馬太福音 第 15 章

1

(THR) Hit sî ū Hoat-lī-sài lâng kap keng-ha̍k-sū, tùi Iâ-lō͘-sat-léng lâi chiū-kūn Iâ-so͘, kóng,

(BCL) 彼時，有法利賽人及經學士，對耶路撒冷來就近耶穌，講：

2

(THR) Lí ê ha̍k-seng siáⁿ-sū hōan-tio̍h kó͘-chá lâng ê liû-thôan? in-ūi chia̍h ê sî in bô sóe chhiú.

(BCL) 「你的學生啥事犯著古早人的流傳？因為食的時，無洗手。」

3

(THR) I chiū ìn kóng, Siáⁿ-sū lín ia̍h tùi lín ê liû-thôan lâi hōan-tio̍h Siōng-tè ê bēng-lēng ah?

(BCL) 伊就應講：「啥事恁亦對恁的流傳來犯著上帝的命令啊？

4

(THR) In-ūi Siōng-tè kóng, Tio̍h kèng lín ê pē, lín ê bú; koh ū kóng, Mē pē á-sī mē bú ê, tek-khak tio̍h hō͘ i sí.

(BCL) 因為上帝講：『著敬恁的父，恁的母』；閣有講：『罵父抑是罵母的，的確著互伊死。』

5

(THR) Nā-sī lín chiū kóng, Kìⁿ-nā lâng tùi pē á-sī bú kóng,

(BCL) 若是恁就講：『見若人對父抑是母講：你本所會通對我得著的利益已經獻去，

6

(THR) Lí pún só͘ ōe thang tùi góa tit-tio̍h ê lī-ek, í-keng hiàn-khì; hit lâng chiū koat-tòan bô kèng i ê pē. Lín chiū tùi lín ê liû-thôan í-keng hòe Siōng-tè ê tō-lí.

(BCL) 彼人就決斷無敬伊的父。』恁就對恁的流傳已經廢上帝的道理。

7

(THR) Ké-hó ê lâng ah, Í-sài-a chí lín lâi chhàm-gú ê chin-chiàⁿ tio̍h; i kóng,

(BCL) 假好的人啊，以賽亞指恁來讖語的真正著。伊講：

8

(THR) Chit ê peh-sìⁿ ēng chhùi-tûn chun-kèng góa; Nā-sī in ê sim lī-khui góa hn̄g-hn̄g.

(BCL) 此個百姓用嘴唇尊敬我，若是的心離開我遠遠；

9

(THR) In kèng-pài góa sī khang-khang, In-ūi in ēng lâng só͘ bēng-lēng ê chòe kà-sī lâi kà-sī lâng.

(BCL) 敬拜我是空空，因為用人所命令的做教示來教示人。」

10

(THR) Chiū kiò chèng lâng lâi, kā in kóng, Lín tio̍h thiaⁿ lâi hiáu-ngō͘.

(BCL) 就叫眾人來，給講：「恁著聽來曉悟。

11

(THR) M̄ sī tùi chhùi jı̍p-ê ōe hō͘ lâng ù-òe; chiū-sī tùi chhùi chhut-ê, chit-ê ōe hō͘ lâng ù-òe.

(BCL) 呣是對嘴入的會互人污穢，就是對嘴出的此個會互人污穢。」

12

(THR) Hit sî ha̍k-seng chiū-kūn lâi kā I kóng, Hoat-lī-sài lâng thiaⁿ-kìⁿ chit ê ōe, chin m̄ gōan, lí chai mah?

(BCL) 彼時學生就近來給伊講：「法利賽人聽見此個話，真呣願，你知嗎？」

13

(THR) I ìn kóng, Kìⁿ-nā chai-chèng ê mı̍h m̄ sī góa ê Thiⁿ Pē só͘ chai-chèng ê, beh pu̍ih i ê kun.

(BCL) 伊應講：「見若栽種的物，呣是我的天父所栽種的，欲拔伊的根。

14

(THR) Chhut-chāi in; in sī chhiⁿ-mî teh chhōa lō͘ ê. Nā-sī chhiⁿ-mî kā chhiⁿ-mî ê chhōa lō͘, nn̄g ê teh-beh po̍ah-lo̍h hām-khiⁿ.

(BCL) 出在！是睛暝導路的；若是睛暝給睛暝的導路，二個欲跋落陷坑。」

15

(THR) Pí-tek ìn I kóng, Chit ê phì-jū, chhiáⁿ kā góan kóe-bêng.

(BCL) 彼得應伊講：「此個譬喻請給阮解明。」

16

(THR) I chiū kóng, Lín ia̍h iáu-kú bē hiáu-ngō͘ mah?

(BCL) 伊就講：「恁亦猶久未曉悟嗎？

17

(THR) Kiám bōe hiáu-tit, kìⁿ-nā tùi chhùi jı̍p ê, lo̍h tī pak-tó͘, lâi pàng tī chhè-tî ah?

(BCL) 豈曉得見若對嘴入的，落佇腹肚，來放佇廁池啊？

18

(THR) Nā-sī tùi chhùi chhut ê; sī tùi sim-lāi hoat-chhut; chiah-ê hō͘ lâng ù-òe.

(BCL) 若是對嘴出的，是對心內發出，諸個互人污穢。

19

(THR) In-ūi tùi sim hoat-chhut pháiⁿ liām-thâu, hêng-hiong, kan-îm, su-thong, thau-the̍h, lām-sám kan-chèng, pòng-to̍k;

(BCL) 因為對心發出歹念頭、行兇、姦淫、私通、偷提、濫糝干證、謗瀆。

20

(THR) chiah-ê sī hō͘ lâng ù-òe; nā-sī bô sóe chhiú lâi chia̍h, bōe hō͘ lâng ù-òe.

(BCL) 諸個是互人污穢；若是無洗手來食，互人污穢。」

21

(THR) Iâ-so͘ tùi hia chhut-khì thè-khì kàu Chhui-lô Se-tùn ê kéng-kài.

(BCL) 耶穌對遐出去，退去到推羅、西頓的境界。

22

(THR) Tú-tn̄g ū Ka-lâm ê hū-jîn-lâng chhut in ê kau-kài, âu-kiò kóng, Chú ah, Tāi-pı̍t ê hō͘-è, lîn-bín góa; góa ê cha-bó͘-kiáⁿ hōan-tio̍h kúi, chin kan-khó͘.

(BCL) 抵當有迦南的婦仁人出的交界，喉叫講：「主啊！大衛的後裔，憐憫我！我的查某子患著鬼真艱苦。」

23

(THR) Iâ-so͘ bô ìn i chı̍t kù. I ê ha̍k-seng lâi, kiû I kóng, Tio̍h kah i khì, in-ūi i tī lán ê āu-bīn teh âu-kiò.

(BCL) 耶穌無應伊一句。伊的學生來，求伊講：「著教伊去，因為伊佇咱的後面喉叫。」

24

(THR) I chiū ìn kóng, Góa hōng chhe, bô m̄ sī chiū-kūn Í-sek-lia̍t ke sit-lo̍h ê iûⁿ nā-tiāⁿ.

(BCL) 伊就應講：「我奉差無呣是就近以色列家失落的羊若定。」

25

(THR) Hū-jîn-lâng lâi pài I kóng, Chú ah, pang-chān góa.

(BCL) 婦仁人來拜伊，講：「主啊，幫助我！」

26

(THR) Nā-sī I kóng, The̍h kiáⁿ-jî ê piáⁿ, hiat hō͘ káu-á, sī m̄ ha̍p.

(BCL) 若是伊講：「提子兒的餅互狗仔是呣合。」

27

(THR) Hū-jîn-lâng kóng, Chú ah, tio̍h; in-ūi liân káu-á ia̍h ōe tit chia̍h in ê chú-lâng toh-kha ka-la̍uh ê piáⁿ-iù.

(BCL) 婦仁人講：「主啊，著；因為連狗仔亦會得食的主人桌腳磕落的餅幼。」

28

(THR) Tùi án-ni Iâ-so͘ ìn kóng, Hū-jîn-lâng ah, lí ê sìn tōa lah; chiàu lí só͘ ài ê, kā lí chòe chiâⁿ. Tùi hit sî i ê cha-bó͘-kiáⁿ í-keng hó.

(BCL) 對按呢耶穌應講：「婦仁人啊，你的信大啦！照你所愛的，給你做成。」對彼時，伊的查某子已經好。

29

(THR) Iâ-so͘ lī-khui hia, kàu Ka-lī-lī hái-piⁿ; chiūⁿ soaⁿ teh chē.

(BCL) 耶穌離開遐，到加利利海邊，上山坐，

30

(THR) Ū chōe-chōe tīn ê lâng chiū-kūn I, sòa tòa pái-kha ê, chhiⁿ-mî ê, é-káu ê, phòa-siùⁿ ê, kap chōe-chōe pa̍t khóan ê lâi, hē tī I ê kha-chêng; chiū i-hó in.

(BCL) 有多多陣的人就近伊，續帶跛腳的、睛暝的、啞口者、破相的，及多多別款的來，下佇伊的腳前；就醫好。

31

(THR) Tì-kàu chèng lâng gông-ngia̍h; in-ūi khòaⁿ-kìⁿ é-káu ê kóng ōe, phòa-siùⁿ ê lóng hó, pái-kha ê kiâⁿ, chhiⁿ-mî ê khòaⁿ-kìⁿ; chiū kui êng-kng Í-sek-lia̍t ê Siōng-tè.

(BCL) 致到眾人卬愕；因為看見啞口者講話，破相的攏好，跛腳的行，睛暝的看見，就歸榮光以色列的上帝。

32

(THR) Iâ-so͘ kiò I ê ha̍k-seng lâi, kóng, Góa lîn-bín chiah ê lâng, in-ūi in í-keng kap góa tòa saⁿ jı̍t; ia̍h bô mı̍h thang chia̍h; góa m̄ kam hō͘ in iau-iau khì, kiaⁿ-liáu in lō͘-nı̍h ià-siān.

(BCL) 耶穌叫伊的學生來，講：「我憐憫諸個人；因為已經及我住三日，亦無物通食。我呣甘互枵枵去，驚了路裡厭倦。」

33

(THR) Ha̍k-seng kā I kóng, Góan tī khòng-iá, tùi tá-lo̍h ū hiah chōe piáⁿ thang hō͘ chiah chōe lâng chia̍h pá?

(BCL) 學生給伊講：「阮佇曠野，對叨落有許多餅通互即多人食飽？」

34

(THR) Iâ-so͘ kā in kóng, Lín ū jōa chōe piáⁿ? ìn kóng, Chhit ê, kap tām-po̍h sòe bé hî.

(BCL) 耶穌給講：「恁有偌多餅？」應講：「七個，及淡薄細尾魚。」

35

(THR) Chiū hoan-hù chèng lâng chē tī tōe-nı̍h;

(BCL) 就吩咐眾人坐佇地裡，

36

(THR) The̍h hí chhit ê piáⁿ kap hî, chiok-siā peh, kau hō͘ ha̍k-seng, ha̍k-seng chiū hō͘ chèng lâng.

(BCL) 提彼七個餅及魚，祝謝，擘，交互學生；學生就互眾人，

37

(THR) Lóng chia̍h kàu pá; khioh só͘ chhun ê sut-á, tóe-móa chhit nâ.

(BCL) 攏食到飽，拾所剩的屑仔，貯滿七籃。

38

(THR) Chia̍h ê, hū-jîn-lâng gín-ná í-gōa, kiōng sì-chheng lâng.

(BCL) 食者，婦仁人囝仔以外，共四千人。

39

(THR) Kì-jiân hō͘ chèng lâng sì-sòaⁿ, chiū chiūⁿ chûn, kàu Má-ka-tàn ê kau-kài.

(BCL) 既然互眾人四散，就上船，到馬加但的交界。

Bible Color Mark

• 台語漢字羅馬本
• 巴克禮全羅