瑪拉基書 第 3 章

1

(THR) Bān-kun ê Iâ-hô-hoa kóng, Khòaⁿ ah, Góa chhe Góa ê sù-chiá, i beh tī Góa ê thâu-chêng pī-pān lō͘; lín só͘ chhē ê Chú, beh hut-jiân kàu I ê tiān, bêng-iok ê sù-chiá, chiū-sī lín só͘ him-bō͘--ê, khòaⁿ ah, i lâi lah.

(BCL) 萬軍的耶和華講：「看啊，我差我的使者，伊欲佇我的頭前備辦路。恁所尋的主欲忽然到伊的殿；盟約的使者，就是恁所欣慕者，看啊，伊來啦。」

2

(THR) To̍k-to̍k I lâi ê jı̍t, chī-chūi tng-ōe-khí; I hián-hiān ê sî, chī-chūi khiā-ōe-tiâu? In-ūi I chhin-chhiūⁿ thòan-liān--ê ê hé, koh chhin-chhiūⁿ phiò-pò͘--ê ê kiⁿ.

(BCL) 獨獨伊來的日，是誰當會起？伊顯現的時，是誰徛會住？因為伊親像鍛煉者的火，閣親像漂布者的鹼。

3

(THR) I beh chē-teh, chhin-chhiūⁿ thòan-liān gûn hō͘ i chheng-khì-ê, lâi chheng-khì Lī-bī ê kiáⁿ-sun, thòan-liān in chhin-chhiūⁿ kim-gûn; in chiū beh pîn kong-gī hiàn lé-mı̍h hō͘ Iâ-hô-hoa.

(BCL) 伊欲坐，親像鍛煉銀互伊清氣的，來清氣利未的子孫，鍛煉親像金銀；就欲憑公義獻禮物互耶和華。

4

(THR) Hit-sî Iû-tāi kap Iâ-lō͘-sat-léng só͘ hiàn ê lé-mı̍h, beh tit-tio̍h Iâ-hô-hoa hoaⁿ-hí, chhin-chhiūⁿ kū-sî ê jı̍t, kó͘-chá ê nî.

(BCL) 彼時，猶大及耶路撒冷所獻的禮物欲得著耶和華歡喜，親像舊時的日、古早的年。

5

(THR) Bān-kun ê Iâ-hô-hoa kóng, Góa beh lîm-kàu lín, lâi sím-phòaⁿ; Góa beh kín-kín chòe kan-chèng lâi chí-bêng kiâⁿ siâ-su̍t--ê, kiâⁿ kan-îm--ê, lām-sám chiù-chōa--ê, khui-hū chòe-kang lâng ê kang-chîⁿ--ê, khi-ap kóaⁿ-hū ko͘-jî--ê, oan-óng chhut-gōa lâng--ê, kap bô kiaⁿ-ùi Góa--ê.

(BCL) 萬軍的耶和華講：「我欲臨到恁，來審判。我欲緊緊做干證，來指明行邪術者、行姦淫者、濫糝咒誓者、虧負做工人的工錢者、欺壓寡婦孤兒者、冤枉出外人者，及無驚畏我者。」

6

(THR) In-ūi Góa Iâ-hô-hoa bô kóe-ōaⁿ; só͘-í lín Ngá-kok ê kiáⁿ bô tú-tio̍h bia̍t-bô.

(BCL) 因為我──耶和華無改換，所以恁雅各的子無抵著滅無。

7

(THR) Bān-kun ê Iâ-hô-hoa kóng, Tùi lín lia̍t-chó͘ ê jı̍t í-lâi, lín ū ûi-pōe Góa ê lu̍t-lē, iā bô siú i; taⁿ lín tio̍h o̍at-tńg chhē Góa, Góa chiū o̍at-tńg chhē lín; chóng-sī lín kóng, Góan tio̍h cháiⁿ-iūⁿ o̍at-tńg?

(BCL) 萬軍的耶和華講：對恁列祖的日以來，恁有違背我的律例，也無守伊。今恁著越轉尋我，我就越轉尋恁。總是恁講：『阮著怎樣越轉？』

8

(THR) Lâng kiám thang thau-the̍h Siōng-tè ê mı̍h mah? Lín kèng-jiân thau-the̍h Góa ê mı̍h. Chóng-sī lín kóng, Góan tī sím-mı̍h sū thau-the̍h Lí ê mı̍h ah? Chiū-sī tī eng-kai la̍p ê cha̍p-hūn-chı̍t kap lé-mı̍h.

(BCL) 人豈通偷提上帝的物嗎？恁竟然偷提我的物。總是恁講：『阮佇甚麼事偷提你的物啊？』就是佇應該納的十份一及禮物。

9

(THR) In-ūi lín thong-kok ê lâng, lóng thau-the̍h Góa ê mı̍h; só͘-í lín siū tāng ê chiù-chó͘.

(BCL) 因為恁通國的人攏偷提我的物，所以恁受重的咒詛。

10

(THR) Bān-kun ê Iâ-hô-hoa kóng, Lín tio̍h ēng cha̍p-hūn ê chı̍t-hūn, ôan-chôan sàng-jı̍p hú-khò͘, hō͘ Góa ê chhù ū bí-niû; ēng chit-ê lâi chhì Góa, khòaⁿ Góa kó-jiân kā lín khui thiⁿ ê thang-á, piàⁿ hok-khì hō͘ lín, kàu bô tè(**teh) thang hē bô?

(BCL) 萬軍的耶和華講：恁著用十份的一份完全送入府庫，互我的厝有米糧，用此個來試我，看我果然給恁開天的窗仔，傾福氣互恁，到無地通下無。

11

(THR) Bān-kun ê Iâ-hô-hoa kóng, Góa beh ūi lín chek-pī chháu-meh, bô iông-ún i húi-hōai thó͘-sán; lín chhân--nih ê phû-tô-chhiū, tī bē se̍k ê tāi-seng, iā bô lak-lia̍p.

(BCL) 萬軍的耶和華講：我欲為恁責備草蜢，無容允伊毀壞土產。恁田裡的葡萄樹佇未熟的代先也無落粒。

12

(THR) Bān-kun ê Iâ-hô-hoa kóng, Bān-kok beh chheng lín chòe ū hok-khì--ê, in-ūi lín beh chòe thang hoaⁿ-hí ê tōe.

(BCL) 萬軍的耶和華講：萬國欲稱恁做有福氣者，因為恁欲做通歡喜的地。」

13

(THR) Iâ-hô-hoa kóng, Lín ēng ngī ê ōe kek Góa. Lín iáu-kú kóng, Góan ēng sím-mı̍h ōe kek Lí ah?

(BCL) 耶和華講：「恁用硬的話激我，恁猶久講：『阮用甚麼話激你啊？』

14

(THR) Lín bat kóng, Ho̍k-sāi Siōng-tè sī khang-khang, góan chun-siú I ê bēng-lēng, tī bān-kun ê Iâ-hô-hoa bīn-chêng khek-khó͘ lâi kiâⁿ, ū sím-mı̍h lī-ek ah?

(BCL) 恁曾講：『服事上帝是空空，阮遵守伊的命令，佇萬軍的耶和華面前刻苦來行，有甚麼利益啊？

15

(THR) Taⁿ góan chheng kiau-ngō͘ ê lâng ū hok-khì; ia̍h koh kiâⁿ-pháiⁿ ê lâng tit-tio̍h kiàn-lı̍p; in chhì Siōng-tè, iáu-kú tit-tio̍h kiù-chhut.

(BCL) 今阮稱驕傲的人有福氣，亦閣行歹的人得著建立；試上帝，猶久得著救出。』」

16

(THR) Hit-sî kèng-ùi Iâ-hô-hoa ê lâng saⁿ-kap kóng, Iâ-hô-hoa àⁿ hī-khang teh thiaⁿ; koh ū kì-liām ê chheh siá tī I ê bīn-chêng, sī ūi-tio̍h kèng-ùi Iâ-hô-hoa siàu-liām I ê miâ ê lâng.

(BCL) 彼時，敬畏耶和華的人相及講，耶和華俯耳孔聽，閣有紀念的冊寫佇伊的面前，是為著敬畏耶和華、數念伊的名的人。

17

(THR) Bān-kun ê Iâ-hô-hoa kóng, Tī Góa só͘ tiāⁿ-tio̍h ê jı̍t, in beh kui tī Góa, chòe te̍k-pia̍t ê pó-pòe; Góa beh thiàⁿ-sioh in, chhin-chhiūⁿ lâng thiàⁿ-sioh hit-ê ho̍k-sāi i ê kiáⁿ-jî.

(BCL) 萬軍的耶和華講：「佇我所定著的日，欲歸佇我，做特別的寶貝。我欲疼惜，親像人疼惜彼個服事伊的子兒。

18

(THR) Hit-sî lín beh koh ōe hiáu-tit hó-lâng kap pháiⁿ-lâng ê hun-piat, ho̍k-sāi Siōng-tè ê lâng kap bô ho̍k-sāi Siōng-tè ê lâng ê hun-piat.

(BCL) 彼時恁欲閣會曉得好人及歹人的分別，服事上帝的人及無服事上帝的人的分別。」

Bible Color Mark

• 台語漢字羅馬本
• 巴克禮全羅