Le̍k-tāi chì-lio̍k siōng-kòan 第 28 章 - 巴克禮全羅

1

Tāi-pı̍t chio-chı̍p Í-sek-lia̍t ê siú-léng, kok chi-phài ê siú-léng, kap lûn-pan ho̍k-sāi ông ê kun-tiúⁿ, chhian-chóng, pé-chóng, chiáng-kóan ông kap ông ê kiáⁿ ê sán-gia̍p cheng-siⁿ--ê, kap thài-kàm, í-kı̍p tōa kôan-lêng ê, kap tōa kôan-lêng ê ióng-sū, lóng kàu Iâ-lō͘-sat-léng.

2

Tāi-pı̍t ông chiū khiā--khí-lâi kóng, Góa ê hiaⁿ-tī, góa ê peh-sìⁿ ah, lín tio̍h thiaⁿ góa ê ōe; góa ê sim pún siūⁿ beh ūi-tio̍h Iâ-hô-hoa ê iok-kūi, koh ūi-tio̍h lán ê Siōng-tè ê kha-ta̍h-í, khí tiān lâi an-tì i; góa í-keng pī-pān beh khí.

3

Chóng-sī Siōng-tè tùi góa kóng, Lí bōe-tit-thang ūi Góa ê miâ khí tiān, in-ūi lí sī chiàn-sū, ū hō͘ lâng lâu-huih.

4

M̄-kú Iâ-hô-hoa Í-sek-lia̍t ê Siōng-tè, tī góa ê pē chôan-ke kéng góa chòe Í-sek-lia̍t ông tı̍t-kàu éng-óan; in-ūi I kéng Iû-tāi chòe siú-léng; tī Iû-tāi ê chi-phài tiong kéng góa ê pē ê ke; tī góa ê pē ê chèng-kiáⁿ tiong hoaⁿ-hí góa, siat-lı̍p góa chòe Í-sek-lia̍t chèng-lâng ê ông.

5

Iâ-hô-hoa siúⁿ-sù góa chōe-chōe kiáⁿ, tī góa ê kiáⁿ ê tiong-kan, kéng góa ê kiáⁿ Só͘-lô-bûn, tī Iâ-hô-hoa ê kok chē-ūi, tī-lí Í-sek-lia̍t.

6

I koh tùi góa kóng, Lí ê kiáⁿ Só͘-lô-bûn beh khí Góa ê tiān Góa ê īⁿ; in-ūi Góa kéng i chòe Góa ê kiáⁿ, Góa iā beh chòe i ê pē.

7

I nā kú-tn̂g chun-thàn Góa ê kài-bēng hoat-tō͘, chhin-chhiūⁿ kin-á-jı̍t, Góa chiū beh kian-kò͘ i ê kok-ūi, tı̍t-kàu éng-óan.

8

Taⁿ tī Iâ-hô-hoa ê hōe, Í-sek-lia̍t chèng-lâng ê bīn-chêng, lán ê Siōng-tè iā thiaⁿ-kìⁿ, lín tio̍h chhâ-khó lín ê Siōng-tè Iâ-hô-hoa ê kài-bēng lâi chip-siú i; án-ni lín thang hióng-siū chit ê hó ê tōe, lâu hō͘ lín āu-tāi ê kiáⁿ-sun, éng-óan chòe-gia̍p.

9

Góa ê kiáⁿ Só͘-lô-bûn ah, lí tio̍h jīn-bat lí ê pē ê Siōng-tè, sêng-sı̍t sim hoaⁿ-hí ho̍k-sāi I; in-ūi Iâ-hô-hoa kàm-chhat chèng-lâng ê sim, chai lóng-chóng ê sim-su liām-thâu; lí nā chhē I, I beh hō͘ lí tú-tio̍h; lí nā pàng-sak I, I beh éng-óan kū-cho̍at lí;

10

lí tio̍h kín-sīn, in-ūi Iâ-hô-hoa kéng lí khí chhù chòe sèng-só͘; lí tio̍h ióng-kám khì chòe.

11

Tāi-pı̍t chiong tiān-tn̂g ê léng-lông, pâng-keng, hú-khò͘, lâu-koh, lāi-tiān, kap Si-un-só͘ hit-keng, it-chhè ê tô͘-iūⁿ, kau i ê kiáⁿ Só͘-lô-bûn;

12

koh ēng tùi Sîn só͘ tit-tio̍h it-chhè ê tô͘-iūⁿ, chiū-sī Iâ-hô-hoa tiān ê īⁿ, sì-ûi ê pâng, Siōng-tè tiān ê hú-khò͘, kap sèng-mı̍h ê hú-khò͘ chiah ê tô͘-iūⁿ, lóng kau i;

13

koh chí-sī i chè-si kap Lī-bī lâng ê pan-lia̍t, kap Iâ-hô-hoa tiān-lāi ho̍k-sāi ê kang, í-kı̍p Iâ-hô-hoa tiān-lāi ho̍k-sāi ê khì-kū;

14

koh chhìn kim hō͘ i chòe ta̍k-iūⁿ èng-iōng ê kim-khì; ia̍h chhìn gûn hō͘ i, chòe ta̍k-iūⁿ èng-iōng ê gûn-khì;

15

chiū-sī chiah ê kim teng-tâi kap i ê chóaⁿ, chiū chhìn kim lâi chòe ta̍k ê teng-tâi kap i ê chóaⁿ, koh ēng chòe gûn teng-tâi ê gûn lâi chhìn hō͘ i; i ê teng-tâi kap i ê chóaⁿ lóng sī án-ni, chiàu ta̍k ê teng-tâi ê lō͘-ēng;

16

koh chhìn kim hō͘ i lâi chòe pâi-lia̍t piáⁿ ê toh; ia̍h chhìn gûn lâi chòe gûn ê toh;

17

koh ēng hó-kim hō͘ i chòe bah-chhe, pôaⁿ, poe; koh chhìn kim, hō͘ i thang chòe ta̍k ê kim-óaⁿ, chhìn gûn hō͘ i chòe ta̍k ê gûn-óaⁿ;

18

koh chhìn hó-kim hō͘ i thang chòe hiuⁿ-tôaⁿ; ia̍h ēng kim chòe ki-lō͘-peng chhia ê khóan-sit, in thí-khui sı̍t, jia-khàm Iâ-hô-hoa ê iok-kūi.

19

Tāi-pı̍t kóng, Téng-bīn chiah ê kui-bô͘, lóng sī góa tit-tio̍h Iâ-hô-hoa be̍k-sī siá chhut-lâi--ê.

20

Tāi-pı̍t koh kā i ê kiáⁿ Só͘-lô-bûn kóng, Lí tio̍h ióng-kám chòng-táⁿ khì chòe; bo̍h-tit lún, ia̍h bo̍h-tit kiaⁿ; in-ūi Iâ-hô-hoa Siōng-tè, chiū-sī góa ê Siōng-tè, kap lí tī-teh; I tek-khak bô lī-khui lí, ia̍h bô pàng-sak lí, tı̍t-kàu Iâ-hô-hoa tiān ê kang lóng bêng-pe̍k.

21

Khòaⁿ ah, ū chè-si kap Lī-bī lâng ê ta̍k-pan, ūi-tio̍h beh pān-lí Siōng-tè tiān ta̍k-hāng ê sū; koh ū kî-khiáu ê lâng, tī ta̍k-hāng ê kang hoaⁿ-hí pang-chān lí; ia̍h ū chiah ê siú-léng kap chèng peh-sìⁿ chı̍t-sim thiaⁿ-thàn lí ê bēng-lēng.