詩篇 第 109 章

1

(THR) Tāi-pı̍t ê si; kau hō͘ Ga̍k-koaⁿ.1) Góa só͘ o-ló ê Siōng-tè ah, kiû Lí bo̍h-tit chēng-chēng;

(BCL) 〔大衛的詩，交互樂官。〕我所謳咾的上帝啊，求你莫得靜靜。

2

(THR) In-ūi pháiⁿ-lâng ê chhùi, kap kan-chà ê chhùi, in í-keng thí-khui kong-kek góa; In ēng pe̍h-chha̍t ê chı̍h tùi góa kóng-ōe.

(BCL) 因為歹人的嘴及奸詐的嘴已經展開攻擊我；用白賊的舌對我講話。

3

(THR) In ēng òan-hūn ê ōe pau-ûi góa; Koh bô in-toaⁿ lâi kong-kek góa.

(BCL) 用怨恨的話，包圍我，閣無因端來攻擊我。

4

(THR) Góa thiàⁿ--in, in hóan-tńg chòe góa ê tùi-te̍k; To̍k-to̍k góa choan-bū kî-tó.

(BCL) 我疼，反轉做我的對敵，獨獨我專務祈禱。

5

(THR) In tùi góa ēng pháiⁿ pò hó, Ēng òan-hūn pò jîn-ài.

(BCL) 對我用歹報好，用怨恨報仁愛。

6

(THR) Gōan Lí phài chı̍t ê pháiⁿ-lâng kóan-hat i, Phài chı̍t ê tùi-te̍k khiā tī i ê chiàⁿ-pêng.

(BCL) 願你派一個歹人管轄伊，派一個對敵徛佇伊的正旁！

7

(THR) I siū sím-phòaⁿ ê sî, gōan i chhut-lâi siū tēng-chōe; Gōan i ê kî-tó pìⁿ-chòe chōe-kòa.

(BCL) 伊受審判的時，願伊出來受定罪！願伊的祈禱變做罪過！

8

(THR) Gōan i ê jı̍t-chí té-chió; Gōan pa̍t-lâng tit-tio̍h i ê chit.

(BCL) 願伊的日子短少！願別人得著伊的職！

9

(THR) Gōan i ê kiáⁿ-jî chòe ko͘-jî, I ê bó͘ chòe kóaⁿ-hū.

(BCL) 願伊的子兒做孤兒，伊的某做寡婦！

10

(THR) Gōan i ê kiáⁿ-jî sì-kòe khì kiû-khit; Tùi in pha-hng ê só͘-chāi chhut-lâi thó-chia̍h.

(BCL) 願伊的子兒四界去求乞，對拋荒的所在出來討食！

11

(THR) Gōan chè-chú ēng kè-tì chhú i it-chhè só͘-ū--ê; Gōan siⁿ-hūn-lâng chhiúⁿ i tio̍h-bòa só͘ tit-tio̍h--ê.

(BCL) 願債主用計智取伊一切所有的！願生份人搶伊著磨所得著的！

12

(THR) Gōan bô lâng chiap-sio̍k si-un hō͘ i; Gōan bô lâng khó-lîn i ê ko͘-jî.

(BCL) 願無人接續施恩互伊！願無人可憐伊的孤兒！

13

(THR) Gōan i ê hō͘-è tōan-cho̍at, In ê miâ-jī siū chhat-bia̍t, bô thôan tī ē-tāi.

(BCL) 願伊的後裔斷絕，的名字受擦滅，無傳佇下代！

14

(THR) Gōan i ê chó͘-kong ê chōe-ok hō͘ Iâ-hô-hoa kì-tit; Gōan i ê lāu-bú ê chē-kòa bô tit-tio̍h chhat-siau.

(BCL) 願伊的祖公的罪惡互耶和華記得！願伊的老母的罪過無得著擦消！

15

(THR) Gōan hiah ê chōe-ok siông-siông tī Iâ-hô-hoa ê bīn-chêng, Tì-kàu I bia̍t in ê miâ tī sè-kan.

(BCL) 願許個罪惡常常佇耶和華的面前，致到伊滅的名佇世間！

16

(THR) In-ūi i bô siūⁿ-tio̍h beh kiâⁿ lîn-bín; Hóan-tńg khún-pek hit ê sòng-hiong khùn-khó͘ ê lâng, Beh hāi-sí hiah ê siong-sim ê lâng.

(BCL) 因為伊無想著欲行憐憫，反轉窘迫彼個喪鄉困苦的人，欲害死許個傷心的人。

17

(THR) I ài chiù-chó͘, chiù-chó͘ chiū kàu tī i; I m̄-ài chiok-hok, chiok-hok chiū lī-khui i hn̄g-hn̄g.

(BCL) 伊愛咒詛，咒詛就到佇伊；伊呣愛祝福，祝福就離開伊遠遠！

18

(THR) I ēng chiù-chó͘ chòe saⁿ lâi chhēng; chiù-chó͘ chiū chhin-chhiūⁿ chúi jı̍p i ê pak-lāi, Chhin-chhiūⁿ iû jı̍p i ê kut.

(BCL) 伊用咒詛做衫來穿；咒詛就親像水入伊的腹內，親像油入伊的骨。

19

(THR) Gōan chit ê chiù-chó͘ chòe i chhēng tī sin-khu ê i-ho̍k, Chòe i siông-siông hâ ê io-tòa.

(BCL) 願此個咒詛做伊穿佇身軀的衣服，做伊常常縖的腰帶！

20

(THR) Che chiū-sī góa ê tùi-te̍k, kap ēng pháiⁿ-ōe kong-kek góa ê sîn-hûn ê lâng, Tùi Iâ-hô-hoa hia só͘ siū ê pò-èng.

(BCL) 這就是我的對敵及用歹話攻擊我的神魂的人，對耶和華遐所受的報應。

21

(THR) Chú Iâ-hô-hoa ah, kiû Lí in-ūi Lí ê miâ hó khóan-thāi góa; In-ūi Lí ê chû-ài chin-hó, kiû Lí khan-kiù góa.

(BCL) 主──耶和華啊，求你因為你的名好款待我；因為你的慈愛真好，求你牽救我！

22

(THR) In-ūi góa sòng-hiong, khùn-khó͘, Góa ê lāi-sim siū-siong.

(BCL) 因為我喪鄉困苦，我的內心受傷。

23

(THR) Góa ê hè-siū chhin-chhiūⁿ jı̍t-iáⁿ chiām-chiām chhiâ; Góa chhin-chhiūⁿ chháu-meh siū kóaⁿ-chhut.

(BCL) 我的歲壽親像日影漸漸斜；我親像草蜢受趕出。

24

(THR) Góa in-ūi kìm-chia̍h, kha-thâu-u sng-nńg; Góa ê bah siau-sán, bô lūn-te̍k.

(BCL) 我因為禁食，腳頭窩酸軟；我的肉消瘦無潤澤。

25

(THR) Góa siū in ê húi-pòng; In khòaⁿ-kìⁿ góa, chiū iô-thâu.

(BCL) 我受的誹謗，看見我就搖頭。

26

(THR) Iâ-hô-hoa góa ê Siōng-tè ah, kiû Lí pang-chān góa; Chiàu Lí ê chû-ài chín-kiù góa;

(BCL) 耶和華──我的上帝啊，求你幫助我，照你的慈愛拯救我，

27

(THR) Hō͘ in chai che sī chhut tī Lí ê chhiú; Sī Lí Iâ-hô-hoa só͘ kiâⁿ ê sū.

(BCL) 互知這是出佇你的手，是你──耶和華所行的事。

28

(THR) Chhut-chāi in chiù-chó͘, kiû Lí sù-hok; In khí--lâi ê sî, beh tú-tio̍h kiàn-siàu, Lí ê lô͘-po̍k beh hoaⁿ-hí.

(BCL) 出在咒詛，求你賜福；起來的時欲抵著見誚，你的奴僕欲歡喜。

29

(THR) Gōan góa ê tùi-te̍k ēng lêng-jio̍k chòe-saⁿ chhēng; Gōan in ēng in ê kiàn-siàu chòe phàu, moa sin-khu.

(BCL) 願我的對敵用凌辱做衫穿！願用的見誚做袍身軀！

30

(THR) Góa beh ēng góa ê chhùi tōa-tōa kám-siā Iâ-hô-hoa; Góa beh tī chèng-lâng ê tiong-kan o-ló I.

(BCL) 我欲用我的嘴大大感謝耶和華；我欲佇眾人的中間謳咾伊；

31

(THR) In-ūi I beh khiā tī sòng-hiong lâng ê chiàⁿ-pêng, Beh kiù i thoat-lī sím-phòaⁿ i ê sìⁿ-miā ê lâng.

(BCL) 因為伊欲徛佇喪鄉人的正旁，欲救伊脫離審判伊的生命的人。

Bible Color Mark

• 台語漢字羅馬本
• 巴克禮全羅