Ko-Lîm-to chiân 第 10 章 - 巴克禮全羅

1

Hiaⁿ-tī ah, góa m̄ ài lín m̄ chai lán ê lia̍t-chó͘ lóng tī hûn ē, iā lóng tùi hái-tiong keng-kè,

2

iā lóng tī hûn-tiong hái-tiong siū sóe-lé kui tī Mô͘-se,

3

iā lóng chia̍h tâng chı̍t iūⁿ lêng ê chia̍h, iā lóng lim tâng chı̍t iūⁿ lêng ê lim;

4

in-ūi in só͘ lim ê sī tùi tè in lêng ê chio̍h-pôaⁿ chhut, hit ê chio̍h-pôaⁿ chiū-sī Ki-tok.

5

Nā-sī in tiong-kan khah chōe lâng hō͘ Siōng-tè bô hoaⁿ-hí; in-ūi in ê sin-si hôaiⁿ-ke̍h tī khòng-iá.

6

Taⁿ chiah ê sū sī chòe lán ê kàm-kài, hō͘ lán bo̍h-tit ài pháiⁿ, chhin-chhiūⁿ in ài pháiⁿ chı̍t iūⁿ.

7

Lín iā bo̍h-tit pài ngó͘-siōng, chhin-chhiūⁿ in tiong-kan ū lâng pài i; chiàu só͘ kì-chài kóng, Peh-sìⁿ chē-teh lim-chia̍h, khí-lâi thiàu-bú.

8

Lán iā bo̍h-tit kiâⁿ îm, chhin-chhiūⁿ in tiong-kan ū lâng kiâⁿ îm, chı̍t jı̍t sí nn̄g-bān saⁿ-chheng lâng.

9

Lán iā bo̍h-tit chhì Chú, chhin-chhiūⁿ in tiong-kan ū lâng chhì I, chiū hō͘ chôa kā-sí.

10

Lín iā bo̍h-tit nga̍uh-nga̍uh liām, chhin-chhiūⁿ in tiong-kan ū lâng nga̍uh-nga̍uh liām, chiū hō͘ châu-bia̍t-ê bia̍t in.

11

Taⁿ in tú-tio̍h chiah ê sū sī chòe kàm-kài, sòa kì-chài lâi kéng-kài lán, chiū-sī chiah ê sè-tāi bé ê lâng.

12

Só͘-í ka-kī lia̍h chòe khiā-chāi ê, tio̍h kín-sīn kiaⁿ-liáu po̍ah-tó.

13

Lín só͘ tú-tio̍h ê chhì bô m̄ sī lâng ê siông-sū; Siōng-tè sī sìn-sı̍t, bô beh hō͘ lín tú-tio̍h chhì kè-thâu tī lín só͘ ōe tng; chiū-sī tī siū chhì ê sî beh sòa khui thoat-chhut ê lō͘, hō͘ lín tng ōe khí.

14

Só͘-í góa só͘ thiàⁿ ê hiaⁿ-tī ah, tio̍h siám-pī pài ngó͘-siōng ê sū.

15

Góa só͘ kóng sī chhin-chhiūⁿ tùi tì-sek ê lâng kóng; lín tio̍h séng-chhat góa ê ōe.

16

Chiok-siā ê poe, lán só͘ chiok-siā ê, kiám m̄ sī saⁿ-kap ū hūn tī Ki-tok ê huih mah? lán só͘ peh ê piáⁿ kiám m̄ sī saⁿ-kap ū hūn tī Ki-tok ê seng-khu mah?

17

in-ūi piáⁿ kì-jiân chı̍t-ê, lán sui-jiân chōe-chōe lâng iā sī chı̍t thé; in-ūi lóng ū hūn tī chı̍t ê piáⁿ.

18

Chhì-khòaⁿ chiàu jio̍k-thé ê Í-sek-lia̍t lâng, hiah ê chia̍h chè-mı̍h ê kiám m̄ sī saⁿ-kap ū hūn tī chè-tôaⁿ mah?

19

Án-ni góa sī teh kóng sím-mı̍h? kiám sī teh kóng chè ngó͘-siōng ê mı̍h sī sím-mı̍h?

20

á-sī kóng ngó͘-siōng sī sím-mı̍h? sī teh kóng gōa-pang lâng só͘ chè ê sī chè kúi, m̄ sī chè Siōng-tè; góa m̄ ài lín ū hūn tī kúi.

21

Lín bōe-ōe lim Chú ê poe, kiam lim kúi ê poe; bōe-ōe ū hūn tī Chú ê toh, kiam ū hūn tī kúi ê toh.

22

Á-sī lán teh kek hō͘ Chú siū-khì mah? Lán kiám khah ióng-chòng I mah?

23

Hōan sū lóng thang, chóng-sī bô lóng ū lī-ek. Hōan sū lóng thang, chóng-sī bô lóng kiàn-lı̍p tek-hēng.

24

Bo̍h-tit kiû lī-ek ka-kī, tio̍h kiû lī-ek pa̍t lâng.

25

Kìⁿ-nā koe-chhī só͘ bōe ê thang chia̍h, bo̍h-tit ūi-tio̍h liông-sim ê iân-kò͘ lâi chhâ-mn̄g;

26

in-ūi tōe kap thong tōe-nı̍h ê mı̍h lóng sī Chú ê.

27

Nā ū chı̍t ê m̄ sìn ê lâng chhiáⁿ lín, iā lín ài beh khì, kìⁿ-nā pâi teh chhiáⁿ lín ê, thang chia̍h i; bo̍h-tit ūi-tio̍h liông-sim ê iân-kò͘ lâi chhâ-mn̄g.

28

Siat-sú ū lâng kā lín kóng, Chit-ê sī chè-mı̍h, chiū bo̍h-tit chia̍h; che sī ūi-tio̍h hit ê kā lín kóng ê lâng, í-kı̍p liông-sim ê iân-kò͘.

29

Só͘ kóng ê liông-sim m̄ sī ka-kī ê, sī hit lâng ê; in-ūi góa ê chū-iû siáⁿ-sū hō͘ pa̍t ê liông-sim gí-gī ah?

30

Góa nā kám-un lâi chia̍h, siáⁿ-sū ūi-tio̍h góa só͘ kám-siā ê hō͘ lâng húi-pòng ah?

31

Só͘-í lín he̍k-sī chia̍h, he̍k-sī lim, he̍k-sī chòe sím-mı̍h, lóng tio̍h in-ūi êng-kng Siōng-tè lâi chòe.

32

Bô lūn Iû-thài, á-sī Hi-lī-nî, á-sī Siōng-tè ê kàu-hōe, lín bo̍h-tit chòe in ê that-gāi.

33

Chhin-chhiūⁿ góa hōan sū hō͘ chèng lâng hoaⁿ-hí, bô kiû ka-kī ê lī-ek, chiū-sī kiû chèng lâng ê lī-ek, ài beh hō͘ in tit-tio̍h kiù.