羅馬書 第 6 章

1

(THR) Án-ni lán beh cháiⁿ-iūⁿ kóng? Chóng bô tn̂g-tn̂g tiàm-tī chōe-ok, hō͘ un-tián ke-thiⁿ chōe-chōe mah?

(BCL) 按呢，咱欲怎樣講？總無長長佇罪惡、互恩典加添多多嗎？

2

(THR) Tòan-tòan m̄ thang. Lán ǹg chōe hit bīn í-keng sí ê, kiám beh iû-gôan tī chōe-tiong lâi o̍ah mah?

(BCL) 斷斷呣通！咱向罪彼面已經死的，豈欲猶原佇罪中來活嗎？

3

(THR) Kiám m̄ chai lán kìⁿ-nā bat siū sóe-lé lâi jı̍p tī Ki-tok Iâ-so͘ ê, sī siū sóe-lé lâi jı̍p I ê sí.

(BCL) 豈呣知咱見若曾受洗禮來入佇基督耶穌的，是受洗禮來入伊的死。

4

(THR) Só͘-í lán kì-jiân tùi sóe-lé lâi jı̍p tī sí, kap I tâng bâi-chòng; sī chhin-chhiūⁿ Ki-tok tùi Pē ê êng-kng tùi sí-lâng tiong koh-o̍ah, iā beh hō͘ lán án-ni kiâⁿ tī o̍ah-miā ê sin khóan.

(BCL) 所以，咱既然對洗禮來入佇死，及伊同埋葬，是親像基督對父的榮光對死人中復活，也欲互咱按呢行佇活命的新款。

5

(THR) In-ūi lán nā liân-ha̍p tī I sí ê khóan-sit, iā beh liân-ha̍p tī I koh-o̍ah ê khóan-sit;

(BCL) 因為咱若聯合佇伊死的款式，也欲聯合佇伊復活的款式；

6

(THR) sī chai lán kū ê lâng kap I tâng tèng, hō͘ chōe ê thé ōe hòe-khì, tì-kàu lán bô koh chòe chōe-ok ê lô͘-châi.

(BCL) 是知咱舊的人及伊同釘，互罪的體會廢去，致到咱無閣做罪惡的奴才；

7

(THR) In-ūi í-keng sí-ê sī tit-tio̍h chheng-chòe-gī, lâi thoat-lī chōe.

(BCL) 因為已經死的是得著稱做義，來脫離罪。

8

(THR) Taⁿ lán sìn nā kap Ki-tok tâng sí, chiū beh kap I tâng o̍ah;

(BCL) 今咱信若及基督同死，就欲及伊同活。

9

(THR) chai Ki-tok í-keng tùi sí-lâng tiong koh-o̍ah bô koh sí, sí bô koh kóan-hat I.

(BCL) 知基督已經對死人中復活無閣死，死無閣管轄伊。

10

(THR) In-ūi I ê sí sī ǹg chōe chòe chı̍t pái sí, I ê o̍ah sī ǹg Siōng-tè lâi o̍ah.

(BCL) 因為伊的死，是向罪做一擺死；伊的活是向上帝來活。

11

(THR) Án-ni lín tiàm-tī Ki-tok Iâ-so͘ tio̍h khòaⁿ ka-kī ǹg chōe sī sí, ǹg Siōng-tè sī o̍ah.

(BCL) 按呢，恁佇基督耶穌著看家己向罪是死，向上帝是活。

12

(THR) Só͘-í bo̍h-tit iông-ún chōe-ok chòe ông tī lín ōe sí ê seng-khu, tì-kàu lín sūn-thàn i ê su-io̍k;

(BCL) 所以，莫得容允罪惡做王佇恁會死的身軀，致到恁順趁伊的私慾。

13

(THR) iā bo̍h-tit chiong lín ê pah-thé hiàn hō͘ chōe-ok chòe put-gī ê khì-kū; sī tio̍h chiong pún-sin hiàn hō͘ Siōng-tè, chhin-chhiūⁿ tùi sí-lâng tiong lâi o̍ah ê, iā hiàn lín ê pah-thé hō͘ Siōng-tè, chòe gī ê khì-kū.

(BCL) 也莫得將恁的百體獻互罪惡做不義的器具；是著將本身獻互上帝，親像對死人中來活者，也獻恁的百體互上帝做義的器具。

14

(THR) In-ūi chōe-ok bô koh kóan-hat lín, in-ūi lín m̄ sī tī lu̍t-hoat ē, sī tī un-tián ē.

(BCL) 因為罪惡無閣管轄恁，因為恁呣是佇律法下，是佇恩典下。

15

(THR) Án-ni chiū cháiⁿ-iūⁿ? Lán kì-jiân m̄ sī tī lu̍t-hoat ē, sī un-tián ē, thang hōan-chōe mah? Tòan-tòan m̄ thang.

(BCL) 按呢就怎樣？咱既然呣是佇律法下，是恩典下，通犯罪嗎？斷斷呣通！

16

(THR) Kiám m̄ chai lín hiàn pún-sin chòe lô͘-po̍k lâi sūn-thàn i, chiū-sī chòe só͘ sūn-thàn ê ê lô͘-po̍k, he̍k-sī chòe chōe-ok ê lô͘-po̍k tì-kàu sí, á-sī chòe sūn-thàn ê lô͘-po̍k tì-kàu gī?

(BCL) 豈呣知恁獻本身做奴僕來順趁伊，就是做所順趁者的奴僕？或是做罪惡的奴僕，致到死；抑是做順趁的奴僕，致到義？

17

(THR) Kám-siā Siōng-tè in-ūi lín chêng chòe chōe-ok ê lô͘-po̍k, taⁿ bat kam-sim sūn-thàn lín só͘ jı̍p hit ê kàu-hùn ê kui-bô͘;

(BCL) 感謝上帝！因為恁前做罪惡的奴僕，今曾甘心順趁恁所入彼個教訓的規模。

18

(THR) í-keng tit-tio̍h tháu-pàng thoat-lī chōe, chiū chòe gī ê lô͘-po̍k.

(BCL) 已經得著解放脫離罪，就做義的奴僕。

19

(THR) Góa in-ūi lín jio̍k-thé ê láon-jio̍k, chiū chiàu lâng ê sū lâi kóng; in-ūi chhin-chhiūⁿ lín bat ēng lín ê pah-thé hiàn hō͘ ù-òe put-hoat chòe lô͘-po̍k, tì-kàu put-hoat, taⁿ tio̍h chiàu án-ni ēng lín ê pah-thé hiàn hō͘ gī chòe lô͘-po̍k, tì-kàu chiâⁿ sèng.

(BCL) 我因為恁肉體的軟弱，就照人的事來講。因為親像恁曾用恁的百體獻互污穢不法做奴僕，致到不法；今著照按呢用恁的百體獻互義做奴僕，致到成聖。

20

(THR) In-ūi lín chêng chòe chōe-ok ê lô͘-po̍k, hit sī lín bô hō͘ gī kóan-hat.

(BCL) 因為恁前做罪惡的奴僕，彼時恁無互義管轄。

21

(THR) Tng hit sî lín tit-tio̍h sím-mı̍h ké-chí tī hiān-kim só͘ kiàn-siàu ê ah? in-ūi in ê kiat-kio̍k sī sí.

(BCL) 當彼時恁得著甚麼果子，佇現今所見誚的啊？因為的結局是死。

22

(THR) Taⁿ lín í-keng tit-tio̍h tháu-pàng thoat-lī chōe-ok, lâi chòe Siōng-tè ê lô͘-po̍k, tit-tio̍h ké-chí tì-kàu chiâⁿ-sèng, hit ê kiat-kio̍k sī éng-o̍ah.

(BCL) 今恁已經得著解放脫離罪惡，來做上帝的奴僕，得著果子，致到成聖，彼個結局是永活。

23

(THR) In-ūi chōe-ok ê kang-chîⁿ sī sí, nā-sī Siōng-tè ê un-sù sī éng-o̍ah, chāi-tī lán ê Chú Ki-tok Iâ-so͘.

(BCL) 因為罪惡的工錢是死；若是上帝的恩賜是永活，在佇咱的主基督耶穌。

Bible Color Mark

• 台語漢字羅馬本
• 巴克禮全羅