Ko-Lîm-to chiân 第 11 章 - 巴克禮全羅

1

Lín tio̍h o̍h góa, chhin-chhiūⁿ góa o̍h Ki-tok.

2

Góa o-ló lín in-ūi lín hōan tāi-chì kì-liām góa, koh chip-siú chiah ê ûi-thôan, chiàu góa só͘ thôan hō͘ lín ê.

3

Chóng-sī góa ài lín chai Ki-tok sī chòe ta-po͘-lâng ê thâu, ta-po͘-lâng chòe hū-jîn-lâng ê thâu, Siōng-tè chòe Ki-tok ê thâu.

4

Kìⁿ-nā ta-po͘-lâng kî-tó á-sī thôan-tō, nā tà thâu-khak, chiū lêng-jio̍k i ê thâu.

5

Nā-sī kìⁿ-nā hū-jîn-lâng kî-tó á-sī thôan-tō, bô tà thâu-khak, chiū lêng-jio̍k i ê thâu, in-ūi che kap thì thâu-mn̂g bô koh-iūⁿ.

6

Hū-jîn-lâng nā bô tà thâu-khak, chiū tio̍h chián thâu-mn̂g; hū-jîn-lâng chián thâu-mn̂g á thì thâu-mn̂g nā sī kiàn-siàu, chiū khah hó tio̍h tà thâu.

7

Ta-po͘-lâng m̄ eng-kai tà thâu, in-ūi i sī Siōng-tè ê siōng kap êng-kng; nā-sī hū-jîn-lâng chiū-sī ta-po͘-lâng ê êng-kng.

8

In-ūi ta-po͘-lâng m̄ sī tùi hū-jîn-lâng chhut, to̍k-to̍k hū-jîn-lâng sī tùi ta-po͘-lâng chhut.

9

In-ūi ta-po͘-lâng m̄ sī ūi-tio̍h hū-jîn-lâng chiah chhòng-chō, sī hū-jîn-lâng ūi-tio̍h ta-po͘-lâng lâi chhòng-chō.

10

Só͘-í hū-jîn-lâng tio̍h ū hâng-ho̍k kôan-pèng ê kì-hō tī i ê thâu-khak, ūi-tio̍h sù-chiá ê iân-kò͘.

11

Chóng-sī tī Chú nā bô ta-po͘-lâng, chiū m̄ chiâⁿ hū-jîn-lâng; bô hū-jîn-lâng, chiū m̄ chiâⁿ ta-po͘-lâng.

12

In-ūi chhin-chhiūⁿ hū-jîn-lâng tùi ta-po͘-lâng chhut, ta-po͘-lâng iā sī tùi hū-jîn-lâng chiah ū; to̍k-to̍k bān hāng sī tùi Siōng-tè chhut.

13

Lín sim-lāi ka-kī séng-chhat: hū-jîn-lâng bô tà thâu-khak lâi kî-tó Siōng-tè, sī ha̍p-sek mah?

14

Tùi pún-sèng kiám m̄ chai, ta-po͘-lâng ū tn̂g ê thâu-mn̂g sī chòe kiàn-siàu mah?

15

Nā-sī hū-jîn-lâng ū tn̂g ê thâu-mn̂g, sī chòe i ê êng-kng; in-ūi i ê thâu-mn̂g sī siúⁿ-sù i chòe phè.

16

Siat-sú ū siūⁿ ài beh piān-pok ê, góan bô chit hō lē, Siōng-tè chiah ê kàu-hōe iā bô.

17

Taⁿ góa chiong chit-ê hoan-hù lín, m̄ sī o-ló lín, chiū-sī lín chū-chı̍p, bô tì-kàu lī-ek, sī tì-kàu sún-hāi.

18

Thâu chı̍t hāng, góa thiaⁿ-kìⁿ lín chū-chı̍p chòe hōe ê sî, lín tiong-kan ū hun-tóng, góa iā tāi-lio̍k sìn.

19

In-ūi lín tiong-kan bōe bián-tit ū tóng-phài, beh hō͘ chin-sı̍t ê lâng hián-bêng tī lín tiong-kan.

20

Án-ni lín chū-chı̍p tī chı̍t só͘-chāi, m̄ sī chia̍h Chú ê bóan-chhan.

21

In-ūi chia̍h ê sî ta̍k lâng chòe i tāi-seng chia̍h i ê ê-hng tǹg; ū lâng iau, ū lâng chùi.

22

Lín kiám bô chhù thang lim-chia̍h mah? Á-sī lín khòaⁿ-khin Siōng-tè ê kàu-hōe, iā hō͘ bô-ê kiàn-siàu ah? Góa beh tùi lín cháiⁿ-iūⁿ kóng? Tī chit-ê góa beh o-ló lín mah? Góa bô o-ló.

23

In-ūi góa tùi Chú siū, iā bat thôan hō͘ lín ê, chiū-sī Chú Iâ-so͘ hō͘ lâng bōe hit mî ū the̍h piáⁿ,

24

chiok-siā lâi peh i, kóng, Chit-ê sī góa ê seng-khu, ūi-tio̍h lín phah-phòa ê, lín tio̍h kiâⁿ án-ni lâi kì-liām góa.

25

Chia̍h liáu-āu iā án-ni phâng poe, kóng, Chit ê poe chiū-sī sin iok, tī góa ê huih siat-lı̍p ê, kìⁿ-nā lim ê sî, tio̍h kiâⁿ án-ni lâi kì-liām góa.

26

In-ūi lín ta̍k pái chia̍h chit ê piáⁿ, lim chit ê poe, sī piáu-bêng Chú ê sí, tı̍t kàu I koh lâi.

27

Án-ni hōan-nā chia̍h Chú ê piáⁿ, á-sī lim Chú ê poe, bô ha̍p-gî ê, sī ko͘-hū Chú ê seng-khu kap huih.

28

Nā-sī lâng tio̍h ka-kī séng-chhat, chiah thang chia̍h chit ê piáⁿ, lim chit ê poe.

29

Lâng bô hun-piat Chú ê seng-khu lâi lim-chia̍h, chiū-sī tùi lim-chia̍h ka-kī chhú sím-phòaⁿ.

30

Só͘-í lín tiong-kan soe-lám ê, phòa-pīⁿ ê, chōe-chōe; sí ê iā bô chió.

31

Lán nā ka-kī sím-mn̄g, chiū bô siū sím-phòaⁿ.

32

Chóng-sī lán siū sím-phòaⁿ, sī hō͘ Chú só͘ kéng-kài, bián-tit kap sè-kan lâng tâng siū tēng-chōe.

33

Góa ê hiaⁿ-tī ah, só͘-í lín chū-chı̍p beh chia̍h ê sî, tio̍h saⁿ thèng-hāu.

34

Nā ū lâng iau, tio̍h tiàm in chhù chia̍h, bián-tit chū-chı̍p tì-kàu siū sím-phòaⁿ. Kî-û ê tán góa lâi, chiah beh siat-hoat.