Ko-Lîm-to chiân 第 5 章 - 巴克禮全羅

1

Khak-sı̍t thiaⁿ-kìⁿ lín tiong-kan ū îm-lōan, iā hit hō îm-lōan gōa-pang tiong só͘ bô ê, chiū-sī ū lâng ū i ê lāu-pē ê bó͘.

2

Lín iáu teh chū-ko, iā kèng-jiân bô ai-siong, chiong kiâⁿ chit hō tāi-chì ê lâng tùi lín tiong-kan tû-khì.

3

Góa seng-khu saⁿ lī-khui, sim-sîn kap lín saⁿ-kūn, chhin-chhiūⁿ chhin-sin tī-teh, í-keng ū gí-tiāⁿ kiâⁿ chit hō sū ê lâng,

4

thok lán ê Chú Iâ-so͘ ê miâ, lín chiah-ê í-keng chū-chı̍p, góa ê sîn iā tī-teh, koh ū lán ê Chú Iâ-so͘ ê kôan-lêng,

5

chiong hit hō lâng kau hō͘ Sat-tàn, tì-kàu pāi-hōai i ê jio̍k-thé, beh hō͘ i ê sîn tī lán ê Chú Iâ-so͘ ê jı̍t tit kiù.

6

Lín ê khoa-kháu m̄ sī hó. Kiám m̄ chai tām-po̍h kàⁿ ōe hoat kui-sn̂g mah?

7

Kū ê kàⁿ tio̍h tû kàu chheng, hō͘ lín chiâⁿ-chòe sin ê sn̂g, chhin-chhiūⁿ lín sī bô kàⁿ ê. In-ūi lán pôaⁿ-kè-choeh ê iûⁿ-ko iā í-keng thâi, chiū-sī Ki-tok.

8

Só͘-í lán tio̍h siú choeh, bô ēng kū ê kàⁿ, iā bô ēng pháiⁿ sim ok-to̍k ê kàⁿ, sī ēng sûn-chôan chin-sı̍t ê bô kàⁿ piáⁿ.

9

Chêng góa siá hit tiuⁿ phoe hō͘ lín, kah lín m̄ thang kap îm-lōan ê lâng chham-chhap,

10

m̄ sī hòan-hòan chí chit sè-kan îm-lōan ê, á-sī tham-sim ê, kap le̍k-sek ê, á-sī pài ngó͘-siōng ê; nā beh án-ni, tio̍h lī-khui sè-kan chiah ōe.

11

Chóng-sī taⁿ góa siá phoe hō͘ lín sī kóng, nā ū lâng chheng chòe hiaⁿ-tī iā ū îm-lōan, á-sī tham-sim, á-sī pài ngó͘-siōng, á-sī lóe-mē, á-sī hò͘ⁿ chiú, á-sī le̍k-sek ê, bo̍h-tit kap i chham-chhap; chit hō lâng liân kap i chia̍h iā m̄ thang.

12

In-ūi phòaⁿ-tòan gōa-bīn lâng kap góa ū sím-mı̍h kan-sia̍p?

13

Lāi-bīn ê lâng kiám m̄ sī lín phòaⁿ-tòan ê; iā gōa-bīn ê lâng Siōng-tè phòaⁿ-tòan i ah? Hit ê pháiⁿ lâng tio̍h tùi lín tiong-kan tû-khì.