Le̍k-tāi chì-lio̍k siōng-kòan 第 13 章 - 巴克禮全羅

1

Tāi-pı̍t kap chiah ê chhian-chóng pé-chóng, kap chiah ê thâu-lâng chham-siông.

2

Tāi-pı̍t tùi Í-sek-lia̍t chôan-hōe kóng, Lín nā lia̍h-chòe hó, koh sī chhut tī Iâ-hô-hoa lán ê Siōng-tè ê ì-sù, taⁿ lán chiū chhe lâng piàn kiâⁿ Í-sek-lia̍t chôan-tōe, kìⁿ lán hiah-ê iáu-chhun ê hiaⁿ-tī, kap tiàm-tī ū kau-iá ê siâⁿ ê chè-si Lī-bī lâng, hō͘ in lóng chū-chı̍p kàu lán chia.

3

Lán chiū thang tòa lán ê Siōng-tè ê iok-kūi kàu lán chia; in-ūi Sò-lô ê sî-chūn, lán bô ēng hit-ê lâi mn̄g Siōng-tè.

4

Chôan-hōe lóng kóng, Thang án-ni kiâⁿ; chèng peh-sìⁿ lóng khòaⁿ chit ê tāi-chì chòe hó.

5

Tùi án-ni Tāi-pı̍t tiàu Í-sek-lia̍t lâng, tùi Ai-kı̍p Se-hat ê khoe, tı̍t-kàu Hap-má chhut-jı̍p ê só͘-chāi, beh tòa Siōng-tè ê iok-kūi, tùi Ki-lia̍t-iâ-lîm lâi.

6

Tāi-pı̍t kap Í-sek-lia̍t chèng-lâng chiū kàu Pa-la̍h, chiū-sī sio̍k Iû-tāi ê Ki-lia̍t-iâ-lîm, ài beh tùi hia tòa hit-ê tiàm tī ki-lō͘-peng tiong-kan Iâ-hô-hoa Siōng-tè ê iok-kūi, chiū-sī ēng I miâ lâi chheng-ho͘--ê.

7

In ēng sin ê chhia chài Siōng-tè ê iok-kūi, tùi A-pí-ná-ta̍t ê chhù chhut-lâi, Ou-sat kap A-hi-iok kóaⁿ-chhia.

8

Tāi-pı̍t kap Í-sek-lia̍t chèng-lâng tī Siōng-tè ê bīn-chêng chīn-la̍t chhiùⁿ-koa, ēng khîm, sek, lô, kó͘, hō-thâu, chok-ga̍k thiàu-bú.

9

Kàu Ki-tùn ê gō͘-kak-tiûⁿ, in-ūi gû tio̍h-tak, Ou-sat chhun-chhiú hōaⁿ hit ê kūi.

10

Iâ-hô-hoa siū-khì Ou-sat, in-ūi i chhun-chhiú hōaⁿ iok-kūi, chiū phah i; i chiū sí tī-hia, tī Siōng-tè ê bīn-chêng.

11

Tāi-pı̍t in-ūi Iâ-hô-hoa phah Ou-sat, chiū bô hoaⁿ-hí, hō hit ê só͘-chāi chòe Pí-lia̍t-su-o͘-sat, tı̍t-kàu kin-á-jı̍t.

12

Hit-jı̍t Tāi-pı̍t kiaⁿ Siōng-tè, chiū kóng, Góa thái-thó thang tòa Siōng-tè ê iok-kūi kàu góa ê só͘-chāi?

13

Tùi án-ni Tāi-pı̍t bô tòa iok-kūi kàu Tāi-pı̍t ê siâⁿ, ka-kī ê só͘-chāi; chiū chóan kàu Ka-te̍k lâng Gô-pia̍t-í-tong ê ke.

14

Siōng-tè ê iok-kūi tī Gô-pia̍t-í-tong ê ke, tī i ê chhù saⁿ-ge̍h-jı̍t kú; Iâ-hô-hoa sù-hok tī Gô͘-pia̍t-í-tong ê ke, kap i it-chhè só͘-ū--ê.