Ko-Lîm-to chiân 第 9 章 - 巴克禮全羅

1

Góa kiám bōe tit chū-iû mah? Kiám m̄ sī sù-tô͘ mah? Kiám m̄ bat khòaⁿ-kìⁿ lán ê Chú Iâ-so͘ mah? Lín kiám m̄ sī góa tiàm-tī Chú chòe-chiâⁿ ê kang mah?

2

Siat-sú tùi tī pa̍t lâng góa m̄ sī sù-tô͘, tùi tī lín góa bô m̄ sī; in-ūi lín tiàm-tī Chú chiū-sī góa chòe sù-tô͘ ê ìn-chèng.

3

Ū chhâ-mn̄g góa ê, góa chiū ēng chit-ê ka-kī hun-sò͘.

4

Góan kiám bô kôan thang lim thang chia̍h mah?

5

Góan kiám bô kôan thang chhōa sìn Chú ê chí-bē chòe bó͘ lâi kap góan saⁿ-kap kiâⁿ, chhin-chhiūⁿ kî-û ê sù-tô͘, kap Chú ê hiaⁿ-tī, kap Ki-hoat mah?

6

Á-sī kan-ta góa kap Pa-ná-pa bô kôan thang bián chòe kang mah?

7

Sím-mı̍h lâng tng peng, lâi chia̍h ka-kī ê niû mah? sím-mı̍h lâng chai phû-tô hn̂g, bô chia̍h i ê ké-chí mah? sím-mı̍h lâng chhī cheng-siⁿ, bô chia̍h hit tīn ê lin mah?

8

Góa kóng chiah-ê kiám sī chiàu lâng ê ì-kiàn mah? Á-sī lu̍t-hoat bô án-ni kóng mah?

9

In-ūi tī Mô͘-se ê lu̍t-hoat ū kì-chài kóng, Bō ngó͘-kok ê gû, bo̍h-tit láng i ê chhùi. Siōng-tè kiám sī tì-ì tī gû mah?

10

Á-sī it-khài ūi-tio̍h lán lâi kóng i? Chin-chiàⁿ sī ūi-tio̍h lán lâi siá; in-ūi lôe hn̂g ê tio̍h chûn ǹg-bāng lâi lôe; bō ngó͘-kok ê tio̍h ǹg-bāng saⁿ-kap ū hūn lâi bō.

11

Góan nā chiong sio̍k tī sîn ê mı̍h iā tī lín tiong-kan, chiū tùi lín siu-sêng sio̍k tī jio̍k-thé ê mı̍h, kiám sī kè-thâu mah?

12

Pa̍t lâng tùi tī lín siōng-chhiáⁿ ū hūn chit ê kôan-pèng, hô-hòng góan mah? Chóng-sī góan m̄ bat ēng chit ê kôan, hóan-tńg thun-lún ta̍k hāng ê sū, bián-tit góan ū sím-mı̍h chó͘-tòng Ki-tok ê hok-im.

13

Kiám m̄ chai tio̍h-bôa tī sèng ê sū ê chia̍h tiān-lāi ê mı̍h, kun-sûi chè-tôaⁿ ê, kap chè-tôaⁿ saⁿ-kap pun mı̍h mah?

14

Chhin-chhiūⁿ án-ni, Chú siat-hoat hō͘ thôan hok-im ê lâng tio̍h tùi hok-im lâi tō͘ o̍ah.

15

Nā-sī chiah ê sū góa lóng bē bat ēng; koh góa siá chiah-ê m̄ sī ài lâng án-ni khóan-thāi góa; in-ūi góa lêng-khó͘ sí, put-tì lâng hō͘ góa só͘ khoa-kháu ê kui tī khang-khang.

16

Góa thôan hok-im m̄ sī thang khoa-kháu ê sū, sī put-tek-í nā-tiāⁿ; in-ūi nā bô thôan hok-im, góa chiū ū chai-ē.

17

Góa nā kam-sim chòe chit ê sū, chiū ū pò-siúⁿ; chiū nā m̄ kam-sim, ū chit-jīm í-keng kau-tāi góa lah.

18

Án-ni góa ê pò-siúⁿ sī sím-mı̍h ah? Chiū-sī góa teh thôan hok-im, hō͘ lâng bián só͘-hùi iā ōe tit-tio̍h hok-im; bián-tit góa tī hok-im só͘ ū ê kôan ēng kàu chīn.

19

Góa tùi tī chèng lâng sui-bóng sī chū-iû, iáu-kú chiong ka-kī chòe chèng lâng ê lô͘-po̍k, ūi-tio̍h beh tit-tio̍h lâng ná chōe.

20

Ǹg Iû-thài lâng góa chiū chhin-chhiūⁿ Iû-thài lâng, beh tit-tio̍h Iû-thài lâng; ǹg hoat ē ê lâng, góa sui-jiân pún-sin bô sio̍k tī hoat ē, chiū chhin-chhiūⁿ hoat ē ê lâng, beh tit-tio̍h hoat ē ê lâng.

21

Ǹg hoat gōa ê lâng, góa chiū chhin-chhiūⁿ hoat gōa lâng, beh tit-tio̍h hoat gōa ê lâng; kî-sı̍t góa m̄ sī tī Siōng-tè ê hoat gōa, chiū-sī tī Ki-tok ê hoat lāi.

22

Ǹg lóan-jio̍k ê lâng góa chiū chiâⁿ-chòe lóan-jio̍k, beh tit-tio̍h lóan-jio̍k ê lâng. Ǹg ta̍k hō lâng, góa chiâⁿ-chòe ta̍k hō khóan, it-khài sī beh kiù lâng.

23

Ta̍k hāng sū góa in-ūi hok-im lâi kiâⁿ, sī hō͘ góa thang saⁿ-kap ū hūn tī hok-im.

24

Kiám m̄ chai chāi-tiûⁿ tàu-cháu ê ta̍k ê lóng cháu, nā-sī tit-tio̍h pò-siúⁿ ê chí ū chı̍t-ê; lín tio̍h án-ni cháu chiah thang tit-tio̍h.

25

Kìⁿ-nā tàu-la̍t ê ta̍k hāng sū chún-chat; in sī beh tit-tio̍h ōe pāi-hōai ê bián-liû, nā-sī lán sī beh tit-tio̍h bōe pāi-hōai ê.

26

Só͘-í góa án-ni teh cháu, m̄ sī chhin-chhiūⁿ bô tiāⁿ-tio̍h ê hng-hiùⁿ; góa phah kûn, bô chhin-chhiūⁿ teh phah khong-khì;

27

góa phah góa ê seng-khu kàu thiám-thiám, hō͘ i hâng-ho̍k; kiaⁿ-liáu góa í-keng thôan hō͘ pa̍t lâng, pún-sin kiám-chhái tú-tio̍h kū-cho̍at.