Sat-bó͘-jíⁿ siōng-kòan 第 17 章 - 巴克禮全羅

1

Hui-lī-sū lâng chū-chı̍p in ê kun-peng, beh kau-chiàn, chū-chı̍p tī sio̍k Iû-tāi ê So-ko; chat-iâⁿ tī Í-hut-tāi-bín, tī So-ko kap A-se-ka ê tiong-kan.

2

Sò-lô kap Í-sek-lia̍t lâng iā chū-chı̍p, chat-iâⁿ tī Í-la̍h ê soaⁿ-kok, pâi tūi-ngó͘ tí-te̍k Hui-lī-sū lâng.

3

Hui-lī-sū lâng khiā tī chit-pêng ê soaⁿ, Í-sek-lia̍t lâng khiā tī hit-pêng ê soaⁿ, tiong-kan ū soaⁿ-kok.

4

Tùi Hui-lī-sū ê iâⁿ-tiong ū chı̍t ê chiàn-chiòng chhut-lâi, miâ kiò Ko-lī-à, sī Ka-te̍k lâng, seng-khu kôaiⁿ la̍k-tiú koh chı̍t-lia̍h;

5

thâu tì tâng-khoe, sin chhēng ū lân ê chiàn-kah, i-ê chiàn-kah ê tâng, ū gō͘-chheng sià-khek-le̍k ê tāng;

6

tōa-thúi chhēng tâng-kûn, keng-thâu tiong pē tâng ê kek;

7

chhiuⁿ-pìⁿ tōa chhin-chhiūⁿ pò͘-ki ê te̍k-sim; chhiuⁿ-bé ê thih ū la̍k-pah sià-khek-le̍k ê tāng; ū chı̍t ê kōaⁿ tîn-pâi-ê kiâⁿ tī i ê thâu-chêng.

8

I khiā-teh tùi Í-sek-lia̍t ê kun-tūi hoah, kā in kóng, Lín chhut-lâi pâi tūi-ngó͘ beh siáⁿ-sū ah? góa kiám m̄-sī Hui-lī-sū lâng, lín kiám m̄-sī Sò-lô ê lô͘-po̍k mah? Lín tiong-kan kéng chı̍t-lâng, hō͘ i lo̍h-lâi góa chia;

9

i nā ōe kap góa saⁿ-thâi, thâi-sí góa, góan chiū beh chòe lín ê lô͘-châi; góa nā khah-iâⁿ i, thâi-sí i, lín chiū beh chòe góan ê lô͘-châi, ho̍k-sāi góan.

10

Hit ê Hui-lī-sū lâng koh kóng, Góa kin-á-jı̍t biáu-sī Í-sek-lia̍t chiah ê kun-tūi; lín kiò chı̍t-lâng chhut-lâi, kap góa saⁿ-thâi.

11

Sò-lô kap Í-sek-lia̍t chèng-lâng thiaⁿ-kìⁿ Hui-lī-sū lâng chiah ê ōe, chiū chin lún, chin kiaⁿ.

12

Tāi-pı̍t sī Iû-tāi Pek-lī-hêng ê Í-hoat-tha lâng Iâ-se ê kiáⁿ. Iâ-se ū poeh ê kiáⁿ; tng Sò-lô ê sî, Iâ-se nî-hè chōe, tī lâng ê tiong-kan sǹg sī lāu-lâng.

13

Iâ-se hiah ê kiáⁿ, saⁿ-ê khah sī-tōa-ê tè Sò-lô khì chhut-cheng; khì chhut-cheng hit saⁿ ê kiáⁿ, tōa-ê miâ Í-lī-ap, tē-jī A-pí-ná-ta̍t, tē-saⁿ-ê Sa-má.

14

Tāi-pı̍t sī tē-it-sòe ê; hit saⁿ ê khah sī-tōa-ê kun-tè Sò-lô.

15

Tāi-pı̍t óng-lâi tī Sò-lô ê só͘-chāi, tī Pek-lī-hêng chhī i ê lāu-pē ê iûⁿ.

16

Hit ê Hui-lī-sū lâng chá-àm chhut-lâi khiā-teh tián, le̍k-kè sì-cha̍p jı̍t.

17

Iâ-se kā i ê kiáⁿ Tāi-pı̍t kóng, Lí tio̍h kā lí hiah ê hiaⁿ tòa hang ê gō͘-kak chı̍t i-hoat, kap chí cha̍p ê piáⁿ, kín-kín khì kun-iâⁿ, hō͘ lí hiah ê hiaⁿ;

18

koh tòa chí cha̍p ê gû-lin-piáⁿ, sàng hō͘ in ê chhian-chóng, koh mn̄g lí ê hiaⁿ pêng-an bô, tòa i ê chèng-kù lâi.

19

Sò-lô kap Tāi-pı̍t saⁿ ê hiaⁿ, kap Í-sek-lia̍t chèng-lâng, tī Í-la̍h ê soaⁿ-kok, kap Hui-lī-sū lâng kau-chiàn.

20

Tāi-pı̍t thàu-chá khí-lâi, ēng iûⁿ-kûn pàng kau chı̍t ê kò͘-siú ê lâng, chiàu Iâ-se só͘ bēng-lēng i ê, tòa chia̍h-mı̍h khì kàu pâi-lia̍t chhia ê só͘-chāi; kun-peng tú-á chhut-khì kàu chiàn-tiûⁿ, hoah beh kau-chiàn.

21

Í-sek-lia̍t lâng kap Hui-lī-sū lâng lóng pâi-lia̍t tūi-ngó͘, lióng-pêng ê kun-tūi saⁿ-tùi.

22

Tāi-pı̍t ēng mı̍h-kiāⁿ kau-tài kò͘ mı̍h-kiāⁿ ê lâng ê chhiú, cháu kàu chiàn-tiûⁿ, chhéng-an i ê hiaⁿ.

23

Kap in kóng-ōe ê sî, khòaⁿ ah, hit ê chiàn-chiòng, chiū-sī Ka-te̍k ê Hui-lī-sū lâng, miâ Ko-lī-à, tùi Hui-lī-sū ê tūi-ngó͘ chhut-lâi, chiàu chêng só͘-kóng-ê lâi kóng; Tāi-pı̍t thiaⁿ-kìⁿ.

24

Í-sek-lia̍t chèng-lâng khòaⁿ-kìⁿ hit-lâng chiū cháu siám i, chīn-chāi kiaⁿ.

25

Í-sek-lia̍t lâng kóng, Chit-ê chiūⁿ-lâi ê lâng, lí ū khòaⁿ-kìⁿ mah? I chiūⁿ-lâi, sī beh biáu-sī Í-sek-lia̍t; nā ū lâng ōe thâi-sí i, ông beh hō͘ i tōa hó-gia̍h, chiong i ê cha-bó͘-kiáⁿ kè i, koh hō͘ i lāu-pē chı̍t-ke tī Í-sek-lia̍t tiong bián la̍p-sè tng-chhe.

26

Tāi-pı̍t mn̄g khiā tī i sin-piⁿ hiah ê lâng, Ū lâng thâi-sí chit ê Hui-lī-sū lâng, sóe-tû Í-sek-lia̍t ê kiàn-siàu, beh cháiⁿ-iūⁿ khóan-thāi i ah? chit-ê bô siū kat-lé ê Hui-lī-sū lâng sī chī-chūi, káⁿ biáu-sī éng-o̍ah Siōng-tè ê kun-tūi mah?

27

Peh-sìⁿ chiàu chêng ê ōe ìn i, kóng, Nā ū lâng ōe thâi-sí chit-lâng, beh án-ni khóan-thāi i.

28

Tāi-pı̍t ê tōa-hiaⁿ Í-lī-ap thiaⁿ-kìⁿ i kap lâng teh kóng-ōe, Í-lī-ap siū-khì Tāi-pı̍t, kóng, Lí siáⁿ-sū lo̍h-lâi chia? hit kúi chiah iûⁿ tī khòng-iá-nih, lí pàng kau chī-chūi ah? góa chai lí kiau-ngō͘ kap lí sim-lāi ê pháiⁿ; lí lo̍h-lâi put-kò sī beh khòaⁿ kau-chiàn.

29

Tāi-pı̍t kóng, Góa ū chòe sím-mı̍h? kiám-sī bô in-toaⁿ mah?

30

Tāi-pı̍t chiū lī-khui i, khì ǹg pa̍t-lâng, chiàu chêng ê ōe teh mn̄g; peh-sìⁿ chiàu chêng ê ōe lâi ìn i.

31

Tāi-pı̍t só͘ kóng ê ōe í-keng hō͘ lâng thiaⁿ-kìⁿ, in chiū kóng tī Sò-lô ê bīn-chêng; Sò-lô chiū chhe lâng kiò i lâi.

32

Tāi-pı̍t kā Sò-lô kóng, Lâng m̄-bián ūi-tio̍h hit-lâng lâi sit-táⁿ, lí ê lô͘-po̍k beh khì kap hit ê Hui-lī-sū lâng kau-chiàn.

33

Sò-lô tùi Tāi-pı̍t kóng, Lí bōe-ōe khì tí-te̍k chit ê Hui-lī-sū lâng, kap i kau-chiàn; in-ūi lí ê nî-hè iáu-kú chió, i tùi siàu-liân chiū ha̍k-sı̍p chiàn-sū.

34

Tāi-pı̍t kā Sò-lô kóng, Lí ê lô͘-po̍k kā lāu-pē kò͘-iûⁿ ê sî, ū sai á-sī hîm lâi, tùi iûⁿ-kûn-tiong kā iûⁿ-á khì;

35

góa chiū jip i, phah i, kiù iûⁿ-á chhut i ê chhùi; i khí-lâi beh kāng góa, góa chiū khiú i ê chhùi-ē-táu, phah-sí i.

36

Lí ê lô͘-po̍k bat phah-sí sai kap hîm; chit-ê bô siū kat-lé ê Hui-lī-sū lâng, iā beh chhin-chhiūⁿ in ê chı̍t-chiah; in-ūi i biáu-sī éng-o̍ah Siōng-tè ê kun-tūi.

37

Tāi-pı̍t koh kóng, Iâ-hô-hoa kiù góa thoat-lī sai ê jiáu kap hîm ê jiáu, I iā beh kiù góa thoat-lī chit ê Hui-lī-sū lâng ê chhiú. Sò-lô kā Tāi-pı̍t kóng, Lí khì ah, Iâ-hô-hoa beh kap lí tī-teh.

38

Sò-lô chiū ēng i ê kun-ho̍k hō͘ Tāi-pı̍t chhēng, ēng tâng ê thâu-khoe hō͘ i tì, koh hō͘ i chhēng chiàn-kah.

39

Tāi-pı̍t ēng to hâ tī kun-ho̍k, chhì kiâⁿ-khòaⁿ cheh; in-ūi m̄-bat chhēng-tio̍h. Tāi-pı̍t kā Sò-lô kóng, Chhēng chiah-ê góa kiâⁿ bōe khì, in-ūi m̄-bat chhēng-tio̍h.

40

Tāi-pı̍t chiū thǹg-khí-lâi; i chhiú kia̍h kóaiⁿ-á, koh tī soaⁿ-khiⁿ-á kéng gō͘-tè kng-ku̍t ê chio̍h-nn̄g, hē tī tē-á, chiū-sī kò͘-iûⁿ ê lâng só͘ tòa ê lông; chhiú the̍h hìⁿ-chio̍h ê soh-á; chiū kiâⁿ-óa hit ê Hui-lī-sū lâng.

41

Hit ê Hui-lī-sū lâng iā ná kiâⁿ-óa Tāi-pı̍t, kōaⁿ-pâi-ê kiâⁿ tī i ê thâu-chêng.

42

Hit ê Hui-lī-sū lâng kia̍h khí-lâi khòaⁿ, khòaⁿ-kìⁿ Tāi-pı̍t, chiū khòaⁿ-khin i; in-ūi i chió hè, sek-tī chhiah, bīn-māu hó-khòaⁿ.

43

Hit ê Hui-lī-sū lâng kā Tāi-pı̍t kóng, Góa kiám-sī káu mah, lí chiah kia̍h kóaiⁿ-á lâi góa chia? Hui-lī-sū lâng chiū kí ka-kī ê siōng-tè, chiù-chó͘ Tāi-pı̍t.

44

Hit ê Hui-lī-sū lâng koh kā Tāi-pı̍t kóng, Lí lâi góa chia, góa beh ēng lí ê bah hō͘ khong-tiong ê pe-chiáu kap chhân-iá ê iá-siù.

45

Tāi-pı̍t tùi hit ê Hui-lī-sū lâng kóng, Lí lâi óa-kūn góa, sī ēng to, ēng chhiuⁿ, ēng kek; góa lâi óa-kūn lí, sī ēng bān-kun Iâ-hô-hoa ê miâ, Í-sek-lia̍t kun-tūi ê Siōng-tè, chiū-sī lí só͘ biáu-sī-ê.

46

Kin-á-jı̍t Iâ-hô-hoa beh chiong lí kau tī góa ê chhiú, góa beh phah-sí lí, thâi lí ê thâu-khak; kin-á-jı̍t góa beh chiong Hui-lī-sū kun-peng ê sin-si, hō͘ khong-tiong ê pe-chiáu, tōe-chiūⁿ ê iá-siù; hō͘ phó͘-thiⁿ-ē ê lâng lóng chai Í-sek-lia̍t ū Siōng-tè;

47

koh hō͘ chiah ê kui-kûn ê lâng chai Iâ-hô-hoa kiù lâng, m̄-sī ēng to, iā m̄-sī ēng chhiuⁿ; in-ūi kau-chiàn ê sū chāi-tī Iâ-hô-hoa, I beh chiong lín kau tī góan ê chhiú.

48

Hit ê Hui-lī-sū lâng khí-lâi, chìn-chêng kūn-óa beh chih Tāi-pı̍t. Tāi-pı̍t iā kóaⁿ-kín cháu-khì, ǹg kun-tūi beh chih Hui-lī-sū lâng.

49

Tāi-pı̍t chhun-chhiú jı̍p tē-á-lāi, the̍h chı̍t tè chio̍h-á chhut-lâi, ēng soh hìⁿ-khì, siā-tio̍h Hui-lī-sū lâng ê thâu-hia̍h, chio̍h-á tîm jı̍p thâu-hia̍h; i chiū tó-lo̍h-khì, bīn phak tī tōe-nih.

50

Án-ni Tāi-pı̍t ēng hìⁿ-soh kap chio̍h-á khah-iâⁿ Hui-lī-sū lâng, phah-sí i; chóng-sī Tāi-pı̍t ê chhiú bô to.

51

Tāi-pı̍t kín-kín cháu-khì, khiā tī hit ê Hui-lī-sū lâng ê téng-bīn, chiong i ê to pu̍ih chhut-siù; ēng hit-ki thâi-sí i, chám i ê thâu-khak. Hui-lī-sū chèng-lâng khòaⁿ-kìⁿ in ê ióng-sū í-keng sí, chiū cháu.

52

Í-sek-lia̍t lâng kap Iû-tāi lâng chiū khí-lâi, hoah-hiàm, tui-jip Hui-lī-sū lâng, kàu Ka-í kap Í-kek-lûn ê siâⁿ-mn̂g; tio̍h-siong ê Hui-lī-sū lâng tó tī Sa-la̍h-im ê lō͘, tı̍t-kàu Ka-te̍k, kap Í-kek-lûn.

53

Í-sek-lia̍t lâng tui-jip Hui-lī-sū lâng tò-tńg-lâi, chiū chhiúⁿ in ê iâⁿ-pôaⁿ.

54

Tāi-pı̍t chiong hit ê Hui-lī-sū lâng ê thâu-khak, tòa kàu Iâ-lō͘-sat-léng; koh ēng i ê kun-khì hē tī ka-kī ê pò͘-pîⁿ.

55

Sò-lô khòaⁿ-kìⁿ Tāi-pı̍t khì phah Hui-lī-sū lâng ê sî, chiū mn̄g kun-tiúⁿ Ap-nî-jíⁿ kóng, Ap-nî-jíⁿ ah, hit ê siàu-liân lâng sī chī-chūi ê kiáⁿ? Ap-nî-jíⁿ kóng, Góa kí ông ê o̍ah-miā lâi chiù-chōa, góa m̄-chai.

56

Ông kóng, Lí khì mn̄g-khòaⁿ hit ê gín-ná sī chī-chūi ê kiáⁿ.

57

Tāi-pı̍t phah-sí Hui-lī-sū lâng tò-lâi, Ap-nî-jíⁿ chhōa i lâi Sò-lô ê bīn-chêng, i ê chhiú-nih ū Hui-lī-sū lâng ê thâu-khak.

58

Sò-lô mn̄g i kóng, Siàu-liân lâng ah, lí sī sím-mı̍h lâng ê kiáⁿ? Tāi-pı̍t kóng, Góa sī lí ê lô͘-po̍k Pek-lī-hêng lâng Iâ-se ê kiáⁿ.