詩篇 第 33 章

1

(THR) Lín gī-lâng ah, tio̍h in-ūi Iâ-hô-hoa lâi hoaⁿ-hí; Chèng-tı̍t ê lâng ê o-ló sī ha̍p-gî.

(BCL) 恁義人啊，著因為耶和華來歡喜；正直的人的謳咾是合宜。

2

(THR) Lín tio̍h tôaⁿ-khîm kám-siā Iâ-hô-hoa; Ēng cha̍p-tiâu hiân ê sek o-ló I.

(BCL) 恁著彈琴感謝耶和華，用十條弦的瑟謳咾伊。

3

(THR) Tio̍h tùi I chhiùⁿ sin ê koa, Tôaⁿ kàu chin hó, siaⁿ-im hiáng-liāng.

(BCL) 著對伊唱新的歌，彈到真好，聲音響亮。

4

(THR) In-ūi Iâ-hô-hoa ê giân-gú chèng-tı̍t; Hōan I só͘ chòe--ê, it-chīn sī sêng-sı̍t.

(BCL) 因為耶和華的言語正直；凡伊所做的一盡是誠實。

5

(THR) I hoaⁿ-hí gī-lí kap kong-pêng; Iâ-hô-hoa ê chû-ài móa-móa tī tōe-chiūⁿ.

(BCL) 伊歡喜義理及公平；耶和華的慈愛滿滿佇地上。

6

(THR) Chiah ê thiⁿ tùi Iâ-hô-hoa ê ōe lâi chō, Thiⁿ--nih ê bān-lūi tùi I ê chhùi ê khì lâi chiâⁿ.

(BCL) 諸個天對耶和華的話來造；天裡的萬類對伊的嘴的氣來成。

7

(THR) I chū-chı̍p hái-chúi chhin-chhiūⁿ kui-tui, Siu-khǹg chhim-ian tī khò͘-pâng.

(BCL) 伊聚集海水親像歸堆，收囥深淵佇庫房。

8

(THR) Chôan-tōe tio̍h kèng-ùi Iâ-hô-hoa; Hōan-nā khiā-khí tī sè-chiūⁿ--ê, lóng tio̍h kiaⁿ I.

(BCL) 全地著敬畏耶和華！凡若徛起佇世上的攏著驚伊！

9

(THR) In-ūi I kóng-chhut chiū ū; I bēng-lēng chiū khiā-chāi.

(BCL) 因為伊講出就有，伊命令就徛在。

10

(THR) Iâ-hô-hoa hō͘ lia̍t-pang ê kè-e̍k kui tī khang-khang; Hō͘ chèng peh-sìⁿ só͘ siūⁿ--ê, bô kong-hāu.

(BCL) 耶和華互列邦的計劃歸佇空空，互眾百姓所想的無功效。

11

(THR) Iâ-hô-hoa ê kè-e̍k éng-óan khiā-chāi, I ê sim só͘ siūⁿ--ê kàu bān sè-tāi.

(BCL) 耶和華的計劃永遠徛在；伊的心所想的到萬世代。

12

(THR) Jīn Iâ-hô-hoa chòe i ê Siōng-tè--ê, hit kok ū hok-khì; I kéng-sóan chòe I ê sán-gia̍p--ê, hit ê peh-sìⁿ ū hok-khì.

(BCL) 認耶和華做伊的上帝的，彼國有福氣！伊揀選做伊的產業的，彼個百姓有福氣！

13

(THR) Iâ-hô-hoa tùi thiⁿ teh khòaⁿ; I kàm-chhat lóng-chóng ê sè-kan lâng.

(BCL) 耶和華對天看；伊鑑察攏總的世間人。

14

(THR) I tùi I khiā-khí ê só͘-chāi ǹg gōa-bīn, Khòaⁿ tōe-chiūⁿ it-chhè khiā-khí ê peh-sìⁿ.

(BCL) 伊對伊徛起的所在向外面看地上一切徛起的百姓──

15

(THR) I sī chō-chiâⁿ in chèng-lâng ê sim--ê, Liû-sim tī in it-chhè ê só͘-chòe--ê.

(BCL) 伊是造成眾人的心者，留心佇一切的所做的。

16

(THR) Kun-ông bōe-ōe in-ūi peng chōe tit-tio̍h kiù; Béng-lâng bōe-ōe in-ūi khùi-la̍t tōa tit-tio̍h kiù-chhut.

(BCL) 君王會因為兵多得著救；猛人會因為氣力大得著救出。

17

(THR) Óa-khò bé tit-tio̍h kiù, sī bô chhái-kang; Bōe-ōe ēng i ê tōa la̍t lâi kiù lâng.

(BCL) 倚靠馬得著救是無採工；會用伊的大力來救人。

18

(THR) Iâ-hô-hoa ê ba̍k-chiu khòaⁿ kèng-ùi I ê lâng, Khòaⁿ ǹg-bāng I ê chû-ài ê lâng;

(BCL) 耶和華的目睭看敬畏伊的人，看向望伊的慈愛的人，

19

(THR) Beh kiù in ê sìⁿ-miā thoat-lī sí-bô, Pó-chûn in ê o̍ah-miā tī ki-hng ê sî.

(BCL) 欲救的生命脫離死無，保存的活命佇飢荒的時。

20

(THR) Góan ê sim-sîn pêng-sò͘ thèng-hāu Iâ-hô-hoa; I sī chòe góan ê pang-chān, chòe góan ê tîn-pâi.

(BCL) 阮的心神平素聽候耶和華；伊是做阮的幫助，做阮的盾牌。

21

(THR) Góan ê sim beh óa-khò I lâi hoaⁿ-hí, In-ūi góan pêng-sò͘ óa-khò I ê sèng-miâ.

(BCL) 阮的心欲倚靠伊來歡喜，因為阮平素倚靠伊的聖名。

22

(THR) Iâ-hô-hoa ah, gōan Lí ê chû-ài lîm-kàu góan, Chiàu góan só͘ ǹg-bāng Lí ê.

(BCL) 耶和華啊，願你的慈愛臨到阮，照阮所向望你的！

Bible Color Mark

• 台語漢字羅馬本
• 巴克禮全羅