羅馬書 第 4 章

1

(THR) Án-ni lán beh kóng lán jio̍k-thé ê chó͘ A-pek-la̍h-hán ū tit-tio̍h sím-mı̍h?

(BCL) 按呢，咱欲講咱肉體的祖亞伯拉罕有得著甚麼？

2

(THR) In-ūi A-pek-la̍h-hán nā tùi só͘ kiâⁿ tit-tio̍h chheng-chòe-gī, chiū thang khoa-kháu; chóng-sī tùi Siōng-tè pún sī bô.

(BCL) 因為亞伯拉罕若對所行得著稱做義，就通誇口；總是對上帝本是無。

3

(THR) In-ūi sèng-keng kóng sím-mı̍h? A-pek-la̍h-hán sìn Siōng-tè, chiū kā i sǹg chòe gī.

(BCL) 因為聖經講甚麼？「亞伯拉罕信上帝，就給伊算做義。」

4

(THR) Taⁿ kìⁿ-nā chòe kang ê, i ê kang-chîⁿ bô sǹg sī un-tián, sǹg sī eng-kai ê.

(BCL) 今見若做工的，伊的工錢無算是恩典，算是應該的；

5

(THR) Nā-sī bô chòe kang ê, to̍k-to̍k sìn hit ê chheng put-khiân ê lâng chòe gī ê, i ê sìn chiū kā i sǹg chòe gī.

(BCL) 若是無做工的，獨獨信彼個稱不虔的人做義的，伊的信就給伊算做義。

6

(THR) Chhin-chhiūⁿ Tāi-pı̍t iā kóng-khí lâng lóng bô só͘ kiâⁿ, lâi tit-tio̍h Siōng-tè sǹg i chòe gī ê, ū hok-khì, sī kóng,

(BCL) 親像大衛也講起人攏無所行，來得著上帝算伊做義者，有福氣。

7

(THR) In ê put-hoat tit-tio̍h sià-bián, In ê chōe-ok tit-tio̍ih jia-khàm, hit hō lâng ū hok-khì;

(BCL) 是講：的不法得著赦免，的罪惡得著遮蓋，彼號人有福氣。

8

(THR) Chú bô beh ēng chōe sǹg i ê siàu ê, hit ê lâng ū hok-khì.

(BCL) 主無欲用罪算伊的數的，彼個人有福氣。

9

(THR) Taⁿ chit ê hok-khì sī kàu tī siū kat-lé ê, á-sī iā kàu tī bô siū kat-lé ê ah? in-ūi lán teh kóng, A-pek-la̍h-hán ê sìn sī kā i sǹg chòe gī.

(BCL) 今，此個福氣是到佇受割禮的？抑是也到佇無受割禮的啊？因為咱講，亞伯拉罕的信是給伊算做義，

10

(THR) Án-ni sī cháiⁿ-iūⁿ sǹg? Sī tī kat-lé ê sî, á-sī tī bô kat-lé ê sî? M̄ sī tī kat-lé ê sî, sī tī bô kat-lé ê sî;

(BCL) 按呢是怎樣算？是佇割禮的時？抑是佇無割禮的時？呣是佇割禮的時，是佇無割禮的時。

11

(THR) i iā tit-tio̍h kat-lé ê kì-hō, chiū-sī tī bô siū kat-lé ê sî tùi sìn só͘ ū ê gī ê ìn-sìn; hō͘ i thang chòe lóng-chóng bô siū kat-lé lâi sìn ê lâng ê pē, hō͘ gī thang sǹg chòe in ê;

(BCL) 伊也得著割禮的記號，就是佇無受割禮的時對信所有的義的印信，互伊通做攏總無受割禮來信的人的父，互義通算做的；

12

(THR) iā hō͘ i chòe siū kat-lé ê lâng ê pē, chiū-sī hiah ê m̄ nā siū kat-lé, koh ū thàn lán ê pē A-pek-la̍h-hán bē siū kat-lé ê sî lâi sìn ê kha-pō͘ ê.

(BCL) 也互伊做受割禮的人的父，就是許個呣若受割禮，閣有趁咱的父亞伯拉罕未受割禮的時來信的腳步的。

13

(THR) In-ūi só͘ èng-ún A-pek-la̍h-hán kap i ê hō͘-è chòe hō͘-sû sêng-chiap sè-kan ê, m̄ sī tùi lu̍t-hoat, sī tùi sìn ê gī.

(BCL) 因為所應允亞伯拉罕及伊的後裔做後嗣承接世間的，呣是對律法，是對信的義。

14

(THR) In-ūi nā sio̍k lu̍t-hoat ê chòe hō͘-sû, sìn chiū kui tī khang-khang, èng-ún iā hòe-bô.

(BCL) 因為若屬律法的做後嗣，信就歸佇空空，應允也廢無。

15

(THR) In-ūi lu̍t-hoat sī tì-kàu siū-khì; nā bô lu̍t-hoat, chiū bô hōan-tio̍h.

(BCL) 因為律法是致到受氣；若無律法，就無犯著。

16

(THR) Só͘-í sī tùi sìn, thang chiàu un-tián, beh hō͘ èng-ún kian-kò͘ tī chèng hō͘-è, m̄ nā tī hit ê sio̍k lu̍t-hoat ê, iā tī sio̍k A-pek-la̍h-hán ê sìn ê,

(BCL) 所以是對信，通照恩典，欲互應允堅固佇眾後裔；呣若佇彼個屬律法的，也佇屬亞伯拉罕的信的。

17

(THR) i tī i só͘ sìn ê Siōng-tè ê bīn-chêng chòe lán chèng lâng ê pē, chiū-sī hit ê hō͘ sí lâng koh-o̍ah, kiò hiah ê bô-ê ná chhin-chhiūⁿ ū-ê ê Siōng-tè; chiàu só͘ kì-chài kóng, Góa siat-lı̍p lí chòe chōe-chōe pang-kok ê pē.

(BCL) 伊佇伊所信的上帝的面前做咱眾人的父，就是彼個互死人復活，叫許個無者那親像有者的上帝；照所記載講：「我設立你做多多邦國的父。」

18

(THR) I tī bô thang ǹg-bāng ê tiong-kan, tùi ǹg-bāng lâi sìn, hō͘ i thang chiâⁿ-chòe chōe-chōe pang-kok ê pē, chiàu só͘ bat kóng ê, Lí ê hō͘-è beh chhin-chhiūⁿ án-ni.

(BCL) 伊佇無通向望的中間，對向望來信，互伊通成做多多邦國的父，照所曾講的：「你的後裔欲親像按呢。」

19

(THR) I siūⁿ-tio̍h ka-kī ê seng-khu chhin-chhiūⁿ í-keng sí, (hit sî chiâⁿ pah hè), koh Sat-la̍h ê thai-īn í-keng cho̍at, i ê sìn bô nńg-chiáⁿ;

(BCL) 伊想著家己的身軀親像已經死，（彼時成百歲），閣撒拉的胎孕已經絕，伊的信無軟茈；

20

(THR) i khòaⁿ Siōng-tè ê èng-ún, iā bô tùi m̄ sìn lâi giâu-gî;

(BCL) 伊看上帝的應允，也無對呣信來僥疑，信就愈勇健，來歸榮光上帝，

21

(THR) sìn chiū ná ióng-kiāⁿ, lâi kui êng-kng Siōng-tè;

(BCL) 閣深信上帝會成伊所應允的。

22

(THR) koh chhim sìn Siōng-tè ōe chiâⁿ I só͘ èng-ún ê; só͘-í kā i sǹg chòe gī.

(BCL) 所以，給伊算做義。

23

(THR) Taⁿ só͘ kóng, kā i sǹg, chit kù m̄ sī kan-ta ūi-tio̍h i lâi siá, iā sī ūi-tio̍h lán;

(BCL) 今所講「給伊算」，此句呣是干單為著伊來寫，

24

(THR) lán nā sìn-khò hit ê hō͘ lán ê Chú Iâ-so͘ tùi sí-lâng tiong koh-o̍ah ê Siōng-tè, iā beh kā lán sǹg chòe gī.

(BCL) 也是為著咱，咱若信靠彼個互咱的主耶穌對死人中復活的上帝，也欲給咱算做義。

25

(THR) Iâ-so͘ bat ūi-tio̍h lán ê chōe siū ké-sàng, koh ūi-tio̍h lán ê chheng-chòe-gī lâi tit-tio̍h koh-o̍ah.

(BCL) 耶穌曾為著咱的罪，受解送；閣為著咱的稱做義，來得著復活。

Bible Color Mark

• 台語漢字羅馬本
• 巴克禮全羅