Ko-Lîm-to chiân 第 14 章 - 巴克禮全羅

1

Tio̍h kiû jîn-ài; iā tio̍h chhiat-chhiat him-bō͘ sio̍k tī sîn ê un-sù; khah iàu-kín ê sī chòe sian-ti lâi thôan-tō.

2

In-ūi kóng kok iūⁿ ê im-gú ê m̄ sī kap lâng kóng, sī kap Siōng-tè kóng, in-ūi bô lâng ōe hiáu thiaⁿ; chóng-sī i ū teh kóng sio̍k sîn ê ò-biāu.

3

To̍k-to̍k chòe sian-ti lâi thôan-tō ê sī kap lâng kóng, lâi kiàn-lı̍p, lâi khòan-bián, lâi an-ùi.

4

Kóng im-gú ê sī kiàn-lı̍p ka-kī; chòe sian-ti thôan-tō ê sī kiàn-lı̍p kàu-hōe.

5

Góa ài tit lín lóng ōe kóng im-gú, to̍k-to̍k koh khah ài, sī lín chòe sian-ti lâi thôan-tō. In-ūi kóng im-gú ê nā bô hoan-e̍k, hō͘ kàu-hōe tit-tio̍h kiàn-lı̍p, chiū chòe sian-ti lâi thôan-tō ê pí i khah tōa.

6

Taⁿ hiaⁿ-tī ah, góa kàu lín hia, nā chheng-chheng kóng im-gú, iā bô ēng khé-sī, á-sī chai-bat, á-sī chòe sian-ti lâi thôan-tō, á-sī ēng kà-sī ê ōe lâi kā lín kóng, ū sím-mı̍h lī-ek lín?

7

Hit hō bô o̍ah-khì ê mı̍h teh chhut siaⁿ, chhin-chhiūⁿ siau chhin-chhiūⁿ khîm, nā bô hun-piat i ê im, thái ōe chai só͘ pûn só͘ tôaⁿ ê sī sím-mı̍h ah?

8

Nā sī sàu-kak chhut bô tiāⁿ-tio̍h ê im, chī-chūi ōe pī-pān kau-chiàn ah?

9

Lín iā sī án-ni, nā bô ēng chı̍h kóng khòai bêng ê ōe, thái ōe chai só͘ kóng ê ah? lín só͘ kóng ê hō͘ hong pe-khì.

10

Sè-chiūⁿ ê im-gú put-lūn jōa chōe iūⁿ, bô chı̍t ê bô ì-sù.

11

Góa nā m̄ bat hit ê siaⁿ ê ì-gī, chiū kóng ê lâng beh lia̍h góa chòe hoan, góa iā beh lia̍h i chòe hoan.

12

Án-ni lín kì-jiân chhiat-chhiat him-bō͘ sio̍k tī sîn ê un-sù, tio̍h kiû hō͘ lín chhiong-móa lâi kiàn-lı̍p kàu-hōe.

13

Só͘-í kóng im-gú ê tio̍h kiû ōe hoan-e̍k.

14

Góa nā ēng im-gú kî-tó, góa ê sîn ū teh kî-tó, nā-sī góa ê sim-su bô só͘ lī-ek.

15

Án-ni sī cháiⁿ-iūⁿ? Góa beh ēng sîn kî-tó, iā beh ēng sim-su kî-tó; góa beh ēng sîn gîm si, iā beh ēng sim-su gîm si.

16

Nā bô, chiū lín ēng sîn chiok-siā, hit hō pêng-siông lâng kì-jiân m̄ chai lí teh kóng sím-mı̍h, i thái ōe tng lí kám-siā ê sî lâi kóng, À-bēng?

17

Lí ê kám-siā sī hó, nā-sī pa̍t lâng bô tit-tio̍h kiàn-lı̍p.

18

Góa kám-siā Siōng-tè, góa kóng im-gú pí lín chèng lâng khah chōe.

19

Chóng-sī tī kàu-hōe tiong góa ài ēng sim-su kóng gō͘ kù thang kà-sī lâng ê ōe, iâⁿ-kè kóng bān kù ê im-gú.

20

Hiaⁿ-tī ah, lūn tì-hūi bo̍h-tit chòe gín-ná; lūn pháiⁿ tio̍h chòe eⁿ-á, lūn tì-hūi tio̍h chòe tōa lâng.

21

Tī lu̍t-hoat ū kì-chài, Chú kóng, Góa beh ēng pa̍t iūⁿ im-gú ê lâng, kap pa̍t iūⁿ lâng ê chhùi-tûn, kā chit kok ê peh-sìⁿ kóng; án-ni in iû-gôan m̄ thiaⁿ góa.

22

Só͘-í im-gú chòe tiāu-thâu, m̄ sī ūi-tio̍h sìn ê lâng, sī ūi-tio̍h m̄ sìn ê lâng; chòe sian-ti lâi thôan-tō, m̄ sī ūi-tio̍h m̄ sìn ê lâng, sī ūi-tio̍h sìn ê lâng.

23

Siat-sú chôan kàu-hōe chū-chı̍p tī chı̍t só͘-chāi, nā lóng kóng im-gú, ū pêng-siông lâng á-sī m̄ sìn ê jı̍p-lâi, kiám bô beh kóng lín teh siáu mah?

24

Siat-sú lóng chòe sian-ti lâi thôan-tō, ū chı̍t ê m̄ sìn ê á-sī pêng-siông lâng jı̍p-lâi, i chiū hō͘ chèng lâng kiò-chhíⁿ, hō͘ chèng lâng gí-tòan;

25

i sim-lāi só͘ ún-ba̍t ê lō͘-hiān; chiū phak-lo̍h-khì pài Siōng-tè, kóng Siōng-tè chin-chiàⁿ tī lín tiong-kan.

26

Hiaⁿ-tī ah, án-ni sī cháiⁿ-iūⁿ? Lín chū-chı̍p ê sî, ta̍k lâng ū si-koa ê, ū kà-sī ê, ū khé-sī ê, ū im-gú ê, ū hoan-e̍k ê. Ta̍k hāng sū tio̍h kiâⁿ lâi tì-kàu kiàn-lı̍p.

27

Nā ū kóng im-gú ê, chí kham-tit nn̄g ê, siōng chōe saⁿ ê, iā tio̍h chiàu chhù-sū, koh tio̍h chı̍t lâng hoan-e̍k.

28

Nā bô lâng thang hoan-e̍k, chiū tī kàu-hōe tiong i tio̍h chēng-chēng; to̍k-to̍k tùi pún-sin kap tùi Siōng-tè kóng.

29

Chòe sian-ti lâi thôan-tō ê, iā chí kham nn̄g ê á saⁿ ê lâi kóng, kî-û ê tio̍h hun-piat i.

30

Nā piⁿ-thâu chē ê ū lâng tit-tio̍h khé-sī, hit ê tāi-seng kóng ê tio̍h chēng-chēng.

31

In-ūi lín chı̍t lâng chı̍t lâng lóng ōe thang chòe sian-ti lâi thôan-tō, hō͘ chèng lâng thang ha̍k-sı̍p, hō͘ chèng lâng thang siū khó͘-khǹg.

32

Koh sian-ti ê sîn sī sūn-ho̍k tī sian-ti.

33

In-ūi Siōng-tè m̄ sī hun-lōan ê, sī hô-pêng ê; chhin-chhiūⁿ tī sèng-tô͘ lóng-chóng ê kàu-hōe chı̍t iūⁿ.

34

Hū-jîn-lâng tī kàu-hōe tiong, tio̍h chēng-chēng; in-ūi m̄ chún in kóng; chiū-sī tio̍h sūn-ho̍k, chhin-chhiūⁿ lu̍t-hoat iā sī án-ni kóng.

35

In nā ài ha̍k-sı̍p sím-mı̍h, tio̍h tī ke-lāi mn̄g ka-kī ê tiōng-hu; in-ūi hū-jîn-lâng tī kàu-hōe tiong lâi kóng sī kiàn-siàu,

36

Siōng-tè ê tō-lí kiám sī tùi lín chhut? á-sī kan-ta thôan hō͘ lín ah?

37

Nā ū lâng ka-kī lia̍h chòe sian-ti, á-sī chòe sio̍k tī sîn ê lâng, chiū tio̍h chai góa só͘ siá hō͘ lín ê sī Chú ê bēng-lēng.

38

Nā ū lâng m̄ chai, chiū kù-chāi i m̄ chai.

39

Só͘-í góa ê hiaⁿ-tī ah, tio̍h chhiat-chhiat him-bō͘ chòe sian-ti lâi thôan-tō, iā bo̍h-tit kìm-chí kóng im-gú.

40

Hōan sū tio̍h bûn-ngá iā chiàu kui-kú lâi kiâⁿ.