民數記 第 17 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí kā Í-sek-lia̍t lâng kóng, tùi in kia̍h kóaiⁿ-á, ta̍k chi-phài chı̍t-ki, chiū-sī tùi hiah ê chi-phài ê siú-léng, kiōng kia̍h cha̍p-jī ki; lí siá ta̍k-lâng ê miâ tī i ê kóaiⁿ-á.

(BCL) 「你給以色列人講，對抬枴仔，逐支派一支；就是對許個支派的首領，共抬十二支。你寫逐人的名佇伊的枴仔，

3

(THR) Tī Lī-bī hit-ki kóaiⁿ-á tio̍h siá A-lûn ê miâ; in-ūi ta̍k chi-phài ê thâu-lâng lóng ū chı̍t ki kóaiⁿ-á.

(BCL) 佇利未彼支枴仔著寫亞倫的名，因為逐支派的頭人攏有一支枴仔。

4

(THR) Lí tio̍h chiong hiah-ê hē tī hōe-bō͘-lāi hoat-kūi ê thâu-chêng, chiū-sī Góa kap lín siong-hōe ê só͘-chāi.

(BCL) 你著將許個下佇會幕內法櫃的頭前，就是我及恁相會的所在。

5

(THR) Góa só͘ kéng hit-lâng, i ê kóaiⁿ-á beh puh-gê; án-ni Góa beh hō͘ Í-sek-lia̍t lâng ai-òan ê ōe, chiū-sī in só͘ ai-òan lín ê ōe, lóng soah, bô koh hō͘ Góa thiaⁿ-kìⁿ.

(BCL) 我所揀彼人，伊的枴仔欲發芽。按呢，我欲互以色列人哀怨的話就是所哀怨恁的話攏息，無閣互我聽見。」

6

(THR) Mô͘-se chiū kā Í-sek-lia̍t lâng kóng; in ê siú-léng chiū ēng kóaiⁿ-á kau hō͘ i, chiàu in ê chi-phài chı̍t ê siú-léng chı̍t-ki, kiōng cha̍p-jī ki kóaiⁿ-á; A-lûn ê kóaiⁿ-á iā tī hiah ê kóaiⁿ-á ê tiong-kan.

(BCL) 摩西就給以色列人講，的首領就用枴仔交互伊，照的支派一個首領一支；一個首領一支，共十二支柺仔；亞倫的枴仔也佇許個枴仔的中間。

7

(THR) Mô͘-se chiū chiong hiah ê kóaiⁿ-á hē tī hoat-kūi ê pò͘-pîⁿ-lāi, tī Iâ-hô-hoa ê bīn-chêng.

(BCL) 摩西就將許個柺仔下佇法櫃的布棚內，佇耶和華的面前。

8

(THR) Bîn-á-jı̍t Mô͘-se jı̍p-khì hoat-kūi ê pò͘-pîⁿ; khòaⁿ ah, sio̍k Lī-bī ê ke, A-lûn ê kóaiⁿ-á, í-keng puh-gê, siⁿ hoe-m̂, khui-hoe, kiat-chiâⁿ hēng-jîn.

(BCL) 明仔日，摩西入去法櫃的布棚。看啊，屬利未的家亞倫的枴仔已經發芽，生花苺，開花，結成杏仁。

9

(THR) Mô͘-se tùi Iâ-hô-hoa ê bīn-chêng kia̍h hiah ê kóaiⁿ-á chhut-lâi, kàu Í-sek-lia̍t ê chèng-lâng hia; in khòaⁿ-kìⁿ ta̍k-lâng kia̍h in ê kóaiⁿ-á.

(BCL) 摩西對耶和華的面前抬許個枴仔出來，到以色列的眾人遐；看見，逐人抬的枴仔。

10

(THR) Iâ-hô-hoa tùi Mô͘-se kóng, Ēng A-lûn ê kóaiⁿ-á iû-gôan hē tī hoat-kūi chêng, lâu-teh, chòe chiah ê pōe-ge̍k ê lâng ê kàm-kài; án-ni lí chiū hō͘ in tùi Góa ai-òan ê ōe soah, bián-tit in sí-bô.

(BCL) 耶和華對摩西講：「用亞倫的枴仔猶原下佇法櫃前，留做諸個悖逆的人的的鑑戒。按呢，你就互對我哀怨的話息，免得死無。」

11

(THR) Mô͘-se án-ni kiâⁿ, sī chiàu Iâ-hô-hoa só͘ bēng-lēng-ê lâi kiâⁿ.

(BCL) 摩西按呢行。是照耶和華所命令的來行。

12

(THR) Í-sek-lia̍t lâng tùi Mô͘-se kóng, Khòaⁿ ah, góan sí lah, góan bia̍t-bô lah, lóng bia̍t-bô lah.

(BCL) 以色列人對摩西講：「看啊，阮死啦！阮滅無啦！攏滅無啦！

13

(THR) Kìⁿ-nā óa-kūn, chiū-sī óa-kūn Iâ-hô-hoa ê hōe-bō͘ ê, lóng sí; góan beh lóng-chóng sí mah?

(BCL) 見若倚近就是倚近耶和華的會幕的攏死。阮欲攏總死嗎？」

Bible Color Mark

• 台語漢字羅馬本
• 巴克禮全羅