民數記 第 13 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h chhe lâng khì thau-khòaⁿ Góa só͘ sù hō͘ Í-sek-lia̍t lâng ê Ka-lâm tōe, tio̍h tùi in chó͘-kong ta̍k chi-phài tiong chhe chı̍t-lâng, lóng sī tī in tiong-kan chòe siú-léng ê.

(BCL) 「你著差人去偷看我所賜互以色列人的迦南地，著對祖公逐支派中差一人，攏是佇中間做首領的。」

3

(THR) Mô͘-se chiū chiàu Iâ-hô-hoa ê bēng-lēng, tùi Pa-lân ê khòng-iá chhe in khì, in lóng sī Í-sek-lia̍t lâng ê cho̍k-tiúⁿ.

(BCL) 摩西就照耶和華的命令對巴蘭的曠野差去；攏是以色列人的族長。

4

(THR) In ê miâ kì tī ē-tóe; sio̍k Liû-piān ê chi-phài, Sat-khek ê kiáⁿ Sa-bó͘-a;

(BCL) 的名記佇下底：屬流便的支派撒刻的子沙某亞。

5

(THR) sio̍k Se-biān ê chi-phài, Hô-lī ê kiáⁿ Sa-hoat;

(BCL) 屬西緬的支派何利的子沙法。

6

(THR) sio̍k Iû-tāi ê chi-phài, Iâ-hu-nî ê kiáⁿ Ka-le̍k;

(BCL) 屬猶大的支派耶孚尼的子迦勒。

7

(THR) sio̍k Í-sat-ka ê chi-phài, Iok-sek ê kiáⁿ Í-ka;

(BCL) 屬以薩迦的支派約色的子以迦。

8

(THR) sio̍k Í-hoat-liân ê chi-phài, Lùn ê kiáⁿ Hô-se-a;

(BCL) 屬以法蓮的支派嫩的子何西阿。

9

(THR) sio̍k Piān-ngá-bín ê chi-phài, La̍h-hu ê kiáⁿ Phàⁿ-thê;

(BCL) 屬便雅憫的支派拉孚的子帕提。

10

(THR) sio̍k Se-pò͘-lûn ê chi-phài, So-tí ê kiáⁿ Ka-tia̍p;

(BCL) 屬西布倫的支派梭底的子迦疊。

11

(THR) Iok-sek ê kiáⁿ-sun, sio̍k Má-ná-se ê chi-phài, So͘-se ê kiáⁿ Ka-tí;

(BCL) 約瑟的子孫，屬瑪拿西的支派蘇西的子迦底。

12

(THR) sio̍k Tàn ê chi-phài, Ki-má-lī ê kiáⁿ A-bí-lī;

(BCL) 屬但的支派基瑪利的子亞米利。

13

(THR) sio̍k A-siat ê chi-phài, Bí-ka-le̍k ê kiáⁿ Se-thiap;

(BCL) 屬亞設的支派米迦勒的子西帖。

14

(THR) sio̍k Ná-hut-tha-lī ê chi-phài, Po̍k-se ê kiáⁿ Ná-pí;

(BCL) 屬拿弗他利的支派縛西的子拿比。

15

(THR) sio̍k Ka-tek ê chi-phài, Má-ki ê kiáⁿ Kiū-lī.

(BCL) 屬迦得的支派瑪基的子臼利。

16

(THR) Chiah-ê chiū-sī Mô͘-se só͘ chhe khì thau-khòaⁿ hit ê tōe ê lâng ê miâ. Mô͘-se chiū chheng Lùn ê kiáⁿ Hô-se-a chòe Iok-su-a.

(BCL) 諸個就是摩西所差去、偷看彼個地的人的名。摩西就稱嫩的子何西阿做約書亞。

17

(THR) Mô͘-se chhe in khì thau-khòaⁿ Ka-lâm tōe, tùi in kóng, Lín tùi chit ê lâm-hng chiūⁿ-khì, sòa peh-chiūⁿ in ê soaⁿ,

(BCL) 摩西差去偷看迦南地，對講：「恁對此個南方上去續　上的山，

18

(THR) khòaⁿ hit ê tōe cháiⁿ-iūⁿ; kî-tiong só͘ khiā ê peh-sìⁿ sī kiông á-sī jio̍k, sī chió á-sī chōe;

(BCL) 看彼個地怎樣，其中所徛的百姓是強抑是弱，是少抑是多，

19

(THR) só͘ khiā-khí ê tōe sī sím-mı̍h khóan, sī hó á-sī pháiⁿ; só͘ khiā ê só͘-chāi sím-mı̍h khóan, sī iâⁿ-pôaⁿ á-sī kian-kò͘ ê siâⁿ;

(BCL) 所徛起的地是甚麼款是好抑是歹，所徛的所在甚麼款是營盤抑是堅固的城。

20

(THR) koh khòaⁿ hit ê tōe-thó͘ cháiⁿ-iūⁿ, sī pûi á-sī sán; hit tiong-kan ū chhiū-ba̍k á-bô. Lín tio̍h hó-táⁿ, chiong hit só͘-chāi ê ké-chí tòa kóa-á lâi; hit-sî tú-á sī phû-tô khí-thâu se̍k ê sî.

(BCL) 閣看彼個地土怎樣，是肥抑是瘦，彼中間有樹木抑無。恁著好膽，將彼所在的果子帶寡仔來。」（彼時抵仔是葡萄起頭熟的時。）

21

(THR) In chiū khì thau-khòaⁿ hit ê tōe, tùi Sîm ê khòng-iá kàu Lī-ha̍p, kàu jı̍p Hap-má ê lō͘-kháu.

(BCL) 就去偷看彼個地，對尋的曠野到利合，到入哈馬的路口。

22

(THR) In tùi lâm-hng chiūⁿ-khì, kàu Hi-pek-lûn; tī-hia ū A-la̍p cho̍k ê lâng, A-hi-bān, Sī-su, That-mái. (Hi-pek-lûn siâⁿ khí-chō pí Ai-kı̍p ê Só-an siâⁿ khah-chá chhit-nî.)

(BCL) 對南方上去，到希伯崙；佇遐有亞納族的人亞希幔、示篩、撻買。（希伯崙城起造比埃及的鎖安城卡早七年。）

23

(THR) In kàu Í-sı̍t-kok ê soaⁿ-kok, tùi-hia chhò phû-tô-chhiū chı̍t-ki, téng-bīn ū chı̍t-pha phû-tô, nn̄g-lâng ēng kǹg-á kng i; koh tòa kóa-á sia̍h-liû, kap bû-hoa-kó lâi.

(BCL) 到以實各的山谷，對遐剉葡萄樹一支，頂面有一葩葡萄，二人用槓仔扛伊，閣帶寡仔石榴及無花果來。（

24

(THR) In-ūi Í-sek-lia̍t lâng tùi-hia chhò chı̍t pha phû-tô, hit só͘-chāi chiah hō-chòe Í-sı̍t-kok ê soaⁿ-kok.

(BCL) 因為以色列人對遐剉一葩葡萄，彼所在才號做以實各的山谷。）

25

(THR) In thau-khòaⁿ hit ê tōe sì-cha̍p jı̍t kú chiah tò-lâi.

(BCL) 偷看彼個地，四十日久才倒來，

26

(THR) Kàu Pa-lân ê khòng-iá ê Ka-te-su, kìⁿ Mô͘-se, A-lûn, kap Í-sek-lia̍t ê hōe-chiòng, hê-hok in kap chôan-hōe; koh ēng hit só͘-chāi ê ké-chí hō͘ in khòaⁿ.

(BCL) 到巴蘭的曠野的加低斯，見摩西、亞倫，及以色列的會眾，回覆及全會，閣用彼所在的果子互看；

27

(THR) Koh kā i kóng, Góan kàu lí só͘ chhe góan khì ê tōe, kó-jiân sī lâu lin kap bı̍t ê tōe; che chiū-sī hit ê tōe ê ké-chí.

(BCL) 閣給伊講：「阮到你所差阮去的地，果然是流奶及蜜的地；這就是彼個地的果子。

28

(THR) Chóng-sī hit só͘-chāi ê peh-sìⁿ ióng-chòng, siâⁿ iā kian-kò͘ khoah-tōa; góan tī-hia iā khòaⁿ-kìⁿ A-la̍p cho̍k.

(BCL) 總是彼所在的百姓勇壯，城也堅固闊大，阮佇遐也看見亞衲族。

29

(THR) A-má-le̍k lâng tiàm tī lâm-hng; Hek lâng, Iâ-pò͘-su lâng, A-mô͘-lī lâng, tiàm tī soaⁿ-tōe; Ka-lâm lâng tiàm tī hái-piⁿ, kap Iok-tàn hô-piⁿ.

(BCL) 亞瑪力人踮佇南方；赫人、耶布斯人、亞摩利人踮佇山地；迦南人踮佇海邊及約但河邊。」

30

(THR) Ka-le̍k tī Mô͘-se ê bīn-chêng an-ùi peh-sìⁿ, kóng, Lán tio̍h lı̍p-khek chiūⁿ-khì lâi tit-tio̍h hit só͘-chāi; lán ū kàu-gia̍h ê la̍t ōe khah-iâⁿ in.

(BCL) 迦勒佇摩西的面前安慰百姓，講：「咱著立刻上去來得著彼所在！咱有夠額的力會卡贏。」

31

(THR) To̍k-to̍k hiah-ê kap i chiūⁿ-khì ê lâng kóng, Lán bōe-ōe chiūⁿ-khì kong-kek hiah ê peh-sìⁿ; in-ūi in pí lán khah ióng-chòng.

(BCL) 獨獨許個及伊上去的人講：「咱會上去攻擊許個百姓，因為比咱卡勇壯。」

32

(THR) In hiah ê lâng, lūn só͘ thau-khòaⁿ ê tōe, tùi Í-sek-lia̍t lâng pò pháiⁿ siau-sit, kóng, Góan só͘ keng-kè thau-khòaⁿ ê tōe, sī thun-chia̍h hiah ê khiā-khí ê peh-sìⁿ ê tōe; góan tī-hia só͘ khòaⁿ-kìⁿ ê peh-sìⁿ lóng chin tōa-hàn.

(BCL) 許個人論所偷看的地，對以色列人報歹消息，講：「阮所經過、偷看的地是吞食許個徛起的百姓的地，阮佇遐所看見的百姓攏真大漢。

33

(THR) Góan tī-hia khòaⁿ-kìⁿ A-la̍p cho̍k lâng, chiū-sī tōa-hàn lâng, in sī tōa-hàn lâng ê hō͘-è; chiàu góan khòaⁿ ka-kī chhin-chhiūⁿ chháu-meh, chiàu in khòaⁿ góan iā sī án-ni.

(BCL) 阮佇遐看見亞納族人，就是大漢人；是大漢人的後裔。照阮看，家己親像草蜢；照看，阮也是按呢。」

Bible Color Mark

• 台語漢字羅馬本
• 巴克禮全羅