詩篇 第 41 章

1

(THR) Tāi-pı̍t ê si, kau hō͘ Ga̍k-koaⁿ.1) Kòan-kò͘ sòng-hiong lâng ê, ū hok-khì; Tng hōan-lān ê jı̍t, Iâ-hô-hoa beh kiù i.

(BCL) 〔大衛的詩，交互樂官。〕眷顧喪鄉人的有福氣！當患難的日，耶和華欲救伊。

2

(THR) Iâ-hô-hoa beh pó-chôan i, hō͘ i o̍ah--teh, i beh tī tōe-chiūⁿ hióng-hok; Kiû Lí m̄-thang chiong i kau hō͘ tùi-te̍k, lâi chiàu in só͘ ài.

(BCL) 耶和華欲保全伊，互伊活；伊欲佇地上享福。求你呣通將伊交互對敵，來照所愛。

3

(THR) I tó chāi-chhn̂g, Iâ-hô-hoa beh hû-chhî i; I phòa-pīⁿ ê sî, Lí beh liāu-lí i ê phē-pho͘.

(BCL) 伊倒在床，耶和華欲扶持伊；伊破病的時，你欲料理伊的被舖。

4

(THR) Góa bat kóng, Iâ-hô-hoa ah, kiû Lí lîn-bín góa; I-hó góa ê sim-sîn, in-ūi góa ū tek-chōe tī Lí.

(BCL) 我曾講：耶和華啊，求你憐憫我，醫好我的心神！因為我有得罪佇你。

5

(THR) Góa ê tùi-te̍k ēng pháiⁿ-ōe gī-lūn góa, kóng, I tī-sî ōe sí, i ê miâ tī-sî ōe bia̍t-bô?

(BCL) 我的對敵用歹話議論我講：伊底時會死，伊的名底時會滅無？

6

(THR) I nā lâi khòaⁿ góa, chiū kóng bô-iáⁿ ōe; I ê sim chek-chū kan-ok, Chhut-khì gōa-kháu, chiū sì-kòe kóng.

(BCL) 伊若來看我就講無影話；伊的心積聚奸惡，出去外口就四界講。

7

(THR) It-chhè òan-hūn góa ê lâng chi-bú chi-chū gī-lūn góa; In siat kè-bô͘ beh hāi góa;

(BCL) 一切怨恨我的人，嗤舞嗤呲議論我；設計謀欲害我。

8

(THR) In kóng, Ū kòai-pīⁿ tiâu tī i ê seng-khu; I í-keng tó-chhn̂g, éng bōe koh khí--lâi.

(BCL) 講：有怪病住佇伊的身軀；伊已經倒床，永閣起來。

9

(THR) Liân góa ti-kí ê pêng-iú, góa só͘ óa-khò, chia̍h góa ê piáⁿ--ê, Kia̍h-khí kha-āu-tiⁿ that góa.

(BCL) 連我知己的朋友，我所倚靠、食我的餅者，抬起腳後踢我。

10

(THR) Iâ-hô-hoa ah, kiû Lí lîn-bín góa, Hō͘ góa khí-lâi thang pò-èng in.

(BCL) 耶和華啊，求你憐憫我，互我起來，通報應！

11

(THR) In-ūi góa ê tùi-te̍k bōe tit-tio̍h tùi góa khoa-kháu khah-iâⁿ; Góa tùi án-ni chiū chai Lí hoaⁿ-hí góa.

(BCL) 因為我的對敵得著對我誇口卡贏，我對按呢就知你歡喜我。

12

(THR) Lūn-kàu góa, Lí in-ūi góa ê sûn-chôan chiū hû-chhî góa, Hō͘ góa éng-óan khiā tī Lí ê bīn-chêng.

(BCL) 論到我，你因為我的純全就扶持我，互我永遠徛佇你的面前。

13

(THR) Tio̍h o-ló Iâ-hô-hoa Í-sek-lia̍t ê Siōng-tè, Tùi éng-óan kàu éng-óan, A-bēng, koh A-bēng.

(BCL) 著謳咾耶和華──以色列的上帝，對永遠到永遠。阿們！閣阿們！

Bible Color Mark

• 台語漢字羅馬本
• 巴克禮全羅