Le̍k-tāi chì-lio̍k siōng-kòan 第 20 章 - 巴克禮全羅

1

Nî-thâu lia̍t-ông chhut-lâi kau-chiàn ê sî, Iok-ap chhōa kun-peng húi-hōai A-bûn lâng ê tōe, ûi-khùn La̍h-pa; Tāi-pı̍t iû-gôan tiàm tī Iâ-lō͘-sat-léng. Iok-ap phah La̍h-pa ê siâⁿ chhia-tó i.

2

Tāi-pı̍t chhiúⁿ in ê ông só͘ tì kim ê bián-liû, chhìn i ê kim tāng chı̍t tha-liân-tek, koh siuⁿ pó-chio̍h; lâng chiong chit ê bián-liû tì tī Tāi-pı̍t ê thâu-khak; Tāi-pı̍t tùi siâⁿ-lāi chhiúⁿ i ê châi-bu̍t chōe-chōe.

3

Chiong siâⁿ-lāi ê lâng thoa-chhut--lâi, ēng kù-á, ēng thih-pê, ēng pó͘-thâu thâi-sí in; Tāi-pı̍t ēng án-ni khóan-thāi A-bûn ta̍k ê siâⁿ. Tāi-pı̍t chiū kap chèng peh-sìⁿ lóng tò-khì Iâ-lō͘-sat-léng.

4

Liáu-āu kap Hui-lī-sū lâng kau-chiàn tī Ki-sek; Hō͘-sa lâng Se-pí-kai thâi-sí tōa-hàn lâng chı̍t ê kiáⁿ, miâ-kiò Se-phài; Hui-lī-sū lâng chiū hâng-ho̍k.

5

Koh kap Hui-lī-sū lâng kau-chiàn, hit-sî Gâi-jíⁿ ê kiáⁿ I-le̍k-ha̍p-lân thâi-sí Ka-te̍k lâng, Ko-lī-a ê hiaⁿ-tī La̍h-hap-bí; chit-lâng ê chhiuⁿ-pìⁿ tōa chhin-chhiūⁿ pò͘-kui(**ki) ê te̍k-sim.

6

Koh tī Ka-te̍k kau-chiàn, tī-hia ū chı̍t ê tōa-hàn lâng, chhiú-kha lóng ū la̍k-ki chńg-thâu-á, kiōng ū jī-cha̍p-sì ki, i iā sī tōa-hàn lâng ê kiáⁿ.

7

Chit-lâng bú-bān Í-sek-lia̍t lâng ê sî, Tāi-pı̍t ê hiaⁿ Sī-bí-a ê kiáⁿ Iok-ná-tan thâi-sí i.

8

Chiah ê lâng lóng sī tī Ka-te̍k ê tōa-hàn lâng siⁿ-ê; in lóng sí tī Tāi-pı̍t ê chhiú, kap i ê jîn-sîn ê chhiú.