Ko-Lîm-to chiân 第 15 章 - 巴克禮全羅

1

Hiaⁿ-tī ah, góa hō͘ lín chai góa chêng só͘ thôan hō͘ lín ê hok-im, lín só͘ sêng-siū, só͘ óa-khò lâi khiā-chāi ê;

2

lín nā chip-siú góa só͘ thôan hō͘ lín hok-im ê tō-lí, iā m̄ sī khang-khang sìn, chiū tùi chit-ê tit kiù.

3

In-ūi góa só͘ siū lâi thôan hō͘ lín ê, tē it chiū-sī Ki-tok ūi-tio̍h lán ê chōe sí, chiàu sèng-keng só͘ kì-chài;

4

koh ū bâi-chòng; tē saⁿ jı̍t koh-o̍ah, iā chiàu sèng-keng só͘ kì-chài;

5

ū chhut-hiān hō͘ Ki-hoat khòaⁿ-kìⁿ; koh chhut-hiān hō͘ cha̍p-jī ê sù-tô͘ khòaⁿ-kìⁿ;

6

koh chı̍t pái chhut-hiān hō͘ gō͘-pah gōa ê hiaⁿ-tī tâng sî khòaⁿ-kìⁿ, kî-tiong tōa pòaⁿ iáu tī-teh, nā-sī ū-ê í-keng khùn-khì.

7

Koh chı̍t pái chhut-hiān hō͘ Ngá-kok khòaⁿ-kìⁿ; iū-koh chı̍t pái chhut-hiān hō͘ lóng-chóng ê sù-tô͘ khòaⁿ-kìⁿ;

8

siōng lō͘-bé iā chhut-hiān hō͘ góa khòaⁿ-kìⁿ, góa sī chhin-chhiūⁿ bē kàu ge̍h lâi siⁿ ê.

9

In-ūi góa sī sù-tô͘ ê chì-bî-sòe ê, bōe kham-tit chheng chòe sù-tô͘, in-ūi góa bat khún-tio̍k Siōng-tè ê kàu-hōe.

10

Chóng-sī góa taⁿ chiâⁿ chòe chit téng-hō ê lâng, sī tùi Siōng-tè ê un chiah ū; koh I só͘ siúⁿ-sù góa ê un m̄ sī khang-khang; nā-sī góa pí in chèng lâng khah tio̍h-bôa; kî-sı̍t m̄ sī góa, sī Siōng-tè ê un kap góa tī-teh ê.

11

Án-ni put-lūn sī góa á-sī in, góan mī án-ni thôan, lín mī án-ni sìn.

12

Taⁿ nā thôan Ki-tok tùi sí-lâng tiong koh-o̍ah, cháiⁿ-iūⁿ lín tiong-kan ū lâng kóng sí-lâng bô koh-o̍ah ah?

13

Sí-lâng nā bô koh-o̍ah, chiū Ki-tok bē bat koh-o̍ah;

14

Ki-tok nā bē bat koh-o̍ah, chiū góan só͘ thôan ê sī khang-khang, lín ê sìn iā sī khang-khang.

15

Sí-lâng nā bô koh-o̍ah, chiū Siōng-tè bē bat hō͘ Ki-tok koh-o̍ah; m̄ kú góan kan-chèng I bat hō͘ I koh-o̍ah, chiū hián-bêng góan sī chòe Siōng-tè pe̍h-chha̍t ê kan-chèng.

16

In-ūi sí-lâng nā bô koh-o̍ah, chiū Ki-tok bē bat koh-o̍ah.

17

Ki-tok nā bē bat koh-o̍ah, chiū lín ê sìn bô chhái-kang, lín iáu-kú tī lín ê chōe tiong.

18

Chiū hiah ê tiàm-tī Ki-tok í-keng khùn ê, iā sī tîm-lûn.

19

Lán nā kan-ta chāi-siⁿ ū ǹg-bāng tī Ki-tok, chiū tī chèng lâng tiong lán sī tē it khó-lîn ê.

20

Chóng-sī taⁿ Ki-tok í-keng tùi sí-lâng tiong koh-o̍ah, chòe chiah ê teh khùn ê thâu chı̍t ê koh-o̍ah ê.

21

In-ūi kì-jiân tùi chı̍t lâng chiah ū sí, iā tùi chı̍t lâng chiah ū sí-lâng ê koh-o̍ah.

22

In-ūi chhin-chhiūⁿ tī A-tong chèng lâng lóng sí, iā chhin-chhiūⁿ án-ni tī Ki-tok chèng lâng beh tit-tio̍h koh-o̍ah.

23

Nā-sī ta̍k ê chiàu i ê chhù-sū; thâu chı̍t ê sī Ki-tok, tē jī sī hiah ê sio̍k Ki-tok ê, tī I lîm-kàu ê sî.

24

Jiân-āu bo̍at-kî kàu, chiū-sī I í-keng hòe-bô lóng-chóng ê chèng-tī, lóng-chóng ê kôan-pèng kap châi-lêng, chiong kok kau hō͘ Pē Siōng-tè ê sî;

25

in-ūi I tek-khak chòe ông, kàu hē lóng-chóng ê tùi-te̍k tī I ê kha-ē.

26

Tē it lō͘-bé siū hòe-bô ê tùi-te̍k, chiū-sī Sí.

27

In-ūi ū kóng, I hō͘ bān-hāng-ū hâng-ho̍k tī I ê kha-ē. Í-keng kóng, Bān-hāng-ū hâng-ho̍k I, chiū hit ê hō͘ bān-hāng-ū hâng-ho̍k I ê, bô chāi-lāi, sī bêng.

28

Bān-hāng-ū í-keng hâng-ho̍k I, chiū Kiáⁿ iā beh ka-kī hâng-ho̍k tī hō͘ bān-hāng-ū hâng-ho̍k I ê, hō͘ Siōng-tè tī bān-ū tiong chòe bān-ū ê.

29

Nā m̄ sī án-ni, chiū ūi-tio̍h sí-lâng siū sóe-lé ê, beh siáⁿ-sū? Sí-lâng nā it-khài bô koh-o̍ah, ūi-tio̍h in siū sóe-lé sím-mı̍h iân-kò͘?

30

Koh góan siáⁿ-sū sî-sî mō͘-hiám ah?

31

Hiaⁿ-tī ah, góa tī lán ê Chú Ki-tok Iâ-so͘ ūi-tio̍h lín só͘ ū ê khoa-kháu, góa kí i lâi chiù-chōa, góa jı̍t-jı̍t phe-sí.

32

Góa nā chiàu lâng ê khóan, tī Í-hut-só͘ kap iá-siù saⁿ-phah, góa ū sím-mı̍h lī-ek? Sí-lâng nā bô koh-o̍ah, lán chiū chòe lán lim, chòe lán chia̍h, in-ūi bîn-á-jı̍t beh sí lah.

33

Bo̍h-tit siū bê-he̍k; Lām-sám kau-pôe sī pāi-hōai hó tek-hēng.

34

Tio̍h chhíⁿ-gō͘ lâi chiàu gī, bo̍h-tit hōan chōe; in-ūi ū lâng m̄ bat Siōng-tè. Góa kóng án-ni, sī beh hō͘ lín kiàn-siàu.

35

Ū lâng beh kóng, Sí-lâng cháiⁿ-iūⁿ koh-o̍ah? Ēng sím-mı̍h hō ê sin-thé lâi ah?

36

Gōng lâng ah, lí só͘ iā ê, bô tāi-seng sí, chiū bōe o̍ah.

37

Koh lí só͘ iā ê m̄ sī hit ê chiong-lâi ê hêng-thé, he̍k-sī be̍h, he̍k-sī pa̍t iūⁿ ê ngó͘-kok, put-kò sī chı̍t lia̍p chí nā-tiāⁿ.

38

Nā-sī Siōng-tè chiàu I só͘ tiāⁿ-tio̍h ê, ēng hêng-thé hō͘ i; tī ta̍k hō chéng-chí ū i ka-kī ê hêng-thé.

39

Kìⁿ-nā jio̍k-thé m̄ sī tâng chı̍t iūⁿ ê jio̍k-thé; lâng-ê chı̍t khóan, siù-ê chı̍t khóan, chiáu-ê chı̍t khóan, hî-ê chı̍t khóan.

40

Ū thiⁿ-nı̍h ê hêng-thé, iā ū tōe-nı̍h ê hêng-thé; chóng-sī tī thiⁿ-nı̍h ê ê êng-kng koh-iūⁿ tī tōe-nı̍h ê ê êng-kng.

41

Jı̍t ê êng-kng sī chı̍t khóan, ge̍h ê êng-kng koh chı̍t khóan, chiah ê chhiⁿ ê êng-kng iū-koh chı̍t khóan; in-ūi chit lia̍p chhiⁿ kap hit lia̍p chhiⁿ, êng-kng bô saⁿ-tâng.

42

Sí-lâng koh-o̍ah iā sī án-ni. Só͘ iā ê sī ōe hiú-nōa, koh-o̍ah ê sī bōe hiú-nōa;

43

só͘ iā ê sī lêng-jio̍k, koh-o̍ah ê sī êng-kng; só͘ iā ê sī nńg-chiáⁿ, koh-o̍ah ê sī ióng-kiāⁿ;

44

só͘ iā ê sī hiat-khì ê hêng-thé, koh-o̍ah ê sī sîn-lêng ê hêng-thé; nā ū hiat-khì ê hêng-thé, iā ū sîn-lêng ê hêng-thé.

45

Só͘ kì-chài iā sī án-ni kóng, Thâu chı̍t ê lâng, A-tong, chiâⁿ-chòe ū hiat-khì ê o̍ah lâng.

46

Lō͘-bé ê A-tong chiâⁿ-chòe siúⁿ-sù o̍ah ê sîn. Chóng-sī sîn ê m̄ sī tāi-seng, sī hiat-khì ê tāi-seng; sîn ê tè-āu.

47

Thâu chı̍t ê lâng chhut tī tōe-nı̍h, sio̍k tī thô͘ ê lūi; tē jī ê lâng chhut tī thiⁿ-nı̍h.

48

Hit ê sio̍k tī thô͘-lūi ê sī cháiⁿ-iūⁿ, kìⁿ-nā sio̍k tī thô͘-lūi ê iā sī án-ni; iā hit ê sio̍k tī thiⁿ-nı̍h ê sī cháiⁿ-iūⁿ, kìⁿ-nā sio̍k tī thiⁿ-nı̍h ê iā sī án-ni.

49

Lán kì-jiân chhēng sio̍k tī thô͘ ê ê hêng-chōng, iā beh chhēng sio̍k tī thiⁿ ê ê hêng-chōng.

50

Hiaⁿ-tī ah, góa kóng hiat-khì ê jio̍k-thé bōe-ōe sêng-chiap Siōng-tè ê kok, ōe hiú-nōa ê bōe-ōe sêng-chiap bōe hiú-nōa ê.

51

Taⁿ góa ēng ò-biāu kā lín kóng; lán bô beh lóng khùn, sī beh lóng piàn-hòa,

52

chı̍t sî-á kú, ba̍k chı̍t nih, bo̍at-kî sàu-kak tân ê sî; in-ūi sàu-kak beh tân, sí-lâng chiū beh koh-o̍ah, piàn-chòe bōe hiú-nōa ê, lán iā beh piàn-hòa.

53

In-ūi chit ê ōe hiú-nōa ê tek- khak tio̍h piàn-chòe bōe hiú-nōa, chit ê ōe sí ê piàn-chòe bōe sí.

54

Nā-sī chit ê ōe hiú-nōa ê í-keng piàn-chòe bōe hiú-nōa, iā chit ê ōe sí ê í-keng piàn-chòe bōe sí, chiū só͘ kì-chài kóng, Ū hòe-bô sí lâi khah-iâⁿ i, chit ê ōe hit sî beh èng-giām.

55

Sí ah, lí ê khah-iâⁿ tī tá-lo̍h? Sí ah, lí ê lī-hāi tī tá-lo̍h?

56

Sí ê lī-hāi chiū-sī chōe, chōe ê kôan-sè sī lu̍t-hoat.

57

Chóng-sī kám-siā Siōng-tè, I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ.

58

Só͘-í, góa só͘ thiàⁿ ê hiaⁿ-tī ah, lín tio̍h kian-kò͘, bô iô-choah, siông-siông chīn-la̍t tī Chú ê kang; in-ūi chai lín tio̍h-bôa tī Chú ê m̄ sī khang-khang.