Ko-Lîm-to chiân 第 6 章 - 巴克禮全羅

1

Lín tiong-kan ū lâng kap lâng oan-ke, kiám káⁿ kò tī put-gī ê lâng ê bīn-chêng iā bô tī sèng-tô͘ ê bīn-chêng mah?

2

Á-sī lín m̄ chai sèng-tô͘ beh sím-phòaⁿ sè-kan? Sè-kan siōng-chhiáⁿ hō͘ lín sím-phòaⁿ, iā bōe kham-tit sím-phòaⁿ ke̍k sió-khóa ê sū mah?

3

Kiám m̄ chai lán beh sím-phòaⁿ thiⁿ-sài? hô-hòng kim-sè ê sū mah?

4

Taⁿ lín nā ū kim-sè ê sū tio̍h sím-phòaⁿ, lín kiám sī ēng kàu-hōe tiong bô miâ-jī ê sím-phòaⁿ mah?

5

Góa kóng án-ni sī beh hō͘ lín kiàn-siàu. Kiám sī lín tiong-kan bô chı̍t ê tì-sek ê lâng, ōe phòaⁿ-tòan tī i ê hiaⁿ-tī tiong?

6

Kèng-jiân hiaⁿ-tī kò hiaⁿ-tī, sòa kò tī m̄ sìn ê lâng ê bīn-chêng.

7

Taⁿ lín ū saⁿ-kò ê sū, í-keng lóng sī lín ê tōa sit-chhò. Siáⁿ-sū m̄ lêng-khó͘ siū oan-óng? siáⁿ-sū m̄ lêng-khó͘ siū khek-khui ah?

8

Nā-sī lín kèng-jiân oan-óng lâng, khek-khui lâng, hòng-kiam chiah-ê sī hiaⁿ-tī.

9

Kiám m̄ chai put-gī ê lâng bōe-ōe sêng-chiap Siōng-tè ê kok mah? Bo̍h-tit chhò-gō͘; îm-lōan ê, pài ngó͘-siōng ê, kiâⁿ kan-îm ê,

10

chòe lôan-tông ê, hò͘ⁿ lâm-sek ê, chòe chha̍t ê, tham-sim ê, hò͘ⁿ-chiú ê, lóe-mē lâng ê, le̍k-sek lâng ê, lóng bōe tit-tio̍h sêng-chiap Siōng-tè ê kok.

11

Lín tiong-kan ū lâng chá sī án-ni; nā-sī tī Chú Iâ-so͘ Ki-tok ê miâ, kap lán ê Siōng-tè ê Sîn, í-keng sóe chheng, í-keng tit-tio̍h chiâⁿ-sèng, í-keng chheng-chòe-gī.

12

Hōan sū góa lóng thang; nā-sī bô it-chīn ū lī-ek. Hōan sū góa lóng thang, nā-sī bô chı̍t hāng góa beh hō͘ i kóan.

13

Chia̍h sī ūi-tio̍h pak-tó͘, pak-tó͘ iā sī ūi-tio̍h chia̍h, chóng-sī chit nn̄g hāng Siōng-tè beh hòe i. To̍k-to̍k seng-khu m̄ sī ūi-tio̍h îm-lōan, sī ūi-tio̍h Chú, Chú iā sī ūi-tio̍h seng-khu.

14

Siōng-tè bat hō͘ Chú koh-o̍ah, iā beh tùi I ê kôan-lêng hō͘ lán koh-o̍ah.

15

Kiám m̄ chai lín ê seng-khu sī Ki-tok ê pah-thé? góa kiám thang chiong Ki-tok ê pah-thé hō͘ i chòe chhiong-ki ê pah-thé mah? Tòan-tòan m̄ thang.

16

Á-sī lín m̄ chai kap chhiong-ki liân-ha̍p ê, sī kap i chòe chı̍t thé? in-ūi kóng, Nn̄g ê beh chiâⁿ chòe chı̍t thé.

17

To̍k-to̍k kap Chú liân-ha̍p ê sī chı̍t ê sîn.

18

Tio̍h siám-pī îm-hēng. Lâng só͘ hōan ta̍k hāng ê chōe lóng sī sin-khu gōa ê; nā-sī kiâⁿ kan-îm ê sī hōan-chōe kàu tī ka-kī ê seng-khu.

19

Á-sī lín m̄ chai lín ê seng-khu chiū-sī Sèng Sîn ê tiān; Sèng Sîn tiàm-tī lín, chiū-sī lín tùi Siōng-tè só͘ ū ê? koh lín m̄ sī ka-kī ê;

20

in-ūi sī ēng kè-chîⁿ bóe ê; só͘-í tio̍h tī lín ê seng-khu êng-kng Siōng-tè.