Sat-bó͘-jíⁿ siōng-kòan 第 10 章 - 巴克禮全羅

1

Sat-bó͘-jíⁿ the̍h chı̍t pân iû, tò tī Sò-lô ê thâu-khak, kā i chim, kóng, Che kiám m̄-sī Iâ-hô-hoa boah lí chòe I ê gia̍p ê thâu-lâng mah?

2

Kin-á-jı̍t lí lī-khui góa liáu-āu, tī Piān-ngá-bín kau-kài ê Siat-sat, kūn La̍h-kiat ê bōng, beh tú-tio̍h nn̄g-lâng; in beh kā lí kóng, Lí khì chhē hiah ê lû-bú, í-keng chhē-tio̍h; taⁿ lí ê lāu-pē bô teh khòa-lū lû, sī teh hôan-ló lí, kóng, Góa ūi-tio̍h góa ê kiáⁿ beh cháiⁿ-iūⁿ ah?

3

Lí beh tùi-hia khì, kàu Tha-po̍k ê siōng-chhiū hia, beh ū saⁿ-lâng tú-tio̍h lí, in sī beh khì Pek-te̍k-lī kàu Siōng-tè hia, chı̍t-ê tòa saⁿ chiah soaⁿ-iûⁿ-á, chı̍t-ê tòa saⁿ ê piáⁿ, chı̍t-ê tòa chı̍t phê-tē ê chiú;

4

in beh mn̄g lí pêng-an, ēng nn̄g ê piáⁿ hō͘ lí; lí chiū tùi in ê chhiú chih-lâi.

5

Chit-tia̍p liáu-āu lí beh kàu Siōng-tè ê soaⁿ, tī-hia ū Hui-lī-sū lâng hông-siú ê peng; lí kàu siâⁿ ê sî, beh tú-tio̍h chı̍t tīn sian-ti tùi kôaiⁿ ê só͘-chāi lo̍h-lâi; tī in ê thâu-chêng ū sek, ū lin-long-kó͘, ū ta̍t-á, ū khîm; in lóng kóng sian-ti ōe.

6

Iâ-hô-hoa ê Sîn beh tōa-tōa lîm-kàu lí, lí iā beh kap in kóng sian-ti ōe, lí beh piàn-chòe sin ê lâng.

7

Chiah ê tiāu-thâu lîm-kàu lí, lí tio̍h thàn ki-hōe lâi chòe, in-ūi Siōng-tè kap lí tī-teh.

8

Lí tio̍h tāi-seng góa lo̍h-khì Kiat-kah, góa iā beh lo̍h-khì lí hia, hiàn sio-chè kap siā-un-chè; lí tio̍h thèng-hāu chhit-jı̍t, thèng-hāu góa kàu lí hia, chí-sī lí tio̍h kiâⁿ ê sū.

9

I o̍at-tńg-sin beh lī-khui Sat-bó͘-jíⁿ, Siōng-tè ōaⁿ-sin i ê sim; tng hit-jı̍t chiah ê tiāu-thâu lóng èng-giām.

10

In í-keng kàu hit ê soaⁿ, ū chı̍t tīn sian-ti-lâng tú-tio̍h i; Siōng-tè ê Sîn tōa-tōa lîm-kàu Sò-lô, i chiū tī in tiong-kan kóng sian-ti ōe.

11

Pêng-sò͘ bat i ê lâng, khòaⁿ i tī sian-ti-tiong teh kóng sian-ti ōe, chiū saⁿ-kap kóng, Ki-sū ê kiáⁿ tú-tio̍h án-ni sī cháiⁿ-iūⁿ? Sò-lô iā lia̍t tī sian-ti-tiong mah?

12

Hit só͘-chāi ū chı̍t lâng ìn kóng, Hiah ê lâng ê lāu-pē sī chī-chūi ah? Tùi án-ni ū chı̍t-kù sio̍k-gú kóng, Sò-lô iā lia̍t tī sian-ti-tiong mah?

13

Sò-lô kóng sian-ti ōe bêng-pe̍k, chiū chiūⁿ-khì kôaiⁿ ê só͘-chāi.

14

Sò-lô ê chek mn̄g Sò-lô kap i ê lô͘-po̍k kóng, Lín khì toh-lo̍h? Ìn kóng, Khì chhē lû-bú; chhē i bô, chiū khì Sat-bó͘-jíⁿ hia.

15

Sò-lô ê chek kóng, Chhiáⁿ lí kā góa kóng, Sat-bó͘-jíⁿ kā lín kóng sím-mı̍h.

16

Sò-lô kā i ê chek kóng, I bêng-bêng kā góan kóng lû-bú í-keng chhē-tio̍h lah. Lūn-kàu Sat-bó͘-jíⁿ só͘ kóng kok ê sū, i bô kā i kóng.

17

Sat-bó͘-jíⁿ chio-chı̍p peh-sìⁿ kàu Bí-su-pa Iâ-hô-hoa hia;

18

kā Í-sek-lia̍t lâng kóng, Iâ-hô-hoa Í-sek-lia̍t ê Siōng-tè án-ni kóng, Góa chhōa Í-sek-lia̍t chhut Ai-kı̍p, kiù lín thoat-lī Ai-kı̍p lâng ê chhiú, iā thoat-lī lóng-chóng hiah ê chè-ap lín kok ê chhiú.

19

Chóng-sī lín kin-á-jı̍t ū khì-sak lín ê Siōng-tè, chiū-sī pún-sin kiù lín thoat-lī it-chhè hōan-lān kan-khó͘ ê; lín iā tùi I kóng, tio̍h siat-lı̍p ông kóan-lí góan. Taⁿ lín tio̍h chiàu lín ê chi-phài, lín ê chong-cho̍k, lâi khiā tī Iâ-hô-hoa ê bīn-chêng.

20

Tùi án-ni Sat-bó͘-jíⁿ hō͘ Í-sek-lia̍t chèng chi-phài kūn-chêng lâi, chiū chhú-tio̍h Piān-ngá-bín ê chi-phài;

21

koh hō͘ Piān-ngá-bín ê chi-phài chiàu in ê chong-cho̍k kūn-chêng lâi, chiū chhú-tio̍h Má-te̍k-lī cho̍k; tùi hit tiong-kan koh chhú-tio̍h Ki-sū ê kiáⁿ Sò-lô; lâng chhē i, iā chhē-bōe-tio̍h.

22

Só͘-í chiū koh mn̄g Iâ-hô-hoa kóng, Hit-lâng ū lâi chia á-bē? Iâ-hô-hoa kóng, I bih tī cha̍p-mı̍h ê tiong-kan.

23

In chiū cháu-khì, tùi-hia chhōa i chhut-lâi; i khiā tī peh-sìⁿ ê tiong-kan, pí chèng peh-sìⁿ khah kôaiⁿ chı̍t ê thâu-khak.

24

Sat-bó͘-jíⁿ kā chèng peh-sìⁿ kóng, Iâ-hô-hoa só͘ kéng ê lâng, tī peh-sìⁿ-tiong bô chı̍t-ê ōe pí-tit i, lín khòaⁿ-kìⁿ mah? Chèng peh-sìⁿ chiū tōa-siaⁿ kiò kóng, Gōan ông bān-sòe.

25

Sat-bó͘-jíⁿ chiong kok-hoat tùi peh-sìⁿ kóng-bêng, koh kì tī chheh-nih, hē tī Iâ-hô-hoa ê bīn-chêng; jiân-āu Sat-bó͘-jíⁿ sì-sòaⁿ chèng-lâng, ta̍k-ê tò-khì in ê ke.

26

Sò-lô iā tò-khì Ki-pí-a, kàu i ê ke; ū chı̍t tīn lâng, hō͘ Siōng-tè kám-tōng i ê sim ê, tè i khì.

27

Hiah ê húi-lūi kóng, Chit-lâng thái ōe kiù lán ah? Chiū biáu-sī Sò-lô, bô sàng i lé-mı̍h; chóng-sī Sò-lô chēng-chēng.