Lia̍t-ông siōng-kòan 第 4 章 - 巴克禮全羅

1

Só͘-lô-bûn ông chòe Í-sek-lia̍t chèng-lâng ê ông.

2

I só͘ ū ê jîn-sîn kì tī ē-bīn: Sat-tok ê kiáⁿ A-sat-lī-ngá chòe chè-si;

3

Sī-sa nn̄g ê kiáⁿ Í-lī-hô-lia̍t A-hi-a chòe pì-su; A-hi-lu̍t ê kiáⁿ Iok-sa-hoat chòe sú-koaⁿ;

4

Iâ-hô-iâ-tāi ê kiáⁿ Pí-ná-ngá chòe kun-tiúⁿ; Sat-tok kap A-pí-a-tha chòe chè-si;

5

Ná-tan ê kiáⁿ A-sat-lī-ngá chòe chèng-koaⁿ-tiúⁿ; Ná-tan ê kiáⁿ Sat-pò͘-tek chòe chè-si, iā chòe ông ê pêng-iú;

6

A-hi-soah chòe kóan-ke--ê; A-pí-tāi ê kiáⁿ A-to-nî-lân chòe tok-kang--ê.

7

Só͘-lô-bûn tī Í-sek-lia̍t chôan-tōe siat-lı̍p cha̍p-jī ê koaⁿ-ôan, in ūi-tio̍h ông kap i ê ke pī-pān chia̍h-mı̍h, múi-nî ta̍k-lâng chı̍t-ge̍h-jı̍t pī-pān chia̍h-mı̍h.

8

In ê miâ kì tī ē-tóe: tī Í-hoat-liân soaⁿ-tōe, ū Piān-hō͘-jíⁿ;

9

Tī Má-ka-su, Sa-pin, Pek-sī-be̍k, Í-lûn-pek-hap-lâm, Ū Piān-tī-kah;

10

tī A-ló͘-po̍k, ū Piān-hi-sek, i iā tī So-ko kap Hi-hut chôan-tōe;

11

tī To-jíⁿ ê chôan soaⁿ-tōe, ū Piān-a-pí-ná-ta̍t; i chhōa Só͘-lô-bûn ê cha-bó͘-kiáⁿ Tha-hoat chòe-bó͘;

12

tī Tha-la̍p, kap Bí-kiat-to, kap óa-kūn Sat-la̍h-tha-ná, Iâ-su-lia̍t ē-pêng ê Pek-siān chôan-tōe, tùi Pek-siān kàu A-pek-bí-hô-la̍h, kàu Iok-liām ê gōa-bīn, ū A-hi-lu̍t ê kiáⁿ Pa-ná;

13

tī Ki-lia̍t ê la̍h-bo̍at, ū Piān-ki-pia̍t, i iā tī Ki-lia̍t ê Má-ná-se kiáⁿ-sun Gāi-jíⁿ hiah ê siâⁿ, Pa-san ê A-jíⁿ-ko-pek tōe ê tōa-siâⁿ, la̍k-cha̍p chō siâⁿ, lóng ū siâⁿ-chhiûⁿ kap tâng ê mn̂g-kông;

14

tī Má-hap-liām ū Ek-to ê kiáⁿ A-hi-ná-ta̍t;

15

tī Ná-hut-tha-lī ū A-hi-má-su, i iā chhōa Só͘-lô-bûn chı̍t ê cha-bó͘-kiáⁿ Pa-sı̍t-bo̍at chòe-bó͘;

16

tī A-siat kap A-lo̍k ū Hō͘-su ê kiáⁿ Pa-ná;

17

tī Í-sat-ka ū Phàⁿ-lō͘-a ê kiáⁿ Iok-sa-hoat;

18

tī Piān-ngá-bín ū Í-la̍h ê kiáⁿ Sī-múi;

19

tī Ki-lia̍t tōe, ū Ou-lī ê kiáⁿ Ki-pia̍t; i iā tī A-mô͘-lī ông Se-hông kap Pa-san ông Go̍k ê tōe, to̍k-to̍k i chı̍t-lâng tī-hia chòe-koaⁿ.

20

Iû-tāi kap Í-sek-lia̍t chèng-lâng chin-chōe, chhin-chhiūⁿ hái-piⁿ ê soa hiah-chōe, iā chia̍h, iā lim, iā chin khòai-lo̍k.

21

Tùi Tōa-hô kàu Hui-lī-sū tōe, tı̍t-kàu Ai-kı̍p pian-kài hiah ê kok, Só͘-lô-bûn lóng kóan-hat in; Só͘-lô-bûn o̍ah-teh ê jı̍t, in lóng chìn-kòng ho̍k-sāi i.

22

Só͘-lô-bûn ta̍k-jı̍t só͘ ēng lâi chia̍h-ê, iù ê mī-hún saⁿ-cha̍p ko-jíⁿ, chho͘ ê mī-hún la̍k-cha̍p ko-jíⁿ;

23

pûi ê gû cha̍p-chiah, chháu-tiûⁿ ê gû jī-cha̍p chiah, iûⁿ chı̍t-pah chiah, iáu ū lo̍k, lêng-iông, chhiah-lo̍k, kap pûi ê koe.

24

In-ūi i kóan-hat Tôa-hô chit-pêng ê chôan-tōe, tùi Thê-hut-sat kàu Ka-sat, chiū-sī hit ê Hô chit-pêng chiah ê ông; koh tī i sì-ûi ê sì-hng, lóng hióng-siū thài-pêng.

25

Só͘-lô-bûn o̍ah-teh ê jı̍t, tùi Tàn kàu Pia̍t-sī-pa ê Iû-tāi lâng kap Í-sek-lia̍t lâng lóng an-jiân khiā-khí, ta̍k-lâng tī i ê phû-tô-chhiū-kha, kap bû-hoa-kó chhiū-kha.

26

Só͘-lô-bûn ū sì-bān keng thò chhia ê bé-pâng, ū bé-peng chı̍t-bān nn̄g-chheng.

27

Hiah ê koaⁿ-ôan, ta̍k-ê chiàu i ê ge̍h-hūn, kā Só͘-lô-bûn ông, kap kìⁿ-nā chē Só͘-lô-bûn ông ê toh--ê, pī-pān chia̍h-mı̍h, lóng bô khiàm chı̍t-hāng.

28

Kok-lâng chīn i ê chit, ūi-tio̍h bé kap gâu-pháu ê bé, tòa tōa-be̍h kap chháu-liāu kàu in ê só͘-chāi.

29

Siōng-tè siúⁿ-sù Só͘-lô-bûn tì-hūi chhang-miâ ke̍k-tōa, sim iā khui-khoah, chhin-chhiūⁿ hái-piⁿ ê soa.

30

Só͘-lô-bûn ê tì-hūi pôaⁿ-kè tang-hng ê lâng ê tì-hūi, kap Ai-kı̍p it-chhè ê tì-hūi.

31

I ê tì-hūi iâⁿ-kè bān-lâng, iâⁿ-kè Í-su-la̍h lâng Í-thàm, kap Má-hat ê kiáⁿ Hi-bān, Kah-kok, Ta̍t-tāi; i ê miâ-siaⁿ pò-iông tī sì-ûi lia̍t-kok.

32

I chòe chim-giân saⁿ-chheng kù; si-koa chı̍t-chheng liân gō͘ siú.

33

I káng-lūn chháu-ba̍k, tùi Lī-pa-lùn ê pek-hiuⁿ-chhiū kàu chhiûⁿ-téng hoat--khí-lâi ê giû-chhek-chháu; koh káng-lūn cháu-siù, pe-chiáu, thâng-thōa, chúi-cho̍k.

34

Ū lâng tùi lia̍t-pang lâi, thiaⁿ Só͘-lô-bûn tì-hūi ê ōe, thiⁿ-ē lia̍t-ông thiaⁿ-kìⁿ Só͘-lô-bûn ê tì-hūi, iā ū chhe lâng lâi.