Ko-Lîm-to chiân 第 13 章 - 巴克禮全羅

1

Góa siat-sú ōe kóng lâng kap thiⁿ-sài ê im-gú, nā bô jîn-ài, góa chiū chiâⁿ chòe hiáng ê tâng-khì, tân ê lâ-po̍ah.

2

Góa siat-sú chòe sian-ti, bêng-pe̍k lóng-chóng ê ò-biāu kap lóng-chóng ê chai-bat; koh siat-sú ū chiâu-pī ê sìn, kàu-gia̍h lâi î soaⁿ, nā bô jîn-ài, góa chiū bōe sǹg chòe sī sím-mı̍h.

3

Góa siat-sú chīn só͘ ū ê lâi chín-chè, koh hiàn góa ê seng-khu hō͘ hé sio, nā bô jîn-ài, chiū góa bô tit-tio̍h lī-ek.

4

Jîn-ài sī gâu khoan-iông chû-pi; jîn-ài sī bô òan-tò͘; jîn-ài bô khoa-kháu, bô phín-phóng,

5

bô kiâⁿ kiàn-siàu ê sū, bô kiû ka-kī ê lī-ek, bô khòai siū-khì, bô kì-tit lâng ê pháiⁿ;

6

bô hoaⁿ-hí put-gī, sī kap chin-lí saⁿ-kap hoaⁿ-hí;

7

hōan sū jím-siū, hōan sū siong-sìn, hōan sū ǹg-bāng, hōan sū thun-lún.

8

Jîn-ài éng-óan bōe bô--khì; nā-sī sian-ti ê chit beh hòe-bô, hiah ê im-gú beh soah, chai-bat beh hòe-bô.

9

In-ūi lán só͘ chai ê bô ôan-chôan, chòe sian-ti iā bô ôan-chôan;

10

ôan-chôan ê nā kàu, bô ôan-chôan ê chiū hòe-bô.

11

Góa chòe gín-ná ê sî, kóng ōe chhin-chhiūⁿ gín-ná, sèng-chêng chhin-chhiūⁿ gín-ná, ì-kiàn chhin-chhiūⁿ gín-ná; í-keng sêng-jîn, chiū hòe-bô gín-ná ê sū.

12

In-ūi lán taⁿ tùi kiàⁿ teh khòaⁿ, bū-bū bô bêng; nā-sī kàu hit sî chiū tng-thâu tùi-bīn. Góa taⁿ só͘ chai bô ôan-chôan; kàu hit sî chiū chai, chhin-chhiūⁿ góa hō͘ Chú chai chı̍t iūⁿ.

13

Hiān-kim só͘ chûn ê, chiū-sī sìn, ǹg-bāng, jîn-ài; chí saⁿ hāng, kî-tiong tē it tōa ê sī jîn-ài.