Le̍k-tāi chì-lio̍k siōng-kòan 第 12 章 - 巴克禮全羅

1

Tāi-pı̍t in-ūi kiaⁿ Ki-sū ê kiáⁿ Sò-lô, siú-teh m̄-káⁿ chhut-khì ê sî, ū chiah ê ióng-sū lâi kàu Sé-kek-la̍h chhē--i, pang-chān i kau-chiàn.

2

In gâu khui-keng, ōe ēng tò-chhiú chiàⁿ-chhiú hiat chio̍h-thâu siā-chìⁿ; lóng sī Piān-ngá-bín lâng Sò-lô ê tâng-cho̍k.

3

Thâu-chı̍t-ê sī A-hi-í-siā, koh ū Iok-a-si, lóng sī Ki-pí-a lâng Sī-má ê kiáⁿ; koh ū Iâ-siat kap Pí-le̍k, sī A-su-má-ui ê kiáⁿ; koh ū Pí-la̍h-ka kap A-ná-tu̍t lâng Iâ-hō͘;

4

Ki-piàn lâng Í-sı̍t-mái-ngá, tī saⁿ-cha̍p lâng tiong sī ióng-sū, iā teh kóan hit saⁿ-cha̍p lâng. Koh ū Iâ-lī-bí, Ngá-hap-sek, Iok-hap-lân, kap Ki-tek-la̍h lâng Iok-sat-po̍at;

5

I-lī-o͘-sài, Iâ-lī-mô͘, Pí-a-lī-ngá, Sī-má-lī-ngá, Hap-lu̍t-hut lâng Sī-hoat-thê-ngá;

6

Khó-la̍h lâng Í-lī-ka-ná, Iâ-se-a, A-sat-lia̍t, Iok-í-siā, Ngá-sok-pan;

7

Ki-to lâng Iâ-lô-hán ê kiáⁿ Iû-la̍h, kap Se-pa-tē-ngá.

8

Ka-tek chi-phài ū kúi-nā lâng kàu khòng-iá ê ōe-só͘, kui-óa Tāi-pı̍t; in lóng sī ióng-sū chiàn-sū, ōe chhut-tīn, giâ pîn-pâi, kia̍h chhiuⁿ, in ê bīn chhin-chhiūⁿ sai ê bīn, gâu cháu chhin-chhiūⁿ soaⁿ--nih ê lo̍k.

9

Thâu-chı̍t-ê Í-siat, tē-jī Gô-pa-tí-ná, tē-saⁿ Í-lī-ap;

10

tē-sì Bî-si-má-ná, tē-gō͘ Iâ-lī-bí;

11

tē-la̍k A-thài, tē-chhit Í-lī-gia̍p;

12

tē-poeh Iok-hap-lân, tē-káu Í-lī-sat-pa;

13

tē-cha̍p Iâ-lī-bí, tē-cha̍p-it bo̍at-pa-nāi.

14

Chiah-ê lóng sī Ka-tek lâng, iā lóng sī kun-tiúⁿ; siōng-bōe--ê ōe tí-tng chı̍t-pah lâng, siōng-ōe--ê ōe tí-tng chı̍t-chheng lâng.

15

Chiaⁿ-ge̍h Iok-tàn hô-chúi tiòng-móa siang-pêng hōaⁿ ê sî, in kè-hô, hō͘ it-chhè tiàm tī soaⁿ-kok ê lâng cháu-tang cháu-sai.

16

Koh ū Piān-ngá-bín Iû-tāi lâng lâi kàu ōe-só͘, chhē Tāi-pı̍t.

17

Tāi-pı̍t chhut-khì ngiâ-chih in; tùi in kóng, Lín nā sī ūi-tio̍h pêng-an lâi pang-chān góa, góa kap lín ê sim chiū saⁿ-khè-ha̍p; chóng-sī lín nā beh chiong góa bô-chōe ê lâng, bōe tī tùi-te̍k ê chhiú, gōan lán lia̍t-chó͘ ê Siōng-tè kàm-chhat chek-ho̍at.

18

Hit-sî Siōng-tè ê Sîn lîm-kàu chiah ê chiòng ê thâu-lâng A-má-sat, i chiū kóng, Tāi-pı̍t ah, góan sī kui tī lí--ê, Iâ-se ê kiáⁿ ah, góan sī pang-chān lí--ê; gōan lí pêng-pêng an-an, gōan pang-chān lí--ê, iā tit-tio̍h pêng-an; in-ūi lí ê Siōng-tè pang-chān lí. Tāi-pı̍t chiū siu-liû in, siat-lı̍p in chòe kun-tiúⁿ.

19

Tāi-pı̍t chiông-chêng kap Hui-lī-sū chhut-tīn beh kong-kek Sò-lô ê sî, ū Má-ná-se chi-phài kúi-nā lâng lâi kui-óa--i, chóng-sī kàu-bé in bô pang-chān in, in-ūi Hui-lī-sū ê thâu-lâng ū gī-lūn tio̍h hō͘ i tò--khì, kóng, I tek-khak kui i ê chú-lâng Sò-lô, tì-kàu lán ê thâu-khak gûi-hiám.

20

Hit-sî Tāi-pı̍t khì Sé-kek-la̍h, ū Má-ná-se lâng ê chhian-chóng, Ap-ná, Iok-sat-po̍at, Iâ-tia̍p, Bí-ka-le̍k, Iok-sat-po̍at, Í-lī-hō͘, Sé-le̍k-thài, lóng lâi kui-óa i.

21

Chiah ê lâng pang-chān Tāi-pı̍t kong-kek thó͘-húi, in lóng sī tōa khùi-la̍t ê ióng-sū, koh chòe kun-tiúⁿ.

22

Hit-sî jı̍t-jı̍t ū lâng kui-óa Tāi-pı̍t, beh pang-chān i, chiū chiâⁿ-chòe tōa kun-tūi, chhin-chhiūⁿ Siōng-tè ê kun-tūi chı̍t-iūⁿ.

23

Pī-pān kau-chiàn ê kun-tūi kàu Hi-pek-lûn kìⁿ Tāi-pı̍t, beh chiàu Iâ-hô-hoa ê ōe î-sóa Sò-lô ê kok-ūi hō͘ Tāi-pı̍t, in ê siàu-gia̍h kì tī ē-bīn.

24

Iû-tāi chi-phài, giâ pîn-pâi kia̍h chhiuⁿ pī-pān kau-chiàn ê, ū la̍k-chheng poeh-pah lâng.

25

Se-biān ê chi-phài, ōe chhut-tīn ê ióng-sū, ū chhit-chheng chı̍t-pah lâng.

26

Lī-bī chi-phài sì-chheng la̍k-pah lâng.

27

Iâ-hô-iâ-tāi sī A-lûn ê ke ê siú-léng, tè-i--ê ū saⁿ-chheng chhit-pah lâng.

28

Koh ū siàu-liân lâng Sat-tok sī tōa ióng-sū, kap i pún-ke ê cho̍k-tiúⁿ jī-cha̍p-jī lâng.

29

Piān-ngá-bín ê chi-phài, chiū-sī Sò-lô ê tâng-cho̍k, saⁿ-chheng lâng; in-ūi kàu hit-sî, chit-cho̍k tōa-pòaⁿ iáu-kú iòng(**ióng)-hō͘ Sò-lô ê ke.

30

Í-hoat-liân chi-phài ê tōa ióng-sū, tī pún-cho̍k chhut-miâ--ê, ū nn̄g-bān liân poeh-pah lâng.

31

Má-ná-se pòaⁿ-chi-phài kì-miâ--ê, kiōng chı̍t-bān poeh-chheng, lóng lâi siat-lı̍p Tāi-pı̍t chòe-ông.

32

Í-sat-ka chi-phài ū tì-sek, bat sî-sè, chai Í-sek-lia̍t só͘ tio̍h kiâⁿ--ê, in ê thâu-lâng ū nn̄g-pah; in ê hiaⁿ-tī lóng thàn in ê bēng-lēng.

33

Se-pò͘-lûn ū ōe-chhut-tīn--ê, lóng gâu kau-chiàn, ōe ēng ta̍k-iūⁿ ê kun-khì--ê, ū gō͘-bān lâng; in ōe pâi tūi-ngó͘, bô nn̄g-iūⁿ sim.

34

Sio̍k Ná-hut-tha-lī--ê, ū chı̍t-chheng ê kun-tiúⁿ; giâ pîn-pâi kia̍h chhiuⁿ lâi tè in-ê, ū saⁿ-bān chhit-chheng lâng.

35

Tàn ê chi-phài, ōe pâi-tīn ê, nn̄g-bān poeh-chheng la̍k-pah lâng.

36

Sio̍k A-siat--ê, ōe chhut-kun pâi-tīn--ê, ū sì-bān lâng.

37

Iok-tàn-hô ê tang-pêng, Liû-piān lâng, Ka-tek lâng, Má-ná-se pòaⁿ-chi-phài ê lâng, kia̍h ta̍k-iūⁿ ê kun-khì lâi kau-chiàn--ê, ū cha̍p-jī-bān lâng.

38

Chiah ê chiàn-sū lóng ōe pâi tūi-ngó͘, sêng-sı̍t sim kàu Hi-pek-lûn, beh siat-lı̍p Tāi-pı̍t chòe Í-sek-lia̍t chôan-kok ê ông; Í-sek-lia̍t kî-û ê lâng, iā tâng chı̍t-iūⁿ ê sim, beh siat-lı̍p Tāi-pı̍t chòe-ông.

39

In tiàm hia saⁿ-jı̍t kú, kap Tāi-pı̍t saⁿ-kap tiàm, iā lim iā chia̍h, in-ūi in ê hiaⁿ-tī kā in pī-pān piān-piān.

40

Óa-kūn in ê lâng, tı̍t kàu Í-sat-ka, Se-pò͘-lûn, Ná-hut-tha-lī ê lâng, chiong lû, lo̍k-tô, lô, gû, chài mī-hún chia̍h-mı̍h, kap bû-hoa-kó-piáⁿ, phû-tô-koaⁿ, chiú, iû, lâi hia; iā ū tòa gû iûⁿ, lóng chin-chōe; in-ūi tī Í-sek-lia̍t tiong ū tōa hoaⁿ-hí.