羅馬書 第 7 章

1

(THR) Hiaⁿ-tī ah, (góa taⁿ sī kap bat lu̍t-hoat ê teh kóng,) lín kiám m̄ chai lu̍t-hoat kóan lâng kàu i chı̍t-sì-lâng mah?

(BCL) 兄弟啊，我今是及識律法的講，恁豈呣知律法管人到伊一世人嗎？

2

(THR) In-ūi ū tiōng-hu ê hū-jîn-lâng, tiōng-hu o̍ah-teh ê sî, i chiū hō͘ lu̍t-hoat só͘ pa̍k lâi tè i ê tiōng-hu; tiōng-hu nā sí, chiū thoat-lī tiōng-hu ê lu̍t-hoat.

(BCL) 因為有丈夫的婦仁人，丈夫活的時，伊就互律法所縛來隨伊的丈夫；丈夫若死，就脫離丈夫的律法。

3

(THR) Só͘-í tiōng-hu tī-teh, nā tè pa̍t lâng, chiū kiò i chòe îm-hū; tiōng-hu nā sí, chiū tit-tio̍h tháu-pàng thoat-lī lu̍t-hoat; sui-jiân tè pa̍t lâng, iā m̄ sī îm-hū.

(BCL) 所以丈夫佇，若隨別人，就叫伊做淫婦；丈夫若死，就得著解放脫離律法，雖然隨別人，也呣是淫婦。

4

(THR) Án-ni góa ê hiaⁿ-tī ah, lín tùi Ki-tok ê seng-khu, ǹg lu̍t-hoat í-keng sí, beh hō͘ lín tè pa̍t-ê, chiū-sī hit ê tùi sí koh-o̍ah ê, hō͘ lán ūi-tio̍h Siōng-tè kiat ké-chí.

(BCL) 按呢，我的兄弟啊，恁對基督的身軀，向律法已經死，欲互恁隨別個，就是彼個對死復活的，互咱為著上帝結果子。

5

(THR) In-ūi lán tiàm-tī jio̍k-thé ê sî, hiah ê chōe-ok ê chêng-io̍k, tùi lu̍t-hoat kek-khí ê, ūn-tōng tī lán ê pah-thé, tì-kàu lán ūi-tio̍h sí kiat ké-chí.

(BCL) 因為咱佇肉體的時，許個罪惡的情慾對律法激起的，運動佇咱的百體，致到咱為著死結果子。

6

(THR) Nā-sī hiān-kim lán ū thoat-lī lu̍t-hoat, sī pêng-sò͘ pé-pa̍k lán ê, lán í-keng ǹg i lâi sí, tì-kàu lán ê ho̍k-sāi sī tī sim-sîn ê sin khóan, m̄ sī tī bûn-jī ê kū khóan.

(BCL) 若是現今咱有脫離律法，是平素把縛咱的，咱已經向伊來死，致到咱的服事是佇心神的新款，呣是佇文字的舊款。

7

(THR) Án-ni lán beh cháiⁿ-iūⁿ kóng? Lu̍t-hoat sī chōe-ok mah? Tòan-tòan m̄ sī; chóng-sī nā bô tùi lu̍t-hoat, góa chiū m̄ chai chōe: in-ūi lu̍t-hoat nā bô kóng, M̄ thang tham-io̍k, góa chiū m̄ chai tham-io̍k;

(BCL) 按呢，咱欲怎樣講？律法是罪惡嗎？斷斷呣是！總是若無對律法，我就呣知罪。因為律法若無講「呣通貪慾」，我就呣知貪慾。

8

(THR) nā-sī chōe-ok sēng ki-hōe, tùi kài-bēng chòe-chiâⁿ ta̍k iūⁿ ê tham-io̍k tī góa ê sim; in-ūi bô lu̍t-hoat, chōe-ok sī sí.

(BCL) 若是罪惡乘機會，對誡命做成逐樣的貪慾佇我的心；因為無律法罪惡是死。

9

(THR) Chêng bô lu̍t-hoat, góa chiū o̍ah; kài-bēng kàu, chōe-ok o̍ah-khí-lâi, góa chiū sí.

(BCL) 前無律法，我就活；誡命到，罪惡活起來，我就死。

10

(THR) Kài-bēng pún sī beh hō͘ lâng o̍ah, chiàu góa kìⁿ-kè hóan-tńg sī hō͘ lâng sí.

(BCL) 誡命本是欲互人活，照我見過反轉是互人死。

11

(THR) In-ūi chōe-ok sēng ki-hōe, tùi kài-bēng khi-phiàn góa, koh tùi i lâi hāi-sí góa.

(BCL) 因為罪惡乘機會，對誡命欺騙我，閣對伊來害死我。

12

(THR) Án-ni-siⁿ lu̍t-hoat sī sèng, kài-bēng iā sī sèng, sī gī, sī hó.

(BCL) 按呢生，律法是聖，誡命也是聖、是義、是好。

13

(THR) Nā-sī án-ni hit ê hó-ê sī hō͘ góa sí mah? Tòan-tòan m̄ sī. Sī chōe-ok tùi hit ê hó-ê hō͘ góa sí, beh hián-chhut i sī chōe-ok; hō͘ chōe-ok tùi kài-bēng chiâⁿ chòe chōe-ok ê ke̍k-thâu.

(BCL) 若是按呢，彼個好的是互我死嗎？斷斷呣是！是罪惡對彼個好的互我死，欲顯出伊是罪惡，互罪惡對誡命成做罪惡的極頭。

14

(THR) In-ūi lán chai lu̍t-hoat sī sio̍k tī sîn ê, nā-sī góa sī sio̍k tī jio̍k-thé ê, í-keng bōe-khì hō͘ chōe-ok.

(BCL) 因為咱知律法是屬佇神的，若是我是屬佇肉體的，已經賣去互罪惡。

15

(THR) In-ūi góa só͘ chòe ê ka-kī m̄ chai; in-ūi góa só͘ teh kiâⁿ ê, m̄ sī góa só͘ ì-ài; hóan-tńg góa só͘ òan ê, góa khì kiâⁿ i.

(BCL) 因為我所做的，家己呣知；因為我所行的，呣是我所意愛；反轉我所怨的，我去行伊。

16

(THR) Taⁿ góa nā kiâⁿ só͘ m̄ ài ê, góa chiū-sī sêng-jīn lu̍t-hoat chòe hó.

(BCL) 今我若行所呣愛的，我就是承認律法做好。

17

(THR) Án-ni kiâⁿ i ê, taⁿ m̄ sī góa, sī tiàm-tī góa sim-lāi ê chōe-ok.

(BCL) 按呢行伊的，今呣是我，是佇我心內的罪惡。

18

(THR) In-ūi góa chai góa lāi-bīn, chiū-sī góa jio̍k-thé lāi, bô hó tī-teh; in-ūi lūn hit ê ì-ài, góa chiū ū, kiâⁿ hit ê hó, góa chiū bô.

(BCL) 因為我知我內面，就是我肉體內，無好佇。因為，論彼個意愛我就有，行彼個好我就無。

19

(THR) In-ūi góa só͘ ì-ài ê hó, góa bô khì kiâⁿ; góa só͘ m̄ ài ê pháiⁿ, hóan-tńg khì kiâⁿ.

(BCL) 因為，我所意愛的好，我無去行；我所呣愛的歹，反轉去行。

20

(THR) To̍k-to̍k góa nā kiâⁿ góa só͘ m̄ ài ê, hit ê teh kiâⁿ ê, taⁿ m̄ sī góa, sī tiàm-tī góa lāi-bīn ê chōe-ok.

(BCL) 獨獨我若行我所呣愛的，彼個行的，今呣是我，是佇我內面的罪惡。

21

(THR) Án-ni góa tit-chai ū chı̍t ê hoat, chiū-sī tng góa ài kiâⁿ hó ê sî, pháiⁿ kap góa tī-teh.

(BCL) 按呢我得知有一個法，就是當我愛行好的時，歹及我佇。

22

(THR) In-ūi góa chiàu lāi-sim sī hoaⁿ-hí Siōng-tè ê lu̍t-hoat.

(BCL) 因為我照內心，是歡喜上帝的律法；

23

(THR) Nā-sī góa khòaⁿ pah-thé tiong ū pa̍t ê hoat kap góa sim-chì ê hoat saⁿ kau-chiàn, lia̍h góa lâi hâng-ho̍k pah-thé lāi chōe-ok ê hoat.

(BCL) 若是我看百體中有別個法及我心志的法相交戰，掠我來降服百體內罪惡的法。

24

(THR) Khó͘ ah, góa ê chòe lâng! chī-chūi beh kiù góa thoat-chhut chit ê tì-kàu sí ê thé ah?

(BCL) 苦啊！我的做人！是誰欲救我脫出此個致到死的體啊？

25

(THR) Kám-siā Siōng-tè sī tùi lán ê Chú Iâ-so͘ Ki-tok. Án-ni góa pún-sin ēng sim-chì sūn-ho̍k Siōng-tè ê hoat, ēng jio̍k-thé sūn-ho̍k chōe-ok ê hoat.

(BCL) 感謝上帝是對咱的主耶穌基督。按呢，我本身用心志順服上帝的法，用肉體順服罪惡的法。

Bible Color Mark

• 台語漢字羅馬本
• 巴克禮全羅