詩篇 第 57 章

1

(THR) Tāi-pı̍t siám-pī Sò-lô, bih tī tōng-lāi; hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hōai--ê".1) Siōng-tè ah, kiû Lí khó-lîn góa, khó-lîn góa; Góa ê sin beh tâu-hioh tī Lí; Góa beh tâu-hioh tī Lí sı̍t-kó͘ ê tì-ìm-ē, Thèng-hāu chiah ê chai-ē keng-kè.

(BCL) 〔大衛閃避掃羅，匿佇洞內。彼時，伊做此個金的詩，交互樂官。調是用「莫得毀壞的」。〕上帝啊，求你可憐我，可憐我！我的身欲投歇佇你。我欲投歇佇你翅股的致蔭下，聽候諸個災禍經過。

2

(THR) Góa beh kiû-kiò Chì-kôaiⁿ ê Siōng-tè; Chiū-sī kā góa chhiâⁿ-tî ta̍k-hāng sū ê Siōng-tè.

(BCL) 我欲求叫至高的上帝，就是給我成持逐項事的上帝。

3

(THR) Tng hit ê beh thun-chia̍h góa ê lâng húi-pòng góa ê sî, Siōng-tè beh si-un, tùi thiⁿ kiù góa; [Sè-la̍h Ia̍h beh hoat-chhut I ê chû-ài, kap I ê sêng-sı̍t.

(BCL) 當彼個欲吞食我的人誹謗我的時，上帝欲施恩對天救我，亦欲發出伊的慈愛及伊的誠實。

4

(THR) Góa ê sìⁿ-miā tī sai ê tiong-kan; Góa tó tī chhin-chhiūⁿ hé to̍h ê sè-kan lâng ê tiong-kan; In ê chhùi-khí sī chhiuⁿ sī chìⁿ, In ê chı̍h sī lāi-to.

(BCL) 我的生命佇獅的中間；我倒佇親像火的世間人的中間。的嘴齒是槍、是箭；的舌是利刀。

5

(THR) Siōng-tè ah, gōan Lí kôaiⁿ-tōa pôaⁿ-kè chiah ê thiⁿ, Gōan Lí ê êng-kng pôaⁿ-kè chôan-tōe.

(BCL) 上帝啊，願你高大過諸個天！願你的榮光過全地！

6

(THR) In kā góa ê kha-pō͘ siat lô-bāng, Ap-chè góa ê sim-sîn; In tī góa ê bīn-chêng khui hām-khiⁿ, Ka-kī hóan-tńg po̍ah-lo̍h hit lāi-bīn. [Sè-la̍h

(BCL) 給我的腳步設羅網，壓制我的心神；佇我的面前開陷坑，家己反轉跋落彼內面。（細拉）

7

(THR) Siōng-tè ah, góa ê sim chū-chāi, góa ê sim chū-chāi; Góa beh gîm-si, góa beh chhiùⁿ-koa o-ló.

(BCL) 上帝啊，我的心自在，我的心自在；我欲吟詩，我欲唱歌謳咾！

8

(THR) Góa ê sîn ah, lí tio̍h cheng-sîn khí-lâi; Khîm ah, sek ah, lín tio̍h cheng-sîn khí-lâi; Góa pún-sin beh chin chá cheng-sîn khí-lâi.

(BCL) 我的神啊，你著精神起來！琴啊，瑟啊，恁著精神起來！我本身欲真早精神起來！

9

(THR) Chú ah, Góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí.

(BCL) 主啊，我欲佇萬百姓的中間感謝你，佇列邦的中間唱歌謳咾你！

10

(THR) In-ūi Lí ê chû-ài tōa kàu tú-thiⁿ, Lí ê sêng-sı̍t kàu kiong-chhong.

(BCL) 因為，你的慈愛大到抵天；你的誠實到穹蒼。

11

(THR) Siōng-tè ah, gōan Lí kôaiⁿ-tōa pôaⁿ-kè chiah ê thiⁿ; Gōan Lí ê êng-kng pôaⁿ-kè chôan-tōe.

(BCL) 上帝啊，願你高大過諸個天！願你的榮光過全地！

Bible Color Mark

• 台語漢字羅馬本
• 巴克禮全羅