Ko-Lîm-to chiân 第 8 章 - 巴克禮全羅

1

Lūn-kàu chè ngó͘-siōng ê mı̍h: Lán chai lán lóng ū tì-sek. Tì-sek ōe tì-kàu chū-ko; nā-sī jîn-ài ōe kiàn-lı̍p tek-hēng.

2

Lâng nā phah-sǹg i ū só͘ chai, chiū-sī i iáu-bē chai chiàu só͘ eng-kai chai.

3

Lâng nā thiàⁿ Siōng-tè, chit ê lâng chiū-sī hō͘ I só͘ bat.

4

Lūn-kàu chia̍h chè ngó͘-siōng ê mı̍h, lán chai ngó͘-siōng tī sè-kan sī bô iáⁿ ê, iā chai Siōng-tè to̍k-to̍k chı̍t-ê, bô pa̍t ê.

5

In-ūi sui-jiân ū chheng chòe Siōng-tè ê, he̍k-sī tī thiⁿ-nı̍h he̍k-sī tī tōe-nı̍h, chhin-chhiūⁿ ū chōe-chōe siōng-tè, chōe-chōe chú;

6

nā-sī lán chí ū chı̍t ê Siōng-tè, chiū-sī Pē, bān mı̍h pún tùi I, lán iā kui tī I; koh ū chı̍t ê Chú Iâ-so͘ Ki-tok, bān mı̍h tùi I, lán iā tùi I.

7

Chóng-sī lâng bô lóng ū chit hō tì-sek; ū-ê pài ngó͘-siōng kòaiⁿ-sì, kàu taⁿ lia̍h hit ê chè-sū chòe chè ngó͘-siōng ê mı̍h lâi chia̍h i, in ê liông-sim kì-jiân lóan-jio̍k, só͘-í chiū bak-tio̍h.

8

Chóng-sī chia̍h-mı̍h bōe hō͘ Siōng-tè hoaⁿ-hí lán; bô chia̍h, lán bô khui-sún; chia̍h, lán iā bô lī-ek.

9

To̍k-to̍k tio̍h kín-sīn, kiaⁿ-liáu lín chit ê kôan chòe nńg-chiáⁿ ê lâng ê that-gāi.

10

In-ūi nā ū lâng khòaⁿ-kìⁿ lí ū tì-sek ê chē toh tī ngó͘-siōng ê biō, hit ê lóan-jio̍k ê lâng ê liông-sim kiám bô tùi án-ni hòng-táⁿ, lâi chia̍h chè ngó͘-siōng ê mı̍h mah?

11

in-ūi tùi lí ê tì-sek hit ê lóan-jio̍k ê lâng tîm-lûn, chiū-sī Ki-tok thòe i sí ê hiaⁿ-tī.

12

Lín án-ni tek-chōe hiaⁿ-tī, siong-tio̍h in lóan-jio̍k ê liông-sim, chiū-sī tek-chōe Ki-tok.

13

Só͘-í chia̍h-mı̍h nā hō͘ góa ê hiaⁿ-tī po̍ah-tó, góa chiū éng-éng m̄ chia̍h bah, bián-tit hō͘ góa ê hiaⁿ-tī po̍ah-tó.