Le̍k-tāi chì-lio̍k siōng-kòan 第 11 章 - 巴克禮全羅

1

Í-sek-lia̍t chèng-lâng chiū chū-chı̍p kàu Hi-pek-lûn kìⁿ Tāi-pı̍t kóng, Khòaⁿ ah, góan sī lí ê kut-jio̍k.

2

Chiông-chêng Sò-lô chòe ông ê sî, chhōa Í-sek-lia̍t lâng chhut-jı̍p--ê, iā sī lí; koh Iâ-hô-hoa lí ê Siōng-tè bat tùi lí kóng, Lí beh chiàu-kò͘ Góa ê peh-sìⁿ Í-sek-lia̍t, iā beh chòe Góa ê peh-sìⁿ Í-sek-lia̍t ê jîn-kun.

3

Tùi án-ni Í-sek-lia̍t chèng tiúⁿ-ló kàu Hi-pek-lûn kìⁿ ông; Tāi-pı̍t chiū tī Hi-pek-lûn, tī Iâ-hô-hoa ê bīn-chêng, kap in lı̍p-iok; in chiū ēng iû boah Tāi-pı̍t chòe Í-sek-lia̍t ông, chiàu Iâ-hô-hoa thok-tiōng Sat-bó͘-jíⁿ só͘ kóng--ê.

4

Tāi-pı̍t kap Í-sek-lia̍t lâng khì kàu Iâ-lō͘-sat-léng, chiū-sī Iâ-pò͘-su. Hit-sî pún-tōe ê Iâ-pò͘-su lâng khiā-khí tī-hia.

5

Khiā-khí tī Iâ-pò͘-su ê lâng kā Tāi-pı̍t kóng, Lí bōe-ōe jı̍p chia. Chóng-sī Tāi-pı̍t kong-chhú Sek-an ê ōe-só͘, chòe Tāi-pı̍t ê siâⁿ.

6

Tāi-pı̍t kóng, Chòe-thâu kong-kek Iâ-pò͘-su lâng--ê, beh chòe siú-léng, chòe gôan-sòe; Sé-ló͘-ngá ê kiáⁿ Iok-ap tāi-seng chiūⁿ-khì, chiū chòe siú-léng.

7

Tāi-pı̍t khiā-khí tī ōe-só͘, só͘-í in kiò i chòe Tāi-pı̍t ê siâⁿ.

8

I khí siâⁿ ê sì-ûi, chiū-sī tùi Bí-lô khí kàu i ê sì-ûi; kî-û--ê, Iok-ap siu-lí--i.

9

Tāi-pı̍t tı̍t-tı̍t khah kiông-tōa, in-ūi bān-kun ê Iâ-hô-hoa kap i tī-teh.

10

Ē-tóe só͘ kì sī Tāi-pı̍t ióng-sū ê thâu-lâng; in kap Í-sek-lia̍t chèng-lâng hùn-ióng, pang-chān i tit-tio̍h kok, siat-lı̍p i chòe-ông, chiàu Iâ-hô-hoa só͘ lūn Í-sek-lia̍t ê ōe.

11

Tāi-pı̍t ióng-sū ê siàu-gia̍h kì tī ē-tóe; Hap-kek-mô͘-nî lâng Ngá-sok-pan, i sī chiah ê chiòng ê siú-léng, i bat chòe chı̍t-sî kia̍h-chhiuⁿ thâi-sí saⁿ-pah lâng.

12

Tē-jī sī A-ha̍p lâng, To-to ê kiáⁿ Í-lī-a-sat; i sī saⁿ ê ióng-sū ê chı̍t-ê.

13

I bat kap Tāi-pı̍t tī Pa-su-ta̍t-bín, Hui-lī-sū lâng chū-chı̍p tī-hia beh kau-chiàn, tī-hia ū chı̍t khu hn̂g tōa-be̍h móa-móa; chèng peh-sìⁿ chiū tī Hui-lī-sū lâng ê bīn-chêng tô-cháu.

14

In khiā tī hit khu hn̂g-tiong lâi pó-hō͘--i. sòa phah-sí Hui-lī-sū lâng; Iâ-hô-hoa chín-kiù in, hō͘ in khah-iâⁿ.

15

Saⁿ-cha̍p ê thâu-lâng tiong ū saⁿ-lâng lo̍h-khì chio̍h-pôaⁿ hia, jı̍p A-thó͘-lân ê tōng kìⁿ Tāi-pı̍t; Hui-lī-sū ê kun-tūi chat-iâⁿ tī Lī-ho̍at-im ê soaⁿ-kok.

16

Hit-sî Tāi-pı̍t tī ōe-só͘, Hui-lī-sū lâng ê peng-iâⁿ tī Pek-lī-hêng.

17

Tāi-pı̍t him-sōan kóng, Sím-mı̍h lâng ōe chiong Pek-lī-hêng siâⁿ-mn̂g-piⁿ ê chíⁿ-chúi, chhiūⁿ lâi hō͘ góa lim?

18

Chí(**Chit) saⁿ-lâng chiū tùi Hui-lī-sū ê kun-iâⁿ chhiong--kè-khì, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, tòa lâi hō͘ Tāi-pı̍t; i m̄ lim, piàⁿ tī Iâ-hô-hoa bīn-chêng, kóng,

19

Góa ê Siōng-tè ah, góa koat-tòan m̄-thang chòe án-ni; chiah ê lâng bô kò͘ sìⁿ-miā, góa kiám káⁿ lim in ê huih mah? In-ūi in bô kò͘ sìⁿ-miā khì chhiūⁿ--lâi. Só͘-í i m̄ lim--i. Chiah ê sū sī chí saⁿ ê ióng-sū chòe--ê.

20

Iok-ap ê hiaⁿ-tī A-pí-su sī hit saⁿ ê ióng-sū tiong ê thâu; in-ūi i kia̍h-chhiuⁿ kong-kek saⁿ-pah lâng lâi thâi-sí, chiū tī chí(**chit) saⁿ-lâng tiong tit-tio̍h miâ.

21

Saⁿ-lâng tiong i pí hit nn̄g-ê khah chhut-tioh, chiū chòe in ê thâu; chóng-sī bōe pí-tit khí-thâu ê saⁿ-lâng.

22

Ū Kah-siat lâng Iâ-hô-iâ-tāi ê kiáⁿ, Pí-ná-ngá, bat chòe-chhut chōe-chōe tōa-sū--ê, thâi-sí Mô͘-ap lâng A-lī-i-le̍k ê nn̄g ê kiáⁿ; koh tī lo̍h-seh ê sî, lo̍h khiⁿ-lāi thâi-sí chı̍t chiah sai.

23

Koh thâi-sí chı̍t ê Ai-kı̍p ê tōa-hàn lâng, ū gō͘ tiú ê kôaiⁿ; Ai-kı̍p lâng chhiú--nih ū chhiuⁿ, tōa chhin-chhiūⁿ pò͘-kui(**ki) ê niû; Pí-ná-ngá kia̍h-kóaiⁿ lo̍h-khì chih--i, chhiúⁿ Ai-kı̍p lâng chhiú-lāi ê chhiuⁿ, chiah ēng i ê chhiuⁿ thâi-sí i.

24

Chiah-ê sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū, chiū tī saⁿ ê ióng-sū tiong tit-tio̍h miâ.

25

I pí saⁿ-cha̍p ê ióng-sū khah chhut-tioh; chóng-sī bōe pí-tit chêng saⁿ ê ióng-sū; Tāi-pı̍t siat-lı̍p i chòe sī-ōe-tiúⁿ.

26

Kun-tūi tiong ê ióng-sū, ū Iok-ap ê hiaⁿ-tī A-sat-hek, Pek-lī-hêng lâng, To-to ê kiáⁿ I-le̍k-hap-lân;

27

Hap-lu̍t lâng Sa-má, Pí-lûn lâng Hi-lī-su;

28

Thê-ko-a lâng Ek-kiat ê kiáⁿ Í-la̍h, A-ná-tu̍t lâng A-pí-í-siā;

29

Hō͘-sa lâng Se-pí-kai, A-ha̍p lâng Í-lâi;

30

Nî-to-hoat lâng Má-khap-lâi, Nî-to-hoat lâng Pa-ná ê kiáⁿ Hi-lı̍p;

31

Piān-ngá-bín cho̍k, Ki-pí-a lâng Lī-pài ê kiáⁿ Í-thài, Pí-la̍h-tùn lâng Pí-ná-ngá;

32

sio̍k Ka-sı̍t chiah ê khoe ê lâng Hō͘-lâi, A-la̍h-pa lâng A-pí;

33

Pa-lō͘-bí lâng A-su-má-hut, Sa-pún lâng I-lī-ngá-hap-pa;

34

Ki-sun lâng Hap-chhim ê chèng-kiáⁿ, Hap-la̍h lâng Sa-ki ê kiáⁿ Iok-ná-tan;

35

Hap-la̍h lâng Sa-kah ê kiáⁿ A-hi-àm, Ngô͘-jíⁿ ê kiáⁿ Í-lī-hoat-le̍k;

36

Bí-ki-la̍h lâng Hi-hut, Pí-lûn lâng A-hi-ngá;

37

Ka-bı̍t lâng Hi-su-lô, I-su-pài ê kiáⁿ Ná-lâi;

38

Ná-tan ê hiaⁿ-tī Iok-jíⁿ, Hap-ki-lī ê kiáⁿ Bî-pek-hap;

39

A-bûn lâng Sé-le̍k, Pí-lio̍k lâng Ná-hap-lâi, Ná-hap-lâi sī kā Sé-ló͘-ngá ê kiáⁿ Iok-ap kia̍h chiàn-khì--ê;

40

Í-thiap lâng Í-la̍h, Í-thiap lâng Ka-lı̍p;

41

Hek-lâng Ou-lī-à, A-lâi ê kiáⁿ Sat-po̍at;

42

Liû-piān lâng Sī-sat ê kiáⁿ, A-tē-ná, i sī Liû-piān chi-phài tiong chı̍t-ê cho̍k-tiúⁿ, chhōa saⁿ-cha̍p lâng;

43

Má-ka ê kiáⁿ Hap-lân, Bî-te̍k-nî lâng Iok-sa-hoat;

44

A-si-tha-la̍h lâng Ou-se-a, A-lô-jíⁿ lâng, Hô-thán ê kiáⁿ Sa-má, Iâ-lī;

45

Thê-sé lâng Sin-lī ê kiáⁿ Iâ-tia̍p, kap i ê hiaⁿ-tī Iok-hap;

46

Má-hap-bī lâng Í-lī-gia̍p, I-lī-ná-an ê kiáⁿ Iâ-lī-pài, Iok-sa-bī-ngá, Mô͘-ap lâng I-te̍k-má;

47

Í-lī-gia̍p, Gô-pī-tek, kap Bí-só-pat lâng Ngá-se-gia̍p.