Le̍k-tāi chì-lio̍k siōng-kòan 第 14 章 - 巴克禮全羅

1

Chhui-lô ông Hi-lân chhe sù-chiá tòa pek-hiuⁿ-chhâ, kap thô͘-chúi sai-hū, chòe-ba̍k sai-hū, kàu Tāi-pı̍t hia, beh kā i khí chhù.

2

Tāi-pı̍t chai Iâ-hô-hoa tiāⁿ-tio̍h siat-lı̍p i chòe Í-sek-lia̍t ông, koh ūi-tio̍h I ê peh-sìⁿ Í-sek-lia̍t ê iân-kò͘, lâi heng-khí i ê kok.

3

Tāi-pı̍t tī Iâ-lō͘-sat-léng koh chhōa kúi-nā ê bó͘. Tāi-pı̍t koh siⁿ kiáⁿ cha-bó͘-kiáⁿ.

4

Tī Iâ-lō͘-sat-léng só͘ siⁿ chiah ê kiáⁿ ê miâ kì tī ē-tóe: Sa-bó͘-a, Sok-pa, Ná-tan, Só͘-lô-bûn;

5

Ek-hat, Í-lī-su-a, Í-hoat-lia̍t;

6

Lô-ka, Nî-húi, Ngá-hui-a;

7

Í-lī-sa-má, Pí-lī-ngá-tāi, Í-lī-hoat-lia̍t.

8

Hui-lī-sū lâng thiaⁿ-kìⁿ Tāi-pı̍t siū boah-iû chòe Í-sek-lia̍t chôan-kok ê ông, Hui-lī-sū lâng chiū lóng chiūⁿ-lâi chhē Tāi-pı̍t; Tāi-pı̍t thiaⁿ-kìⁿ chiū chhut-khì tí-te̍k i.

9

Hui-lī-sū lâng lâi, pâi-lia̍t tī Lī-ho̍at-im ê soaⁿ-kok.

10

Tāi-pı̍t mn̄g Siōng-tè kóng, Góa tio̍h chiūⁿ-khì kong-kek Hui-lī-sū lâng mah? Lí beh chiong in kau tī góa ê chhiú mah? Iâ-hô-hoa kóng, Tio̍h chiūⁿ-khì, in-ūi Góa beh chiong in kau tī lí ê chhiú.

11

In chiūⁿ-lâi Pa-le̍k-pí-la̍h-sim, Tāi-pı̍t tī-hia phah in; Tāi-pı̍t kóng, Siōng-tè ēng góa ê chhiú chhiong-sòaⁿ góa ê tùi-te̍k, chhin-chhiūⁿ chúi chhiong-sòaⁿ chı̍t-iūⁿ; in-ūi án-ni kiò hit só͘-chāi chòe Pa-le̍k-pí-la̍h-sim.

12

Hui-lī-sū lâng pàng-hē in ê siōng-tè tī-hia; Tāi-pı̍t bēng-lēng lâng ēng hé sio i.

13

Hui-lī-sū lâng koh pâi-lia̍t tī soaⁿ-kok;

14

Tāi-pı̍t koh mn̄g Siōng-tè, Siōng-tè kā i kóng, M̄-thang chiūⁿ-khì tui-jip; tio̍h siám tùi piⁿ-á; tī sng-châi-chhiū ê tùi-bīn lâi kong-kek in.

15

Lí thiaⁿ-kìⁿ sng-châi chhiū-bé ū kha-pō͘ ê siaⁿ, chiū tio̍h chhut-khì kau-chiàn; in-ūi Siōng-tè chòe lí ê thâu-chêng chhut-khì beh phah Hui-lī-sū lâng.

16

Tāi-pı̍t chiū chun-thàn Siōng-tè só͘ hoan-hù; in phah Hui-lī-sū lâng ê kun-tūi, tùi Ki-piàn kàu Ki-sek.

17

Tāi-pı̍t ê miâ-siaⁿ chiū pò-iông ta̍k só͘-chāi; Iâ-hô-hoa hō͘ lia̍t-kok lóng kiaⁿ i.