Lia̍t-ông siōng-kòan 第 5 章 - 巴克禮全羅

1

Chhui-lô ông Hi-lân chhe i ê lô͘-po̍k khì kìⁿ Só͘-lô-bûn, in-ūi thiaⁿ-kìⁿ lâng ēng iû boah i sòa-chiap i ê lāu-pē chòe ông; in-ūi Hi-lân pêng-sò͘ thiàⁿ Tāi-pı̍t.

2

Só͘-lô-bûn iā chhe lâng khì kìⁿ Hi-lân, kóng,

3

Lí chai góa ê pē Tāi-pı̍t, in-ūi sì-ûi sì-hng ê kau-chiàn, bōe-ōe in-ūi Iâ-hô-hoa i ê Siōng-tè ê miâ khí tiān, kàu Iâ-hô-hoa ēng tùi-te̍k hē tī i ê kha-ē.

4

Taⁿ Iâ-hô-hoa góa ê Siōng-tè í-keng siúⁿ-sù góa sì-hng pêng-an, tì-kàu bô tùi-te̍k, bô chai-ē.

5

Góa ì-sù beh ūi Iâ-hô-hoa góa ê Siōng-tè ê miâ khí tiān, sī chiàu Iâ-hô-hoa èng-ún góa ê pē Tāi-pı̍t ê ōe, kóng, Góa beh hō͘ lí ê kiáⁿ sòa-chiap lí, chē lí ê ūi, i beh ūi Góa ê miâ khí tiān.

6

Só͘-í chhiáⁿ lí bēng-lēng lâng, tī Lī-pa-lùn kā góa chhò pek-hiuⁿ-chhâ; góa ê lô͘-po̍k beh kap lí ê lô͘-po̍k saⁿ-kap chòe; góa iā beh chiàu lí kìⁿ só͘ tiāⁿ-tio̍h--ê, chiong lí ê lô͘-po̍k ê kang-chîⁿ kau lí; in-ūi lí chai, tī góan tiong-kan bô lâng chhin-chhiūⁿ Se-tùn lâng gâu chhò-chhiū.

7

Hi-lân thiaⁿ-kìⁿ Só͘-lô-bûn ê ōe, chiū chin hoaⁿ-hí, kóng, Kin-á-jı̍t eng-kai o-ló Iâ-hô-hoa, in-ūi I siúⁿ-sù Tāi-pı̍t chı̍t-ê ū tì-hūi ê kiáⁿ, tī-lí chiah-chōe ê peh-sìⁿ.

8

Hi-lân chhe lâng khì kìⁿ Só͘-lô-bûn kóng, Lí chhe lâng só͘ tùi góa kóng ê sū, góa ū thiaⁿ-kìⁿ; lūn-kàu pek-hiuⁿ-chhâ, kap siông-chhiū ê chhâ, góa beh chiàu lí ê sim-gōan lâi kiâⁿ.

9

Góa ê lô͘-po̍k beh tùi Lī-pa-lùn ūn i lo̍h-hái, góa beh ká kui-pâi phû tī hái--nih, kàu lí só͘ kā góa tiāⁿ-tio̍h ê só͘-chāi; góa beh tī-hia thiah-khui; lí thang chiap-siu; lí ēng chia̍h-mı̍h hō͘ góa ê ke, chiâⁿ góa ê sim-gōan.

10

Hi-lân chiū ēng pek-hiuⁿ-chhâ kap siông-chhiū ê chhâ hō͘ Só͘-lô-bûn chiàu i it-chhè só͘-ài--ê.

11

Só͘-lô-bûn hō͘ Hi-lân nn̄g-bān ko-jíⁿ ê sió-be̍h; jī-cha̍p ko-jíⁿ ê chheng-iû, chòe i ke-lāi ê chia̍h-mı̍h. Só͘-lô-bûn ta̍k-nî chiàu án-ni hō͘ Hi-lân.

12

Iâ-hô-hoa chiàu I só͘ èng-ún--ê, siúⁿ-sù tì-hūi hō͘ Só͘-lô-bûn. Hi-lân kap Só͘-lô-bûn ê tiong-kan ū hô-pêng; in nn̄g-lâng saⁿ-kap lı̍p-iok.

13

Só͘-lô-bûn ông tùi Í-sek-lia̍t chèng-lâng ê tiong-kan, phài lâng-kang; só͘ phài ê lâng-kang kiōng saⁿ-bān.

14

Ta̍k-ge̍h-jı̍t lûn-liû phài chı̍t-bān lâng kàu Lī-pa-lùn; in chı̍t-ge̍h-jı̍t tī Lī-pa-lùn, nn̄g ge̍h-jı̍t tī ke-lāi; A-to-nî-lân chòe tok-kang--ê.

15

Só͘-lô-bûn ū thiau-hu chhit-bān; poeh-bān lâng tī soaⁿ--nih phah-chio̍h.

16

Chiah-ê í-gōa Só͘-lô-bûn ū ēng tok-kang ê tōa-koaⁿ saⁿ-chheng saⁿ-pah lâng; in kam(**kàm)-tok hiah ê chòe-kang ê lâng.

17

Ông chhut-lēng, in chiū ūn tōa-chio̍h, pó-pòe ê chio̍h, ēng phah-hó ê chio̍h lâi hē chhù ê tōe-ki.

18

Só͘-lô-bûn ê sai-hū, kap Hi-lân ê sai-hū, kap Ka-pa-le̍k lâng, lóng phah-chio̍h, pī-pān chhâ-liāu kap chio̍h, lâi khí tiān-chhù.