詩篇 第 103 章

1

(THR) Tāi-pı̍t ê si.1) Góa ê sim-sîn ah, lí tio̍h o-ló Iâ-hô-hoa; Hōan-nā tī góa lāi-bīn--ê, ia̍h tio̍h o-ló I ê sèng-miâ.

(BCL) 〔大衛的詩。〕我的心神啊，你著謳咾耶和華！凡若佇我內面者，亦著謳咾伊的聖名！

2

(THR) Góa ê sim-sîn ah, lí tio̍h o-ló Iâ-hô-hoa; M̄-thang bōe-kì-tit I it-chhè ê un-hūi;

(BCL) 我的心神啊，你著謳咾耶和華！呣通記得伊一切的恩惠！

3

(THR) I sià-bián lí lóng-chóng ê chōe; I-hó lí lóng-chóng ê pīⁿ;

(BCL) 伊赦免你攏總的罪，醫好你攏總的病。

4

(THR) I kiù-sio̍k lí ê sìⁿ-miā thoat-lī sí-bô; Ēng jîn-ài kap chû-pi chòe lí ê bián-liû;

(BCL) 伊救贖你的生命脫離死無，用仁愛及慈悲做你的冕旒。

5

(THR) Ēng hó-mı̍h chiok lí ê sim-gōan; Hō͘ lí ho̍k-tò siàu-liân chhin-chhiūⁿ eng-chiáu.

(BCL) 用好物足你的心願，互你復倒少年親像鷹鳥。

6

(THR) Iâ-hô-hoa kiâⁿ kong-gī, Ūi-tio̍h it-chhè siū un-khut ê lâng sin-oan.

(BCL) 耶和華行公義，為著一切受冤屈的人伸冤。

7

(THR) Ēng I ê tō-lō͘ chí-sī Mô͘-se, Ēng I ê kiâⁿ-chòe chí-sī Í-sek-lia̍t lâng.

(BCL) 用伊的道路指示摩西，用伊的行做指示以色列人。

8

(THR) Iâ-hô-hoa ū lîn-bín, ū un-tián; Bô khòai-khòai siū-khì, koh ū hong-sēng ê chû-ài.

(BCL) 耶和華有憐憫，有恩典，無快快受氣，閣有豐盛的慈愛。

9

(THR) I bô tn̂g-tn̂g chek-pī, Ia̍h bô éng-óan khǹg siū-khì.

(BCL) 伊無長長責備，亦無永遠囥受氣。

10

(THR) I bô chiàu lán ê chōe-kòa khóan-thāi lán, Ia̍h bô chiàu lán ê chōe-ok pò-èng lán.

(BCL) 伊無照咱的罪過款待咱，亦無照咱的罪惡報應咱。

11

(THR) In-ūi thiⁿ lī-khui tōe hiah--nih kôaiⁿ, I ê chû-ài tùi kèng-ùi I ê lâng ia̍h sī hiah--nih tōa.

(BCL) 因為天離開地許呢高，伊的慈愛對敬畏伊的人亦是許呢大！

12

(THR) Tang lī-khui sai ū jōa-hn̄g, I hō͘ lán ê chōe-kòa lī-khui lán ia̍h sī hiah hn̄g.

(BCL) 東離開西有偌遠，伊互咱的罪過離開咱亦是許遠！

13

(THR) Lāu-pē cháiⁿ-iūⁿ lîn-bín i ê kiáⁿ-jî, Iâ-hô-hoa lîn-bín kèng-ùi I ê lâng ia̍h sī án-ni.

(BCL) 老父怎樣憐憫伊的子兒，耶和華憐憫敬畏伊的人亦是按呢！

14

(THR) In-ūi I chai lán ê thé-chit, Siàu-liām lán sī thô͘-hún.

(BCL) 因為伊知咱的體質，數念咱是土粉。

15

(THR) Lūn-kàu lâng, i ê jı̍t-chí chhin-chhiūⁿ chháu, I ê heng-ōng chhin-chhiūⁿ soaⁿ--nih ê hoe.

(BCL) 論到人，伊的日子親像草。伊的興旺親像山裡的花，

16

(THR) Keng-kè hong chı̍t-ē chhe, chiū bô--khì; I ê gôan-ūi bōe koh jīn--tit.

(BCL) 經過風一下吹，就無去；伊的原位閣認得。

17

(THR) Chóng-sī Iâ-hô-hoa ê chû-ài kui tī kèng-ùi I ê lâng, tùi éng-óan kàu éng-óan; I ê kong-gī iā kui tī kiáⁿ-kiáⁿ sun-sun;

(BCL) 總是耶和華的慈愛歸佇敬畏伊的人，對永遠到永遠；伊的公義也歸佇子子孫孫──

18

(THR) Chiū-sī hiah ê chun-siú I ê iok, Kì-liām I ê kà-sī lâi chun-thàn ê lâng.

(BCL) 就是許個遵守伊的約、記念伊的教示來遵趁的人。

19

(THR) Iâ-hô-hoa tī thiⁿ-téng siat-lı̍p I ê pó-chō, I ê kok-kôan kóan-hat bān-hāng-ū.

(BCL) 耶和華佇天頂設立伊的寶座；伊的國權管轄萬項有。

20

(THR) Lín chiah ê ū tōa kôan-lêng ê thiⁿ-sài ah, Thiaⁿ I ê siaⁿ, chiâⁿ I ê bēng-lēng ê, Lóng tio̍h o-ló Iâ-hô-hoa.

(BCL) 恁諸個有大權能的天使啊，聽伊的聲、成伊的命令的，攏著謳咾耶和華！

21

(THR) Lín chiah ê chòe I ê chèng kun-peng, chòe I ê chhe-sài, kiâⁿ I só͘ hoaⁿ-hí--ê, Lóng tio̍h o-ló Iâ-hô-hoa.

(BCL) 恁諸個做伊的眾軍兵，做伊的差使，行伊所歡喜者，攏著謳咾耶和華！

22

(THR) Lín it-chhè siū I chhòng-chō--ê, tī I só͘ kóan-lí ê ta̍k-ūi, Lóng tio̍h o-ló Iâ-hô-hoa. Góa ê sim-sîn ah, lí tio̍h o-ló Iâ-hô-hoa.

(BCL) 恁一切受伊創造者，佇伊所管理的逐位，攏著謳咾耶和華！我的心神啊，你著謳咾耶和華！

Bible Color Mark

• 台語漢字羅馬本
• 巴克禮全羅