍h ê sî, kìⁿ-nā ū pīⁿ ê, put-lūn hōan-tio̍h sím-mı̍h pīⁿ, lâng lóng tòa in lâi chiū-kūn Iâ-so͘. Iâ-so͘ hōaⁿ chhiú tī in ta̍k lâng ê sin-chiūⁿ, lâi i-hó in.

(BCL) 日落的時，見若有病的，不論患著甚麼病，人攏帶來就近耶穌。耶穌按手佇逐人的身上，來醫好。

41

(THR) Koh ū kúi tùi chōe-chōe lâng chhut-khì, kiò kóng, Lí chiū-sī Siōng-tè ê Kiáⁿ. Iâ-so͘ in-ūi kúi bat I sī Ki-tok, chiū chek-pī in, m̄ chún in kóng.

(BCL) 閣有鬼對多多人出去，叫講：「你就是上帝的子。」耶穌因為鬼識伊是基督，就責備，呣淮講。

42

(THR) Thiⁿ-kng ê sî Iâ-so͘ khì tī khòng-iá ê só͘-chāi; kui tīn lâng chhē I, chiū-kūn I, ài lâu I, hō͘ I bo̍h-tit lī-khui in khì.

(BCL) 天光的時，耶穌去佇曠野的所在。歸陣人尋伊，就近伊，愛留伊，互伊莫得離開去。

43

(THR) Nā-sī I tùi in kóng, Góa iā tio̍h tī pa̍t ê siâⁿ thôan Siōng-tè kok ê hok-im, in-ūi góa hōng-chhe chiū-sī ūi-tio̍h che.

(BCL) 若是伊對講：「我也著佇別個城傳上帝國的福音，因為我奉差就是為著這。」

44

(THR) I chiū tī Ka-lī-lī chiah ê hōe-tn̂g lâi soan-thôan.

(BCL) 伊就佇加利利諸個會堂來宣傳。

Bible Color Mark

• 台語漢字羅馬本
• 巴克禮全羅