Ko-Lîm-to chiân 第 4 章 - 巴克禮全羅

1

Lâng tio̍h lia̍h góan chòe Ki-tok ê chhe-ēng, chòe Siōng-tè chiah ê ò-biāu ê kóan-ke.

2

Koh só͘ ǹg-bāng tī kóan-ke ê, sī ài tit i chīn-tiong.

3

Nā-sī góa hō͘ lín á-sī pa̍t lâng phoe-phêng, góa lia̍h chòe ke̍k sió-khóa ê sū; góa iā bô ka-kī phoe-phêng.

4

In-ūi góa m̄ chai ka-kī ū sím-mı̍h thang chek-pī, chóng-sī góa bô tùi chit-ê tit-tio̍h chheng-chòe-gī; to̍k-to̍k phoe-phêng góa ê chiū-sī Chú.

5

Só͘-í sî bē kàu, lín bo̍h-tit phoe-phêng sím-mı̍h; thèng-hāu Chú kàu, I beh ēng kng chiò tī o͘-àm chiah ê ún-ba̍t ê sū, hián-bêng chiah ê sim-lāi ê kè-bô͘; hit sî ta̍k lâng beh tùi Siōng-tè tit-tio̍h i ê o-ló.

6

Hiaⁿ-tī ah, góa ūi-tio̍h lín chiah-ê chioh pún-sin kap A-pho-lô lâi kóng-khí chiah ê tāi-chì, sī beh hō͘ lín tī khóan-thāi góan ê sū lâi ha̍k-sı̍p chit kù. Bo̍h-tit kè-thâu tī só͘ kì-chài; bián-tit lín chū-ko, chun-tiōng chit-ê, khòaⁿ-khin hit-ê.

7

In-ūi chī-chūi hō͘ lí koh-iūⁿ tī pa̍t lâng ah? lí só͘ ū ê, tá-lo̍h chı̍t hāng m̄ sī tùi siū ê? Nā-sī tùi siū ê, cháiⁿ-iūⁿ khoa-kháu, ná chhin-chhiūⁿ m̄ sī tùi siū ê ah?

8

Lín í-keng pá-chiok, í-keng pù-ū, lín í-keng chòe ông, góan bô hūn; góa chin-chiàⁿ ài lín chòe ông, hō͘ góan iā kap lín saⁿ-kap chòe ông.

9

In-ūi góa teh siūⁿ, Siōng-tè ū an-tì góan chiah ê sù-tô͘ tī bé-liu, chhin-chhiūⁿ gí-sí ê hōan-lâng; in-ūi góan chiâⁿ-chòe chı̍t pîⁿ hì, hō͘ sè-kan, kap thiⁿ-sài, kap lâng khòaⁿ.

10

Góan ūi-tio̍h Ki-tok chòe gōng, lín tiàm-tī Ki-tok chòe tì-hūi; góan lóan-jio̍k, lín ióng-chòng; lín chun-kùi, góan pi-chiān.

11

Kàu tī chit tia̍p góan iā iau, iā chhùi-ta, thǹg-pak-theh, hō͘ lâng cheng, bô tiāⁿ-tio̍h ê só͘-chāi;

12

iā lô-khó͘ chhin-chhiūⁿ chòe kang; siū lóe-mē, chiū kā lâng chiok-hok; siū khún-tio̍k, chiū thun-lún;

13

siū húi-pòng, chiū kap lâng hó-chhùi; kèng-jiân chiâⁿ-chòe sè-kan ê pùn-sò, bān mı̍h ê che-tái, kàu tī kin-á-jı̍t.

14

Góa siá chiah-ê m̄ sī beh hō͘ lín kiàn-siàu, sī kéng-kài lín, chhin-chhiūⁿ góa só͘ thiàⁿ ê kiáⁿ.

15

In-ūi lín tiàm-tī Ki-tok, sian-siⁿ sui-jiân káng-bān, nā-sī lāu-pē chiū bô chōe ê; in-ūi tī Ki-tok Iâ-so͘, góa bat tùi hok-im lâi siⁿ lín.

16

Só͘-í góa khǹg lín tio̍h o̍h góa.

17

In-ūi án-ni góa í-keng chhe Thê-mô͘-thài khì lín hia. i tiàm-tī Chú sī góa só͘ thiàⁿ koh chīn-tiong ê kiáⁿ; i beh hō͘ lín kì-tit góa tiām-tī Ki-tok ê kiâⁿ-ta̍h, chiū-sī chhin-chhiūⁿ góa ta̍k só͘-chāi, tī ta̍k ê kàu-hōe só͘ kà-sī ê.

18

Ū lâng chū-ko, lia̍h-chòe góa bô beh kàu lín hia.

19

Chóng-sī Chú nā ún-chún, góa beh kín-kín khì chiū-kūn lín; koh góa só͘ beh chai ê, m̄ sī hiah ê chū-ko ê lâng ê ōe, chiū-sī in ê kôan-lêng.

20

In-ūi Siōng-tè ê kok put-chāi kóng ōe, sī chāi-tī kôan-lêng.

21

Lín ài cháiⁿ-iūⁿ? góa chiū-kūn lín tio̍h kia̍h chhê-á khì? á-sī ēng jîn-ài kap un-jiû ê sim-sîn ah?