腓立比書 第 4 章

1

(THR) Só͘-í góa só͘ thiàⁿ só͘ him-bō͘ ê hiaⁿ-tī, chòe góa ê hoaⁿ-hí, chòe góa ê bián-liû ê, só͘ thiàⁿ ê ah, tio̍h án-ni khiā-chāi tī Chú.

(BCL) 所以我所疼、所欣慕的兄弟，做我的歡喜，做我的冕旒的。所疼的啊，著按呢徛在佇主。

2

(THR) Góa khǹg Iú-o-tia koh khǹg Sûn-to͘-ki, tio̍h tâng-sim tī Chú.

(BCL) 我勸友阿爹閣勸循都基，著同心佇主。

3

(THR) Koh chin ê tâng-phōaⁿ ah, góa iā kiû lí pang-chān chí nn̄g ê hū-jîn-lâng, in-ūi in bat kap góa tâng chhut-la̍t tī hok-im, iā kap Kek-lī-bián, í-kı̍p kî-û kap góa tâng tio̍h-bôa ê, in ê miâ kì tī o̍ah-miā ê chheh.

(BCL) 閣真的同伴啊，我也求你幫助此二個婦仁人，因為曾及我同出力佇福音；也及革利免，以及其餘及我同著磨的，的名記佇活命的冊。

4

(THR) Tio̍h siông-siông tiàm-tī Chú lâi hoaⁿ-hí; góa beh koh kóng i, Tio̍h hoaⁿ-hí.

(BCL) 著常常佇主來歡喜。我欲閣講伊，著歡喜。

5

(THR) Lín ê sûn-liông tio̍h tùi chèng lâng hián-bêng. Chú kūn lah.

(BCL) 恁的純良著對眾人顯明。主近了。

6

(THR) It-khài bo̍h-tit khòa-lū; to̍k-to̍k bān sū tio̍h ēng kî-tó khún-kiû kap kám-siā, chiong lín só͘ kiû ê pâi-lia̍t tī Siōng-tè;

(BCL) 一概莫得掛慮，獨獨萬事著用祈禱、懇求，及感謝，將恁所求的排列佇上帝。

7

(THR) chiū Siōng-tè ê pêng-an, pôaⁿ-kè it-chhè lâng só͘ siūⁿ ōe kàu ê, beh tī Ki-tok Iâ-so͘ pó-siú lín ê sim, lín ê liām-thâu.

(BCL) 就上帝的平安、過一切人所想會到的，欲佇基督耶穌保守恁的心恁的念頭。

8

(THR) Taⁿ hiaⁿ-tī ah, kiat-bé lâi kóng, kìⁿ-nā chin-sı̍t ê, kìⁿ-nā khó-kèng ê, kìⁿ-nā kong-gī ê, kìⁿ-nā chheng-kiat ê, kìⁿ-nā thang thiàⁿ ê, kìⁿ-nā hó miâ-siaⁿ ê, nā ū sím-mı̍h tek-hēng, sím-mı̍h thang o-ló, chiah-ê lín tio̍h siàu-liām.

(BCL) 今兄弟啊，結尾來講：見若真實的、見若可敬的、見若公義的、見若清潔的、見若通疼的、見若好名聲的、若有甚麼德行、甚麼通謳咾，諸個恁著數念。

9

(THR) Lín tùi góa só͘ ha̍k-sı̍p, só͘ niá-siū, só͘ thiaⁿ-kìⁿ, só͘ khòaⁿ-kìⁿ ê, lóng tio̍h kiâⁿ i; chiū siúⁿ-sù pêng-an ê Siōng-tè beh kap lín tī-teh.

(BCL) 恁對我所學習，所領受，所聽見，所看見的，攏著行伊，就賞賜平安的上帝欲及恁佇。

10

(THR) Góa tiàm-tī Chú tōa-tōa hoaⁿ-hí, in-ūi lín siàu-liām góa ê sim-chì taⁿ ū koh puh-íⁿ; lín pêng-sò͘ ū chit hō siàu-liām, put-kò sī bô ki-hōe nā-tiāⁿ.

(BCL) 我佇主大大歡喜，因為恁數念我的心志今有閣發芛；恁平素有此號數念，不過是無機會若定。

11

(THR) Góa kóng án-ni, m̄ sī ūi-tio̍h ēng bô kàu ê iân-kò͘; in-ūi góa í-keng ha̍k-sı̍p, put-lūn sím-mı̍h kéng-gū, bô m̄ ti-chiok.

(BCL) 我講按呢呣是為著用無夠的緣故；因為我已經學習，不論甚麼境遇無呣知足。

12

(THR) Góa chai-iáⁿ tiàm-tī pi-chiān, iā chai-iáⁿ tiàm-tī hù-chiok; he̍k-sī pá, he̍k-sī iau, he̍k-sī hù-chiok, he̍k-sī kheh-khiàm, hōan sū góa lóng láu-liān.

(BCL) 我知影佇卑賤，也知影佇富足；或是飽，或是枵；或是富足，或是缺欠，凡事我攏老練。

13

(THR) Tiàm-tī siúⁿ-sù góa khùi-la̍t ê, góa sū-sū lóng ōe.

(BCL) 佇賞賜我氣力的，我事事攏會。

14

(THR) Sui sī án-ni, lín thé-thiap góa ê hōan-lān, che sī chin hó.

(BCL) 雖是按呢，恁體貼我的患難這是真好。

15

(THR) Hui-lı̍p-pí lâng ah, lín iā ka-kī chai tī thôan hok-im ê khí-thâu, góa lī-khui Má-kî-tùn ê sî, kap góa chiap-chhiú ê chí ū lín, pa̍t ê kàu-hōe bô;

(BCL) 腓立比人啊，恁也家己知佇傳福音的起頭，我離開馬其頓的時，及我接手的，只有恁，別個教會無。

16

(THR) in-ūi liân góa tī Thiap-sat-lô-nî-ka ê sî, lín iā chı̍t pái koh chı̍t pái chhe lâng kiong-kip góa só͘ khiàm-ēng.

(BCL) 因為連我佇帖撒羅尼迦的時，恁也一擺閣一擺差人供給我所欠用。

17

(THR) M̄ sī góa teh kiû lâng sàng mı̍h, to̍k-to̍k sī kiû ké-chí ná chōe, lâi kì-lo̍h lín ê siàu.

(BCL) 呣是我求人送物，獨獨是求果子愈多，來記落恁的數。

18

(THR) Nā-sī góa ū chiah ê mı̍h, kàu-gia̍h ū chhun; góa í-keng chhiong-chiok, sī bat tùi Í-pa-hut-thê siū-tio̍h lín kià-lâi ê mı̍h, chiū-sī phang-phang ê bī, chòe thang chiap-la̍p ê chè-mı̍h, Siōng-tè só͘ hoaⁿ-hí ê.

(BCL) 若是我有諸個物，夠額有剩。我已經充足，是曾對以巴弗提受著恁寄來的物，就是芳芳的味，做通接納的祭物，上帝所歡喜的。

19

(THR) Koh góa ê Siōng-tè beh chiàu I êng-kng tiong ê pù-ū, tī Ki-tok Iâ-so͘, pó͘-chiok lín it-chhè ê khiàm-kheh.

(BCL) 閣我的上帝欲照伊榮光中的富有，佇基督耶穌，補足恁一切的欠缺。

20

(THR) Gōan êng-kng kui tī lán ê Siōng-tè lán ê Pē, kàu tāi-tāi bô soah. À-bēng.

(BCL) 願榮光歸佇咱的上帝咱的父，到代代無息。阿們！

21

(THR) Chhéng-an tiàm-tī Ki-tok Iâ-so͘ ta̍k ê sèng-tô͘. Chiah ê kap góa tī-teh ê hiaⁿ-tī chhéng-an lín.

(BCL) 請安佇基督耶穌逐個聖徒。諸個及我佇的兄弟請安恁。

22

(THR) Chiah ê sèng-tô͘ lóng chhéng-an lín; sio̍k tī Kai-sat ê ke ê, koh khah tì-ì chhéng-an lín.

(BCL) 諸個聖徒攏請安恁。屬佇該撒的家的閣卡致意請安恁。

23

(THR) Gōan Chú Iâ-so͘ Ki-tok ê un-tián kap lín ê sîn saⁿ-kap tī-teh.

(BCL) 願主耶穌基督的恩典及恁的神相及佇！

Bible Color Mark

• 台語漢字羅馬本
• 巴克禮全羅