Sat-bó͘-jíⁿ siōng-kòan 第 12 章 - 巴克禮全羅

1

Sat-bó͘-jíⁿ kā Í-sek-lia̍t chèng-lâng kóng, Kìⁿ-nā lín tùi góa só͘ kóng ê ōe, góa lóng ū thiaⁿ-kìⁿ, siat-lı̍p chı̍t ê ông kóan lín.

2

Khòaⁿ ah, taⁿ ū chı̍t ê ông kiâⁿ tī lín ê bīn-chêng; góa í-keng lāu, thâu-mn̂g pe̍h; góa ê kiáⁿ lóng tī lín chia; góa tùi siàu-liân kàu-taⁿ, lóng kiâⁿ tī lín ê bīn-chêng.

3

Góa tī-chia, lín tio̍h tī Iâ-hô-hoa ê bīn-chêng kap I só͘ boah-iû-ê ê bīn-chêng, kā góa chòe kan-chèng; góa ū khan chī-chūi ê gû? khan chī-chūi ê lû? khi-hū chī-chūi? ap-chè chī-chūi? tùi chī-chūi ê chhiú siū pò͘-lō͘, tì-kàu jia góa ê ba̍k-chiu? nā ū, góa beh hêng lín.

4

In kóng, Lí m̄-bat khi-hū góan, m̄-bat ap-chè góan, iā m̄-bat tùi lâng ê chhiú the̍h sím-mı̍h mı̍h.

5

I kā in kóng, Lín tī góa ê chhiú bô chhē-tio̍h sím-mı̍h mı̍h, kin-á-jı̍t Iâ-hô-hoa tùi lín chòe kan-chèng, I só͘ boah-iû-ê, iā chòe kan-chèng; in kóng, I chòe kan-chèng.

6

Sat-bó͘-jíⁿ kā peh-sìⁿ kóng, Chêng siat-lı̍p Mô͘-se A-lûn-ê, chhōa lín ê lia̍t-chó͘ chhut Ai-kı̍p-ê, sī Iâ-hô-hoa.

7

Taⁿ lín tio̍h khiā-teh, góa beh tī Iâ-hô-hoa ê bīn-chêng kap lín piān-lūn Iâ-hô-hoa tùi lín kap lín ê lia̍t-chó͘ só͘ kiâⁿ it-chhè kong-gī ê sū.

8

Chêng Ngá-kok kàu Ai-kı̍p, iā lín ê lia̍t-chó͘ kiû-kiò Iâ-hô-hoa, hit-sî Iâ-hô-hoa chiū chhe Mô͘-se A-lûn chhōa lín ê lia̍t-chó͘ chhut Ai-kı̍p, hō͘ in khiā-khí tī chit ê só͘-chāi.

9

Chóng-sī in bōe-kì-tit Iâ-hô-hoa in ê Siōng-tè, I chiū bōe in hō͘ Hā-só ê kun-tiúⁿ Se-se-la̍h ê chhiú, kap Hui-lī-sū lâng ê chhiú, kap Mô͘-ap ông ê chhiú, tì-kàu hiah ê lâng lâi kong-kek in.

10

In kiû-kiò Iâ-hô-hoa kóng, Góan ū-chōe lah, in-ūi góan ū lī-khui Iâ-hô-hoa, khì ho̍k-sāi Pa-le̍k kap A-su-tha-lio̍k; taⁿ kiû Lí kiù góan thoat-lī góan ê tùi-te̍k ê chhiú, góan beh ho̍k-sāi Lí.

11

Iâ-hô-hoa chiū chhe Iâ-lō͘-pa-le̍k, Pí-tàn, Iâ-hut-tha, Sat-bó͘-jíⁿ, kiù lín thoat-lī sì-ûi ê tùi-te̍k ê chhiú, lín chiah pêng-an khiā-khí.

12

Lín khòaⁿ-kìⁿ A-bûn lâng ê ông Ná-hat lâi kong-kek lín, chiū tùi góa kóng, M̄-ah, góan tiāⁿ-tio̍h beh chı̍t ê ông kóan-lí góan; kî-sı̍t Iâ-hô-hoa lín ê Siōng-tè sī lín ê ông.

13

Taⁿ khòaⁿ lín só͘ kéng só͘ kiû ê ông tī-chia; khòaⁿ ah, Iâ-hô-hoa í-keng siat-lı̍p ông kóan lín.

14

Lín nā kèng-ùi Iâ-hô-hoa, ho̍k-sāi I, thiaⁿ I ê ōe, bô ûi-pōe Iâ-hô-hoa ê bēng-lēng, lín kap kóan-hat lín ê ông iā sūn-thàn Iâ-hô-hoa lín ê Siōng-tè chiū hó.

15

Siat-sú lín m̄ thiaⁿ-thàn Iâ-hô-hoa ê ōe, ûi-pōe Iâ-hô-hoa ê bēng-lēng, Iâ-hô-hoa ê chhiú beh kong-kek lín, chhin-chhiūⁿ chêng kong-kek lín ê chó͘-kong chı̍t-iūⁿ.

16

Taⁿ lín tio̍h khiā-teh, lâi khòaⁿ Iâ-hô-hoa tī Lín ê ba̍k-chiu-chêng só͘ beh kiâⁿ ê tōa-sū.

17

Kin-á-jı̍t kiám m̄-sī koah sió-be̍h ê sî mah? Góa kiû Iâ-hô-hoa, I beh khí-lûi lo̍h-hō͘; hō͘ lín iā chai iā khòaⁿ-chhut, lín ūi ka-kī kiû siat-lı̍p ông ê sū, sī tī Iâ-hô-hoa ê bīn-chêng só͘ hōan ê chōe chin-tōa.

18

Tùi án-ni Sat-bó͘-jíⁿ kiû-kiò Iâ-hô-hoa; Iâ-hô-hoa chiū tī chit-jı̍t khí-lûi lo̍h-hō͘; chèng peh-sìⁿ chiū chin kiaⁿ Iâ-hô-hoa kap Sat-bó͘-jíⁿ.

19

Chèng peh-sìⁿ kā Sat-bó͘-jíⁿ kóng, Kiû lí thòe lí chiah ê lô͘-po̍k kiû Iâ-hô-hoa lí ê Siōng-tè, bián-tit góan sí-bô; in-ūi góan ūi ka-kī kiû chı̍t ê ông, chin-chiàⁿ sī ke-thiⁿ chōe tī chōe ê téng-bīn.

20

Sat-bó͘-jíⁿ kā peh-sìⁿ kóng, Bo̍h-tit kiaⁿ, lín sui-jiân kiâⁿ chit ê pháiⁿ, chóng-sī m̄-thang phian-lī bô-tè Iâ-hô-hoa; to̍k-to̍k tio̍h chīn-sim ho̍k-sāi Iâ-hô-hoa;

21

m̄-thang phian-lī, in-ūi phian-lī chiū-sī thàn hu-ké ê mı̍h, bô lī-ek, iā bô chín-kiù-ê, in-ūi in sī hu-ké.

22

Iâ-hô-hoa ūi-tio̍h ka-kī ê tōa-miâ tek-khak bô khì-sak I ê peh-sìⁿ; in-ūi Iâ-hô-hoa hoaⁿ-hí ēng lín chòe I ê peh-sìⁿ.

23

Lūn-kàu góa thòe lín kî-tó, koat-tòan bô thêng-soah, tì-kàu tek-chōe Iâ-hô-hoa; góa beh ēng hó koh chèng-tı̍t ê lō͘ chí-sī lín.

24

To̍k-to̍k lín tio̍h kèng-ùi Iâ-hô-hoa, sêng-sim sı̍t-ì ho̍k-sāi I; in-ūi lín tio̍h siàu-liām I ūi lín só͘ kiâⁿ ê sū cháiⁿ-iūⁿ ê tōa.

25

Lín nā iû-gôan chòe-pháiⁿ, lín kap lín ê ông beh chòe chı̍t-ē bia̍t-bô.