Le̍k-tāi chì-lio̍k siōng-kòan 第 29 章 - 巴克禮全羅

1

Tāi-pı̍t ông tùi hōe-chiòng kóng, Góa ê kiáⁿ Só͘-lô-bûn sī Siōng-tè te̍k-pia̍t kéng--ê, iáu-kú siàu-liân iù-chíⁿ; chit ê kang-tiâⁿ chin-tōa; in-ūi chit ê tiān m̄-sī ūi-tio̍h lâng, chiū-sī ūi-tio̍h Iâ-hô-hoa Siōng-tè khí--ê.

2

Góa ūi-tio̍h góa ê Siōng-tè ê tiān, í-keng chīn khùi-la̍t, pī-pān kim chòe kim-khì, pī-pān gûn chòe gûn-khì, tâng chòe tâng-khì, thih chòe thih-khì, chhâ chòe chhâ-khì; koh ū âng bé-ló, kap thang siuⁿ ê pó-chio̍h, kng-chio̍h, chhái-sek ê chio̍h, í-kı̍p ta̍k-iūⁿ ê pó-chio̍h, sia̍h-chio̍h ke̍k-chōe.

3

In-ūi góa him-bō͘ góa ê Siōng-tè ê tiān, chiū tī pī-pān khí sèng-tiān ê chhâi-liāu í-gōa, koh ēng góa pún-sin só͘ chek-chū ê kim-gûn, hiàn tī góa Siōng-tè ê chhù;

4

chiū-sī Gô-hui ê kim, saⁿ-chheng tha-liân-tek ê kim, thòan-liān ê gûn chhit-chheng tha-liân-tek, lâi an chiah ê chhù-chhiûⁿ;

5

kim chòe kim-khì, gûn chòe gûn-khì, kap sai-hū ê chhiú só͘ chòe chiah ê kang. Kin-á-jı̍t ū sím-mı̍h lâng hoaⁿ-hí chiong pún-sin hiàn hō͘ Iâ-hô-hoa ah?

6

Tùi án-ni chèng cho̍k-tiúⁿ, kap Í-sek-lia̍t ta̍k chi-phài ê siú-léng, chhian-chóng, pé-chóng, í-kı̍p kam(**kàm)-tok hiah-ê kā ông chòe-kang--ê, lóng hoaⁿ-hí lâi hiàn.

7

In ūi-tio̍h Siōng-tè tiān ê lō͘-ēng, hiàn kim gō͘ chheng tha-liân-tek liân chı̍t-bān ta̍t-lī-khek, gûn chı̍t-bān tha-liân-tek, tâng chı̍t-bān poeh chheng tha-liân-tek, thih cha̍p-bān tha-liân-tek.

8

Kìⁿ-nā ū pó-chio̍h--ê, lóng kau-tài Kek-sūn lâng Iâ-iat ê chhiú, sàng-jı̍p Iâ-hô-hoa tiān ê hú-khò͘.

9

In-ūi in kam-sim hiàn, peh-sìⁿ lóng hoaⁿ-hí, in-ūi in chīn-sim hiàn hō͘ Iâ-hô-hoa; Tāi-pı̍t ông iā tōa hoaⁿ-hí kàu-ke̍k.

10

Só͘-í Tāi-pı̍t tī hōe-chiòng ê bīn-chêng o-ló Iâ-hô-hoa; Tāi-pı̍t kóng, Iâ-hô-hoa góan ê chó͘ Í-sek-lia̍t ê Siōng-tè ah, sī eng-kai o-ló--ê, tùi éng-óan kàu éng-óan;

11

Iâ-hô-hoa ah, chun-tōa, lêng-le̍k, êng-kng, tek-sèng, ui-giâm lóng sī Lí-ê; hōan-nā tī thiⁿ-téng tōe-ē--ê, lóng sī Lí-ê; Iâ-hô-hoa ah, kok iā sī Lí-ê, Lí sī chì-kôaiⁿ, chòe bān-ū ê thâu.

12

Hó-gia̍h chun-kùi lóng tùi Lí lâi, Lí iā chiáng-kóan bān-ū; tī Lí ê chhiú ū tōa kôan-lêng tōa khùi-la̍t; hō͘ lâng chun-tōa, hō͘ chèng-lâng tōa khùi-la̍t, lóng chhut tī Lí ê chhiú.

13

Góan ê Siōng-tè ah, taⁿ góan kám-siā Lí, o-ló Lí êng-kng ê miâ;

14

góa sī sím-mı̍h, góa ê peh-sìⁿ sī sím-mı̍h, góan kéng-jiân ōe án-ni hoaⁿ-hí hōng-hiàn ah? In-ūi bān-mı̍h lóng tùi Lí lâi, góan ēng Lí ê mı̍h hiàn hō͘ Lí;

15

góan tī Lí ê bīn-chêng sī chhut-gōa lâng, sī kià-kha--ê, kap góan ê lia̍t-chó͘ chı̍t-poaⁿ-iūⁿ; góan tī sè-kan ê jı̍t-chí chhin-chhiūⁿ iáⁿ, bô thang ǹg-bāng tn̂g-tn̂g tī-teh.

16

Iâ-hô-hoa góan ê Siōng-tè ah, góan pī-pān chiah-ê chōe-chōe chhâi-liāu, beh ūi-tio̍h Lí ê sèng-miâ khí Lí ê tiān, lóng sī tùi Lí lâi, iā lóng sī Lí--ê.

17

Góa ê Siōng-tè ah, góa chai Lí kàm-chhat lâng ê sim, hoaⁿ-hí chèng-tı̍t; lūn-kàu góa, góa ēng chèng-tı̍t ê sim hoaⁿ-hí hiàn che it-chhè ê mı̍h; taⁿ góa khòaⁿ-kìⁿ Lí ê peh-sìⁿ tī-chia, lóng hoaⁿ-hí hiàn hō͘ Lí, góa chiū hoaⁿ-hí.

18

Iâ-hô-hoa, góan lia̍t-chó͘ A-pek-la̍h-hán, Í-sat, Í-sek-lia̍t ê Siōng-tè ah, kiû Lí hō͘ Lí ê peh-sìⁿ siông-siông chûn chit-hō ê sim-su liām-thâu, pī-pān in ê sim kui-ǹg Lí.

19

Koh kiû Lí siúⁿ-sù góa ê kiáⁿ Só͘-lô-bûn sêng-sı̍t ê sim, lâi siú Lí ê bēng-lēng, hoat-tō͘, lu̍t-lē, chòe-chiâⁿ che it-chhè ê sū, ēng góa só͘ pī-pān-ê lâi khí tiān.

20

Tāi-pı̍t tùi chiah ê hōe-chiòng kóng, Lín tio̍h o-ló Iâ-hô-hoa lín ê Siōng-tè; tùi án-ni hōe-chiòng o-ló Iâ-hô-hoa in lia̍t-chó͘ ê Siōng-tè, àⁿ-thâu pài Iâ-hô-hoa kap ông.

21

Keh-jı̍t in hiàn-chè hō͘ Iâ-hô-hoa, koh hiàn sio-chè hō͘ Iâ-hô-hoa; chiū-sī hiàn kang ê gû chı̍t-chheng chiah, kang ê mî-iûⁿ chı̍t-chheng chiah, iûⁿ-á chı̍t-chheng chiah, kap i ê kòan-tiān; koh ūi Í-sek-lia̍t ê chèng-lâng hiàn chōe-chōe chè-mı̍h.

22

Hit-jı̍t in tī Iâ-hô-hoa ê bīn-chêng lim-chia̍h tōa-tōa hoaⁿ-hí. In tē-jī pái siat-lı̍p Tāi-pı̍t ê kiáⁿ Só͘-lô-bûn chòe ông, ūi Iâ-hô-hoa ēng iû boah i, hō͘ i chòe kun-ông; ia̍h ēng iû boah Sat-tok chòe chè-si.

23

Tùi án-ni Só͘-lô-bûn chē tī Iâ-hô-hoa só͘ siúⁿ-sù ê ūi, sòa-chiap i ê lāu-pē Tāi-pı̍t chòe ông, bô m̄ heng-thong; Í-sek-lia̍t chèng-lâng iā lóng thiaⁿ-thàn i.

24

Chèng siú-léng kap ióng-sū, kap Tāi-pı̍t ông ê chèng-kiáⁿ, lóng sūn-ho̍k Só͘-lô-bûn ông.

25

Iâ-hô-hoa hō͘ Só͘-lô-bûn tī Í-sek-lia̍t chèng-lâng ê bīn-chêng, ke̍k-kî chun-tōa; hō͘ i chòe kok-ông ê ui-hong, iâⁿ-kè Í-sek-lia̍t í-chêng ê ông.

26

Iâ-se ê kiáⁿ Tāi-pı̍t chòe Í-sek-lia̍t chèng-lâng ê ông;

27

i chòe Í-sek-lia̍t ông, le̍k-kè sì-cha̍p nî, tī Hi-pek-lûn chòe-ông chhit-nî, tī Iâ-lō͘-sat-léng chòe-ông saⁿ-cha̍p-saⁿ nî.

28

I chia̍h tn̂g hè-siū; nî-hè, hó-gia̍h, êng-kng lóng móa-chiok, chiū kè-sì; i ê kiáⁿ Só͘-lô-bûn sòa-chiap i chòe-ông.

29

Tāi-pı̍t ông thâu kàu bé ê sū, lóng kì tī sian-kiàn Sat-bó͘-jíⁿ ê chheh, kap sian-ti Ná-tan ê chheh, í-kı̍p sian-kiàn Ka-tek ê chheh.

30

Hiah ê chheh iā kì-chài i tī-lí kok ê sū, kap i ê tōa kôan-lêng, í-kı̍p i kap Í-sek-lia̍t, kap sì-hng ê lia̍t-kok, só͘ keng-kè ê sî-sū.