Le̍k-tāi chì-lio̍k siōng-kòan 第 22 章 - 巴克禮全羅

1

Tāi-pı̍t kóng, Che sī Iâ-hô-hoa Siōng-tè ê chhù; chit-ê sī Í-sek-lia̍t sio-chè ê tôaⁿ.

2

Tāi-pı̍t bēng-lēng chū-chı̍p khiā-khí Í-sek-lia̍t tōe ê chhut-gōa lâng; koh phài phah-chio̍h ê sai-hū phah-chio̍h; ài beh khí Siōng-tè ê tiān.

3

Tāi-pı̍t pī-pān thih chin-chōe, chòe mn̂g-sìⁿ ê teng kap saⁿ-liân ê lō͘-ēng; koh pī-pān tâng chin-chōe, kàu bōe chhìn--tit.

4

Ia̍h pī-pān bōe-sǹg--tit ê pek-hiuⁿ-chhâ; in-ūi Se-tùn lâng kap Chhui-lô lâng chài chōe-chōe pek-hiuⁿ-chhâ kàu Tāi-pı̍t hia.

5

Tāi-pı̍t kóng, Góa ê kiáⁿ Só͘-lô-bûn iáu-kú sòe-hàn koh nńg-chiáⁿ; beh kā Iâ-hô-hoa khí ê tiān tio̍h chin súi kàu-ke̍k, hō͘ i miâ-siaⁿ êng-kng kàu tī bān-kok; só͘-í góa taⁿ tio̍h kā i pī-pān. Tāi-pı̍t chiū tī bē sí ê tāi-seng pī-pān chōe-chōe chhâi-liāu.

6

Tāi-pı̍t chiū kiò i ê kiáⁿ Só͘-lô-bûn lâi, hoan-hù i tio̍h kā Í-sek-lia̍t ê Siōng-tè khí tiān.

7

Kā Só͘-lô-bûn kóng, Góa ê kiáⁿ ah, góa sim-lāi pún siūⁿ, beh ūi Iâ-hô-hoa góa ê Siōng-tè ê miâ khí tiān.

8

Chóng-sī Iâ-hô-hoa ê ōe lîm-kàu góa kóng, Lí lâu chōe-chōe lâng ê huih, tōa-tōa kau-chiàn, lí bōe-tit-thang ūi Góa ê miâ khí tiān, in-ūi lí tī Góa ê ba̍k-chiu chêng hō͘ chōe-chōe lâng ê huih lâu tī tōe--nih.

9

Khòaⁿ ah, lí beh siⁿ chı̍t ê kiáⁿ, i beh chòe thài-pêng ê lâng, Góa beh hō͘ i thài-pêng, hō͘ sì-ûi chiah ê tùi-te̍k bô kiáu-jiáu i; i ê miâ beh kiò Só͘-lô-bûn; tī i chē-ūi ê jı̍t, Góa beh siúⁿ-sù an-chēng hô-pêng hō͘ Í-sek-lia̍t.

10

I beh ūi Góa ê miâ khí tiān; i beh chòe Góa ê kiáⁿ, Góa beh chòe i ê pē; Góa beh kian-kò͘ i ê kok-ūi tī Í-sek-lia̍t kàu éng-óan.

11

Góa ê kiáⁿ ah, taⁿ gōan Iâ-hô-hoa kap lí tī-teh, hō͘ lí heng-thong, khí lí ê Siōng-tè Iâ-hô-hoa ê tiān, chiàu I só͘ lūn-kàu lí--ê.

12

To̍k-to̍k gōan Iâ-hô-hoa siúⁿ-sù lí chhang-miâ tì-hūi, hō͘ lí tī-lí Í-sek-lia̍t, lâi chun-thàn Iâ-hô-hoa lí ê Siōng-tè ê lu̍t-hoat.

13

Lí nā kín-sīn chun-thàn Iâ-hô-hoa só͘ bēng-lēng Mô͘-se kà-sī Í-sek-lia̍t chiah ê lu̍t-lē hoat-tō͘, chiū lí beh heng-thong; lí tio̍h hùn-chì hó-táⁿ, bo̍h-tit kiaⁿ bo̍h-tit lún.

14

Góa tī khùn-khó͘ tiong, ūi Iâ-hô-hoa ê tiān, pī-pān kim cha̍p-bān tha-liân-tek, gûn chı̍t-pah-bān tha-liân-tek, tâng kap thih tāng kàu bōe chhìn--tit, in-ūi chin-chōe; góa iā ū pī-pān chhâ kap chio̍h, lí thang koh ke-thiⁿ i.

15

Koh lí iā ū chōe-chōe sai-hū, phah-chio̍h--ê, chòe-ba̍k--ê, kap ta̍k-hō kang-tiâⁿ-su, thang chòe ta̍k-hō ê kang.

16

Kim, gûn, tâng, thih, chōe kàu bōe sǹg--tit; lí tio̍h khí-lâi chòe; gōan Iâ-hô-hoa kap lí tī-teh.

17

Tāi-pı̍t koh hoan-hù Í-sek-lia̍t ê chèng siú-léng pang-chān i ê kiáⁿ Só͘-lô-bûn, kóng,

18

Iâ-hô-hoa lín ê Siōng-tè kiám bô kap lín tī-teh mah? kiám bô tī sì-ûi siúⁿ-sù lín pêng-an mah? in-ūi I í-keng chiong chit ê tōe khiā-khí ê peh-sìⁿ kau tī góa ê chhiú, chit ê tōe chiū hâng-ho̍k tī Iâ-hô-hoa kap I ê peh-sìⁿ ê bīn-chêng.

19

Taⁿ lín tio̍h tiāⁿ-tio̍h lín ê sim, lín ê ì-sù, chhē Iâ-hô-hoa lín ê Siōng-tè; ia̍h tio̍h khí--lâi, khí-chō Iâ-hô-hoa Siōng-tè ê sèng-só͘, thang chiong Iâ-hô-hoa ê iok-kūi, kap Siōng-tè sèng ê khì-kū, poaⁿ-jı̍p ūi Iâ-hô-hoa ê miâ só͘ beh khí ê tiān.