Le̍k-tāi chì-lio̍k siōng-kòan 第 21 章 - 巴克禮全羅

1

Sat-tàn khí-lâi ài hāi Í-sek-lia̍t, ín-iú Tāi-pı̍t sǹg Í-sek-lia̍t lâng ê siàu-gia̍h.

2

Tāi-pı̍t kā Iok-ap kap peh-sìⁿ-tiong ê siú-léng kóng, Lín khì sǹg Í-sek-lia̍t lâng, tùi Pia̍t-sī-pa kàu Tàn, tò-lâi kā góa kóng, hō͘ góa chai in ê siàu-gia̍h.

3

Iok-ap kóng, Gōan Iâ-hô-hoa hō͘ I ê peh-sìⁿ pí hiān-kim ke-thiⁿ pah-pē, góa ê chú góa ê ông ah, in kiám bô lóng sī góa ê chú ê peh-sìⁿ mah? góa ê chú siáⁿ-sū bēng-lēng chit ê tāi-chì? siáⁿ-sū hō͘ Í-sek-lia̍t hōan-chōe ah?

4

Chóng-sī ông ê ōe iâⁿ-kè Iok-ap. Iok-ap chiū chhut-khì piàn-kiâⁿ Í-sek-lia̍t tōe, koh tò-lâi Iâ-lō͘-sat-léng.

5

Iok-ap chiū chiong só͘ sǹg peh-sìⁿ ê chóng-gia̍h, pò-kò Tāi-pı̍t. Í-sek-lia̍t lâng ōe kia̍h-to--ê, chı̍t-pah-cha̍p-bān; Iû-tāi lâng ōe kia̍h-to--ê, sì-cha̍p-chhit-bān.

6

To̍k-to̍k Lī-bī lâng kap Piān-ngá-bín lâng i bô sǹg chāi-lāi, in-ūi Iok-ap iàm-ò͘ⁿ ông chit ê bēng-lēng.

7

Chit ê sū Siōng-tè khòaⁿ-chòe m̄-hó, chiū phah Í-sek-lia̍t.

8

Tāi-pı̍t tùi Siōng-tè kóng, Góa kiâⁿ chit ê sū, tōa-tōa ū chōe, taⁿ kiû Lí tû-khì Lí ê lô͘-po̍k ê chōe, in-ūi góa só͘ chòe--ê chin gōng.

9

Iâ-hô-hoa hoan-hù Tāi-pı̍t ê sian-kiàn--ê Ka-tek, kóng,

10

Lí tio̍h khì kā Tāi-pı̍t kóng, Iâ-hô-hoa án-ni kóng, Taⁿ Góa ēng saⁿ-hāng pâi tī lí bīn-chêng, lí kéng chı̍t-hāng, Góa thang kiâⁿ tī lí.

11

Ka-tek chiū lâi kìⁿ Tāi-pı̍t, kā i kóng, Iâ-hô-hoa án-ni kóng, Lí tio̍h ka-kī kéng;

12

kiám-chhái saⁿ-nî ê ki-hng, á-sī saⁿ-ge̍h-jı̍t kú tú-tio̍h sún-hāi tī lí ê tùi-te̍k ê bīn-chêng, hō͘ kiû-siû ê to-kiàm jip-tio̍h lí, á-sī saⁿ-jı̍t kú Iâ-hô-hoa ê kiàm, chiū-sī un-e̍k tī lí ê kok-lāi, Iâ-hô-hoa ê sù-chiá tī Í-sek-lia̍t ê piàn-kéng teh húi-bia̍t; taⁿ lí tio̍h siūⁿ-khòaⁿ, góa thang ēng sím-mı̍h ōe hê-hok chhe góa--ê.

13

Tāi-pı̍t kā Ka-tek kóng, Góa khùn-pek kàu-ke̍k; góa gōan hām-lo̍h tī Iâ-hô-hoa ê chhiú, in-ūi I ê lîn-bín chin-tōa, góa m̄-gōan hām-lo̍h tī lâng ê chhiú.

14

Tùi án-ni Iâ-hô-hoa chiū kàng un-e̍k tī Í-sek-lia̍t; Í-sek-lia̍t lâng sí--ê chhit-bān.

15

Siōng-tè chhe chı̍t ê sù-chiá kàu Iâ-lō͘-sat-léng bia̍t i; beh bia̍t i ê sî, Iâ-hô-hoa khòaⁿ-kìⁿ, chiū thè-hóe chit ê chai-ē, chiū kā húi-bia̍t ê sù-chiá kóng, Kàu-gia̍h lah, taⁿ thang thêng lí ê chhiú; hit-sî Iâ-hô-hoa ê sù-chiá khiā tī Iâ-pò͘-su lâng O-jíⁿ-lâm ê gō͘-kak-tiûⁿ.

16

Tāi-pı̍t kia̍h-ba̍k khòaⁿ-kìⁿ Iâ-hô-hoa ê sù-chiá khiā tī pòaⁿ-khong-tiong, pu̍ih-to tī chhiú--nih, chhun tī Iâ-lō͘-sat-léng ê téng-bīn. Tāi-pı̍t kap chiah ê tiúⁿ-ló lóng chhēng môa-saⁿ, bīn phak tī tōe--nih.

17

Tāi-pı̍t tùi Siōng-tè kóng, Hoan-hù sǹg peh-sìⁿ--ê, kiám m̄-sī góa mah? góa hōan-chōe kiâⁿ tōa-pháiⁿ; chóng-sī chiah ê iûⁿ-kûn ū chòe sím-mı̍h ah? Kiû Iâ-hô-hoa góa ê Siōng-tè, chhun-chhiú tī góa kap góa ê pē ê ke; m̄-thang kong-kek Lí ê peh-sìⁿ, kàng un-e̍k hō͘ in.

18

Tng hit-sî Iâ-hô-hoa ê sù-chiá bēng-lēng Ka-tek khì kā Tāi-pı̍t kóng, Tāi-pı̍t tio̍h chiūⁿ-khì, tī Iâ-pò͘-su lâng O-jíⁿ-lâm ê gō͘-kak-tiûⁿ, kā Iâ-hô-hoa khí chı̍t chō tôaⁿ.

19

Tāi-pı̍t chiū chiàu Ka-tek hōng Iâ-hô-hoa ê miâ só͘ kóng ê ōe chiūⁿ-khì.

20

Hit-sî O-jíⁿ-lâm teh phah-be̍h, o̍at-thâu khòaⁿ-kìⁿ thiⁿ-sài; kap i tī-teh sì ê kiáⁿ cháu khì bih.

21

Tāi-pı̍t kàu O-jíⁿ-lâm hia; O-jíⁿ-lâm khòaⁿ-kìⁿ Tāi-pı̍t, chiū chhut gō͘-kak-tiûⁿ, àⁿ-thâu pài Tāi-pı̍t.

22

Tāi-pı̍t tùi O-jíⁿ-lâm kóng, Lí ēng chit ê gō͘-kak-tiûⁿ ê tōe hō͘ góa, hō͘ góa tī-hia thang kā Iâ-hô-hoa khí chı̍t chō tôaⁿ; lí tio̍h chiàu chiok-gia̍h ê kè-chîⁿ bōe góa, hō͘ un-e̍k soah, bô hāi peh-sìⁿ.

23

O-jíⁿ-lâm kā Tāi-pı̍t kóng, Lí thang ēng i, gōan góa ê chú góa ê ông, chiàu lí só͘ khòaⁿ-chòe hó-ê khì kiâⁿ; lí khòaⁿ, góa ēng gû hō͘ lí chòe sio-chè, ēng phah gō͘-kak ê khì-kū chòe chhâ, ia̍h ēng be̍h chòe sò͘-chè, chiah-ê góa lóng hō͘ lí.

24

Tāi-pı̍t ông kā O-jíⁿ-lâm kóng, M̄-sī án-ni, góa koat-tòan beh ēng chiok-gia̍h ê kè-chîⁿ lâi bóe; in-ūi góa m̄-ài the̍h lí ê mı̍h hō͘ Iâ-hô-hoa, m̄-ài ēng bô khai-hùi lâi hiàn sio-chè.

25

Tùi án-ni Tāi-pı̍t ūi-tio̍h hit tè tōe phêng la̍k-pah sià-khek-le̍k ê kim hō͘ O-jíⁿ-lâm.

26

Tāi-pı̍t tī-hia kā Iâ-hô-hoa khí chı̍t chō tôaⁿ, hiàn sio-chè kap pêng-an-chè; koh kiû-kiò Iâ-hô-hoa; I tùi thiⁿ kàng-hé tī chè-tôaⁿ-téng lâi ìn i.

27

Iâ-hô-hoa bēng-lēng sù-chiá, i chiū siu i ê to jı̍p siù.

28

Hit-sî Tāi-pı̍t khòaⁿ-kìⁿ Iâ-hô-hoa tī Iâ-pò͘-su lâng O-jíⁿ-lâm ê gō͘-kak-tiûⁿ ìn i, chiū tī-hia hiàn-chè.

29

In-ūi Mô͘-se tī khòng-iá só͘ chō Iâ-hô-hoa ê hōe-bō͘ kap sio-chè ê tôaⁿ, hit-sî lóng tī Ki-piàn kôaiⁿ ê só͘-chāi.

30

Chóng-sī Tāi-pı̍t bōe-ōe chiūⁿ kàu i ê bīn-chêng lâi mn̄g Siōng-tè, in-ūi i kiaⁿ Iâ-hô-hoa sù-chiá ê to.