馬太福音 第 24 章

1

(THR) Iâ-so͘ chhut tiān, tú teh kiâⁿ, I ê ha̍k-seng chiū-kūn I, ēng tiān-tn̂g hiah ê chhù pò I khòaⁿ.

(BCL) 耶穌出殿，抵行，伊的學生就近伊，用殿堂許個厝報伊看。

2

(THR) Nā-sī I ìn kóng, Lín bô khòaⁿ-kìⁿ chiah ê mah? góa sı̍t-chāi kā lín kóng, Tī chia beh bô chı̍t tè chio̍h lâu tī chio̍h téng, iā bô chhia-lo̍h-khì.

(BCL) 若是伊應講：「恁無看見諸個嗎？我實在給恁講，佇遮欲無一塊石留佇石頂，也無捙落去。」

3

(THR) Iâ-so͘ chē tī Kaⁿ-ná soaⁿ ê sî, ha̍k-seng su-khia chiū-kūn I kóng, Chhiáⁿ kā góan kóng, tī-sî ū chiah ê tāi-chì? iā lí koh lâi, kap sè-kài ê kiat-kio̍k ū sím-mı̍h tiāu-thâu?

(BCL) 耶穌坐佇橄欖山的時，學生私奇就近伊講：「請給阮講，底時有諸個代誌？也你閣來，及世界的結局有甚麼兆頭？」

4

(THR) Iâ-so͘ ìn kóng, Tio̍h kín-sīn, bo̍h-tit hō͘ lâng bê-he̍k.

(BCL) 耶穌應講：「著謹慎，莫得互人迷惑。

5

(THR) In-ūi beh ū chōe-chōe lâng tī góa ê miâ lâi, kóng, Góa sī Ki-tok, lâi bê-he̍k chōe-chōe lâng.

(BCL) 因為欲有多多人佇我的名來，講：『我是基督』，來迷惑多多人。

6

(THR) Lín beh thiaⁿ-kìⁿ kau-chiàn kap kau-chiàn ê hong-siaⁿ, kín-sīn bo̍h-tit kiaⁿ; in-ūi chiah-ê tek-khak ū, chóng-sī bo̍at-kî iáu-bē kàu.

(BCL) 恁欲聽見交戰及交戰的風聲，謹慎莫得驚；因為諸個的確有，總是末期猶未到。

7

(THR) In-ūi peh-sìⁿ beh khí-lâi kong-kek peh-sìⁿ, kok beh khí-lâi kong-kek kok; chōe-chōe só͘-chāi beh ū ki-hng, tōe-tāng.

(BCL) 因為百姓欲起來攻擊百姓，國欲起來攻擊國；多多所在欲有飢荒、地動。

8

(THR) Chiah-ê lóng sī khó͘-thàng ê khí-thâu.

(BCL) 諸個攏是苦痛的起頭。

9

(THR) Hit sî lâng beh kau-hù lín tī hōan-lān, thâi-sí lín. Lín in-ūi góa ê miâ beh hō͘ bān pang òan-hūn.

(BCL) 彼時，人欲交付恁佇患難，死恁；恁因為我的名欲互萬邦怨恨。

10

(THR) Iā hit sî chōe-chōe lâng beh siū that-gāi, saⁿ ké-sàng, saⁿ òan-hūn.

(BCL) 也彼時，多多人欲受塞礙相解送，相怨恨；

11

(THR) Koh ū chōe-chōe ké sian-ti beh khí-lâi bê-he̍k chōe-chōe lâng.

(BCL) 閣有多多假先知欲起來，迷惑多多人。

12

(THR) In-ūi put-hoat tōa-tōa ke-thiⁿ, chōe-chōe lâng ê thiàⁿ chiām-chiām léng-tām.

(BCL) 因為不法大大加添，多多人的疼漸漸冷淡。

13

(THR) To̍k-to̍k thun-lún kàu lō͘-bé ê, i ōe tit-tio̍h kiù.

(BCL) 獨獨吞到路尾的，伊會得著救。

14

(THR) Chit ê thian-kok ê hok-im beh thôan kàu thong thiⁿ-ē, chòe kan-chèng tī bān pang; hit sî bo̍at-kî chiū kàu.

(BCL) 此個天國的福音欲傳到通天下，做干證佇萬邦，彼時末期就到。」

15

(THR) Só͘-í lín khòaⁿ-kìⁿ chá thok sian-ti Tàn-í-lí só͘ kóng, hit ê chân-hāi khó-ò͘ⁿ ê khiā tī sèng ê só͘-chāi, (tha̍k ê lâng tio̍h hiáu-ngō͘),

(BCL) 「所以恁看見早託先知但以理所講『彼個殘害可惡的』徛佇聖的所在（讀的人著曉悟）。

16

(THR) hit sî tī Iû-thài ê tio̍h cháu-khì soaⁿ-nı̍h;

(BCL) 彼時，佇猶太的，著走去山裡；

17

(THR) tī chhù-téng ê bo̍h-tit lo̍h-lâi the̍h i ke-lāi ê mı̍h;

(BCL) 佇厝頂的，莫得落來提伊家內的物；

18

(THR) tī hn̂g-nı̍h ê bo̍h-tit tò-khì hiaⁿh i ê saⁿ.

(BCL) 佇園裡的，莫得倒去撒伊的衫。

19

(THR) Tng hiah ê jı̍t, ū sin-īn kap hō͘ eⁿ-á chia̍h lin ê hū-jîn-lâng ū chai-ē ah!

(BCL) 當許個日，有娠孕及互嬰仔食奶的婦仁人有災禍啊！

20

(THR) Lín tio̍h kî-tó, bián-tit lín ê tô-cháu tī tang-thiⁿ sî, á-sī an-hioh-jı̍t.

(BCL) 恁著祈禱，免得恁的逃走，佇冬天時抑是安息日。

21

(THR) In-ūi hit sî beh ū tōa hōan-lān, tùi sè-kan ê khí-thâu kàu taⁿ bē bat ū án-ni; āu-lâi iā koat-tòan bô.

(BCL) 因為彼時欲有大患難，對世間的起頭到今，未曾有按呢，後來也決斷無。

22

(THR) Nā bô kiám-chió hiah ê jı̍t, chiū hōan ū jio̍k-thé ê bô chı̍t-ê tit kiù, to̍k-to̍k ūi-tio̍h kéng ê peh-sìⁿ, hiah ê jı̍t beh kiám-chió.

(BCL) 若無減少許個日，就凡有肉體的無一個得救；獨獨為著揀的百姓，許個日欲減少。

23

(THR) Hit sî nā ū lâng kā lín kóng, Lí khòaⁿ, Ki-tok tī chia, á-sī kóng, Tī hia, lín bo̍h-tit sìn.

(BCL) 彼時，若有人給恁講：『你看，基督佇遮』，抑是講：『佇遐』，恁莫得信！

24

(THR) In-ūi beh ū ké Ki-tok, ké sian-ti khí-lâi kiâⁿ tōa ê sîn-jiah kap tiāu-thâu; beh sī ōe, liân kéng ê peh-sìⁿ iā bê-he̍k i.

(BCL) 因為欲有假基督，假先知起來，行大的神蹟及兆頭，欲是會，連揀的百姓也迷惑伊。

25

(THR) Góa í-keng tāi-seng kā lín kóng.

(BCL) 我已經代先給恁講。

26

(THR) Só͘-í lâng nā kā lín kóng, Lí khòaⁿ, I sī tī khòng-iá, lín bo̍h-tit chhut-khì; á-sī kóng, Lí khòaⁿ, I sī tī ba̍t chhù, lín bo̍h-tit sìn.

(BCL) 所以人若給恁講：『你看，伊是佇曠野』，恁莫得出去！抑是講：『你看，伊是佇密厝』，恁莫得信！

27

(THR) In-ūi chhin-chhiūⁿ sih-nà tùi tang-sì teh sih, nā kàu sai-sì, Jîn-chú ê koh lâi iā beh án-ni.

(BCL) 因為親像閃爁對東勢閃，爁到西勢。人子的閣來也欲按呢。

28

(THR) Sin-si nā tī hia, eng-chiáu iā beh chū-chı̍p tī hia.

(BCL) 身屍若佇遐，鷹鳥也欲聚集佇遐。」

29

(THR) Tú-tú chiah ê jı̍t ê hōan-lān liáu-āu, jı̍t beh o͘-àm, ge̍h bô chhut kng, chhiⁿ tùi thiⁿ ka-la̍uh, thiⁿ-siōng tín-tāng.

(BCL) 「抵抵諸個日的患難了後，日欲黑暗，月無出光，星對天磕落，天象振動。

30

(THR) Hit sî Jîn-chú ê tiāu-thâu beh chhut-hiān tī thiⁿ-nı̍h; tī tōe-nı̍h chiah ê cho̍k-lūi lóng beh thî-khàu, iā beh khòaⁿ-kìⁿ Jîn-chú ēng kôan-lêng kap tōa êng-kng chē thiⁿ ê hûn lîm-kàu.

(BCL) 彼時，人子的兆頭欲出現佇天裡，佇地裡諸個族類攏欲啼哭。也欲看見人子，用權能、及大榮光，坐天的雲臨到。

31

(THR) I beh chhe I ê thiⁿ-sài, ēng hō-thâu hiáng-liāng ê siaⁿ, in beh tùi sì-hng chit pêng ê thiⁿ-piⁿ kàu hit pêng ê thiⁿ-piⁿ, chū-chı̍p I só͘ kéng ê peh-sìⁿ.

(BCL) 伊欲差伊的天使，用號頭響亮的聲，欲對四方，此旁的天邊到彼旁的天邊，聚集伊所揀的百姓。」

32

(THR) Lín tio̍h tùi bû-hoa-kó chhiū chhú phì-jū; tng i ki nńg hio̍h hoat ê sî, chiū chai hē-thiⁿ kūn lah.

(BCL) 「恁著對無花果樹取譬喻；當伊枝軟葉發的時，就知夏天近啦。

33

(THR) Án-ni, lín khòaⁿ lóng-chóng chiah ê sū, chiū chai í-keng kūn, kàu mn̂g-kháu lah.

(BCL) 按呢，恁看攏總諸個事，就知已經近，到門口啦。

34

(THR) Góa sı̍t-chāi kā lín kóng, Chit sè-tāi koat-tòan bē kè-khì, kàu chiah ê tāi-chì lóng chiâⁿ.

(BCL) 我實在給恁講，此世代決斷未過去，到諸個代誌攏成。

35

(THR) Thiⁿ kap tōe beh hòe-bô, góa ê ōe bōe hòe-bô.

(BCL) 天及地欲廢無，我的話廢無。」

36

(THR) Nā-sī lūn hit jı̍t, hit sî, lâng m̄ chai, thiⁿ-sài iā m̄ chai, Kiáⁿ iā m̄ chai, to̍k-to̍k Pē chai nā-tiāⁿ.

(BCL) 「若是論彼日，彼時，人呣知，天使也呣知，子也呣知，獨獨父知若定。

37

(THR) Koh chhin-chhiūⁿ Ná-a ê jı̍t, Jîn-chú ê koh lâi iā beh án-ni.

(BCL) 閣親像挪亞的日，人子的閣來也欲按呢。

38

(THR) In-ūi tōa chúi ê tāi-seng hiah ê jı̍t, lâng teh lim-chia̍h, kè-chhōa, kàu Ná-a jı̍p tōa chûn ê jı̍t,

(BCL) 因為大水的代先許個日，人飲食嫁娶，到挪亞入大船的日；

39

(THR) in kèng-jiân m̄ chai, kàu tōa chúi kàu, it-chīn bia̍t in, Jîn-chú ê koh lâi iā beh án-ni.

(BCL) 竟然呣知，到大水到一盡滅。人子的閣來也欲按呢。

40

(THR) Hit sî beh ū nn̄g lâng tī hn̂g-nı̍h, chı̍t-ê chhú-khì, chı̍t-ê pàng-teh.

(BCL) 彼時，欲有二人佇園裡，一個取去，一個放。

41

(THR) Nn̄g ê hū-jîn-lâng oe bō, chı̍t-ê chhú-khì, chı̍t-ê pàng-teh.

(BCL) 二個婦仁人挨磨，一個取去，一個放。

42

(THR) Só͘-í tio̍h tiuⁿ-tî, in-ūi lín m̄ chai lín ê Chú sím-mı̍h jı̍t beh lâi.

(BCL) 所以著張持，因為恁呣知恁的主甚麼日欲來。

43

(THR) Ke-chú nā chai chha̍t sím-mı̍h kiⁿ beh kàu, i chiū tiuⁿ-tî, bô iông-ún lâng iah khang i ê chhù, che sī lín só͘ chai.

(BCL) 家主若知賊甚麼更欲到，伊就張持無容允人挖空伊的厝；這是恁所知。

44

(THR) Só͘-í lín ia̍h tio̍h pī-pān piān; in-ūi lín bô phah-sǹg ê sî, Jîn-chú lâi lah.

(BCL) 所以，恁亦著備辦便，因為恁無拍算的時，人子來啦。」

45

(THR) Chī-chūi sī chīn-tiong tì-hūi ê lô͘-po̍k, chú-lâng só͘ siat-lı̍p lâi kóan i ke-lāi ê lâng, thang chiàu sî pun bí-niû hō͘ in.

(BCL) 「是誰是盡忠智慧的奴僕，主人所設立，來管伊家內的人，通照時分米糧互？

46

(THR) Chú-lâng lâi, tú-tio̍h i án-ni kiâⁿ, hit ê lô͘-po̍k ū hok-khì.

(BCL) 主人來，抵著伊按呢行，彼個奴僕有福氣。

47

(THR) Góa sı̍t-chāi kā lín kóng, chú-lâng beh siat-lı̍p i lâi kóan i it-chhè só͘ ū ê.

(BCL) 我實在給恁講，主人欲設立伊來管伊一切所有的。

48

(THR) To̍k-to̍k hit ê pháiⁿ ê lô͘-po̍k, nā sim-lāi kóng, Góa ê chú-lâng teh iân-chhiân;

(BCL) 獨獨彼個歹的奴僕若心內講：『我的主人延延』，

49

(THR) chiū phah hiah-ê kap i tâng chòe lô͘-po̍k ê, koh kap chùi-hàn saⁿ-kap lim-chia̍h,

(BCL) 就拍許個及伊同做奴僕的，閣及醉漢相及飲食。

50

(THR) chiū tī bô phài-phe ê jı̍t, m̄ chai ê sî, hit ê lô͘-po̍k ê chú-lâng beh kàu.

(BCL) 就佇無派批的日，呣知的時，彼個奴僕的主人欲到，

51

(THR) tāng-tāng hêng-ho̍at i, chhú-tī i kap ké-hó ê lâng pîⁿ-téng, tī hia beh ū thî-khàu kā-gê chhiat-chhí.

(BCL) 重重刑罰伊，處置伊及假好的人平等；佇遐欲有啼哭咬牙切齒。」

Bible Color Mark

• 台語漢字羅馬本
• 巴克禮全羅