Sat-bó͘-jíⁿ siōng-kòan 第 11 章 - 巴克禮全羅

1

A-bûn lâng Ná-hat chiūⁿ-kàu Ki-lia̍t ê Ngá-pí, chat-iâⁿ beh kong-kek i; Ngá-pí ê chèng-lâng kā Ná-hat kóng, Lí kap góan lı̍p-iok, góan chiū beh ho̍k-sāi lí.

2

A-bûn lâng Ná-hat ìn kóng, Góa kap lín lı̍p-iok, tio̍h án-ni, chiū-sī iah lín chèng-lâng ê chiàⁿ-ba̍k, góa thang ēng chit-ê lâi lêng-jio̍k Í-sek-lia̍t lâng.

3

Ngá-pí ê tiúⁿ-ló kā i kóng, Kiû lí khoan-iông góan chhit-jı̍t, hō͘ góan chhe lâng khì Í-sek-lia̍t ê chôan-kéng; nā bô lâng kiù góan, góan chiū chhut-lâi chiū lí.

4

Só͘ chhe ê lâng kàu Sò-lô ê Ki-pí-a, chiong chiah ê ōe kóng hō͘ peh-sìⁿ thiaⁿ; peh-sìⁿ chiū lóng khui-siaⁿ háu.

5

Sò-lô tú-tn̄g tùi chhân-nih kóaⁿ-gû tò-lâi; Sò-lô kóng, Peh-sìⁿ ūi siáⁿ-sū thî-khàu? In chiū chiong Ngá-pí lâng ê ōe kā i kóng.

6

Sò-lô thiaⁿ-kìⁿ chiah ê ōe, Siōng-tè ê Sîn tōa-tōa kám-tōng i; i tōa siū-khì.

7

I chiū chiong chı̍t tùi gû chhiat chı̍t-tè chı̍t-tè, kau-tài sù-chiá sàng kàu Í-sek-lia̍t ê chôan-kéng, kóng, Kìⁿ-nā bô chhut-lâi kun-tè Sò-lô kap Sat-bó͘-jíⁿ ê, iā beh án-ni khóan-thāi i ê gû. Iâ-hô-hoa hō͘ peh-sìⁿ kiaⁿ, in chiū lóng chhut-lâi chhin-chhiūⁿ chı̍t-lâng.

8

Tī Pí-sek tiám-sǹg hiah ê lâng; Í-sek-lia̍t lâng ū saⁿ-cha̍p-bān, Iû-tāi lâng ū saⁿ-bān.

9

In kā só͘ chhe ê lâng kóng, Lín tio̍h án-ni hê-hok Ki-lia̍t ê Ngá-pí lâng, kóng, Bîn-á-jı̍t chiong-kūn tiong-tàu ê sî, lín beh tit-tio̍h chín-kiù; só͘ chhe ê lâng tò-khì kā Ngá-pí lâng kóng, in chiū hoaⁿ-hí.

10

Ngá-pí lâng chiū kā A-bûn lâng kóng, Bîn-á-jı̍t góan beh chhut-lâi chiū lín, lín thang chhut-chāi ì-sù khóan-thāi góan.

11

Keh-jı̍t Sò-lô pun peh-sìⁿ chòe saⁿ-tūi, tī gō͘-kiⁿ-chá ê sî, jı̍p A-bûn lâng ê kun-iâⁿ, phah-sí in kàu jı̍t beh tàu; só͘ chhun ê lâng lóng cháu sì-sòaⁿ, bô nn̄g-lâng saⁿ-kap tòa chı̍t-ūi.

12

Peh-sìⁿ kā Sat-bó͘-jíⁿ kóng, Hit-ê kóng, Sò-lô kiám ōe kóan-hat lán-ê sī chī-chūi ah? Tio̍h lia̍h hiah ê lâng chhut-lâi, góan beh thâi-sí i.

13

Sò-lô kóng, Kin-á-jı̍t chı̍t-lâng iā m̄-thang thâi-sí; in-ūi kin-á-jı̍t Iâ-hô-hoa chín-kiù Í-sek-lia̍t.

14

Sat-bó͘-jíⁿ kā peh-sìⁿ kóng, Lâi ah, lán lâi khì Kiat-kah, tī-hia têng-chài kiàn-lı̍p kok.

15

Chèng peh-sìⁿ chiū khì Kiat-kah; tī Kiat-kah tng Iâ-hô-hoa ê bīn-chêng siat-lı̍p Sò-lô chòe-ông; in tī-hia hiàn siā-un-chè tī Iâ-hô-hoa ê bīn-chêng. Sò-lô kap Í-sek-lia̍t chèng-lâng tōa-tōa hoaⁿ-hí.